རྩོམ་པ་པོ་སྟག་འབུམ་རྒྱལ་གྱི་བརྩམས་སྒྲུང《རྒྱང་དུ་གྱེས་པ》།

          ཁོས་འཚབ་འཚབ་ངང“གཅིག་འདྲ་ལོས་ཡིན།  རེད།  འོན་ཀྱང... ...  ”ཁོས་ཡང་བསྐྱར་སྐྲ་བཞར་གྱི་ཁང་བ་འདིའི་ནང་ཡོངས་ལ་ཞིབ་ལྟ་ཞིག་བྱེད་དགོས་བྱུང༌།    དོན་ངོ་མར་ད་ནི་ཅི་ཞིག་བཤད་འོས་པ་ཁོ་རང་གིས་ཀྱང་མི་ཤེས་པར་འདུག
          ཏག་ཏག་སྐབས་དེར་སྒོ་ནང་ནས་མི་གཉིས་ནང་དུ་ཐོན་བྱུང་བས་ཁོང་གཉིས་ཀྱི་ཁ་བརྡ་ཡང་དེ་མུར་མཚམས་གཅོད་དགོས་བྱུང༌།  ནང་དུ་ཡོང་མཁན་ནི་འབྲོག་པ་ཕ་བུ་གཉིས་རེད་འདུག་ཅིང་ཁོ་ཚོ་སྐྲ་བཞར་དུ་ཡོང་བ་རེད། ཚེ་རིང་སྒྲོལ་མ་མྱུར་མོར་ཡར་ལངས་ཏེ་དེ་རུ་སྡོད་པར་ཞུས་ཀྱང༌། རྒད་པོ་ནི་དེ་གར་འགྲེང་ནས་བསྡད་དེ་སར་ཙོག་རྩིས་མི་བྱེད་པར༌། ཡུད་ཙམ་ལ་ཁོང་གཉིས་ལ་རེས་མོས་ཀྱིས་ཞིབ་ལྟ་ཞིག་བྱས་རྗེས༌།  “ཡ་བུ་མོ།  སྐྲ་བཞར་ན་སྒོར་མོ་དུ་ཡིན”ཞེས་དྲིས་བྱུང༌།
          ཚེ་རིང་སྒྲོལ་མས“སྒོར་བརྒྱད་ཡིན”ཞེས་བཤད་བྱུང༌།
          རྒད་པོས་རྣར་མི་འགྲོ་བའི་ཚུལ་གྱིས“སྒོར་བརྒྱད་ནི་ཧ་ཅང་མཐོ་འདུག”ཟེར།
          ཚེ་རིང་སྒྲོལ་མ་ཡང་དགོད་བཞིན་དུ“འོ་ན་ཁྱོད་ཀྱིས་དུ་སྟེར་འདོད་ན་དེ་བྱིན་དང་ཆོག”ཟེར།  ཚིག་དེས་རྒད་པོ་ཡང་ཅུང་དོགས་མི་བདེ་བར་གྱུར་ཅིང་དེ་མུར་བགད་བྱུང༌། ཅུང་ཙམ་བགད་རྗེས་འདང་རྒྱག་ཙམ་ཡང་མི་བྱེད་པར“ཡ། ཁྱོད་ནི་བུ་མོ་དྲང་མོ་ཞིག་རེད། སྒོར་བརྒྱད་ཡིན་ན་ཡིན་དུ་ཆུགས།  འདིའི་སྐྲ་བཞར་རོགས”ཟེར་ནས་གན་དུ་ཁྲིད་པའི་ལོ་ཆུང་དེ་བསྟན་རྗེས་ཁོ་རང་ཚུར་ཡོང་སྟེ་ནོར་བུའི་གན་དུ་གཏད་ནས་འདུག་སྟེགས་སྟེང་བསྡད་བྱུང༌།
          “འདི་རུ་ཤོག”
          ཚེ་རིང་སྒྲོལ་མས་ལོ་ཆུང་དེ་ཕར་ཁྲིད་ནས་ཐོག་མར་མགོ་བཀྲུ་ས་རུ་མགོ་བཀྲུས་པ་དང༌། དེ་ནས་ཕྱིར་ཁྲིད་ཡོང་སྟེ་སྐྲ་བཞར་སའི་འདུག་སྟེགས་སྟེང་དུ་སྡོད་དུ་བཅུག་རྗེས་རས་ཀྱིས་གཅུད་རྗེས།    ལག་གཡས་པས་ཁེ་གྲི་དང་གཡོན་པས་སོ་མང་བཟུང་སྟེ་ཧ་ཅང་བྱང་ཆ་ལྡན་པའི་ངང་སྐྲ་བཞར་བའི་ལས་ལ་ཞུགས་སོང་བས། རྒད་པོ་དེ་དང་ནོར་བུ་གཉིས་ཀྱིས་ཁོ་མོའི་སྐྲ་བཞར་བའི་ངང་ཚུལ་ལ་བལྟས་ནས་བསྡད། རྒད་པོ་དེ་ཡང་ཧ་ཅང་སྤྲོ་སྣང་ཅན་ཞིག་འདུག  ཁོས་ཚེ་རིང་སྒྲོལ་མས་བྱང་ཆ་ལྡན་པའི་སྒོ་ནས་སྐྲ་བཞར་བའི་ངང་ཚུལ་ལ་ལྟ་བཞིན་དུ་ཀུ་རེ་རྩེ་གྱིན་པ་ལྟར་འཛུམ་དམུལ་དམུལ་ངང“ཨ་ཙི་ཙི། ཁྱོད་ཀྱིས་སྐྲ་དེད་ན་རྒྱ་མོ་ཞིག་དང་འདྲ་བར་འདུག   ངོ་མ་བྱང་ཆ་ཞིག་འདུག”ཟེར།
          ཚེ་རིང་སྒྲོལ་མས་ཁོར་ལྟ་ཙམ་བྱས་ཏེ་དགོད་བཞིན་དུ“འོ་ན་བོད་མོས་སྐྲ་འདེད་མི་ཤེས་པ་   རེད་དམ”ཞེས་དྲིས་བྱུང༌།
          རྒད་པོས་ཀྱང་གནས་ལུགས་མང་བོ་བཤད་རྒྱུ་མེད་པའི་ངང“སྐྲ་འདེད་མི་ཤེས་རྒྱུ་མེད་ན་ཐང་མོད། ངས་བོད་མོ་ཞིག་གིས་སྐྲ་བཞར་གྱིན་པ་མཐོང་མ་མྱོང”ཟེར་ནས་གདོང་ལ་འཛུམ་ཞིག་ལངས་བཞིན་མུ་མཐུད་དུ་ཁོ་མོས་སྐྲ་བཞར་ཚུལ་ལ་ཞིབ་ལྟ་བྱེད་ཀྱིན་སྡོད།
          ཚེ་རིང་སྒྲོལ་མ་ཡང་མུ་མཐུད་དུ་དགོད་ཙམ་བྱས་ནས་“དེ་རིང་ནི་ཁྱོད་ཀྱིས་རིག་བྱུང་ཨང” ཞེས་བཤད་རྗེས་གན་དུ་ཡོད་པའི་ནོར་བུ་ལ་ཟུར་མིག་གིས་ལྟ་ཙམ་བྱས་ཏེ་མུ་མཐུད་དུ་སྐྲ་བཞར་བའི་ལས་ལ་དམིགས་པ་གཏད་སོང༌། 
          སྐབས་འདིར་ཁོས་ཀྱང་སེམས་མ་གཡེང་བར་ཁོང་གཉིས་ཀྱིས་ཁ་བརྡར་ཉན་གྱིན་ཡོད་པས་དེང་ཐོག་རྒད་པོའི་ཀུ་རེ་རྩེ་བ་ལྟ་བུའི་སྐད་ཆ་དེ་དག་ལ་དགོད་བྲོ་བའི་སྣང་བ་ཞིག་སྐྱེས་བྱུང་མོད།  འོན་ཀྱང་རིམ་བཞིན་དུ་རྒད་པོའི་ལྟ་ཚུལ་དེ་དག་ཀྱང་ཧ་ཅང་བདེན་པ་སྟེ།  རང་ཉིད་ལ་མཚོན་ན་ཡང་ད་བར་དུ་མཐོང་བའི་སྐྲ་བཞར་མཁན་དག་ནི་སྨད་ཕྱོགས་ནས་ཡོང་བའི་རྒྱ་མི་ཕོ་མོ་འབྱོར་འཁོས་ཞན་པ་ཤ་སྟག་ཡིན་པ་ལས་རིགས་རྒྱུད་ཀྱི་ཐོབ་ཐང་ཡོད་པའི་མི་ཞིག་གིས་སྐྲ ་བཞར་ལས་ཀ་གཉེར་གྱིན་པ་མཐོང་མ་མྱོང་ལ། ལྷག་པར་དུ་བོད་མི་ཞིག་གིས་འདི་ལྟ་བུའི་གདོལ་བའི་ལས་གཉེར་ཀྱིན་པ་གཏན་ནས་མཐོང་མ་མྱོང་བས་ཁོ་མོར་བཟུང་བའི་ལྟ་ཚུལ་ཡང་རིམ་བཞིན་དུ་འགྱུར་སོང༌།   