རྨེ་རུ་ཕག་མོ་ཚེ་བརྟན་གྱི་ཚེ་ཐར་ཞེས་པའི་རང་མོས་སྙན་ངག

ཚེ་ཐར།
རྨེ་རུ་ཕག་མོ་ཚེ་བརྟན།（ཉི་ཧོང་།）​

༡

འབྲི་རྒྱ་ཐོས
འཛིངས་ཤིང་སྦོམ་པའི་རྔ་མ་འཕྲེད་དུ་གཡུག་བཞིན
ལྷོད་ལྷོད་ཀྱིས  དལ་དལ་སྒོས
མངར་ཞིང་ཞིམ་པའི་རྩྭའི་རོ་བཅུད་ལ་རོལ་བཞིན་འདུག
གོ་ཐོས་སུ
ཁོ་མོར
བཙོང་ན་རིན་མི་ལེན་ཞིང
ཤི་ན་ཤ་མི་ཟ་བའི་ཁྱད་མཐོའི་གོ་གནས་ཤིག་བསྩལ་བྱུང་ཟེར
འཛུམ་ཤ་ལྷོད་པའི་ཕྱུགས་བདག་གིས
ཟེར་སྒྲོས་ལ
དེ་ནི་དུད་འགྲོའི་ཚོགས་སྙེག་བཞིན་པའི“གསེར་འོད་ཀྱི་ལམ་ཆེན”རེད་ཟེར
དེ་ནི་དུད་འགྲོའི་ཚོགས་ཀྱི“ཐར་བའི་གོ་འཕང་”རེད་ཟེར

༢

དགེན་ལགས་ཀྱིས
ན་ནིང     རྔ་བའི“བྱང་ཆུབ་སེམས་དཔའ”ཞིག་གིས
ཉ་མོ་ཁྲི་སྟོང་མང་བོ་རྒྱ་མཚོའི་ཀློང་ཡངས་སུ་འཕངས་སོང་ཟེར
གཞི་ཆེ་ལ་གཏིང་ཟབ་པའི་འཁོར་སྒམ་ནས་དྲངས་ཏེ
ད་དུང
མོའོ་ཙེ་ཏུང་གི་མགོ་བརྙན་དམར་པོ་དེ་དག
མཐེབ་མཛུབ་དང་གོང་མཛུབ་བར་ནས་ནང་འགུག་བྱེད་ཞོར
གོ་ཐོས་སུ
དེ་ནི་ཚེ་ཐར་རེད་ཟེར

༣

འབྲི་རྒྱ་ཐོ
མར་ཁུ་སྤང་གི་ལྟེབས་གཉེར་ཁུགས་ན
སོས་དལ་སྒོས       བག་ཡངས་ཀྱིས
ལོངས་སྤྱོད་ལ་རྔམ་གྱིན་འདུག
རྒྱ་མཚོའི་དབྱིངས་སུ་འཐིམས་པའི་ཉ་མོ་དག
ལྡེམ་མྱུར་གྱི་འཁྱུག་རྩལ་ཤུགས་ཀྱིས་ངོམས་བཞིན
བྲེལ་སྟབས་དང་དངངས་སྐྲག་གིས་འབྲོ་བཞིན་འདུག
ཕྲ་ལ་མཉེན་པའི་ལྕགས་ཀྱུ་ཕྲ་མོའི་གཡོ་ཟོལ་ལ་འཇིགས་ནས
བཤད་རྒྱུན་ལ
འདི་གཉིས་ཀ་ཚེ་ཐར་རེད་ཟེར