གནས་རྙིང་རྒྱང་མཇལ།（ལྷུག་རྩོམ）

སྡུག་ན་སྐད་ངན་མི་འདོན་ཞིང་སྐྱིད་ན་སྐྱོ་ཤས་ཆེ་བ།

--《བཀའ་གདམས་ཆོས་འབྱུང་གསལ་བའི་སྒྲོན་མེ》ལས་བཏུས།

  ཞོགས་པའི་ཉི་ཟེར་སེར་ལམ་མེར་གཙང་བོའི་ལྷོ་ཡི་ཁ་བ་ཆགས་པའི་རི་རྩེར་འཕྲོས་པ་དང་མཉམ་དུ། ང་གཙང་ཆུ་བྱང་ངོས་ཀྱི་རྔ་ཆེན་ལ་བརྒྱུད་ནས་བྲག་ཡེར་པར་བསྐྱོད་པའི་རླངས་འཁོར་ནང་བསྡད་ཡོད།  ཡེར་པ་གྲོང་ཚོའི་མདའ་ལ་བསླེབས་པ་ན། ལུང་བའི་ཕུ་ན་བྲག་རོང་ལིང་ངེ་བ་ཞིག་མཐོང་ལ།  དེའི་ལྡེབས་སུ་དར་ལྕོག་བར་མེད་དུ་གཡོ་བཞིན་འདུག ངའི་སེམས་པའང་རི་ལྡེབས་ཀྱི་དར་ལྕོགས་དང་མཉམ་པོར་བར་མེད་དུ་གཡོ་བཞིན་འདུག

བྲག་ཡེར་པ་གླེངས་མ་ཐག  མི་རྣམས་ཀྱི་བློ་ངོར་དཔའ་བོ་ཞིག་གི་སྣང་བརྙན་འཁོར་འོང་སྟེ། “རྟ་དཀར་པོ་ལ་སོལ་བ་བྱུགས། གོས་ཕྱི་ནག་ནང་དཀར་གྱོན། ལྷ་ས་རུ་འོངས་པ་དང་། བཙན་པོས་རྡོ་རིང་གི་ཡི་གེ་ཀློག་པའི་སྐབས་སུ་འགྲིག་པས། ཕྱག་བྱེད་པ་ལྟར་བྱས་ཏེ་མཐེབ་ལྟོང་སྦྱར། བདེན་པ་བདར་ཏེ་བརྒྱབ་པས་ཁོའི་བྲང་ལ་ཕོག དེ་མ་ཐག་བྲོས་ཏེ་གྲིབ་ཀྱི་མ་གདོང་གི་ཆུ་ལ་བཤན་པས་སོལ་བ་དག་སྟེ་རྟ་དཀར་པོར་སོང་། གོས་ཕྱི་ནང་བསྒྱུར……ཞེས་ལག་པ་གཉིས་ཀྱིས་མདའ་ལ་འཇུས་ཤིང་།  ཡང་ན་ལོ་གསུམ་གྱིས་གསོད་པ་སྔས། ཡང་ན་ལོ་གསུམ་གྱིས་འཕྱིས་ཞེས་སྨྲ་བའི་མུ་ལ་ལྔ་བའི་ལམ་དུ་གྱུར”པའི་བཙན་པོ་ལྷ་སྲས་དར་མ་འགྲོང་མཁན་གྱི་ལྷ་ལུང་དཔལ་གྱི་རྡོ་རྗེའི་ཉམས་འགྱུར་དེ།  རྒྱལ་དབང་ལྔ་བ་ཆེན་མོས་གསར་བཞེངས་གནང་བ་དང་།  ལོ་རྒྱུས་ཀྱི་བྲག་ཅའི་ཀློང་ནས་མི་རྣམས་ཀྱིས་ད་དུང་དཔའ་བོ་དེ་དང་དེའི་མདའ་མོའི་གསིར་སྒྲ་བརྗེད་མེད།  ངོ་མ་མི་རྣམས་ལ་ཁག་ཅི་ཡོད།  འོ་སྐོལ་ཚོར་ཆོས་སྲིད་གཉིས་ཀ་བདག་གིར་བཞེས་པའི་མཁས་ཆེན་གྱི་གསུང་ཉིད་ཚད་མར་འཛིན་པའི་སྐྱེས་བུ་ག་ཚོད་ཡོད།  ཡིན་ནའང་། ང་ཚོས་ལོ་རྒྱུས་ཀྱི་མེ་རོའི་གསེབ་ཏུ་ལག་པ་བརྐྱངས་ནས་དོན་དངོས་ཀྱི་དྲོད་ཐིག་ལ་རེག་སྐབས།  ལོ་རྒྱུས་ལ་བསྐྱར་དུ་ངོས་འཛིན་དང་བསྐྱར་དུ་གདེངས་འཇོག་བྱེད་འོས་པའི་སྤོབས་པ་རེ་སྐྱེས་འོང་གི་འདུག་ལ།  “དཔའ་བོ”དེ་ནི་བཟང་ངན་གང་ལྟར་ཡང་རང་གི་བཙན་པོ་འགྲོང་མཁན་གྱི་ལག་དམར་རམ་མདའ་མོ་གཅིག་གིས་བོད་ཁམས་སིལ་བུར་གཏོར་མཁན་གྱི་གཏེ་བོ་ཞིག་མིན་པའི་གདེང་ཚོད་ཀྱང་བྲལ་ཏོ། །དེ་ལ་མཁར་རྨེའུ་བསམ་གཏན་ལགས་ཀྱིས་༡༩༧༦ལོར་ཏུང་ཧོང་ཡིག་རྙིང་གི་གྲས་ནས་རྙེད་པར་གྲགས་པའི། “ལྷ་སྲས་དར་མ་མན་ཅད་དང་། །འོད་སུས(སྲུང)དབོན་སྲས་མན(ཡན)ཆད་དུ། །སྤྱིར་ནི་དར་ཅིང་རྒྱས་ཅེས(ཆེས)པས། །མྱིར་སྐྱེས་ཀུན་ཀྱང་འགྲུབ་པར་བཞེད”ཅེས་པ་འདི་དུས་རབས་དགུ་བའི་ཕྱེད་གཉིས་པའི་ནང་བྲིས་པ་ཡིན་པར་ངོས་འཛིན་བྱུང་བ་ལས་ཀྱང་འོ་སྐོལ་ཚོར་སྔོན་མེད་ཀྱི་བློ་སྐྱེད་དང་བསམ་གཞིག་གི་སྟོང་ཆ་རེ་སྟེར་སྲིད་དོ། །

