སྤང་གཤོང་གི་མཆི་མ་སྐམ་དུས་མེད།

སྤང་གཤོང་གི་མཆི་མ་སྐམ་དུས་མེད།  

                                 ཆོས་ཤུལ་ཚང་།

　　　　རྩྭ་ཐང་གི་འཕང་བ་རེ་ནས་བདག་གིས་རྨི་ལམ་གང་མང་བཏང་མྱོང
　　　　རྨི་ལམ་ངོགས་ཀྱི་འོ་སྦྱོར་རེ་རེ
　　　　ད་ལྟ་ལྷག་ཏུ་དྲན་འོང
 

　　　　ཁྱོད་གཅིག་པུས་བཞེངས་པའི་དག་ཞིང་རེ
　　　　དུད་སྤྲིན་ཁྲོད་ཡལ་གྱིན་པའི་སྣང་བ་ཞིག
　　　　མལ་ཁང་གི་ཁྲིས་སུ་འབྱོར་འོང
　　　　བདག་གི་རྩྭ་ཐང  　སེམས་ཀྱི་རྩྭ་ཐང
　　　　ཕྱིར་མིག་རེ་རེ་ཁྱོད་ལ་གཏོད་དུས
　　　　མཚན་མོ་གཉིད་འདོད་དམ

　　　　བདག་གིས་གནའ་གཏམ་བཤད་མྱོང་བའི་ཐག་རིང
　　　　དུས་ཚོད་ཀྱི་འཁོར་སྐྱོད་རེ
　　　　ཁྱོད་ཀྱི་ཉེ་འཁོར་དུ་འཁྱུད་ཐེངས་རེ་རེ
　　　　བདག་གིས་ད་དུང་རྨི་ལམ་གཏོང་འདོད་ཨང
 

　　　　ས་སྲོད་ཀྱི་ཕྱོགས་སུ་བསྲིངས་པའི་གཞིས་ཀ
　　　　ཁྱོད་རང་ཧ་ཅང་ཆུང
　　　　ཧ་ཅང་ཆུང་བའི་ཁྱོད་རང
　　　　ལྷ་ས་གཅིག་པུའི་མིང་བྱང་ལས་ཅི་ཞིག་འདེགས་ཐུབ
 

　　　　ཉི་མའི་གྲོང་དུ་སྙེག་མྱོང་བའི་ཁྱོད་རང
　　　　ཕྱི་རློན་ནང་རློན་གྱི་བགྲོད་དུས
　　　　ཚེ་སྲོག་གི་འོད་ཐིག་རེ་རེ
　　　　རྩྭ་རྐང་གཅིག་གི་གུད་དུ་འཁྱུད
 

　　　　ང་རང་དལ་གྱིས་ཁྱོད་ཀྱི་གཞིས་ཀ་དེར་འཐིམ་འོང
　　　　གསང་སྟབས་ངང
　　　　ཁྱོད་ཀྱི་ལང་ཚོའི་གསེང་དུ་འཐིམས་ཡོང