ཁོའི་སེམས་ལ་ཁོ་མོས་སྐྲ་བཞར་བའི་ལས་ཀ་བྱེད་པ་ནི་ཧ་ཅང་འུ་ཐུག་གི་བྱ་སྤྱོད་ཅིག་ཡིན་པར་འདུག་ཅིང་ལས་ཀ་འདི་གཉེར་བའི་ལྟག་རྒྱབ་ཏུ་མི་ལ་སྨྲ་མི་ཕོད་པའི་གཏམ་རྒྱུད་བཙོག་པོ་ཞིག་ཅིས་ཀྱང་ཡོད་ངེས་སུ་འདུག་སྙམ་ནས་མིག་མདུན་གྱི་མི་འདི་ནི་སྔོན་ཆད་སློབ་གྲྭའི་ནང་དུ་ཀུན་གྱི་སྨོན་གཞིར་གྱུར་བའི་ཁོ་མོ་མིན་པ་ལྟ་བུའི་ཚོར་སྣང་བྱུང༌།  ཁོ འི་སེམས་ལ་སྔོན་ཆད་ཁོ་མོར་མི་ཀུན་གྱིས་ཡིད་སྨོན་དང་བཅས་མངོན་ལྐོག་གང་རུང་དུ་རེ་འབོད་བྱེད་པའི་དུས་སུ་ཁོ་རང་ལྟ་བུ་ནི་མིག་ནང་དུ་ཡང་མི་འཇོག་ལ་ཐ་ན་མངོན་སུམ་འཛེམ་མེད་སྒོས་མི་མང་གི་ཁྲོད་ནས་དགེ་རྒན་ལ་ཞུ་གཏུགས་བྱས་པ་ཡིན་ཡང༌། ད་ལྟ་གནས་བབ་སྡུག་པོ་འདི་འདྲར་ལྷུང་དུས་བསྐྱར་དུ་ཁོ་ལ་ངོ་གཡོག་གིས་འགྲིག་མཐུན་ཨེ་ཡོང་ལ་རེ་བ་བྱེད་ཀྱིན་འདུག་པར་མ་ཟད།    ཐ་ན་ཁེ་སྔོན་དོན་མེད་དུ་ཁོ་རང་ལ་སྒོར་མོ་བསྐྱིས་པ་དེར་ཡང་དམིགས་ཡུལ་ངེས་ཅན་ཞིག་ཡོད་རྒྱུ་རེད་སྙམ་ནས་སེམས་ཧ་ཅང་མི་བདེ་བར་གྱུར་སོང༌།
          ཁོས་དེ་ལྟར་བསམ་བློ་བཏང་སྟེ་ཐ་ན་སྐྲ་བཞར་ཚར་ཏེ་འབྲོག་པ་རྒན་གཞོན་གཉིས་ཀ་ཇི་ལྟར་སྒོར་སོང་བ་ཡང་མ་ངེས་པ་འདྲ། ཁོས་ཧུར་རེར་མིག་མདུན་གྱི་ཅི་ཞིག་ལ་ཧ་ཅང་བཟབ་ནན་ངང་ཞིབ་ལྟ་བྱེད་པ་ལྟར་ཅེར་ནས་འདུག  ཁོ་མོས་ལག་བཀྲུས་རྗེས་སླར་ཡང་ཁོའི་གན་དུ་ཡོང་ནས་སྡོད་ཞོར་དུ་ཧ་ཅང་དགའ་བཞིན་པའི་ངང“ངས་སྐྲ་བཞར་བ་ཅི་འདྲ་རེད། ངས་ཀྱང་སྦྱང་ནས་ཡུན་རིང་འགོར་མེད”ཟེར།
          ཁོ་གཞི་ནས་བསམ་གཞིགས་ཀྱི་ཀློང་ནས་ཕྱིར་ཐོན་ཏེ་ཕར་ལྟ་ཚུར་ལྟ་ཞིག་བྱས་ཤིང༌།   དེ་ནས་སླར་ཡང་ཁོ་མོའི་ལུས་ཀྱི་ལྭ་བ་ལ་ཞིབ་ལྟ་ཞིག་བྱས་ནས་ཅུང་གཟབ་ནན་ངང“ཁྱོད་རང་སྐྲ་བཞར་མཁན་ཞིག་མ་བྱས་ན་མི་ཆོག་གམ”ཞེས་དྲིས།
          ཁོའི་དྲི་བ་དེས་ཁོ་མོ་ཤ་སྐྱིའི་གཏིང་རུམ་ནས་བརྡོལ་ཡོང་བའི་སྤྲོ་སྣང་གི་འཛུམ་མདངས་ཡོངས་རྫོགས་འཕྲལ་མ་ཉིད་དུ་ཕྱིར་བསྡུ་རུ་བཅུག་བྱུང༌། ཕལ་ཆེར་ཁོས་དེ་ལྟར་དྲིས་ཡོང་བ་ཁོ་མོའི་སེམས་ཀྱི་ཟུར་ལ་ཡང་དྲན་མེད་པ་དང་འདྲ་བར་རང་དབང་མེད་པར་ཡུད་ཙམ་ལ་ཁོའི་གདོང་ལ་ཅེར་ནས་སྡོད་པ་དང༌། དེ་མུར་མིག་འོད་ཕྱིར་བསྡུས་ཏེ་ཅེར་རེར་མདུན་ཕྱོགས་ཀྱི་ཐང་གཅལ་ཏུ་ལྟ་བཞིན་དུ་སྐད་དམའ་མོས།“དོན་ངོ་མར་ངས་ཀྱང་དེང་ཐོག་ནས་སྐྲ་བཞར་རྩིས་བྱེད་འདོད་མེད།  གྲོང་ཁྱེར་དུ་ཉུལ་ནས་གླུ་གཞས་བཏང་སྟེ་རང་ཁ་གསོ་སྙམ་པ་ཡིན།   ད་ལྟ་གླུ་བ་གླུ་མ་མང་པོས་དེ་ལྟར་བྱེད་ཀྱིན་པ་མ་རེད་དམ།  ངས་ཀྱང་དེ་ལྟར་ནུས་པར་གདེང་ཚོད་ཡོད།”ཁོ་མོས་དེ་ལྟར་བཤད་དུས་ངག་གི་གདངས་ཅུང་ཟད་འདར་གྱིན་པ་ལྟར་སྣང༌། ཁོ་མོས་སླར་ཡང་ཁོ་རང་མིག་ཟུར་གྱིས་ལྟ་ཙམ་བྱས་ཤིང༌། མུ་མཐུད་དུ་ཡིད་ཕམ་པའི་ངང་“འོན་ཀྱང་ཡུལ་མི་དག་ནི་དེ་ལ་གཏན་ནས་འཐད་ཀྱིན་མེད་པར་མ་ཟད་ད་དུང་ང་རང་ས་ཆ་ཆ་མེད་ཅིག་ལ་གནས་ལ་སྟེར་རྩིས་བྱས་བྱུང༌།  དེ་བས་ང་རང་ཡང་འུ་ཐུག་སྟེ་སྐྲ་བཞར་རྒྱུ་སྦྱངས་པ་ཡིན”ཟེར་ནས་མ་ཉེས་ཁ་གཡོག་ཐེབས་པའི་བྱིས་པ་ཞིག་དང་འདྲ་བར་མགོ་བོ་དུད་ཅིང་སྨྲ་བ་བསྡམས་ནས་བསྡད་བྱུང༌།
          “འོ་ན་ལས་ཀ་གཞན་ལས་རྒྱུ་མི་འདུག་གམ།”ཁོས་དེ་ལྟར་བཤད་རྗེས་རང་ཉིད་ཀྱི་དྲི་བ་དེ་ཅུང་བཙན་སོང་བ་ལྟར་དུ་སྣང་བས་ཅུང་དོགས་མི་བདེ་བར་གྱུར་ཏེ། སེམས་ལ་འདི་ལྟར་ཤར་བ་སྟེ།   དོན་ངོ་མར་རང་ཉིད་ཀྱིས་ཀྱང་དེ་ལྟར་སེམས་ཁུར་བྱེད་དོན་ཅི་ཡོད་དམ། སྔོན་ཆད་ཁོ་མོ་ན་ཟླའི་ཁྲོད་ཀྱི་མེ་ཏོག་ལྟ་བུ་ཡིན་ཡང་ད་ལྟ་མི་ཐམས་ཅད་ཀྱི་མིག་ནང་དུ་མེད་ཅིང་དམན་སར་འཕེན་པའི་སྐྲ་བཞར་མཁན་ཞིག་རེད། ཆར་སྡོད་བྱེའུ་ཁ་སྐོམ་ཡང་།། ས་ལ་བབས་པའི་ཆུ་མི་འཐུང་།། ཟེར་བ་མིན་ནམ། རང་ཉིད་ཀྱང་སྟག་ཤར་བ་ཞིག་ཡིན་པས་གཞན་ལ་དགོས་དུས་ལྷ་རྫས་དང་མི་མཁོ་དུས་གདོན་རྫས་བྱེད་དུ་གཞུག་དོན་མི་འདུག་སྙམ།  འོན་ཀྱང་དྲན་ཚུལ་དེ་ནི་ཧ་ཅང་ཡང་དག་ཅིག་ཡིན་མིན་ཁོ་རང་ཉིད་ཀྱིས་ཀྱང་མི་རྟོགས་པས་ཁོའི་སེམས་ཀྱང་རྒྱུ་མཚན་མེད་པར་ཅུང་བློང་བློང་བོར་ གྱུར་སོང༌། 
          ཁོ་མོས་མུ་མཐུད་དུ་ཁོའི་གདོང་ལ་ལྟ་མི་ཕོད་པར་མགོ་གུག་ནས་ཐང་གཅལ་ལ་རྡོག་པས་ཕུར་ཕུར་བྱེད་བཞིན་དུ“ད་ནི་ཅི་ཞིག་ལས་ཨང”ཟེར་ལ། སྐད་ཆ་བཤད་དུས་ངོ་གདོང་ལ་སྐག་ཚོས་བྱུག་པ་ལྟར་ཧ་ཅང་དམར་བོར་གྱུར་འདུག
