རང་མོས་སྙན་ངག《སྤྲེལ་ལོར་བྲག་དཀར་སྤྲེལ་རྫོང་ལ་ཕྱིན་པ》།

                      སྙིང་ཆུང་འཕར་ཞིང་ལྡེམ་པའི་འདབ་ལོ་མེ་ཏོག་གི་ཆུ་བོ་ཇི་བཞིན
                      མཐོ་རིས་ལ་ངོས་སུ་བཞུར་བའི་རྐང་ལམ་ཕྲ་མོས་ཤག་ཤག་དྲངས

                      ལོ་ངོ་ཁྲི་སྟོང་ལ་འབར་བའི་ཞབས་རྗེས་ཀྱི་ནེམ་ཤ་ལག་མཐིལ་ནས་བཞད་ཆེད
                      ངས་སེམས་པ་སྐད་ཆའི་ལྟག་རྒྱབ་ལ་བཞག་སྟེ་ནམ་མཁར་ཉན
                      ངས་རུས་པ་ཁྱོར་བ་གང་གི་མཆོད་མེ་བཏགས
                      བཀའ་དྲིན་ཆེ    ལས་སྐལ་གྱིས་དགའ་དགོད་དང་མཆི་མའི་རྫི་བོར་བསྐོས

                      གནས་མཇལ་བའི་པང་གདན་གྱི་རལ་ཁའམ་དམའ་ས་ཞིག་ནས
                      རྡོ་བའམ་རྡོ་ངོས་སུ་འབུར་བའི་བསླུ་བྲིད་ཀྱི་སྒྲ་དབྱངས་སེར་བོ་ཐོས་སམ
                      གྲྭ་བ་དེའི་གཟན་ལས་ཀྱང་དམར་བའི་གཏམ་རྒྱུད་ཀྱི་སྒྲོ་གཤོག་ཟད་པོ་མཐོང་ངམ
                      དར་ལྕོག་གི་ཚུལ་གྱིས་འགྲེང་ཞིང
                      བཀྲ་ཤིས་ལ་རྩེ་ནས་སླར་ཡང་ཕྱི་མིག་བལྟས