ཚེར་མའི་སྙན་རྩོམ་ཁག་བཞི་བདམས་བཀོད།

ཀ་རྩོམ་དྲན་གསོའི་སྨན་མཆོག

   ཚེར་མ།༼མདོ་ལྷོ༽

འགྱུར་མེད་བསམ་བློ་ཀ་རྡོ་ལྟ་བུའི་སྤོབས།།
ལ་རྒྱའི་སྐད་ཆ་་ཁ་ཙམ་བཤད་པ་མིན།།
དཀའ་སྡུག་ཆེ་ཡང་ག་དུས་དུས་ནས་བཟུང།།
མུན་ཚང་འཇོམས་མཁན་ང་ཡི་སློབ་དཔོན་ལགས།།
ཅ་ཅོའི་འུར་གཏམ་ཆེན་པོར་མི་གཡེང་བར།།
ཆ་མེད་སློབ་དཔོན་དག་གི་དབུ་ཁྲིད་འོག།
ཉ་ཉོག་གཏམ་གྱི་ཁ་ལ་དགྲར་ལངས་ཏེ།།
མི་འགྱུར་རང་བཞིན་ཏན་ཏན་གཞུང་ལུགས་ཕྱོགས།།
ལེ་ལོ་སྒྱིད་ལུག་ཐ་མའི་སྤྱོད་པ་དག།
མི་མངོན་མཐའ་རུ་དྭྭ་ཕྲུག་བཞིན་དུ་སྤྱུགས།།
ལང་ཚོའི་གཟི་དཔལ་ན་ཚོད་གཞོན་པའི་དུས།།
པ་ཏྲ་ལྟ་བུའི་ཡུལ་གྲུར་འདོམས་འཇལ་ནས།།
ཕ་མཐའ་མེད་པའི་རང་གི་གཞུང་ལུགས་ལ།།
བག་ཕེབས་ངང་ནས་བརྩོན་པ་རྒྱུན་བཞིན་བསྟེན།།
མ་སྤུན་རང་གི་རིགས་ལ་ཞབས་འདེགས་མཁན།།
རྒྱ་གར་བལ་བོ་ཙ་རའི་གནས་དག་ན།།
ངན་སྨྲས་ཕྲག་དོག་ཚ་རྦབས་འཕྱུར་ན་ཡང་།།
རང་གི་དམ་ཚིག་ཛ་ཏིའི་ཤིང་བཞིན་དུ།།
ངལ་དུབ་དཀའ་སྡུག་ཝ་ལེར་མེད་པའི་ངང་།།
ཞ་ར་ཞ་བོའི་རྟུལ་ཞུགས་མ་གཟབ་པར།།
ཟ་མ་ངན་ངོན་ཕྱོགས་ལ་མ་གཟབ་པར།།
འ་ཅག་མི་རིགས་མདུན་སྐྱོད་ལམ་གྱི་ཆེད།།
ཡ་ཐོག་བཙན་་པོའི་སྐབས་ཀྱི་ལོ་རྒྱུས་དག
དག་གཙང་གནས་མཆོག་ར་རིས་མ་གོས་པའི།།
གངས་ལྗོངས་བཙན་པོའི་ཡུལ་ལ་རྟེན་དུ་ཕུལ།།
འགྱུར་མེད་དཔའ་སེམས་ཤ་སྟག་སྒོམ་ནས་ནི།།
མཛེས་པའི་ཡུལ་གྲུ་ས་ལའི་སྨན་ལྗོངས་ཕེབས།།
ཧ་ཅང་མུན་པས་ཁེངས་པའི་བཙན་པོའི་ཡུལ།།
ཨ་ལི་སུམ་ཅུའི་སྒྲོན་མེ་སྒྲོན་མཁན་པོ།།
སློབ་དཔོན་ཐོན་མིའི་ཞབས་ལ་ཕྱག་འཚལ་ལོ།།