ཁོང་གཉིས་ལ་རེ་ཞིག་ཁ་བརྡ་མེད་པར་གྱུར་སོང༌། ཅུང་ཙམ་ནས་ཁོས་སེམས་ལ་ལུག་གཉིས་ཀ་ད་དུང་སོལ་འཚོང་རྒད་པོའི་གན་དུ་བཏགས་ནས་ཡོད་པ་དྲན་ཞིང༌། རང་ཉིད་འདི་གར་འདི་ལྟར་དོན་མེད་དུ་སྡོད་དོན་ཅི་ཡོད་དམ་སྙམ་ནས་ཁོ་མོར་བལྟས་ཏེ་རྟབ་རྟབ་པོར་ཡར་ལངས་ཤིང༌།  “ཐེངས་རྗེས་མར་ངས་ཁྱོད་ཀྱི་སྒོར་མོ་ངེས་པར་དུ་ཁྱེར་ཡོང་ངེས་ཡིན”ཞེས་བཤད།
          ཐེངས་འདིར་ཁོ་མོས་ཀྱང་སྔོན་ལྟར་ང་ལ་སྒོར་མོའི་དགོས་མཁོ་མེད་ཅེས་བཤད་མ་བྱུང༌། དལ་དལ་ངང་ཡར་ལངས་ཏེ་ཚུར་ཡོང་ཞིང་ཁོའི་གདོང་ལ་ལྟ་ཡི་ཕོད་པར་སྒོ་ཁའི་བར་དུ་སྐྱེལ་མ་བྱས་བྱུང༌།  སྐབས་འདིར་ཁོ་མོའི་ངོ་གདོང་དུ་སྐྱོ་གདུང་གི་གྲིབ་མས་ཡོངས་སུ་གཡོགས་ཡོད་ན་ཡང་ཁོས་དེ་དག་ལ་མཉམ་འཇོག་ཅི་ཡང་མ་བྱས་པར་ཤར་རེར་སྒོར་བུད་དེ་ཁོ་མོར་བདེ་མོ་ཙམ་ཡང་གཏམ་རྒྱུ་མ་བྱུང་བར་གོམ་སྟབས་ཆེན་པོས་ཕྱི་སྒོའི་ཕྱོགས་སུ་སོང༌།  འགྲོ་ཞོར་དུ་རང་དབང་མེད་པར་སེམས་སུ་དྲི་བ་ཞིག་བསྐྱར་བཟླས་ཀྱིས་འདོན་པར་བྱེད་དེ། དེ་ནི“ད་ནི་ངས་ཅི་ཞིག་བྱས་ན་བཟང”ཞེས་པ་དེ་རེད།
          ཐེངས་དེར་ཁོ་རང་གིས་ལུག་མ་བཙོངས་པར་ཡུལ་དུ་ལོག་པ་དེར་ཨ་ཕས་ཀྱང་སྐྱོན་བརྗོད་ཅི་ཡང་བྱས་མ་སོང༌།  རྒྱུ་མཚན་ནི་ཁོ་རང་ཕྱིར་ཡུལ་དུ་ཐོན་དུས་ཁོང་ཚང་ལ་ལོ་ན་རྒན་པའི་གྲྭ་རྒན་ཞིག་ཡོང་ཡོད་ཅིང༌། ཨ་ཕས་གྲྭ་རྒན་དེར་བུ་ཡི་ནུས་མེད་ཀྱི་རང་བཞིན་ཚུལ་བཞིན་བརྗོད་པ་སྟེ། ད་ནི་ཁོ་རང་ཡང་ལོ་ན་རྒས་སོང་བས་མུ་མཐུད་དུ་སྡིག་ལས་བྱེད་མི་འདོད་པར་མ་ཎི་འགའ་རེ་འདོན་རྩིས་ཡིན་མོད།  འོན་ཀྱང་བུ་ཡིས་ཅི་ཡང་མི་ནུས་པར་འདུག  ཐ་ན་ཁེ་སྔོན་ནས་བསྟུད་མར་ཐེངས་གཉིས་ལ་ལུག་འཚོང་དུ་སོང་ཡང་ཤན་པ་དག་གིས་དམར་གསོད་བྱེད་ཀྱིན་པ་མཐོང་འཕྲལ་བཙོང་མ་ཕོད་པར་གཞན་ལ་སྒོར་མོ་བསྐྱིས་ནས་བཟའ་ཕྱེ་ཉོས་ཚུལ་ཇི་མ་ཇི་བཞིན་དུ་བཤད་པ་ན།  གྲྭ་བ་རྒན་པ་དེས་སྐད་ཆ་དེ་ཐོས་འཕྲལ་ཧ་ཅང་ཡིད་སྨོན་སྐྱེས་པ་ལྟར་གྱུར་སོང༌།“དེ་ཧ་ཅང་བཟང་གི  སྡིག་ལས་ནི་མ་བྱས་ན་དེ་ལས་ལྷག་པ་ཅི་ཡོད།  འོན་ཀྱང་འཇིག་རྟེན་པ་ཞིག་གི་སྐྱེས་པ་བླངས་ན་སྡིག་ལས་བྱེད་མི་བྱེད་ལ་རང་དབང་མེད་པ་རེད། ཇི་ལྟར་བྱས་ཀྱང་ཁྱིམ་ཚང་གི་ཁ་རྒྱབ་གསོ་དགོས་པ་རེད་པས། ཁྱོད་ཀྱི་བུ་འདི་གཞན་དང་མི་འདྲ་བ་ཞིག་འདུག་པར་བལྟས་ན་སྐྱེས་པ་སྔོན་མར་བྱང་ཆུབ་སེམས་དཔའ་ཞིག་གི་རྣམ་ཤེས་ཡིན་པ་འདྲ།”ཞེས་བཤད་སོང༌།
          གྲྭ་བ་རྒན་པའི་སྐད་ཆ་དེས་ཨ་ཕར་ཡང་སེམས་འགུལ་ཆེན་པོ་ཞིག་ཐེབས་སུ་བཅུག་སོང༌། དེ་ནས་བཟུང་ཨ་ཕས་ཁོ་ལ་ནུས་པ་མི་མི་འདུག་ཅེས་གཤེ་གཤེ་མི་གཏོང་བའི་ཁར་ཡར་བསྐྱར་ཁོ་ལ་  ཁྱོད་རང་སོང་སྟེ་ལུག་ཚོངས་ཤིག་ཅེས་པའི་སྐད་ཆའང་བཤད་མ་མྱོང༌། དེ་ལས་ལྡོག་སྟེ་ནམ་རྒྱུན་ཁོ་རང་ལུག་རྫི་ནས་ཕྱིར་ཁྱིམ་དུ་ལོག་སྟེ་བཟའ་བཏུང་ལ་རོལ་བའི་སྐབས་དག་ཏུ། ཨ་ཕས་མ་ནི་འདོན་མཚམས་ཀྱང་བཞག་སྟེ་སྨྲ་བ་མེད་པར་ཁོ་རང་ལ་ཅེ་རེར་ལྟ་བཞིན་པ་ནི་ཁོའི་ལུས་ཀྱི་ཆ་ཤས་གང་  ཞིག་ཏུ་བསྐུངས་ཡོད་པའི་བྱང་ཆུབ་སེམས་དཔའི་རྣམ་ཤེས་ཡིན་པའི་མངོན་རྟགས་དེ་འཚོལ་གྱིན་པ་དང་གཉིས་སུ་མ་མཆིས། ཡིན་ན་ཡང་ཐེངས་དེར་ཁོ་རང་དེ་ལྟར་ཚེ་རིང་སྒྲོལ་མ་དང་གྱེས་པ་ནས་བཟུང་ཁོའི་སེམས་གཏིང་ཞིག་ནས་རང་ཉིད་ཀྱི་དངོས་བོ་ཅི་ཞིག་བོར་བརླག་ཏུ་གྱུར་སོང་བའི་སྣང་བ་ཞིག་དབང་མེད་དུ་སྐྱེས་བྱུང་ཞིང༌། ཅི་བྱུང་མེད་པར་སེམས་ཡོངས་བློང་བློང་བོར་གྱུར་ཏེ་ལས་ཅི་ཡང་ལས་མི་འདོད་ཅིང་ཟས་ཅི་ཡང་ཟ་མི་འདོད་པའི་ཚད་དུ་གྱུར་བར་མ་ཟད། ལྷག་པར་དུ་ཨ་ཕས་མིག་མདངས་དེ་ལྟ་བུས་ཁོ་རང་ལ་གཟབ་ལྟ་བྱེད་པའི་ཚུལ་དེ་མཐོང་འཕྲལ་གང་བྱུང་དུ་ཚིག་པ་ཟོས་ཡོང་བར་མ་ཟད་ཁྱིམ་ནང་གི་མི་སུ་ལ་ཡང་ཁ་བརྡ་བྱེད་མི་འདོད་པར་གྱུར་འགྲོ  ཁྱིམ་མི་དག་གིས་ཁོའི་གློ་བུར་བའི་འགྱུར་ལྡོག་མཚར་བོ་དེ་མཐོང་འཕྲལ་ཁོ་རང་ལ་ཅི་ཞིག་བདེ་ཡིན་མི་འདུག་སྙམ་སྟེ་སེམས་ཐེ་ཚོམ་གྱི་ཁྱོགས་སུ་འཕྱང་བར་གྱུར་འདུག  ཁོ་རང་དགོང་མོ་མལ་སའི་ནང་དུ་ཉལ་ཡང་གཉིད་མི་ཡོང་བར་སེམས་ནང་དུ་རང་དབང་མེད་པར་ལུག་འཚོང་དུ་སོང་བའི་ཉིན་དེ་དག་ལ་ཚེ་རིང་སྒྲོལ་མ་དང་ཐུག་འཕྲད་བྱས་ཚུལ་དག་ཁོ་ན་དྲན་ཡོང་ལ། ཁོ་མོས་བཤད་པའི་སྐད་ཆ་དེ་དག་རང་ཉིད་དང་བར་ཐག་དེ་འདྲའི་ཉེ་ཞིང་དེ་འདྲའི་སྙན་པོ་ཡོད་པའི་སྣང་བ་ཞིག་ཤར་ཡོང་བར་མ་ཟད།    ལྷག་པར་དུ་ཁོ་སྐད་ཆ་བཤད་པའི་དུས་དག་ཏུ་གང་བྱུང་ངང་ཁོ་ལ་ལྟ་དུས་ཀྱི་ཧ་ཅང་ཡིད་སེམས་བསྲེགས་པར་བྱེད་པའི་མིག་འོད་དེ་བདུད་ཀྱི་ཆོ་འཕྲུལ་བཞིན་མིག་ལམ་ནས་མི་ཡལ་བར་མངོན་ཡོང་གིན་འདུག  
