དོ་ནུབ། ང་ཅོ་ནེ་རྫོང་ཐོག་ན་ཡོད།

དོ་ནུབ།   ང་ཅོ་ནེ་རྫོང་ཐོག་ན་ཡོད།
       དགའ་བཀྲ་ཤིས་རྡོ་རྗེ། ༼ ཅོ་ནེ༽

སྨུག་པའི་ཁྲོད་ཀྱི་རྫོང་ཐོག་ན་ཡོད། 
ཆར་བའི་ཀློང་གི་རྫོང་ཐོག་ན་ཡོད།
ཅོ་ནེའི་དགོན་ཆེན་ལ་མིག་ཟུང་ཅེར་བཞིན། 
མུན་པ་དང་རླབས་སྒྲ་རུམ་ནས་ཁེར་རྐྱང་གིས་ལུས་ཡོད།


བྱེ་འདམ་གྱི་ཕུང་བོས་ཟ་བཞིན་པའི་རྫོང་ཐོག་ན་ཡོད།
ཟི་ཁྲོན་ཟ་ཁང་གི་དྲི་མ་འཐུལ་བའི་རྫོང་ཐོག་ན་ཡོད།
བོད་ཟས་ཁང་རྫུན་མ་རེ་གཉིས་ཀྱི་ཁ་དོག་རུམ་ནས།
ཨུ་ཚུགས་དང་བཟོད་བསྲན་སྒོམ་ནས།
ཀླུ་ཆུ་སྔོན་མོའི་མིག་ཆུ་རུམ་ནས་ཟམ་སྣེ་ན་ལུས་ཡོད། 


དོ་ནུབ།    ང་ཅོ་ནེ་རྫོང་ཐོག་ན་ཡོད། 
རྫོང་ཐོག་ནས་མི་བུ་ཞིག་གི་ཞབས་རྗེས་མ་རྙེད།
དོ་ནུབ།    ང་ཅོ་ནེ་རྫོང་ཐོག་ན་ཡོད། 
མི་ཕོ་ཞིག་ཡལ་བཞིན་པའི་གསང་བ་ཀློག་གི་ཡོད། 
ཁྲམ་ལས་ཀྱི་འུར་ཟིང་དང་རུས་རྐང་བྲལ་བའི་རྫོང་ཐོག་ན་ཡོད། 
དཔའ་ཉམས་ཀྱིས་འགྱིང་བའི་ཁ་སང་གི་ཅོ་ནེ་དེ་སྒོམ་བཞིན། 


དོ་ནུབ།   ང་ཅོ་ནེ་རྫོང་ཐོག་ན་ཡོད། 
ཐག་འཁྱུད་མེ་ཏོག་འདྲ་བའི་མགོ་ཡང་ཁྲོད་ན་ཡོད།
རྨི་ལམ་དང་འགྲོགས་ནས།   ལྷོག་ལྷོག་ཏུ་འཕྱུར་བཞིན། 
འུག་པ་དང་བྱ་རོག་གི་འཇིག་རྟེན་ན་ལུས་ཡོད། 


དོ་ནུབ།     ང་ཅོ་ནེ་རྫོང་ཐོག་ན་ཡོད། 
རུས་རྒྱུད་དང་གདུང་རྒྱུད་འདྲེས་མའི་གསེང་ན་ཡོད།
ཁ་དོག་དཀར་ནག་གཉིས་ཀྱི་འདྲེས་མཚམས་ན་ཡོད། 
རྒྱབ་གཟུགས་དང་ཁྱིམ་ལུད་འདྲེས་མའི་ཁྲོད་ན་ཡོད། 
དབྱངས་གསལ་སོ་བཞི་ཤུགས་ཀྱིས་གྱེར་བཞིན་ཡོད།
སྲོང་བཙན་སྒམ་པོའི་དམག་གི་ངོ་གདོང་ལ་ཅེར་བཞིན།
རུས་རྐང་ལྷད་མ་དག་གི་གཡོ་ཟོལ་ལ་ཅེར་བཞིན། 

དོ་ནུབ།    ང་ཅོ་ནེ་རྫོང་ཐོག་ནས་ལུས་སོང་། 
ཙན་དན་ཤུལ་ལ་རྒྱ་ལྕང་སྐྱེས་བཞིན་པའི།
ཅོ་ནེ་རྫོང་ཐོག་ན་ང་རོ་གཞན་ཞིག་འདྲེས་འདུག
དོ་ནུབ་དང་འདྲ་བའི་ཅོ་ནེ་རྫོང་ཐོག་ནས། 
གནའ་བོའི་ཕ་མ་སྤུན་མཆེད་དྲན་ཡོང་།  
ཝ་སྐྱེས་རྒྱལ་པོའི་ཚོགས་དང་རྒྱང་དུ་གྱེས་ན་འདོད་ཡོང་།


སྨུག་པའི་ཁྲོད་ཀྱི་རྫོང་ཐོག་ན་ཡོད། 
ཆར་བའི་ཀློང་གི་རྫོང་ཐོག་ན་ཡོད། 
གྲགས་འགུལ་མེད་པའི་རྫོང་ཐོག་ན་ཡོད། 
འགུལ་རུང་རྡོག་སྒྲ་མེད་པའི་རྫོང་ཐོག་ན་ཡོད། 


ཅོ་ནེ་ལགས།   མྱུར་དུ་ལུས་སེམས་ལ་བདག་པོ་གནང་རོགས།
ཅོ་ནེ་ལགས།   ཕ་ཡིག་ཕ་སྐད་དག་མ་གང་ན་ཡོད།
ཅོ་ནེ་ལགས།   རུས་དང་གདུང་རྒྱུད་གཙང་མ་གང་ན་ཡོད།


དོ་ནུབ། ང་ཅོ་ནེ་རྫོང་ཐོག་ན་ཡོད། 
བསམ་གཞིག་ལྷག་མ་དང་རེ་བའི་རྨི་ལམ་ཡོད་ཚད།
ས་བོན་མེད་ན་མེ་ཏོག་ཅིག་གནམ་ནས་ལྷུང་སྲིད་དམ།
རུས་རྐང་ཡོད་ན་མཚར་སྡུག་དེ་རྒྱང་དུ་ཡལ་སྲིད་དམ།

2014ལོའི་ཟླ5བའི་ཚེས24ཉིན་གྱི་དགོང་མོར་ཐོལ་གྱིས་བྲིས།