2014/11.23

སྙིང་གཏམ་ཁ་ཚ་མ།

ཨ་མའི་ངག་ལས་བྱུང་བའི་སྙིང་གཏམ་ཏེ།།
ཧ་ཅང་བཙོག་གི་བསམ་ནས་མ་ཉན་པར།།
ས་མཐའི་གྲོང་བར་མྱུར་ལ་རྒྱ་སོགས།།
ཤ་རུས་མི་གཅིག་མི་བུ་འགའ་དང་ལྷན་དུ།།
ལང་ཤོར་ཐེའུ་རང་བཞིན་དུ་ཡར་མར་མྱུལ།།
ར་མ་ལུག་གི་སྤྱོད་པའི་རྒྱུན་བསྲིངས་ནས།།
ཡ་མ་བརླ་ཡིས་བྱ་བ་མང་བསྒྲུབསནས།།
འ་ཡོ་བཞིན་དུ་གཞན་གྱི་སྒོར་འགྲིམ་ནས།།
ཟ་འཕྲོད་འཐུང་འཕྲོད་ཕྱོགས་འབད་བཞིན་དུ།།
ཞ་ལུའི་དུས་ཀྱི་ན་ཚོད་གཞོན་པའི་དུས།།
ཝ་སྐྱེས་བཞིན་དུ་རང་ཉིད་འདི་ལྟར་བརླགས།།
ཛ་དྲག་ལྡན་པའི་ད་ལྟའི་དུས་རབས་འདིར།།
ཚ་ཁུ་འཐུང་བས་སྐོམ་པ་མི་སེལ་བཞིན།།
ཙག་ཙག་བྱ་བ་བསྒྲུབས་ན་དེ་བཞིན་ནོ།།
མ་ཅང་རྩེད་རིགས་ལ་སོགས་མི་གཡེང་བར།།
བ་རྒྱ་བཙན་པའི་སྤྱོད་པ་རིང་དོར་ནས།།
ཕ་མའི་གསུང་བ་ཛི་བཞིན་ལག་ལེན་དུ།།
པ་ཏྲ་ལྟ་བུའི་འཇིག་རྟེན་མི་ཡུལ་ནས།།
ན་སོ་གཞོན་དུས་རང་གི་མ་འོངས་བར།།
ད་ལྟ་མི་རིང་དུས་ཚོད་དང་ལེན་དུ།།
ཐང་ཆེན་མེད་པར་ངལ་བའི་ལས་ལ་བརྩོན།།
ཏ་ཀུ་འཛིན་པའི་དུས་ལ་སླེབས་དུས་སུ།།
ཉམ་ཐག་ལུས་ཕུང་གིས་ཀྱང་མིལྕོགས་པས།།
ཇ་ཆང་རོལ་བའི་བསམ་ཡོད་རུང་ཀྱང་།།
ཆ་རྐྱེན་མེད་པས་སནརང་གི་སྤྲང་བོ་བཞིན།།
ཅ་ཅོའི་གཏམ་མང་བཤད་ན་རྙོག་འགྲོ་བས།།
ང་ཡིས་འདི་ཙམ་བཤད་པས་ཆོག་པར་བྱ།།
ག་ལོག་རྫུན་གཏམ་ཙམ་ཡོད་མ་མཆིས།།
ཁ་ནས་བཤད་པ་ཙམ་གྱི་མི་ཆོག་པས།།
ཀ་ཡེ་སྤྱི་ཚོགས་སྟེང་གི་འཁྱམ་པའི་ཚོགས།།
རང་ལ་དལ་འབྱོར་མི་ལུས་ཐོབ་ཡོད་དུས།།
རང་གིས་རང་ཉིད་དེ་ལྟར་བརླག་མ་འཇོག།
རང་ཉིད་ཅེས་བའི་མིང་བྱང་སྐམ་པོ་ཡང་།།
རང་གཅེས་བསམ་བློ་བརྟན་པོ་ཡོད་མ་ཡིན།