  ལམ་གྱ་མ་གྱུ་ཞིག་གི་རི་ལམ་བརྒྱུད་མཐར་གཞི་ནས་བྲག་ཡེར་པ་དགོན་འདབས་སུ་བསླེབས། ཡུལ་གཞན་ན་མཐོང་དཀོན་པ་དང་མཐོང་མ་ཐག་ཅུང་ཟད་ངོ་མཚར་བའི་སྣང་བ་སྟེར་ལ།  རང་བྱུང་གཤིས་ཀྱིས་གྲུབ་པའི་བྲག་ཕུག་དག་གིས་སྒྲུབ་པ་ཉམས་སུ་ལེན་མཁན་མང་བོ་ཞིག་གནས་འདིར་ངང་གིས་བཀུག  ཟ་ཧོར་རྒྱལ་པོའི་སྲས་སུ་འཁྲུངས་ནས་རྗེས་སོར་མངའ་རིས་སྟོད་དུ་ཕྱག་ཕེབས་པ་བོད་དུ་ལོ་བཅུ་བདུན་བཞུགས་པའི་ཇོ་བོ་རྗེ་མར་མེ་མཛད་ཞུ་བའང་དེའི་གྲས་ཀྱི་གཅིག་ཡིན།   ཐོག་མར་ཁོང་གི་རྟེན་འབྲེལ་ཕུག་པར་མཇལ་དུས།  ཕྱིས་སུ་རྗེ་ཙོང་ཁ་པར་རྟེན་འབྲེལ་གྱི་དགོངས་པ་རྣལ་མ་འཁྲུངས་པའང་ཕུག་པ་དེ་ལ་འབྲེལ་བ་ངེས་ཅན་ཞིག་ཡོད་སྲིད་པའི་འཆར་སྣང་བྱུང་ལ།   སྐྱེས་ཆེན་རིམ་པར་བརྒྱུད་པའི་བྱིན་རླབས་ཀྱི་ཚན་ཁ་མ་ཉམས་པའི་དྲོད་རྒྱུན་དེ་ངའི་ལུས་ཀྱི་དབང་རྩ་ཐམས་ཅད་ལ་ཁྱབ་པར་གྱུར་ན་ཅི་མ་རུང་སྙམ་པའི་དད་འདུན་ཡང་འཕྱུར། བསྡད་ཀྱིན་བསྡད་ཀྱིན་བྱ་བྱེའུའི་གསུང་སྙན་དང་བྲག་ཆུའི་འབབ་དབྱངས་ཙམ་ལས་ཏིང་འཛིན་གྱི་གཉིད་ལས་དཀྲོགས་མཁན་མེད་པ་ལྟ་བུའི་གནས་དེ་ལ་གོ་བ་གསར་པ་ཞིག་ལོན་སོང་།   ཡང་གཅིག་བྱས་ན།  ལོ་རྒྱུས་ཀྱི་བྱུང་བ་དེ་ལས་ང་ཚོ་བོད་པ་རྣམས་ནི་ཏག་ཏག་ལ་ཕྱི་འོང་ལ་དད་འདུན་ཟབ་ཟིང་།  ཕྱི་འོང་གི་རིག་གནས་དེ་རང་ཉིད་ཀྱི་ཁྱད་ཆོས་དང་ལྡན་པའི་རིག་གནས་སུ་བསྒྱུར་ཕོད་པའི་རང་གཤིས་ཤིག་ཀྱང་རྙེད་དུ་ཡོད།   ཏག་ཏག་ལ་རང་ཉིད་ཀྱི་ཁྱད་ཆོས་དང་ལྡན་པའི་རིག་གནས་འདིས་འཛམ་གླིང་གཞན་ཀུན་ཁ་རོག་གེར་བསྐྱུར་བའང་ཡོད།

  རྟེན་འབྲེལ་ཕུག་པར་བཞུགས་པའི་དགེ་སློང་ན་ཡོལ་ཞིག་ལ།   ཇོ་བོ་ཡབ་སྲས་ཀྱི་གསང་ཆོས་བཀའ་གདམས་གླེགས་བམ་དུ་གྲགས་པ་སྟེ།  ནམ་རྒྱུན་བཀའ་གདམས་ཕ་ཆོས་བུ་ཆོས་ཟེར་བའི་སྐོར་ལ་བཀའ་འདྲི་ཞུས་པ་ན།  ཁོང་གིས་དགྱེས་ཉམས་དང་བཅས་མཛུབ་