ཚིགས་བཅད་སྙན་ངག《མཚོ་བསྟོད་མེ་ཏོག་ཆར་འབེབས》།

                                                  ཐིག་ལེ་མཆོག་མའི་མཛེས་སྡུག་ཟླ་བའི་བཞིན།།
                                                  འགོག་མེད་འཛིན་པའི་བཞིན་གྱི་སྣོད་བསྐྲུན་ཕྱིར།། 
                                                  གདོང་བཞིའི་བཀའ་བཞིན་བི་ཤོ་ཀརྨ་ཡིས།།
                                                  གནམ་སྔོན་བཞུས་པ་སྒོར་ལེར་འཁྱིལ་འདྲ་བའི།།
                                                  གངས་ལྗོངས་ནོར་འཛིན་བུ་མོ་སྡུག་གུ་མའི།།
                                                  དཔྲལ་བའི་གཞུག་གཡུ་ཁྲི་ཤོག་རྒྱལ་མོ་ཞེས།།
                                                  གྲགས་སྙན་ཁེངས་ལྡན་དབྱར་སྐྱེས་རྒོད་པོའི་སྒྲས།།
                                                  ཕྱོགས་ཀྱི་གླང་བོའི་རྣ་བའང་དོན་ལྡན་བྱས།།
                                                  ཕུལ་བྱུང་རིན་ཆེན་ཀླུ་ཡི་བང་མཛོད་ན།།
                                                  ཡོད་དགུ་ལུས་ལ་བརྒྱན་ཡང་མི་ཚིམས་པར།།
                                                  བར་སྒང་ཁམས་ཀྱི་མཛེས་རྒྱན་ཉི་ཟླ་ཡང་།།
                                                  འཕྲོགས་ནས་རྣ་ལུང་བྱས་འདི་ཨེ་མ་མཚར།།
                                                  སྙིང་མེད་མ་ཡིན་རྦ་ཀླུང་འཁྲུགས་པའི་དབུས།།
                                                  སྙིང་རི་དེ་ཝ་ཤེལ་དཀར་ལྷུན་པོ་བརྗིད།།
                                                  ཁྲེལ་མེད་མ་ཡིན་ལྷན་སྐྱེས་བཻཌཱུ་མདངས།།
                                                  ནམ་ཡང་འགྱུར་མེད་ཆོས་དབྱིངས་མཛའ་མོར་བསྡེབས།།
                                                  རྣམ་རིག་རྟུལ་བོ་མ་ཡིན་ཉི་ཟླའི་འོད།།
                                                  ཉིན་མཚན་གཉིས་ཀར་གསེར་དངུལ་སྒྲོན་ཐོགས་པས།།
                                                  མུན་ནག་ཡོལ་བས་བསྒྲིབས་པའི་ཤེས་བྱའི་གནས།།
                                                  རི་གླིང་འབུམ་གྱི་གཟུགས་མཚར་གསལ་པར་བྱས།།
                                                  དེ་ལ་ཤིས་བརྗོད་ལྷ་ཡི་མེ་ཏོག་ཆར།།
                                                  སྙུག་ཅེས་རིག་སྔགས་འཕྲུལ་གྱིས་ཕབ་པ་འདིས།།
                                                  གཡང་མཚོ་ཕྱུག་མོ་མི་ཉམས་རྒྱས་པ་དང་།།
                                                  བོད་དཀར་རྣམ་དཔྱོད་ཉི་ཟླ་གསལ་བར་ཤོག།