          སྐབས་འདིར་ཁོའི་སེམས་ངོར་ཁོ་མོས་བཤད་པའི་སྐད་ཆ་དེ་དག་ལ་ཡང་གནས་ལུགས་ངེས་ཅན་ལྡན་པའི་སྣང་བ་སྐྱེས།  གལ་ཏེ་ཁོ་མོ་ཡང་རང་ཉིད་ཀྱི་རེ་བ་བཞིན་དུ་གྲོང་ཁྱེར་དུ་གླུ་དབྱངས་ལེན་དུ་སོང་བའམ་ཕ་མའི་ངག་བཞིན་ཐག་རིང་གི་ཡུལ་དུ་གནས་ལ་སོང་བ་ཡིན་ཚེ་འདི་ལྟར་ཡང་བསྐྱར་ཁོང་གཉིས་ངོ་འཕྲད་པའི་གོ་སྐབས་ག་ལ་ཡོད།  ཁོ་མོས་གདམ་ག་འདི་འདྲ་བྱས་པ་དེས་ཁོང་གཉིས་ལ་སླར་ཡང་འཛོམས་པའི་གོ་སྐབས་འདི་འདྲ་ཞིག་ཡོད་པར་གྱུར་བ་རེད་ཅིང༌། འདི་ནི་ཚད་ངེས་ཅན་ཞིག་ནས་བཤད་ན་ལས་ཀྱིས་ཁོ་གཉིས་ལ་ཆེད་དུ་བཀོད་སྒྲིག་བྱས་པ་ཞིག་ཡིན་ཡང་སྲིད། སྐབས་འདིར་ཁོ་རང་ལ་རང་དབང་མེད་པར་ཅིས་ཀྱང་ལུག་འཚོང་ཐབས་བྱེད་དགོས་སྙམ་པའི་འདུན་པ་ཞིག་བཟློག་མེད་དུ་སྐྱེས་བྱུང་བ་སྟེ།ཁོས་གང་མྱུར་ངང་ལུག་བཙོངས་ཏེ་ཚེ་རིང་སྒྲོལ་མ་ལ་སྒོར་མོའི་སྐྱིན་པ་དེ་འཇལ་དགོས་པ་ཡིན།གལ་ཏེ་ད་ཐེངས་ཀྱང་སྒོར་མོ་སྟེར་རྒྱུ་མ་བྱུང་ཚེ་ཁོ་རང་ནི་དངོས་གནས་ཁ་དན་ཚིག་ཏུ་མི་གནས་པའི་མི་ཞིག་ཏུ་གྱུར་སོང་བ་སྟེ། ཁོ་མོས་ཡིད་སྨོན་བྱེད་ཀྱིན་པའི་རང་ཉིད་དུ་མ་གྱུར་བར་རང་ཉིད་ཀྱིས་བཤད་པའི་མི་ཁྲེལ་མེད་ཀྱི་རིགས་སུ་གྱུར་བ་རེད། ཁོས་ཅི་ནས་ཀྱང་ཁོ་མོའི་སེམས་ཁོང་དུ་རང་ཉིད་ལ་དེ་ལྟ་བུའི་མི་ཐ་ཤལ་བ་ཞིག་ཡིན་པའི་བག་ཆགས་ཤིག་འཇོག་མི་རུང་སྙམ།  དོན་དངོས་སུ་གྲྭ་བ་རྒན་པ་དེས་བཤད་པ་ཧ་ཅང་བདེན་འདུག་པ་སྟེ།  འཇིག་རྟེན་པ་ཞིག་ཡིན་ན་སྡིག་ལས་མ་བྱས་པར་ཁྱིམ་ཚང་གི་ཁ་རྒྱབ་ཇི་ལྟར་གསོ་རྒྱུ། ཁོ་རང་མཚོན་ན་ཡང་ལུག་མ་བཙོང་བར་སྒོར་མོ་ཞིག་ཇི་ལྟར་བཙལ་རྒྱུ།  ལུག་རྫི་ཞིག་ཡིན་ན་ལུག་བཙོང་སྟེ་ཁྱིམ་ཚང་གི་ཁ་རྒྱབ་མི་གསོ་བར་དངོས་བོ་གཞན་ཅི་ཞིག་གིས་གསོ་འམ།  དོན་ངོ་མར་བཤད་ན་རང་ཉིད་ཀྱིས་ལུག་ལ་འཚོ་སྐྱོང་བཟང་བོ་བྱས་ཏེ་ཤ་ཤེད་རྒྱས་སུ་བཅུག་སྟེ་རང་ཉིད་ཀྱི་ཁ་རྒྱབ་གསོ་བྱེད་དུ་བཙོང་བ་ནི་གནས་ལུགས་དང་མཐུན་པ་ཞིག་ཀྱང་ཡིན་པ་རེད། དེ་ནི་རང་ཉིད་ཀྱིས་ངལ་རྩོལ་བྱས་པའི་འབྲས་བུ་ཡིན་པས་དོན་མེད་ཀྱི་ཚེ་སྲོག་ལ་གནོད་སྐྱོན་གཏོང་བ་དང་གཏན་ནས་བསྡུར་ཐབས་མེད་པ་རེད།  ཁོས་དེ་ལྟར་སྙམ་བཞིན་དུ་ཡང་བསྐྱར་རྒྱ་སྲང་དུ་ལུག་གཉིས་འཚོང་དུ་འགྲོ་བར་སེམས་ཐག་བཅད། 
          ཐེངས་འདིར་ཁོས་སླར་ཡང་ཤབ་གཟན་ཡ་རུ་འདྲ་བ་གཉིས་འབྲེང་བས་སྐེ་སྦྲེལ་བྱས་ཏེ་རྫོང་  མཁར་དུ་ཁྱེར། ཁོ་རང་ལུག་འཚོང་དུ་འགྲོ་རྒྱུ་ཡིན་པ་ཡུལ་ནས་ཨ་ཕ་ལ་ཡང་བཤད་མེད་དེ།  བསྟུད་མར་ཐེངས་གཉིས་ལ་ལུག་འཚོང་མ་ཕོད་པས་ཁོས་ཡང་བསྐྱར་ཡུལ་མི་དག་ལ་དེ་ལྟར་བཤད་པར་ངོ་གནོང་བས་རེད།  ཡུལ་ནས་ཡོང་དུས་སུ་ལྐོག་ཏུ་རུམ་ལ་འབྲེང་བ་ཞིག་བཟུང་སྟེ་རྩ་སར་སླེབས་རྗེས་ལུག་རྗི་འགའ་ལ་རོགས་བྱེད་དུ་བཅུག་སྟེ་ལུག་གཉིས་ཀ་བཟུང་བ་དང་ལུག་ཁྱུ་ཡང་མི་གཞན་ལ་བཅོལ་ནས་གཞུང་ལམ་འགྲམ་དུ་སོང་ནས་རླངས་འཁོར་ལ་བསྒུགས་པ་རེད། གཞུང་ལམ་ནི་རྩྭ་རའི་མར་འགྲམ་གྱི་བྱེ་མའི་མཐར་བརྒྱུད་ནས་ཡོད་པས་བར་སྐབས་འདིར་རླངས་འཁོར་ལ་སྟབས་འགྲིག་མིན་ཐད་སེམས་ཁུར་བྱེད་མི་དགོས་ཏེ།  རླངས་འཁོར་ཁ་ལོ་བ་དག་གིས་ནམ་རྒྱུན་ལུག་དྲུད་ནས་རྫོང་མཁར་རམ་ཟི་ལིང་དུ་བསྐྱོད་དེ་གླ་བཙའ་མཐོན་པོ་ལེན་གྱིན་ཡོད་པས།  འཁོར་སྒམ་སྟོང་བ་ཡིན་པའི་སྐབས་སུ་ཁོ་ཚོ་ཡང་ཟོག་འཚོལ་ཞིག་དང་འདྲ་བར་ལམ་ཧྲིལ་བོར་མིག་རིག་རིག་གིས་མི་ཕྱུགས་གང་རུང་ཞིག་འདྲུད་རྒྱུ་ཨེ་རྙེད་ལ་རེ་བ་བྱེད་ཀྱིན་ཡོད་ཅིང༌། ལན་རེར་མི་ཕྱུགས་གཅིག་ཀྱང་འདྲུད་རྒྱུ་མ་བྱུང་ཚེ་དེ་ནི་གྱོང་གུད་ཅིག་ཏུ་བརྩི་བཞིན་ཡོད་པས་རེད།  ཁོས་ཡུན་རིང་ལ་སྒུག་མ་དགོས་པར་སྤྱི་སྤྱོད་རླངས་འཁོར་ཞིག་ཐོན་བྱུང་ལ་ཁ་ལོ་བས་རླངས་འཁོར་གྱི་ཁ་བསྒགས་རྗེས་ལུག་ལ་བལྟས་ཏེ་ལུག་ལ་ཡང་མི་ཡི་གླ་བཙའ་དགོས་ཟེར་བས་ཁོས་དེ་མ་ཐག་ཏུ་དང་ལེན་བྱས།    ལུག་གཉིས་ཀར་ཡང་ཁོ་དང་མཉམ་དུ་མི་ཡི་འདུག་སྟེགས་ཀྱི་བར་དུ་འཚངས་སུ་བཅུག་པས་ཧ་ཅང་དྲོན་པོར་སྣང་ལ་མཐའ་འཁོར་གྱི་མི་འགའ་རེས་ལུག་གཉིས་ཀྱི་ཤ་ཤེད་ལ་བསྟོད་བསྔགས་བྱེད་ཀྱིན་འདུག་པས་བལྟས་ཚོད་དུ་འཆམ་མཐུན་གྱི་སྤྱི་ཚོགས་ཞེས་པ་ནི་འདི་འདྲ་ཞིག་ཡིན་རྒྱུ་རེད་ཨང་སྙམ་པའི་ཚོར་སྣང་ཞིག་བྱིན་འོང༌།
