༄༅། །བོད་ཀྱི་ཡི་གེ་ལ་བསྔགས་པ་ལྷག་བསམ་སྤྲིན་གྱི་སྒྲ་དབྱངས།

སེམས་མེད་ལགས་ཀྱང་མཁས་པའི་སྤྱན་ཟུང་གི་བདུད་རྩི།།
སྨྲ་བ་མེད་ཀྱང་སྙན་འགྱུར་སྒྲ་འཛིན་གྱི་བཅུད་ལེན།།
ཉི་ཟླ་མ་ཡིན་ལུགས་གཉིས་ཀུན་གསལ་གྱི་སྒྲོན་མེ།།
བོད་ཀྱི་ཕྱི་མོའི་ཡི་གེ་སོ་བཞི་རང་ལགས་སོ།།

འདི་ཉིད་གངས་རིའི་ལྗོངས་སུ་འཁྲུངས་པ་ཡི་སྔ་རོལ།།
གར་ནག་རྒྱ་ཡིས་བོད་ཡུལ་མུན་གླིང་ཞེས་སྨྲ་ཞིང་།།
རྐང་གཉིས་མི་སྐད་སྨྲ་བའི་བྱོལ་སོང་ཞེས་འཕྱ་བ།།
སྒྲོ་བཏགས་མ་ཡིན་ལོ་རྒྱུས་མེ་ལོང་དུ་གསལ་ལོ།།

མཚན་ཙམ་གྱིས་ཀྱང་སྲིད་ཞིའི་གདུང་བ་ཀུན་སེལ་བའི།།
ཆོས་རྒྱལ་སྲོང་བཙན་ཉིན་བྱེད་རྟ་བདུན་གྱི་དབང་པོ།།
འཛུམ་པའི་གཟི་འོད་ཕྱོགས་མེད་རྒྱལ་ཁམས་སུ་ཤར་ཚེ།།
བོད་ཡུལ་སཱ་ལའི་སྨན་ལྗོངས་འཛམ་གླིང་དུ་གྲགས་སོ།།

ཁམས་ཀྱི་གཞོང་པ་བཅུ་གསུམ་གནམ་བསྐོས་ཀྱི་ཞིང་ས།།
ས་ཆེན་དབང་དུ་བསྒྱུར་མཛད་འཁོར་བསྒྱུར་གྱི་མི་དབང་།།
མཛའ་བའི་གཉེན་དུ་བསྡེབས་པས་འཛམ་གླིང་གི་སྐྱེ་བོས།།
ས་ན་གནས་པའི་ཉི་ཟླ་ཟུང་གཅིག་ཅེས་གྲགས་སོ།།

དེ་ནས་བློ་གྲོས་མེས་པོ་ཐོན་མི་ཡི་ཟླ་ཤེལ།།
སྨག་རུམ་དགུ་བརྩེགས་སེལ་བའི་འོད་སྣང་དུ་ཤར་ཚེ།།
སྲིད་ཞིའི་གཡུལ་ལས་རྒྱལ་བའི་བཀྲ་ཤིས་ཀྱི་དགེ་མཚན།།
གཅིག་ཏུ་རྫོགས་པ་མཚན་མོའི་མགོན་པོ་རང་ཡིན་ནོ།།

གང་གིས་གསར་མཛད་སྔར་མེད་ཡི་གེ་ཡི་གྲུ་ཆེན།།
རྒྱ་བོད་ལོ་པཎ་ངག་གི་ཆུ་གཏེར་གྱི་ཀློང་དུ།།
ཡང་ཡང་བསྐྱོད་པས་ལྔ་རིག་དགོས་འདོད་ཀྱི་ནོར་བུ།།
གངས་རིའི་ལྗོངས་འདིར་སྤུངས་པ་སུ་ཞིག་གིས་གཞལ་ནུས།།

ལོ་ངོ་བརྒྱ་ཕྲག་བཅུ་གསུམ་ལྷག་ཙམ་གྱི་རིང་ལ།།
བྱོན་པའི་མཁས་མཆོག་གནམ་གྱིས་ས་ཆེན་འདི་བཀབ་འདྲ།།
གྲངས་སུ་ལྟ་ཅི་རེ་རེའི་ལེགས་གསུངས་ཀྱི་གཙུག་ལག།
རི་རྒྱལ་ལྷུན་པོར་བསྙེམས་པའི་རྣམ་ཐར་ནི་མཚར་རོ།།

