གངས་ལྗོངས་ལགས། ངས་ཁྱེད་ལ་ཡང་གཅིག་འདྲི།

གངས་ལྗོངས་ལགས།  ངས་ཁྱེད་ལ་ཡང་གཅིག་འདྲི།

                                                                                                      ཡུམ་ཚེ་རིང་།

ཀ

                             ཡུན་རིང་ལོ་རྒྱུས་སུ་གབ་མྱོང་ལ
                             ད་དུང་ལོ་རྒྱུས་སུ་གྱུར་བ       
                             ཁྱོད་ཀྱི་ལྐོག་གྱུར་དང་མཚར་སྡུག་གིས་མི་རྣམས་ཀྱི་ཐེ་ཚོམ་དང་དྲི་བ་མང་པོ་རང་སྟེང་ལ་བཀུག
                             ངས་བར་སྣང་དུ་རྒྱང་བཞུད་བྱེད་པའི་ཚན་རྩལ་པ་མཐོང་མྱོང
                             ངས་ཆུ་བོ་རུ་རྐྱལ་རྩལ་ངོམ་པའི་མཚོ་འགྲུལ་རྟོག་དཔྱད་པ་ཐོས་མྱོང
                             ཡིན་ཡང       ངས་ཡར་ཀླུང་གཙང་བོར་མཆུ་འདབ་སྦྱོར་བའི་ནང་ལོག་ཡུལ་སྐོར་བ་ཐེངས་དང་པོར་ཐོས
                             ངས་པོ་ཏ་ལའི་མདུན་དུ་རྐྱོང་ཕྱག་བཙལ་བའི་ཕྱི་གླིང་མཇལ་སྐོར་བ་ཐེངས་དང་པོར་མཐོང
                             འདི་ནི་ཁྱེད་ཀྱི་གང་ཞིག་ནས་བྱུང་བའི་གཟི་བརྗིད་རེད
                             གངས་ལྗོངས་ལགས  ངས་ཁྱེད་ལ་ཡང་གཅིག་འདྲི

ཁ

                             ཚན་རྩལ་གྱི་བུ་ཆུང་ཉི་ཟླའི་མཆོང་ཟམ་ན་རྒྱུ་ལ
                             རྟོག་དཔྱོད་ཀྱི་རུ་ཁག་གིས་རྒྱ་མཚོའི་རྦ་རླབས་གཅོད་བཞིན་པའི་དེ་རིང
                             གནའ་བོའི་ཅོང་རྙིང་གིས
                             གཉིད་ལས་མ་སད་པའི་མི་རིགས་ཤིག
                             ད་དུང      རྗེས་ལུས་ཀྱི་ལམ་ན་འཕག་འཚག་བྱེད
                             ཚན་རྩལ་གྱི་རྡོག་འོག་ན
                             རྗེས་ལུས་པ་འཆི་ལམ་ཉག་གཅིག
                             ཁྱེད་རང་འཆི་ཨེ་འདོད
                             གངས་ལྗོངས་ལགས      ངས་ཁྱེད་ལ་ཡང་གཅིག་འདྲི

ག

                             ལེ་དབར་སྟོང་གི་ཕ་རོལ་ན
                             ཁྱེད་རང་ཡི་གེའི་རི་མོར་ཕབ་སྟེ
                             ཀུན་གྱིས་ཡིད་སྨོན་བགྱིད་བཞིན་པ་བདེན་མོད
                             འོན་ཀྱང     ལེ་དབར་སྟོང་གི་ཚུ་རོལ་ན
                             ཁྱེད་རང་འཇིག་རྟེན་འདི་དང་བར་ཐག་ཧ་ཅང་རིང་བ་ག་ལ་རྫུན
                             མུན་ནག   ཀླ་ཀློ   མཐའ་འཁོབ
                             ཁྱེད་ཀྱི་ལུས་ན་མཚང་མིང་གི་བུ་ཡུག་འཚུབ
                             ང་རྒྱལ   ཕྲག་དོག  ནང་དམེ
                             ཁྱེད་ཀྱི་རྩ་སྦུབས་སུ་ནང་རུལ་གྱི་དུག་ཆུ་འཁོལ
                             ཁྱེད་ཀྱིས་ནམ་ཞིག་དུས་རབས་མདུན་པར་ལྟ་ཐུབ
                             མཚར་སྡུག་ལྡན་པའི་ལོ་རྒྱུས་ཀྱི
                             ད་དུང    ཁྱེད་རང་ནམ་ཞིག་འགྱིང་ཐུབ
                             གོ་ལའི་རྩེ་མོ་ནས་འཕྲེད་དུ  
                             གངས་ལྗོངས་ལགས     ངས་ཁྱེད་ལ་ཡང་གཅིག་འདྲི

ང

                             ཁྱོད་རང་ལོ་རྒྱུས་ལས་བུད་པའམ
                             མ་འོངས་བར་སྐྱོད་པར
                             མི་ཅི་འདྲ་མང་པོས་རེ་ཞིང་སྒུག་ཡོད་པ་ལ་ཨང
                             གོ་ལའི་ཤར་ཕྱོགས་ཀྱི་བགྲང་ལས་འདས་པའི་ལྐོག་གྱུར
                             ཁྱེད་ཀྱི་རྡོག་འོག་ན་བཅུག་ཡོད་པས
                             ཁྱེད་རང་མདུན་དུ་སྐྱོད་པའི་གོམ་པ་གཅིག
                             ཕལ་ཆེར་འཛམ་གླིང་ཧྲིལ་བོའི་རྟོགས་སད་ཅིག་ཡིན་ནའང་ཐང
                             ཁྱེད་རང་ནམ་ཞིག་མདུན་དུ་སྐྱོད་རྒྱུ
                             གངས་ལྗོངས་ལགས   ངས་ཁྱེད་ལ་ཡང་གཅིག་འདྲི