         རྫོང་མཁར་གྱི་སྲང་མགོར་ཐོན་མ་ཐག་ཏུ་སྤྱི་སྤྱོད་རླངས་འཁོར་ལས་ལུག་གཉིས་སར་བླངས་ཏེ་རྐང་ཐང་ལ་དེད་སོང་བ་རེད། དེ་ནི་ཁ་ལོ་བས་དེང་ཐོག་གླ་བཙའི་ཕན་ཆད་ནས་བཏོན་པའི་ཆ་རྐྱེན་རེད། ཁ་ལོ་བ་ནི་འགྲིམ་འགྲུལ་ཉེན་རྟོག་པས་ཆད་པ་གཅོད་པར་སྐྲག་པ་རེད་མོད་ཁོ་རང་ལ་མཚོན་ན་དེ་ནི་ཧ་ཅང་སྒྲུབ་སླ་མོ་ཞིག་ཡིན་པར་མ་ཟད་ད་དུང་ལུག་གཉིས་ཀ་ཐང་ནས་དེད་ན་རླངས་འཁོར་ལས་སར་བླངས་མ་ཐག་པའི་ཉམས་ཞན་བག་འཁུམས་ཀྱི་ཉམས་དེ་རང་ཡལ་དུ་གྱུར་ནས་གློ་བུར་དུ་ས་ནས་ཡར་ལ་སྐྱེས་བྱུང་བ་ལྟ་བུའི་གཟུགས་བོངས་བཞུན་མོའི་རང་མདངས་ངོ་མ་དེ་མངོན་ཐུབ་ངེས་རེད། རྒྱང་ནས་བལྟས་ཀྱང་རྒྱ་སྲང་དུ་མི་ཡི་འགྲོ་འོང་དེ་སྔ་བཞིན་མང་པོ་འདུག་པ་མིག་ལམ་དུ་མཐོང་ཐུབ་པས་ཁོས་ལུག་གཉིས་ཀ་སྐེ་སྦྲེལ་དུ་དེད་ནས་མྱུར་མོར་རྒྱ་སྲང་ལ་སོང༌།  
          ཉིན་འདིར་གནམ་ངོ་རུབ་ཅིང་རླུང་བུ་གྲང་མོ་ཞིག་ལྡང་གིན་ཡོད་ན་ཡང་ཁོའི་སེམས་ལ་སྔོན་ཆད་བྱུང་ མ་མྱོང་བའི་སྟོབས་ཤུགས་ཀྱི་ཚ་རླབས་ཤིག་མཆེད་ཀྱིན་འདུག་ལ།  དེ་དང་ལྷན་དུ་མིག་རིག་རིག་གིས་དེ་སྔ་ལུག་ཉོ་གྲབས་བྱས་པའི་ཁ་ཆེ་ཚོང་བ་དག་གམ་ཡང་ན་མགོ་ལ་ཞྭ་མོ་དཀར་བོ་གྱོན་པའི་ཁ་ཆེ་བ་ཞིག་ཨེ་མཐོང་ལ་རེ་བ་བྱས།  སྐ བས་འདིའི་ཁོའི་བསམ་ཚུལ་ལ་བལྟས་ན་ཞྭ་མོ་དཀར་བོ་གྱོན་པའི་ཁ་ཆེ་བ་དག་གམ་ཡང་ན་ཁ་ཆེ་བ་ལུག་ཉོ་དག་ ནི་ཁོ་རང་གི་རེ་འབྲས་མཐའ་དག་ཡོངས་འགྲུབ་བྱེད་དུ་གཞུག་པའི་སྐྱབས་མགོན་ཁོ་ན་ཡིན་པའི་ཡིད་ཆེས་དེ་འཆང་ འདུག རྒྱུ་མཚན་ནི་ཁོས་ལུག་གཉིས་ཀ་བཙོངས་རྗེས་གང་མྱུར་ངང་ཚེ་རིང་སྒྲོལ་མའི་སར་ཕྱིན་ཏེ་སྒོར་མོའི་སྐྱིན་པ་དག་སྟེར་བའི་ཞོར་དུ་ཁོས་ཁས་བླངས་ཡོད་པ་ལྟར་ཁོ་མོ་ཟ་ཁང་དུ་མགྲོན་བསུ་བྱས་ཏེ་ཉིན་འདི་དག་ལ་སེམས་  ཁོང་དུ་བསྙལ་བའི་སྐད་ཆ་མང་བོ་ཞིག་དངོས་སུ་བཤད་དགོས་སྙམ།
          དོན་ངོ་མར་ཁོས་ཁ་ཆེ་བ་དག་མ་མཐོང་བའི་སྔོན་ལ་ཁ་ཆེ་བ་དག་གིས་ཁོ་རང་ཡོང་གིན་པ་མཐོང་འདུག ཁོ་ཚོ་སྔ་གཞུག་བརྩད་ནས་ཁོའི་གན་དུ་སུ་ཐོན་ལ་འགྲན་བཞིན་དུ་བརྒྱུགས་ཡོང་བའི་ངང་ཚུལ་ནི་ཨ་ཕ་ཞིག་རྒྱང་རིང་གི་མཁར་གྲོང་དུ་ཚོང་རྒྱག་ཏུ་ཕྱིན་ཏེ་ཕྱིར་ལོག་པའི་སྐབས་སུ་བྱིས་པ་ད ག་གིས་སྔ་གཞུག་བརྩད་དེ་མདུན་བསུ་རུ་བརྒྱུགས་པ་དང་གཉིས་སུ་མ་མཆིས།  སྔ་གཞུག་བྱས་ནས་ཁ་ཆེ་བ་གསུམ་བཞི་ཙམ་གྱིས་ཁོ་རང་ཡོད་པར་དོ་སྣང་མི་བྱེད་པར་ལུག་གཉིས་ཀྱི་སྟེང་དུ་རུབ་བྱུང་ལ།  མཇུག་མཐར་སླེབས་པ་ནི་དེ་སྔོན་མཐོང་མ་མྱོང་བའི་ཨག་ཚོམ་བྲང་ཁར་སླེབས་པའི་ཁ་ཆེ་བ་རྒན་པ་ཞིག་རེད། 
          ཁ་ཆེ་བ་སྔོན་མ་དག་གིས་ཁོ་རང་ཡིན་པ་ངོས་ཟིན་སོང༌། ཁོ་ཚོས་གང་བྱུང་ངང་ལུག་གཉིས་ཀའི་ཚང་ར་དང་བྲང་མགོར་མྱངས་ཙམ་དང་ཡར་བཀྱགས་ནས་ཡང་ལྗིར་ལྟ་ཙམ་བྱས་རྗེས་དགོད་བཞིན་དུ“ཨ་རོགས།  ཁྱོད་ཀྱི་ལུག་བཙོང་རྒྱུ་ཨེ་ཡིན”ཞེས་དྲིས་བྱུང༌།  ཕར་བལྟས་ན་ཁོ་ཚོས་ཀྱང་ཁོས་ལུག་བཙོང་མིན་ལ་གདེང་ཚོད་ཅི་ཡང་མེད་པ་འདྲ། 
         ཁོས་ལུག་གཉིས་ཀར་ལྟ་ཙམ་བྱས་ཤིང་སླར་ཡང་སྐད་ཆ་ཤོད་མཁན་ཁ་ཆེ་དེར་བལྟས་ཏེ“ལུག་བཙོང་ཆོག”ཅེས་བཤད།
          ཁ་ཆེ་བ་གཞོན་པ་དེས“ལུག་རེར་སྒོར་མོ་ག་ཚོད་དགོས”ཟེར།
          ཁོས“ཁྱོད་ཀྱིས་ག་ཚོད་སྟེར་རྒྱུ”ཞེས་དྲིས།
          ཁ་ཆེ་བ་གཞོན་ནུ་དེས“ཆ་སྙོམ་གྱིས་བཞི་བརྒྱ་སྟེར།  ཨེ་བཙོང”ཞེས་ཚད་འཇལ་བྱས་སོང༌།
          ཁོས་འགྱུར་རྒྱུ་མེད་པའི་ཚུལ་གྱིས“ཆ་སྙོམས་ཀྱིས་ལྔ་བརྒྱ་ལྔ་བཅུ་དགོས”ཞེས་བཤད།