༢༠༡༤ ༡༢ ༦།
མལ་ཁང་ནས།

ཀ་རྩོམ་ཁ་དཀར་སེམས་དཀར།

ཨ་མའི་མིང་བྱང་འཁུར་བའི་བུད་མེད་ཚོགས།།
ཧ་ཅང་སྡུག་བསྔལ་ཆེ་བའི་འཁོར་ངན་དུ།།
ས་རྐོ་རྡོ་སློག་བར་ནས་བརྣགས་འཛག་རུང་།།
ཤ་ཟད་རུས་ལ་མ་ཐུག་བར་དུ་ནི།།
ལ་ལུང་དཀྱོག་མཚམས་ཆེ་བའི་རི་ཀླུང་ཏུ།།
ར་མའི་ཚུལ་བཞིན་གཡང་གཟར་རི་ངོས་ན།།
ཡ་རེ་ཡོར་རེ་གཟུགས་པོརའཁྱར་འཁྱོར་ཏུ།།
འ་ཅག་མ་འོངས་འཚོ་བའི་ལོངས་སྤྱོད་ཆེད།།
ཟ་མཁས་འཐུང་མཁས་བྱས་ནས་ངལ་སྤྱོད་བྱེད།།
ཞ་ལུའི་དུས་ཀྱི་ལང་ཚོའི་མཚར་སྡུག་དེ།།
ཝ་མོའི་གཡོ་དང་སླད་ཀྱིས་མ་གོས་ཀྱང་།།
ཚ་གྲང་ཆེ་བའི་རི་ལུང་ཐང་གསུམ་དུ།།
ཙ་ན་ཡིན་ཡང་དུས་ཚོད་དམ་འཛིན་གྱིས།།
མ་འོངས་ལན་ཆགས་བུ་ངའི་མདུན་ལམ་སླད།།
བ་རྒྱའི་དྲ་བར་ཚུད་ཀྱང་འགྱོད་མེད་ངང་།།
ཕ་རོལ་རྐུན་ཇག་གདོང་ཁ་བཙན་ན་ཡང་།།
པ་ཏྲ་ལྟ་བུའི་མཚོ་བོད་མཐོ་སྒང་དུ།།
ན་གཞོན་དུས་ཀྱི་འཚོ་བ་རི་ནས་ཟད།།
ད་ལྟའི་མི་བུ་རྣམས་ཀྱི་རང་གཤིས་སུ།།
ཐ་ཤལ་སྤྱོད་པ་མང་པོ་མཆིས་སྲིད་པས།།
ཏ་ཀུ་འཛིན་ལ་ཉེ་བའི་ཕ་མ་ལ།།
ཉ་ཉོག་མ་བཤད་ཁ་ཚོད་འཛིན་བཞིན་མཆིས།།
ཇ་ཆང་ཟས་གོས་ལ་སོགས་མི་བྱིན་བར།།
ཆ་རྒྱུས་མེད་པའི་འཁྱམ་གྲོགས་འགའ་དང་ལྷན།།
ཅ་ཅོ་ཀློང་ན་ལོངས་སྤྱོད་རྒྱ་ཆེ་སྤེལ།།
ང་ཚོས་རྙེད་པར་དཀའ་བའི་ཕ་མ་ལ།།
ག་ལོག་བྱས་ནས་དུས་རྒྱུན་ཚིག་རྩུབ་སྨྲ།།
ཁ་བའི་བུ་ཚོར་བརྩེ་བའི་སེམས་ཡོད་ན།།
ཀ་མིན་དོན་གྱིས་ཕ་མར་སྲི་ཞུ་བསྒྲུབས།།

