ཀྲེ་ཅང་གི་སློབ་གྲྭ་འགར་ཉུལ་བའི་ཟིན་ཐོ།

       ༢༠༢༣ལོའི་ཟླ༤པའི་ཚེས༥ཉིན་གྱི་ཞོགས་པའི་ཆུ་ཚོད་དགུ་བའི་སྟེང་ཟི་ལིང་ནས་ནན་ཅིན་དུ་བསྐྱོད་པའི་མེ་འཁོར་དུ་བསྡད། ཀྲེ་ཅང་དགེ་ཐོན་སློབ་ཆེན་ནས་ཉིན་དྲུག་ཙམ་ལ་སློབ་སྦྱོང་དང་རྟོག་ཞིབ་ལ་འཇུག་པའི་འགྲུལ་བཞུད་ཀྱི་མགོ་འདི་ལྟར་བརྩམས། ལོ་ངོ་འདི་དག་གི་རིང་ལ་ཞིང་ཆེན་ཕྱི་རུ་སློབ་སྦྱོང་དུ་འགྲོ་བའི་གོ་སྐབས་ཧ་ཅང་ཉུང་། ལྷག་པར་དུ་རང་ལ་མཚོན་ན་སློབ་གསོའི་ལས་ཀར་འཇུས་པ་ནས། ད་ལ་ཐུག་གི་བར་ས་ཕྱོགས་གཞན་དུ་སློབ་སྦྱོང་དང་བརྗེ་རེས་ཀྱི་སྐལ་བ་ཧ་ལམ་ཐོབ་མྱོང་མེད་ཟེར་ཆོག ད་ཐེངས་སློབ་སྦྱོང་དུ་འགྲོ་དགོས་པའི་བརྡ་འབྱོར་དུས། གཅིག་ནས་རང་ལ་གྲ་སྒྲིག་དང་དམིགས་ཡུལ། འཆར་གཞི་ཅི་ཡང་མེད་པ་དང་། གཉིས་ནས་རྒྱུས་ཉག་ཙམ་མེད་པའི་གནས་དེ་ནས་ཉིན་དྲུག་གི་ཡུན་ལ་ཅི་ཞིག་སློབ་ནུས་སམ་བསམ་ནས་ཡིད་གཉིས་ཐེ་ཚོམ་དུ་གྱུར། གོ་སྐབས་འཛིན་པའམ་རྩིས་མེད་བྱ་བ་གང་ལ་བསམ་གཞིགས་ཡུད་ཙམ་གཏང་དགོས་བྱུང་། སློབ་སྦྱོང་ནི་རང་ཉིད་ཀྱི་བསམ་བློ་གོ་རྟོགས་དང་མཐོང་ཐོས་མྱོང་གསུམ་རྒྱ་སྐྱེད་པའི་གོ་རིམ་ཞིག་ཡིན་མོད། ཡུལ་དུས་དང་རིག་གནས། གོམས་སྲོལ་ཀྱིས་བསྐལ་བ་ཞིག་ནས་རུམ་ལ་བསྡུ་རྒྱུ་དང་སེམས་ལ་འཛིན་རྒྱུ་རྙེད་ཞིག་སྲིད་དམ། གློ་བུར་དུ་ཡུན་རིང་སེམས་ལ་བརྣག་པའི་དོན་ཞིག་དྲན་པའི་ངོགས་སུ་འཁོར་བྱུང་། གལ་སྲིད་སྟབས་ལེགས་ན་དོན་གང་ལ་འོས་འཚམ་གྱི་ལན་རེ་རྙེད་ཀྱང་སྲིད། གོ་སྐབས་ནི་རང་གིས་བསྐྲུན་པའམ་དམ་འཛིན་བྱ་དགོས་ངེས་ཀྱི་གདམས་ཚིག་ཅིག་ཡོད་པ་བཞིན། སྐབས་འདིར་ངས་ནི་རང་གིས་བསྐྲུན་དགོས་མེད་པར་བསྩལ་བ་གང་དེ་དམ་འཛིན་བྱས་པས་ཆོག ཁབ་རྩེ་གཉིས་ཀྱིས་བཟོ་མི་འགྲུབ་པས་ཐེ་ཚོམ་བཅད་ནས་བཀའ་བཀོད་དང་ལེན་ཞུས་ཏེ་ལམ་ལ་ཆས་པ་ཡིན།        སྲང་མྱུལ་ནས་དགོང་ཇ་སྟབས་བདེ་ཞིག་འཐུང་དགོས་བསམ་མོད། ཕྱི་རོལ་ན་ད་དུང་ཆར་བ་འབབ་ཀྱིན་ཡོད་པ་དང་ཆད་སྣང་གིས་འགུལ་མི་འདོད་པས། སྟབས་ཐུག་ཅིག་གིས་འཐུས་པར་བྱས། འཆར་ཅན་ལྟར་འཕྲོར་ལུས་པའི་འཆད་ཁྲིད་ཞིག་གི་སྒྲ་ལ་ཉན། ཐང་ཆད་པའི་སྣང་བ་འགོག་མིན་དུ་འདུག་པས་མལ་ཁྲིའི་སྒང་དུ་བུད། གཏི་མུག་གཉིད་ཀྱི་དབང་བཙན་པས་དབང་མེད་ངང་རྨི་ལམ་གྱི་ཞིང་ལ་ཆས་སོང་། ཞོགས་པར་གཉིད་ལས་སད་དུས་མདང་གསོ་རླུང་གིས་བཟི་སོང་བ་མིན་འགྲོ་བསམ།        