          ཁ་ཆེ་བ་གཞོན་པ་དེས་དེ་འདྲ་བྱས་ནས་ཉོ་མི་ཐུབ་ཚུལ་གྱིས་མགོ་འཕྲེད་དུ་གཡུགས་ཀྱིན་དུ་ཕྱིར་རུ་བཀྱེད་བྱུང༌། ཁོ་ཚོས་ཁོ་ལ་སྒོར་ལྔ་བརྒྱ་ལྔ་བཅུ་ཅན་གྱི་ལུག་ཅིག་ཉོ་རྒྱུ་མེད་ཚུལ་བཤད་བྱུང༌།  དེ་འཕྲལ་ཁ་ཆེ་རྒན་པ་དེ་སྔོན་དུ་བུད་ཡོང་སྟེ་ཉམས་མྱོང་གིས་ཕྱུག་མདོག་གིས་ལུག་གཉིས་ལ་ལག་པས་མྱངས་ཙམ་དང་ཡར་ལ་འདེགས་ཙམ་བྱས་སོང༌།  སྐབས་འདིར་ཁོའི་སེམས་གཏིང་ནས་ལུག་གི་ཤ་ཤེད་ཀྱིས་ཁོའི་ཡིད་སེམས་ཡོངས་སུ་འགུགས་ངེས་པར་ཡིད་ཆེས་དང་རེ་བ་བྱེད་ཀྱིན་ཡོད་པས་ལུག་གི་ཤ་ཤེད་ལྷུང་ཨེ་འགྲོ་ལ་སེམས་ཁུར་ཅི་ཡང་བྱུང་མ་སོང༌།  ཁོའི་སེམས་ལ་གང་ལྟར་ལུག་ཕར་བཙོང་ཐུབ་ཚེ་ལུག་ནི་ཁོ་ཚོའི་ཡིན་པ་རེད་པས་ཁོ་དང་འབྲེལ་བ་ཅི་ཡང་མེད་པ་རེད་སྙམ། ཡིན་ན་ཡང་ལུག་དག་ནི་དངོས་ནས་ཁ་ཆེ་བ་འདི་དག་གི་ལག་ཏུ་ཚུད་ཚེ་དངོས་གནས་སྤྱང་ཀིའི་ཁ་རུ་ལུ་གུ་ཚུད་པ་བཞིན་དུ་ཧ་ཅང་ཡང་མོ་ཞིག་ལས་མེད་པར་སྣང༌། ཁ་ཆེ་བ་རྒན་པ་དེས་ཁ་ཚུར་འཁོར་ཏེ་ཁོ་ལ་བལྟས་ནས“ཁྱོད་ཚོ་ཚོང་མི་འགྲིག་ན་ངེད་གཉིས་ཀྱིས་ཚོང་རྒྱག ལུག་གཉིས་ཀ་སྡོམ་པས་དུ་བྱས་ནས་བཙོང་རྒྱུ”ཟེར།
          “སྒོར་སྟོང་གཅིག་དང་བརྒྱ་དགོས”ཁོས་ཁ་ཆེ་རྒན་པ་དེའི་གདོང་ལ་བལྟ་བཞིན་དུ་སྔར་བཞིན་ནན་ཏན་ངང་དེ་ལྟར་བཤད།
          ཁ་ཆེ་རྒན་པ་དེས་ཀྱང་སླར་ཡང་ལུག་གཉིས་ལ་ལྟ་ཙམ་བྱས་ཏེ། ཚིག་ཐག་ཆོད་པའི་ཉམས་ཤིག་བསྟན་ཏེ“འོ་ན་སྒོར་སྟོང་གཅིག་བྱིན་ན་བཙོང་རྒྱུ་ཨེ་ཡིན། བཙོང་ན་ཁྱོད་ཀྱིས་ལུག་དེད་དང་ང་ཚོ་ཚོང་རའི་ནང་དུ་འགྲོ་ལ་ཁྱོད་ལ་སྒོར་མོ་བརྩིས་ཆོག”ཟེར།
          ཁོས་སྒོར་སྟོང་གཅིག་ཟེར་བ་ཐོས་འཕྲལ་རང་དབང་མེད་པར་རྒྱུ་མ་འགུལ་མ་འགུལ་ཙམ་བྱས་སོང༌།  རྒྱུ་མཚན་ནི་ཁོས་ཀྱང་ད་སྔོན་ནས་རེ་གྱིན་པའི་གྲངས་ཀ་ཡང་དེ་ཡིན་མོད་ཁ་ཆེ་བ་དེས་ཁོའི་རེ་བའི་གྲངས་ཀ་དེ་ངག་ལས་ཕུད་སོང་བས་རེད།   འོན་ཀྱང་ཁོས་ཚོང་རར་དེད་དང་སྒོར་མོ་སྟེར་ཟེར་བ་ཐོས་འཕྲལ་བཤས་རའི་ནང་དུ་འདེད་ཟེར་གྱིན་པ་ཤེས་ནས་རང་དབང་མེད་པར་གྲང་འདར་ཞིག་བརྒྱབ་སྟེ“ང་ཚོས་འདི་གར་ཚོང་བརྒྱབ་པ་ཆོག ང་རང་ཚོང་་་་ཚོང་རའི་ནང་དུ་མི་འགྲོ”ཞེས་བཤད།
          ཁ་ཆེ་བ་རྒན་པ་དེ་ཅུང་ཡ་མཚར་བ་བཞིན་གྱུར་ཏེ“ཅི་རེད། འདི་ནས་ཚོང་རྒྱབ་ན་ང་ཚོར་ཆད་པ་གཅོད་ངེས་རེད།  ང་ཚོ་ལྷན་དུ་སོང་ན་སྐྱོན་ཡོད་པ་མ་རེད”ཟེར།
          ཁོས་སེམས་ལ་ངོ་མ་དེ་ལྟར་ཡིན་ཚེ་ཁོ་ཚོར་ཡང་ཁག་མི་འདུག་སྙམ་ཞིང་ཅུང་ཙམ་ལ་འདང་ཞིག་བརྒྱབ་རྗེས་རེ་ཞུ་བྱེད་པའི་ཉམས་ཤིག་མངོན་བཞིན། “འོ་ན་ངས་ཚོང་རའི་སྒོ་ཁའི་བར་དུ་མ་གཏོགས་སྐྱེལ་མི་ཐུབ།  དེ་ཨེ་ཆོག་གི”ཞེས་བཤད། 
          “དེ་ཆོག་གི”
          ཁོ་ཚོས་ལྷན་དུ་ལུག་གཉིས་ཀ་དེད་དེ་དེ་སྔོན་ཁོས་ལུག་གཉིས་ཀ་ཁྲིད ་ནས་སོང་མྱོང་བའི་བཤས་རའི་སྒོ་ཁར་སླེབས་མཚམས་ཁོས་འབྲེང་སྣེ་ནས་བཟུང་ནས་གོམ་པ་ལེན་མཚམས་བཞག་ཅིང་ཁ་ཆེ་རྒན་པ་དེར་ལྟར་བཞིན“ད་ནི་ཁྱོད་ཚོས་ཁྲིད་ཆོག་པར་འདུག  ང་རང་ནང་དུ་མི་འགྲོ”ཞེས་བཤད།
          ཁ་ཆེ་རྒད་པོས་གཞི་ནས་ཁ་བཤད་དོན་དུ་གནས་པའི་ངང་སྟོད་གོས་ ཀྱི་ནང་རོལ་ཞིག་ནས་སྒོར་མོ་བརྩེགས་མ་མཐུག་པོ་ཞིག་བླངས་ཡོང་སྟེ་བརྒྱ་ཤོག་ཅན་བཅུ་བརྩིས་ཏེ་ཁོར་སྤྲད་བྱུང༌། ཁོས་སླར་ཡང་རེ་རེ་བཞིན་བརྩིས་པ་ན་མི་མང་མི་ཉུང་བར་ཏག་ཏག་སྟོང་གཅིག་འདུག་པས། “རེད”ཅེས་བཤད།
          ཁ་ཆེའི་རྒད་པོ་དེས་ཁོ་ལ་ཀུ་རེ་རྩེ་བ་འམ་ཅི་ཡིན་མི་ཤེས་མོད་དགོད་བཞིན་དུ“དེ་རིང་ངས་ཁྱོད་ལ་ཚོང་བརྒྱབ་སྟེ་གྱོང་ཆེན་པོ་རེག་སོང”ཟེར། 
          ཁོ་རང་སྐད་ཆ་དེར་ཡིད་ཆེས་པའམ་སྒོར་མོ་དག་ལག་ཏུ་ཐོན་པའི་རྐྱེན་ཡིན་པ་གང་ཡིན་མི་ཤེས་མོད་དེ་མུར་སེམས་ཡོངས་སྐྱིད་སྣང་ཞིག་གིས་ཁེངས་པར་གྱུར།  སྐབས་འདིར་ཁ་ཆེ་བ་གཞན་པ་དེ་དག་གིས་ལུག་གཉིས་ཀྱི་སྐེ་ལས་འབྲེང་བ་བླངས་ཏེ་སྤྱང་ཀིའི་ཁ་ནང་དུ་ར་རོ་ཤོར་བ་བཞིན་ཕར་དྲུད་ནས་བུད་སོང་བས།   ལུག་གཉིས་ཀའི་མགྲིན་པ་ནས་འབའ་སྐད་དམ་འོ་དོད་འཛེར་བོ་ཞིག་འདོན་བཞིན་གཤང་ལམ་ནས་རིལ་མ་ཡང་ཐར་ཐར་དུ་འཐོར་བྱུང༌། ཚེ་སྲོག་དང་ལྡན་པ་གང་ཡིན་ཡང་འཇིགས་སྐྲག་ཆེན་པོ་གཉའ་རུ་སླེབས་པའི་དུས་སུ་ད་གཟོད་གཅིན་དང་རྟུག་པ་ཤོར་བ་ལ་ཡང་རང་དབང་མེད་པ་འདྲ། ཁོ་ཚོས་སྲོག་བསྡོས་ངང་ཕྱིར་འཐེན་བྱེད་ཀྱིན་འདུག་ཀྱང་གཉའ་རུ་བབ་པའི་བཟློག་མེད་ཀྱི་གཞན་དབང་བཙན་པོ་འདི་དག་ལ་ངོ་ཡ་བྱེད་པའི་ནུས་པ་ག་ལ་ཡོད། སྐད་ཅིག་དེ་ཉིད་ལ་བསམ་དབང་དང་གཟུར་དབང་མེད་པར་དཀར་ནར་ནར་ངང་ཁོའི་མིག་མདུན་ནས་དྲུད་དེ་ཕ་རོལ་གྱི་མི་མཐོང་བའི་གནས་ཤིག་ཏུ་ཡལ་བར་གྱུར་སོང༌།   
