ཚིག་དང་ཐ་སྙད་ཀྱི་དར་དཀར་རིང་མོ།

ཚིག་དང་ཐ་སྙད་ཀྱི་དར་དཀར་རིང་མོ།
དཔའ་ཚེ་རིང་།

རྒྱང་རིང་གི་ཡུལ་གྲུ་འདི་ན  ངས་གྲང་ཤུར་ཤུར་གྱི་ཁང་མིག་ལས་ཕ་ཡུལ་ལ་ལྟ་བཞིན
ཁྱོད་ཀྱི་འདྲ་པར་སྔས་སུ་བྱས་ནས  འབྱུང་འགྱུར་ལྷན་འཛོམས་ཀྱི་ལས་དབང་ལ་སྔོ་ལྗང་གི་ཁ་དོག་བྱུག་དུས
ཁྱོད་ནི་མི་ཡུལ་ལ་བབས་པའི་ལྷའི་དབང་བོ་བརྒྱ་བྱིན་གྱི་སྲས་མོ་ཇི་བཞིན
ལྷ་ཡུལ་གྱི་མངའ་ཐང་དང་ལོངས་སྤྱོད་རྒྱང་དུ་བསྐྱུར་ཏེ
མི་ཡུལ་གྱི་ས་རྒོད་ཐང་སྐྱ་འདི་རུ  སུ་ཞིག་དྲན་གྱིན་ཅི་ཞིག་སྒོམ་ནས་འོང་བ་ཡིན

བསོད་ནམས་ལྷ་མོ
ངའི་ཡིད་སེམས་ཀྱི་རི་ལུང་ན་མཛེས་སྡུག་གིས་བཞད་པའི་འཇམ་མཉེན་གྱི་པད་དཀར་ཆུན་པོ
ཁྱོད་ཀྱི་ཡིད་འོང་གི་འདབ་བརྒྱ་ཨ་མའི་ལྟུངས་བ་ན་ཐོག་མར་བཞད་དུས
ངའི་འཆར་ཡན་གྱི་རྨི་ལམ་མཐའ་དག་འོད་སྣང་དང་སྤྲོ་དགས་ཁེངས་ཤིང
ངའི་ཁེར་རྐྱང་གི་སེམས་པ་དེར་འཇའ་ཚོན་གྱི་གུར་ཁང་ཕུབ་པས

བསོད་ནམས་ལྷ་མོ
ཁྱོད་ནི་ཨ་ཕའི་མི་ཡུལ་དུ་ལུས་པའི་འགྱུར་མེད་ཀྱི་དྲན་ཤིང་གསོན་པོ་ཞིག
ཁྱོད་ནི་ཨ་ཕའི་མིག་མཐའ་ནས་བཞུད་ཅིང་སྙིང་དབུས་ན་བཞད་པའི་མཛེས་སྡུག་གི་མེ་ཏོག་རྐང་གཅིག་ཡིན

དེ་རིང  ངས་ལྗིད་ཏིག་ཏིག་གི་སེམས་པ་ལག་པས་སྐྱོར་བཞིན
ནང་སེམས་ཀྱི་དྲན་གདུང་དང་སྨོན་པ་ཡོད་ཚད  དྲི་མེད་བརྩེ་སེམས་ཀྱི་དར་དཀར་དུ་འཐག་སྟེ
ཁྱོད་ཀྱི་སྐྱེས་སྐར་གྱི་གསོལ་སྟོན་ལ་ཚིག་དང་ཐ་སྙད་ཀྱིས་ལེགས་སྐྱེས་འབུལ་ན་འདོད
བསོད་ནམས་ལྷ་མོ
ངའི་ཚེ་སྔོན་ལ་བོར་ཡང་ཚེ་འདིར་རྙེད་ཟིན་པའི་དྲན་གདུང་གི་མིག་ཆུ་རྡོག་པོ

དེ་རིང་ནི  ཉི་ཟླའི་འཕྲོད་སྦྱོར་གྱི་གཟའ་སྐར་ཡག་ཅིང་རྟགས་དང་ཚད་མའི་རྟེན་འབྲེལ་འཛོམས་པས
ངས་ཀྱང་གཙང་གསུམ་གྱི་འགོ་ཁུངས་འདི་རུ  དངུལ་དཀར་གྱི་ཆང་ཕོར་དགུང་ལ་འདེག་བཞིན
ཁྱོད་ཀྱི་འཛུམ་མུར་མུར་གྱི་ངོ་གདོང་དེ   རང་སེམས་ཀྱི་ཟབ་ས་ན་བརྩེ་བ་ཡིས་རུམ་ཡོད་པས

བསོད་ནམས་ལྷ་མོ
འདི་ནི་ཁྱོད་དང་ང་ལ་དབང་བའི་གཏམ་རྒྱུད་རིང་མོ་ཞིག་གི་དབུ་ཁྱུད་ཡིན
འདི་ནི་ཁྱོད་ཀྱི་སྐྱེས་སྐར་ལ་ཕུལ་བའི་བརྩེ་སེམས་རྣལ་མ་ཞིག་གི་རང་མདངས་ཡིན

2014 3 21