རྐང་ཐང་བའི་རང་མོས་སྙན་ངག་སྟེ་ཆར་བ།

ཆར་བ།

                                                                                     རྐང་ཐང་བ། ནུབ་བྱང་མི་རིགས་སློབ་ཆེན།

                               ཆར་བ་འབབ་ཀྱིན་པའི་སྐབས་སུ
                               ཚོད་ཚོད་དུ   འཚུབ་ཆ་ཞིག་ལངས
                               མཚན་གང་བོར་ཆང་ལ་འཐབ་རེས་བྱས་པའི་གྲོགས་པོ་འདི་གཉིས
                               གཡས་འཕག་གཡོན་འཕག་གི་འགྲེ་ལོག་བར་ནས
                               སོས་དལ་བའི་སྔུར་གླུ་ཡང་མོ་ཞིག་གཏོར་གྱིན་འདུག

 
                               གང་ཞིག་ལ་འགྲོ་དགོས་པའི་དྲན་ཚོད་ཀྱིས
                               ཚོད་ཚོད་ལ་ལམ་ཆས་རེ་བརྒྱབས་ཏེ་སྒེའུ་ཁུང་ལ་བལྟས
                               སྒེའུ་ཁུང   སྐྱོ་བའི་མཆི་མ་བཞུར་བ་ཡིན་ནམ
                               ཚ་བའི་རྔུལ་ཆུ་ཟེགས་པ་ཡིན་ནམ
                               ངོ་གདོང་དུ་མིག་ཆུ་སྤར་མོ་གང

 
                               སྲང་ལམ་དྲན་ན་དངངས་སྐྲག་ཅིག་ཡིན་ཡང
                               མཁའ་དབྱིངས་དྲན་ན་སྐྱོ་བོ་ཞིག་ཡིན་ཡང
                               གཉའ་གོང་གི་ཟོ་བར་ཆར་ཆུ་རེ་བཟེད་དེ
                               གང་ཞིག་ཏུ་བགྲོད་དགོས་པ་ཁོ་ཐག་རེད

2011.9.16ལན་གྲུ་ནས།