བསྟན་འཛིན་སྒྲོལ་དཀར་གྱི་ལྷུག་རྩོམ《ཨ་མ》།

ཨ་མ།
              བསྟན་འཛིན་སྒྲོལ་དཀར།

       སྐྱ་རེངས་བུ་མོའི་འཛུམ་ཟེར་མཁའ་ནས་རྒྱས་ཤིང་།  ཀུན་གསལ་ནམ་མཁའི་དབྱིངས་སུ་གསེར་མདོག་གི་ཉི་འོད་དལ་གྱི་འཕགས་པ་ན།  བདག་གི་མ་ལོས་བཞོ་ཟེའུ་ལག་ཏུ་བཟུང་ནས་རྡང་ཁུག་སུ་སོང་སྟེ་འབྲི་མོ་བཞོ་བར་རྩོམ།  འདི་ནི་བདག་གི་མ་ལོའི་ནམ་རྒྱུན་གྱི་ལས་ཀ་སྟེ།  མི་ཚེ་ཡི་མགོ་རྩོམ་ས་ཡིན་ལ་མཇུག་བསྡུ་སའང་ཡིན་ངེས། 
       ཨ་མ་ལགས།   ཁྱེད་ཀྱི་དུས་བཞིའི་འགྱུར་བག་དང་ཉིན་མཚན་གྱི་དབྱེ་བ་ལ་མ་འཛེམ་པར་བྱ་བ་ཡོད་ཚད་རྒྱབ་ཏུ་ཁུར་ནས།   སེན་རྩ་ཁྲག་དང་སེན་མགོ་རྣག་བྱས་ནས་ད་བར་དུ་ང་ཚོ་གཉོར་ནས་འོང་།  
       ཨ་མ་ལགས།  ཁྱེད་ཀྱི་གསུང་འཇམ་གྱི་སྐད་ཆ་རེ་རེ་ནི་ངེད་མིང་སྲིང་ཚོའི་བསླབ་བྱ་ཡིན་ལ།  ཁྱེད་ཀྱི་སྙིང་གཏམ་དང་དགོད་སྒྲ་རེ་རེའི་ཁྲོད་ན་བྱམས་བརྩེ་ཡི་དྲོད་ཁོལ་ལྷོག་ལྷོག་ཏུ་གདུ་བས།   ང་རང་ཁྱེད་ཀྱི་བསྐྲུན་པའི་བདེ་སྐྱིད་ཀྱི་འཚོ་བའི་ཀློང་ནས་འཇིགས་མེད་སྤྲོ་དགའ་དང་ནད་མེད་བདེ་ཐང་ངང་གཉོམ་ལག་རྒྱས། 
       ཨ་མ་ལགས།   ཁྱེད་ཀྱི་སྐད་ཆེན་ལྟ་བུའི་མིག་ཟུང་དང་སྤྲོ་དགའི་འཛུམ་ཞལ་རེ་རེའི་ཁྲོད་ནས་ཁྱེད་ནི་བྱམས་སེམས་ཅན་གྱི་བདག་མོ་ཞིག་དང་ལྷག་བསམ་གངས་རི་ལས་དཀར་བའི་འབྲོག་པའི་བུ་མོ་གཞུང་དྲང་ཞིག་ཡིན་པ་ཤེས་ཐུབ། ཡིན་ནའང་།   ཨ་མ་ལགས།   དཀའ་སྡུག་གིས་མནར་པའི་མི་ཚེའི་ཁྲོད།    ཁྱེད་ཀྱི་སྨྱུག་མའི་མདའ་བཞིན་དྲང་བའི་ལུས་པོ་རིམ་བཞིན་སྒུར་གྱིན་འདུག་ལ།  གནག་སྣུམ་གྱི་སྐྲ་ལོ་ལའང་དཀར་ཐིགས་བབ་ཀྱིན་འདུག  སེམས་ཁུར་གྱིས་བསུས་པའི་ཀྱག་ཀྱོག་གི་ལམ་ཕྲན་ཁྲོད།   ཁྱེད་གདོང་གི་གཉེར་མ་ཇེ་མང་ཡིན་ལ།   དུང་སོ་སུམ་ཅུའི་གྲལ་ཤལ་ལའང་ཆགས་སྐྱོན་ཤོར་ལ་ཉེ།   ཨ་མ་ལགས།   ནམ་ཞིག་གི་ཚེ་ན།   འབྱུང་བཞིའི་འགྱུར་བ་ཇི་བཞིན་མི་རྟག་པའི་འཇིག་རྟེན་འདི་ནས་ཁྱེད་ཀྱི་བརྗིད་ཉམས་ཀྱི་ཚེ་སྲོག་དེ་ལའང་འཇིགས་ཉེན་ཆེ།  
       ཨ་མ་ལགས།   ཁྱེད་ནི་འཇིག་རྟེན་འདིའི་སྟེང་གི་ཆེས་རླབས་ཆེན་ཞིག་དང་།   ཆེས་གཟི་བརྗིད་ལྡན་པའི་བུད་མེད་ཅིག་ཡིན་ཅེས་བརྗོད་མི་ནུས་ནའང་།   ཁྱེད་ནི་གོ་ལ་འདིའི་གྲུ་ཟུར་ཞིག་ན་གནས་བའི་མཐོ་སྒང་གི་ཡུལ་གྲུ་འདི་ལས་ལྷག་བསམ་གངས་རི་ལས་དཀར་ཞིང་བྱམས་བརྩེ་ཡི་དྲོད་ཁོལ་མཛད་མེད་དུ་གནང་བའི་ཨ་མ་ཞིག་ཡིན་ཅེས་བརྗོད་ན་ཅི་ལ་མི་ཆོག   ཨ་མ་ལགས།