ས་དམར་ཚེ་དོན་གྱི《ལམ་འཕྲད་ཀྱི་བུ་མོ》

ཟུར་མིག་དང་འཛུམ་མདངས་འཕྲད་མཚམས་ནས
ཉམས་སྣང་དང་བརྩེ་སེམས་ལུས་ཡོད
སེམས་ནང་དུ་བབས་པའི་ཁྱོད་ཀྱི་ངོ་གདུང
ཞོ་སྟོན་གྱིས་མྱོངས་པའི་མགྲོན་པོ་ཅི་བཞིན
རྡོག་མགོ་རུ་ཡང་ཡང་འཕྱན
ཁྱོད་རང་སུ་ཡིན་ནམ

རྐྱང་གི་རྨིག་སྒྲ་རྩ་ཐང་ནས་ཁད་ཀྱིས་འཇགས་དུས
སྒྱུ་རྩལ་གྱི་ལྷ་མོ་སོར་རྩེ་ནས་ཐོལ་གྱིས་འཛུམ་དུས
ཁ་རོག་གེར    ང་ཚོ་འཇལ་མྱོང་ངམ

མུན་པས་འཚོས་པའི་མཁའ་དབྱངས་སུ
སྐོམ་གདུང་གི་གཟན་ལ་ཁུགས་པའི་སྐར་ཚོགས
རྣོ་སྦྲངས་ཀྱི་རམ་འདེགས་མེད་པའི་རྫ་སྤྲིན
འདར་ལྕིབས་ལྕིབས     ཁུ་སུམ་མེར

རྒྱང་རིང་ན་འདར་འདར་བྱེད་ཀྱིན་པའི
ལམ་འཕྲད་ཀྱི་བུ་མོ་ལགས
གློ་སྙིང་བྲང་གསུམ་གྱི་ཕོར་ཁར་བབས་པའི་མིག་ཆུ
ལུས་ངག་ཡིད་གསུམ་གྱི་སྒམ་ཆུང་དུ་བཅུག་ཆོག་གམ
ཆ་རྐྱེན་མེད་པའི་ངང་དུ   བུ་མོ་ལགས