ཁོས་གཞི་ནས་སྦྲུལ་རོ་བཞིན་དུ་ས་རུ་རང་སར་བསྣར་ཡོད་པའི་འབྲེང་བ་དེ་ཚུར་བསྡུས་ནས་རུམ་དུ་བཅུག་རྗེས་བསམ་བློ་གཏོང་ཙམ་ཡང་མི་བྱེད་པར་ཕྱིར་རྒྱ་སྲང་གི་ཕྱོགས་སུ་སོང༌།  རྒྱ་སྲང་གི་འགྲུལ་བ་དག་ནི་སྔར་བཞིན་དུ་རང་རང་གི་དམིགས་པ་ཅི་ཡིན་པ་དེ་འཚོལ་བར་བྲེལ་བ་སྟེ།    མིགརིག་རིག་གིས་ཕྱོགས་ཀུན་ཏུ་ཅེར་གྱིན་འགྲོ་བ་ལས་ཁོ་རང་གི་དངོས་ཡོད་ལ་དོ་སྣང་ཅི་ཡང་བྱེད་ཀྱིན་མི་འདུག་ཀྱང༌། ད་ལྟ་ཁོས་སྒོར་བརྒྱ་ཤོག་ཅན་བཅུ་ཐམ་པ་སྟེ་སྒོར་སྟོང་གཅིག་དེ་ཨམ་ཕྲག་ཏུ་བཅུག་ཡོད་པས་ལུས་ལ་སྔ་ན་མེད་པའི་སྟོབས་ཤུགས་ཤིག་རྒྱས་ཡོད་པར་མ་ཟད་རྒྱ་སྲང་འདི་སྔར་བས་བཀྲག་མདངས་ཅན་དུ་གྱུར་ཅིང་གཡས་གཡོན་ན་འདུ་ལོང་བྱེད་པའི་མི་དག་ཀྱང་མིག་ནང་དུ་གསལ་ལྷང་ངེར་མཐོང་ཐུབ་ཅིང༌།   མི་དེ་དག་ཀྱང་རང་ཉིད་དང་གཅིག་འདྲ་ཡིན་པའམ་ཡང་ན་རང་ཉིད་ལས་ཀྱང་ཉམ་ཆུང་ཡིན་པ་ལྟར་སྣང༌།  ཁོ་རང་མི་ཚོགས་ཀྱི་ཁྲོད་ནས་འཚངས་ཏེ་ཐད་ཀར་སྒེར་ཚོང་ཁྲོམ་རའི་ནང་དུ་ཕྱིན། གཡས་གཡོན་གྱི་ཞོར་ཟས་འཚོང་མཁན་དང་ཤིང་ཏོག་འཚོང་མཁན།    ལྷམ་བཟོ་བ་དག་གིས་འཛུམ་པའི་སོ་བསྟན་ཏེ་ཁོ་རང་འགུགས་ཅི་ཐུབ་བྱེད་ཀྱིན་འདུག་ཀྱང་ཁོས་ནི་དེ་དག་ལ་དོ་སྣང་ཅི་ཡང་མ་བྱས་པར་ཤར་རེར“སྒྲོལ་མའི་སྐྲ་བཞར་ཁང”གི་ཕྱོགས་སུ་བསྙེགས་ནས་སོང༌། 
          ཁོ་རང“སྒྲོལ་མའི་སྐྲ་བཞར་ཁང”གི་ཉེ་སར་སླེབས་ལ་ཉེ་དུས་རང་དབང་མེད་པར་གོམ་པ་སྤོ་མཚམས་བཞག་ནས་ཅེར་ཏེ་སྡོད་དགོས་བྱུང༌། དེ་སྔའི“སྒྲོལ་མའི་སྐྲ་བཞར་ཁང”གི་ཁང་བ་དེའི་ནང་དུ་ད་ནི་ཚོང་རྫས་སྣ་ཚོགས་ཤིག་བཤམས་འདུག་ཅིང་སྒོ་ཀླད་ཀྱི་བྱང་བུ་ཡང་གསར་དུ་བརྗེ་སྟེ་རྒྱ་ཡིག་གིས“དུད་ཆང་ཚོང་ཁང་ཆུང་བ”ཞེས་པ་ཞིག་བཀལ་འདུག  ཁོས་རང་ཉིད་ཀྱིས་ཁང་བ་ནོར་བ་ཨེ་ཡིན་སྙམ་སྟེ་མགོ་བོ་དཀྱོགས་ཏེ་གཡས་གཡོན་གྱི་ཚོང་ཁང་དག་ལ་བལྟས་པ་ན། གཡས་གཡོན་གྱི་ཚོང་ཁང་ནི་སྔར་བཞིན་འདུག་པས་ཁང་བ་ནོར་བའང་མ་རེད་པས།  ཁོའི་གློ་བ་དེ་མ་ཐག་ཏུ་མིད་པའི་ཁར་འཚངས་པར་གྱུར་ཏེ་སེམས་ལ་བྲེལ་འཚབ་ཅིག་ལངས་བྱུང༌།  མྱུར་སྟབས་ངང་ཚོང་ཁང་དེའི་ནང་དུ་སོང་བ་ན་ནང་རོལ་གྱི་ཚོང་གཉེར་བ་ནི་ལོ་ན་དྲུག་ཅུར་སླེབས་ལོས་ཡོད་སྙམ་པའི་རྒན་མོ་ཞིག་རེད་ཅིང༌། ཁོ་མོས་ཁོ་མཐོང་བས་དེ་འཕྲལ་ཡར་ལངས་ཏེ་ཧ་ཅང་བཅོས་མའི་འཛུམ་ཞིག་སྟོན་བཞིན“ཅི་ཞིག་ཉོ་རྒྱུ་ཡིན”ཞེས་དྲིས་བྱུང༌།
          ཁོས་བྲེལ་འཚུབ་ཆེན་པོས་རྒྱ་སྐད་ཀྱིས“ཁོ་མོ་གང་ལ་བུད་ཐལ”ཅེས་དྲིས༌།
          རྒན་མོ་ཡང་ཅུང་ཡ་མཚར་བར་གྱུར་ཏེ“ཁྱོད་ཀྱིས་སུ་ཟེར་བ་ཡིན”ཞེས་དྲིས་བྱུང༌།
          ཁོས་གཞི་ནས་རང་ཉིད་འཚབ་དྲགས་ཏེ་སྐད་ཆ་གསལ་བོ་མ་བཤད་པ་ཤེས་ནས་ཅུང་ལྷོད་དུ་བབས་པའི་བཟོ་ལྟ་བསྟན་ནས“དེ་སྔོན་ཁང་བ་འདིའི་ནང་དུ་སྐྲ་བཞར་མཁན་གྱི་བུ་མོ་དེ་གང་ལ་སོང་བ་རེད”ཅེས་དྲིས།
          རྒན་མོས་ཀྱང་གཞི་ནས་སྐད་ཆའི་ཧ་གོ་སྟེ་དགོད་བཞིན་དུ“ཁོ་མོ་འདི་གར་སྐྲ་བཞར་མི་འདོད། གྲོང་ཁྱེར་དུ་འགྲོ་རྒྱུ་ཡིན་ཟེར”ཞེས་བཤད་བྱུང༌།
          ཁོ་རང་རེ་ཞིག་རང་ཉིད་ཀྱི་རྣ་བར་ཡང་ཡིད་མི་ཆེས་པ་ལྟར་གྱུར་སོང༌།  གོམ་གང་མདུན་སྤོས་ཀྱིས་དོན་དག་ལ་གསལ་ཁ་ཞིག་ལེན་དགོས་སྙམ་ནས་རྒན་མོའི་གདོང་ལ་བལྟས་ཏེ་“ཁོ་མོ་གྲོང་ཁྱེར་དུ་ཅི་བྱེད་དུ་སོང་བ་རེད་”ཅེས་ནན་ཏན་དུ་དྲིས།   ཁོའི་མིག་གི་མདངས་དང་སྐད་ཀྱི་གདངས་ལ་བལྟས་ན་ཕལ་ཆེར་རྒན་མོ་དེས་འགྲོ་རུ་བཅུག་པ་ལོས་ཡིན་སྙམ་པའི་ཉམས་ཤིག་མངོན་འདུག།    རྒན་མོས་ཀྱང་ཁོའི་རྣམ་འགྱུར་དེ་མཐོང་འཕྲལ་ཅུང་མི་དགའ་བ་ལྟར་གྱུར་སོང༌།“དེ་མི་ཤེས།”ཞེས་བཤད་རྗེས།  ཁོ་རང་ཚོང་རྒྱག་ཏུ་ཡོང་བ་མིན་པ་ཁོ་ཐག་ཆོད་པས་གདོང་གི་བཅོས་མའི་འཛུམ་དེ་ཡང་ཕྱིར་བསྡུས་ནས་ཅི་མི་སྙམ་པའི་ངང་ཕར་ཕྱོགས་ཤིག་ལ་བལྟས་ཏེ་བསྡད་སོང༌།
          ... ...