གསེར་གྱི་ཐུར་མ་རྣོན་པོ་འཁྱུག་འཁྱུག་གི་གར་གྱིས།།
ཚིག་དོན་གནད་ཀྱི་མདུད་པ་ལྷུག་ལྷུག་ཏུ་བཀྲོལ་བ།།
རང་བཞིན་རྐྱེན་དང་རྣམ་འགྱུར་མཛེས་མཛེས་ཀྱི་སྒྲ་རིག།
བོད་ཀྱི་ཡི་གེ་འདི་ལ་གསལ་གསལ་གྱིས་རྫོགས་སོ།།

མངོན་རྗེས་ཚད་མའི་ནམ་མཁའ་རབ་ཡངས་མའི་གཞི་ལ།།
ལུང་རིགས་གཏན་ཚིགས་ལྷུན་པོའི་མདའ་མོ་དེ་སྦྱར་ནས།།
ཕས་རྒོལ་བྱེ་མར་འཐག་པ་ངེས་དོན་གྱི་སྒྱུ་འཕྲུལ།།
ཡི་གེ་རྡོ་རྗེའི་ཁམས་ཀྱི་རང་སྟོབས་སུ་རྫོགས་སོ།།

སྡེ་བཞིའི་དཔལ་མང་བརྒྱ་བྱིན་གཞུ་མཆོག་གི་རི་མོ།།
བརྟན་གཡོ་སྣོད་བཅུད་མཛེས་བྱེད་བཅོ་བརྒྱད་སོགས་བཟོ་རིགས།།
མཛེས་ཤིང་སྡུག་ལ་ཡིད་འོང་སྒྱུ་མ་ཡི་ལྟད་མོ།།
བོད་ཀྱི་ཡི་གེ་འདི་ཡི་རྫུ་འཕྲུལ་རང་ཡིན་ནོ།།

བཞི་བརྒྱ་རྩ་བཞིའི་ནད་འཇོམས་འཆི་མེད་ཀྱི་བདུད་རྩི།།
གསོ་རིག་ཡན་ལག་བརྒྱད་ལྡན་གཞུང་བཟང་གི་ཆུ་བོ།།
རླབས་ཕྲེང་བརྒྱ་ལྡན་གངས་ཅན་ནོར་འཛིན་གྱི་མཐིལ་ལ།།
དྲངས་པའི་ཡུར་བ་ཡི་གེ་འདི་ཉིད་རང་ཡིན་ནོ།།

ཕུང་པོ་ཁམས་དང་སྐྱེ་མཆེད་ཀུན་ར་ཡི་མེ་ཏོག།
སྣ་ཚོགས་བཀྲ་བའི་སྐྱེ་འཇིག་ལེགས་ཉེས་ཀྱི་རང་བཞིན།།
ལེགས་སྟོན་བརྒྱད་ཁྲི་བཞི་སྟོང་ཆོས་ཉིད་ཀྱི་གཏན་ཚིགས།།
ནང་དོན་རིག་པ་དེ་ཡང་འདི་ཉིད་ལས་བྱུང་ངོ་།།

རྒྱན་གསུམ་ནོར་བུའི་དོ་ཤལ་མཛེས་སྡུག་ཏུ་འབར་ཞིང་།།
ཤར་ལྷོའི་སྙན་འགྱུར་གླུ་ཡི་བང་མཛོད་ཀྱི་མཛེས་མ།།
རྩེ་དགའི་གྲོགས་སུ་འགུག་བྱེད་ངག་སྐྱེས་ཀྱི་པི་ཝང་།།
བོད་ཀྱི་ཡི་གེ་འདི་ཡི་ཉམས་འགྱུར་དུ་རྫོགས་སོ།།

སྲིད་ཞིའི་ནགས་ཀླུང་དབྱར་སྐྱེས་སྔོན་པོ་ལས་འཁྲུངས་པའི།།
མངོན་བརྗོད་སྣ་ཚོགས་ནོར་བུའི་འཁྲི་ཤིང་གི་མེ་ཏོག།
འདོད་རྒྱལ་རྗེས་གྲུབ་ཁ་དོག་སྣ་ཚོགས་ཀྱི་རེ་ཁཱ།།
བོད་ཀྱི་ཡི་གེ་འདི་ཡི་མཁའ་དབྱིངས་སུ་ཤར་རོ།།

