སྐྱེས་སྐར་ལ་ཕུལ་བའི་སྙན་ངག

སྐྱེས་སྐར་ལ་ཕུལ་བའི་སྙན་ངག
     གངས་མུ་ཏིག མདོ་ལྷོ

དེ་རིང་ནི། ཁྱོད་ཀྱི་སྐྱེས་སྐར་ཡིན།
ཁྱོས་ཆེད་དུ་སྐྱེས་སྐར་རོལ་མ་མྱོང་།
ཡིན་ཡང་ཁྱོད་སྐྱེས་དུས་ནི་ལོ་སར་ཚེས་གཅིག་ཉིན་ཁེལ་བས།
ཁྱོས་སྐྱེས་སྐར་མ་རོལ་དུས་གཅིག་ཀྱང་མེད།
མཐའ་ན་རྨོ་རྨོ་ལགས་གཤེགས་དུས་ཀྱང་།

དུས་ད་ལྟ།
ཁྱེད་རང་འཇིག་རྟེན་དུ་འོངས་ནས་མི་ལོ་ཉི་ཤུ་ལྷག་འགོར་ཡོད།
མི་ལོ་ཉི་ཤུའི་རིང་། ཁྱོས་མིག་ཆུ་དང་དགོད་སྒྲ།
ཁེར་རྐྱང་། དྲན་གདུང་སོགས་ཀྱི་ཐ་སྙད་འཁྱེར་ཏེ།
སོང་ཟིན་པའི་ལམ་བུ་དག་ལ་མདོག་མི་གཅིག་པའི་རྐང་རྗེས་རེ་དཔར་ཡོད།

ཡིན་ཡང་འཇིག་རྟེན་འདི་ཆེ་དྲགས་ལ།
ཁྱེད་རང་ཆུང་དྲགས་པས།
འགྲོ་བའི་མིག་ཀོང་ན།
ཁྱོད་ནི་ཇི་འདྲའི་ཉམ་ཆུང་བ་ལ།
ཡང་ན་གང་ལའང་མི་མཁོ་བའི་དངོས་པོ་ཞིག
མི་རྣམས་ཀྱིས་ཁྱོད་རང་མཛེ་ནད་བཞིན་བྱོལ་ནས་འགྲོ
དེ་བས་ཁྱེད་ལ་སྙིང་ཉེ་མཁན་གྱི་མི་ཤིན་ཏུ་དཀོན།

ཁེར་རྐྱང་དང་སྐྱོ་སྡུག་གི་ལོ་ཟླའི་ནང་།
ཁྱོས་དབྱངས་ཅན་མར་གྲོགས་བསྒྲིགས་ཏེ།
མཛེས་སྡུག་དང་བརྩེ་བ་མཚོན་བྱེད་དུ།
སྙན་ངག་གི་ཕོ་བྲང་མང་ཙམ་བཞེངས་མྱོང་ལ།
ཁྱོའི་ཕྱི་ནང་གསང་གསུམ་སྙན་ངག་ལ་བསྟན་ཚར་བས།
ཁྱོད་ལ་སྙན་ངག་ལས་ལྷག་པའི་མཆེད་གྲོགས་ཤིག་ཡོད་མ་ཡིན།
སྙན་ངག་བདོག་པས།
ཁྱོའི་ནམ་མཁའ་ནམ་ཡང་སྔོན་པོ་ཡིན།

ནམ་མཁའ་སྔོན་པོ་འདིའི་འོག་ན།
ཁྱོས་ནམ་ཡང་བསམ་གཞིག་གཏོང་གིན་ཡོད།

ནམ་ཉི་མ་ཞིག་ལ།
ཁྱོད་ནི་སྙན་ངག་གི་རྒྱལ་སྲས་ཤིག་ཏུ་འགྱུར་བར་སྨོན།
ཉིན་མཚན་རེས་མེད་དུ་སྙུ་གུ་འཁྱེར་ནས་རྒྱལ་ཁམས་འགྲིམ་མཁན་དེ་ཡིན་པར་སྨོན།
མཐོ་སྒང་ན་འོད་དུ་འཚེར་བའི་མུ་ཏིག་དེ་ཡང་ཡིན་པར་སྨོན།

2015.2.19ཉིན་རང་ཁྱིམ་ནས།