          ཚེ་རིང་སྒྲོལ་མ་དེ་ལྟར་སླར་ཡང་ཁོ་རང་དང་རྒྱང་དུ་གྱེས་སོང་བ་རེད།  དེ་ནས་བཟུང་ཁོས་ཁོ་མོ་དོན་དངོས་སུ་གང་ཞིག་ཏུ་བུད་སོང་བ་མི་ཤེས་ལ་ད་ལྟ་ཅི་ཞིག་ལས་ཀྱིན་པ་ཡང་མི་རྟོགས། ཁོས་ཤེས་པ་ནི་ད་དུང་རང་ཉིད་ཀྱིས་ཁོ་མོར་སྒོར་མོ་ལྔ་བརྒྱའི་དོམ་ཡང་ཆད་ཡོད་པ་ཡིན།  ཁོས་ཤེས་པ་ནི་རང་ཉིད་ཀྱིས་ཁོ་མོའི་རྣམ་དག་ལ་རྒྱུས་ལོན་བྱེད་མ་ཐུབ་པར་ནོར་འཁྲུལ་འཁང་སེམས་བཟུང་བ་དེ་རེད། དེ་བས་ཁོ་རང་ནམ་རྒྱུན་ལུག་རྫིར་གཅིག་པུར་སྡོད་པའི་སྐབས་སུ་སྣ་གླུ་འདི་བླངས་ནས་དེ་དུས་ཁོ་མོ་དང་སྟེས་དབང་གིས་ངོ་འཕྲད་པའི་དུས་ཀྱི་བྱུང་རིམ་ཞིབ་ཕྲ་དག་དང་ཁོ་མོས་ཁོ་ལ་ལྟ་  དུས་ཀྱི་ཡིད་སེམས་བསྲེགས་པར་བྱེད་པའི་མིག་འོད་དེ་ཕྱིར་དྲན་བྱེད་ཀྱིན་ཡོད།
                  “... ... 
                  རོགས་དྲན་པའི་ལོ་རྒྱུས་བཤད་ཀིན་མེད།།
                  རོགས་དྲན་པའི་ལོ་རྒྱུས་བཤད་རྒྱུ་ན།།
                  སེམས་ཡ་ཆུང་ནང་ལུང་སྟོང་བ་རེད།།
                  ཤ་མཆིན་པའི་ངོ་ཡ་འཁྱག་པ་རེད།།”                                                                                    
          བསེར་བུ་སྔར་བཞིན་ལྡང་གིན་འདུག་ཅིང་ཁོའི་མདུན་རོལ་གྱི་ཚགས་པར་རལ་བོ་དེ་ཡང་སྔོན་ལྟར་བསེར་བུས་བསྐྱོད་དེ་ཕར་ལ་འགུལ་ཙམ་དང་ཚུར་ལ་འགུལ་ཙམ་བྱས་ནས་གནས་གཅིག་ཏུ་  སྡོད་མི་ཚུགས་ལ་ཡང་གནས་གཞན་དུ་འགྲོ་མི་ཕོད་པ་ལྟར་འདུག  མཐའ་འཁོར་གྱི་རྩི་ཤིང་དག་ནི་བསེར་བུའི་ཁྲོད་དུ་ཕར་ཡོ་ཚུར་ཡོ་བྱེད་ཀྱིན་རྒྱང་རིང་གི་སུ་ཞིག་ལ་རེ་འབོད་བྱེད་པ་བཞིན་ཧ་ཅང་མི་གསལ་བའི་ཤུགས་གླུ་གྱེར་གྱིན་ཡོད་པས་ཁོས་སྣ་གླུ་ལེན་པའི་གདངས་ཀྱང་བསེར་བུའི་ཤང་སྒྲ་དང་རྩི་ཤིང་གི་ཤུགས་གླུའི་ཁྲོད་མི་གསལ་བར་གྱུར་ཏེ་ཕལ་ཆེར་རང་ཉིད་གཅིག་པུས་མ་གཏོགས་ ཐོས་མི་ཐུབ་པར་འདུག  རེ་ཞིག་ནས་ཁོས་སླག་པའི་གོང་བ་ནས་མགོ་བོ་ཕྱིར་ཕུད་དེ་སྨད་ཕྱོགས་ཀྱི་མཁའ་མཐའི་རྡུལ་ལོང་ཁྲོད་དུ་སྙེག་བཞིན་པའི་ཉི་མ་ལྟ་ཙམ་བྱེད་དུས་གཞི་ནས་ལུག་ཁྱུ་ཕྱིར་ཡུལ་ དུ་འདེད་རན་པ་རྟོགས་བྱུང༌། ཁོ་རང་དལ་དལ་ལྷོད་ལྷོད་ངང་དེ་མལ་ནས་ཡར་ལངས་བ་ན་ཕོ་བ་ཅུང་སྦོས་ཡོད་པ་དང་འདྲ་བས་སྐ་རགས་བཀྲོལ་ཞིང་སླག་པ་གཡང་ཤམ་བྱས་ཏེ་ཕར་ལྟ་ཚུར་ལྟ་ཞིག་གིས་མདུན་རོལ་གྱི་ཚགས་པར་རལ་བོ་དེ་མཐོང་བྱུང༌།  ཁོས་རྐང་བ་གཡོན་པ་ཚགས་པར་རལ་བོའི་སྟེང་དུ་སྤོས་ཏེ་ལག་པ་གཡས་པས་དེའི་ཕྱེད་ཙམ་བཤགས་ནས་ཕར་གོམ་པ་འགའ་སྤོས་མ་ཐག་གློ་བུར་བའི་རླུང་འཚུབ་ཅིག་ལྡང་བྱུང་སྟེ་ཁོ་རང་རྡུལ་ལོང་ཁྲོད་དུ་བཏུམས་ཤིང་རེ་ཞིག་མུན་འཐོམས་པ་ལྟར་གྱུར་སོང༌། འཚུབ་མ་ཕར་སོང་རྗེས་ཁོས་གཞི་ནས་སླག་པའི་གོང་བ་མར་ཕབ་སྟེ་རླུང་འཚུབ་ཀྱི་རྗེས་ཕྱོགས་སུ་བལྟས་ནས་ཚིག་པ་ཟ་བཞིན་དུ་བྱས་ཤིང་སླག་པ་སྤྲུགས་རྡེབ་ཅིག་བྱས་ནས་ཕར་སོང་སྟེ་ལྷབ་སེར་སར་ཙོག  ཁོ་རང་སར་ཙོག་སྟེ་གང་བྱུང་ངང་ཚགས་པར་དུམ་བུ་དེའི་ ལྟེབ་བཤིག་ནས་ལྟ་བཞིན་པའི་སྐབས་གློ་བུར་དུ་ཚེ་རིང་སྒྲོལ་མའི་མིང་དེ་ཁོའི་མཐོང་ལམ་མངོན་བྱུང༌།  ཚགས་པར་དུམ་བུ་དེའི་མར་ཞོལ་གྱི་ཟུར་ཞིག་ཏུ།   “... ...ནས་ཡོང་བའི་བོད་ཀྱི་གསར་བྱུང་གླུ་མ་ཚེ་རིང་སྒྲོལ་མའི་གླུ་དབྱངས་ཆེད་གཏོང་དགོང་ཚོགས་ཐོག་མ་དེ་གྲོང་ཁྱེར་ལྷ་ས་ནས་སྤེལ། ཚོགས་རར་ཞུགས་པའི་མི་གྲངས་སྟོང་ཕྲག་ལྔ་ལས་བརྒལ་ཡོད་པས... ...”ཞེས་པའི་བར་ནས་བཤགས་འདུག་ཅིང༌།  གཤམ་གྱི་ཟུར་དུ“... ...བླངས་པའི་གླུ་དབྱངས《ཕ་ཡུལ་གངས་ལྗོངས་སེམས་ཀྱི་གཞི་ན་ཡོད་》ཅེས་པར་མི་རྣམས་ཀྱིས་དགའ་བསུ་ཆེན་པོ་ཐོབ་སྟེ་དགའ་སྤྲོའི་ཐལ་མོ་རྡེབ་སྒྲ་ཚོགས་རའི་ནང་དུ་ཁེངས་པར... ...”ཞེས་པའི་མཚམས་ནས་བཤགས་འདུག    ཁོ་ལ་ཕྱི་ས་དོར་ཁོམ་ཡང་མ་བྱུང་བར་ཧར་གྱིས་ཡར་ལངས་ཏེ་སྔར་མལ་དུ་བརྒྱུགས་ནས་ཚགས་པར་རལ་བོའི་ཕྱེད་ཀ་དེ་ཨེ་མཐོང་ལ་ལྟ་དུས༌། དེ་ནི་སྔར་ནས་རླུང་འཚུབ་ཀྱིས་ཁུར་ཏེ་རྒྱང་རིང་གི་ས་རུ་སོང་ཚར་འདུག་ཅིང༌།    རྒྱང་རིང་གི་མིག་གི་མཐོང་ལམ་དུ་མི་ཚུད་ཙམ་ན་རླུང་འཚུབ་ཀྱི་རྡུལ་ལོང་ཁྲོད་དུ་དཀར་ལྷབ་ལྷབ་ངང་ལྡིང་འཁོར་བྱེད་བཞིན་རིམ་གྱིས་ཡལ་ལ་ཉེ་བ་མཐོང་ངོ༌།།