ཚིག་དོན་ཕུན་ཚོགས་ཉམས་ལྡན་གཞན་གསོས་ཀྱི་བུ་མོ།།
པྲྀཏྟ་ཛཱ་ཏིའི་སྒྲོ་གུར་སྣ་ཚོགས་ཀྱི་མེ་ཏོག།
མཛེས་པར་བསྡེབས་པས་རབ་བརྒྱན་འདྲེན་བྱེད་ཀྱི་དགའ་སྟོན།།
ངག་གི་སྦྱོར་བ་འདི་ཡང་བོད་ཡིག་ཏུ་མཛེས་སོ།།

གོ་ལ་ཉི་ཟླ་གཟའ་སྐར་འཕོ་འགྱུར་གྱི་དུས་སྦྱོར།།
དཀར་ནག་དབྱངས་འཆར་རིག་པའི་རྩེ་དགའ་ཡི་རི་མོ།།
གསལ་བར་འཆར་བ་ཤེལ་དཀར་མེ་ལོང་གི་ཞལ་རས།།
རྩིས་ཀྱི་རིག་རྩལ་འདི་ཡང་ཡི་གེ་ལས་བྱུང་ངོ་།།

ཉམས་དགུ་ལྷུན་རྫོགས་དྲི་ཟའི་ན་ཆུང་གི་དགའ་མ།།
སྒྱུ་རྩལ་དྲུག་ཅུའི་གར་གྱི་ཉམས་འགྱུར་ལ་བརྟེན་ནས།།
སྣ་ཚོགས་སྐད་ཀྱི་དབྱངས་བདུན་དྲུག་འགྱུར་དུ་ལེན་པའི།།
ཟློས་གར་རིག་པའི་ལྟད་མོ་ཡི་གེ་ལས་བྱུང་ངོ་།།

སྦྲང་ཆར་བཅུད་དུ་ཆགས་པ་སྤྲིན་སྔོན་གྱི་ཡི་གེ།
ཤེས་བྱའི་ལྷ་ལམ་ཡངས་པོའི་ལྡིང་ཁང་ནས་བྱོན་དང་།།
ལྔ་རིག་བཅུད་ལ་དགའ་བའི་བུ་རམ་གྱི་ལྗོན་པར།།
རེ་ས་སྦྲང་རྩིའི་ཆར་བ་ཁྱོད་རང་ལས་མི་འདུག།

ཕུན་ཚོགས་དཔལ་རབ་སྟེར་བ་དཔྱིད་དཔལ་གྱི་ཡི་གེ།
ཕྱོགས་མེད་དྲོད་ཀྱི་གུར་ཁང་དམ་པ་ནས་བྱོན་དང་།།
ལྔ་རིག་བསུང་ལ་དགའ་བ་པད་དཀར་གྱི་གཞོན་ནུར།།
རེ་ས་དཔྱིད་ཀྱི་མ་མ་ཁྱོད་རང་ལས་མི་འདུག།

ཀྲུང་ཧྭ་མི་རིགས་ཧྲིལ་པོའི་ནོར་འཛིན་གྱི་གཞི་ན།།
མི་རིགས་སྣ་ཚོགས་འགྱུར་བཞིའི་ལྷ་ཡུལ་དུ་བསྐྱོད་པ།།
ཨེ་མ་གཟིགས་སམ་བོད་ཡིག་རིག་འཕྲུལ་གྱི་མེས་པོ།།
བོད་ཀྱི་གཞོན་ནུ་ཁྱོད་ཀྱི་འཕྲུལ་འདེགས་ལ་རེའོ།།

ཁྱོད་ཉིད་མི་བསྲུན་འབྱུང་པོས་མནར་བ་ནི་མིན་ན།།
ཉི་ཟླ་སྦར་འཛིན་རི་རབ་སྤོར་བ་ཡང་སླ་ཞིང་།།
འགྱུར་བཞིའི་ལས་ཀྱང་མཛུབ་གུའི་རྩེ་མོ་རུ་རྩེན་པའི།།
རིག་པའི་དཔའ་བོ་གངས་ཅན་ཡུལ་ལྗོངས་སུ་ཤོང་ངམ།།

ད་ནས་གུང་ཞེས་བྱ་བ་རླབས་ཆེན་གྱི་ཏང་གི།
གཞལ་དཀའི་སྐུ་དྲིན་ཡིད་ལ་བརྗེད་མེད་དུ་བཅངས་ནས།།
མྱུར་མགྱོགས་ཤུགས་ལྡན་ཅང་ཤེས་རྟ་མཆོག་གི་ཁ་ལོ།།
འགྱུར་བཞིའི་ལམ་དུ་སྒྱུར་བར་ཐུགས་སྟོབས་ནི་སྐྱེད་ཅིག།