༢༠༡༤ ༡༢  ༡

སྐྱིད་པའི་ལྷ་སྲས་ལས་འཕྲོས་བའི་གཏམ།

ཀི་སོ་གཡུལ་ལས་རྒྱལ་བའི་བཙན་པོའི་དཔུང་།
ཁུ་ཚུར་འུར་ཆ་ལ་སོགས་བརྟེན་ནས་ནི།
གེ་སར་ལྟ་བུའི་སེང་གོ་མི་ཆེན་ལམ་ཞུགས་ཚེ།
ངོ་ཚ་ཁ་སྐྱེངས་མེད་པའི་དྭགས་པོའི་ལྷ
ཅི་དྲག་ཐབས་ཀྱི་གཡུལ་སར་ཞུགས་ན་ཡང་།
ཆུ་རགས་ཁ་ཤོར་ལྟ་བུའི་གཡུལ་ར་སྟེ།
ཇེ་མཐོར་བཏང་ཡང་རང་སྡུག་རང་ཉིད་ཀྱི།
ཉོ་བར་མིན་པ་ཁོ་ལས་རྒྱལ་ཐབས་བྲལ།
ཏི་ཏིའི་སྙིང་དང་འདྲ་བའི་དྭགས་པོའི་ལྷ།
ཐུ་བྷོ་རྒྱལ་བོའི་འཕྲུལ་བའི་དམག་དཔུང་གིས།
དེ་རིང་སང་ལས་མ་འགྱངས་མཐར་བསྐྲད་ནས།
ནོ་འཁོལ་འདྲ་བའི་རྒྱལ་ངན་སྲོག་ཁྲིམས་བཅད།
པི་ཝང་ལ་སོགས་རོལ་ཆས་སྣ་ཚོགས་དག
ཕུ་རུ་བཞག་ནས་དགའ་བའི་སྐྱིད་ལ་རོལ།
ཕེ་རེག་ལ་སོགས་བཅུད་ལྡན་རིགས་དག
མོ་བཙུན་འཁོར་གཡོག་མཉམ་ཀྱི་ལོངས་སྤྱོད་ངང་།
ཙི་གུ་ཞེས་བའི་མིང་ངན་ཁོ་བོར་བཏགས།
ཚུལ་གྱིས་འདུལ་མཁན་བཙན་པོའི་དཔའ་ཆེན་ཁོས།
རྫེ་བཞིན་ཡོད་པའི་རང་གི་ཕུ་ཐུང་སོགས།
ཝོ་བརྒྱལ་མེད་པར་འོག་གི་འཁོར་གཡོག་གིས།
ཞི་འཇམ་ལྡན་པའི་དར་གོས་གང་ལེགས་གྱོན།
ཟུར་ཟ་ང་རྒྱལ་ཆེ་བའི་ཁྱུང་བོ་སྤུང་ཟད་སོགས།
འུ་སྒྲ་་དང་བཅས་ཟུར་ཟ་བྱེད་མོད་ཀྱང་།
ཡོ་བསྲང་མེད་པར་བཙན་པོའི་རྒྱལ་བོ་ཡིས།
རི་བོང་རྭ་ལྟར་གྱུར་བའི་མི་ཆེ་ཁོ་བོ་ལ།
ལུགས་དང་མཐུན་པའི་ཁོི་བོར་ཆོི་ལོ་བསྩལ།
ཤེས་རྒྱ་ཆེ་བའི་བློན་ཆེན་འགའ་ཞིག་གིས།
སོ་སོའི་ཐད་ནས་ཁོ་བོར་ངན་སྨྲས་བཞིན།
ཧིན་སྒྲ་དང་བཅས་ཁོ་ལ་འཕྱ་སྨོད་བྱས།
ཨེ་མ་འདི་འདྲའི་ཟུར་ཟའི་བར་གསེང་ནས།
སེང་གོ་མྱི་ཆེན་ཁོ་རང་དཔའ་མཚན་ཐོབ།
ཇི་འདྲའི་དཔའ་ངར་ལྡན་པའི་བཙན་པོའི་དཔུང་།
སེམས་དང་ལ་རྒྱ་ཅན་གྱི་བཙན་པོའི་རྒྱུད།
འདི་འདྲའི་མེས་པོར་ངོ་སོ་ཡར་ལ་བསྟོད།

༢༠༡༤ ༡༢ ༣།
དགོང་ཚོགས་སྟེང་གཤར་མར་བྲིས།