ཡིག་ཆ་ལྟར་ན། ཚེས༧ཉིན་མིང་ཐོ་འགོད་དགོས་པ་གཏན་འཁེལ་འདུག་མོད། ཞོགས་པའི་དུས་ལ་སྐད་འཕྲིན་གྱི་ཚོམས་སུ། དགེ་རྒན་རེ་འགའ་འགྲིམ་འགྲུལ་ལམ་ལྷོངས་མ་བྱུང་བའི་རྐྱེན་གྱིས་དུས་ཚོད་ནང་ལྟར་འབྱོར་མ་ཐུབ་པ་དང་། དེ་རིང་གར་འགྲོ་རང་དབང་ཡིན་ཆོག་གི་བརྡ་བཏང་འདུག ད་ནི་ཡིད་ཚིམས་པ་ཞིག་གཉིད་ཆོག་བསམ་ནས་མགོ་བོ་ཡང་བསྐྱར་སྔས་ལ་བཞག་པ་ཡིན་མོད། སྒེའུ་ཁུང་ཕྱི་རོལ་གྱི་བྱ་བྱེའུ་སྣ་ཚོགས་ཀྱི་སྐད་སྒྲས་གཉིད་ཀྱི་བདེ་བ་ཅིག་ཅར་དུ་འཕྲོག་བྱུང་ལ། ཡུན་རིང་ཞིག་ལ་བྱ་བྱེའུ་ཡི་མགྲིན་སྒྲ་ཐོས་མ་མྱོང་བ་ལྟ་བུའི་ཚོར་བ་ཞིག་འདུག་པས། སྒེའུ་ཁུང་གམ་དུ་འགྲེང་ནས་སྔོ་ལྗང་གི་ལྗོན་པ་དང་། ལྗོན་པའི་གསེབ་ན་བར་མེད་དུ་གྲག་ཀྱིན་པའི་བྱ་རིགས་སྣ་ཚོགས་ཀྱི་སྐད་ལ་གཟབ་ནན་གྱིས་ཉན་པ་ཡིན། སྐབས་དེར། སྦྱིན་བདག་མས་ཁ་པར་བཏང་ནས་ས་ཕྱོགས་གཅིག་པའི་དགེ་རྒན་ཞིག་གིས་འབྱོར་ཐོ་འགོད་བཞིན་ཡོད་པ་དང་། སྡོད་ཁང་གཅིག་ཏུ་བཀོད་སྒྲིག་ཆོག་མིན་གྱི་གཏམ་དྲིས་བྱུང་བས་ཆོག་པའི་བརྡ་སྤྲད་པ་ཡིན།
       གར་འགྲོ་རང་དབང་གི་ཉིན་གཅིག་ཆུད་མི་འཛའ་བའི་ཕྱིར། གླ་གཏོང་ཞིག་ཏུ་བསྡད་དེ་ཅིན་ཧྭ་གྲོང་ཁྱེར་གྱི་ཞིན་ཧྭ་དཔེ་ཁང་དུ་སོང་བ་ཡིན། དཔེ་ཁང་ཐོག་རྩེག་རིམ་པ་གསུམ་དུ་འདུག་པ་དང་། ཁེར་ཐོག་ཏུ་སློབ་མའི་བསླབ་དེབ་དང་སྦྱང་ཚན་གྱི་སྐོར་དང་། ཉིས་ཐོག་ཏུ་སྤྱི་ཚོགས་ཚན་རིག་དང་རང་བྱུང་ཚན་རིག་གི་སྐོར། སུམ་ཐོག་ཏུ་བྱིས་པའི་གློག་རྡུལ་རྩེད་ཆས་དང་སློབ་སྦྱོང་གི་མཁོ་ཆས་སྣ་མང་། མདོར་ན། དཔེ་ཆ་སྣ་ཚོགས་རིགས་དབྱེ་ཞིབ་ཚགས་འཚོལ་བདེ་དང་ཁོར་ཡུག་གཙང་ཡངས་བབ་ཆགས་པས་ཤིན་ཏུ་སྡོད་བྲོད་པ་ཞིག་འདུག གཟའ་མཇུག་ཡིན་མིན་ཅི་ཆ་དཔེ་ཀློག་བྱེད་མཁན་དང་དཔེ་ཆ་བླུ་མཁན་ཅུང་མང་། ཞོར་དུ་དགེ་རྒན་ཆེ་གེ་མོས་སྔོན་མར་འོས་སྦྱོར་བྱས་པའི་དེབ་དག་བླུ་དགོས་བསམ་མོད། ཡིད་ཕངས་པ་ཞིག་ལ་དེབ་གཅིག་ཀྱང་མ་རྙེད། དཔེ་ཁང་འགན་འཛིན་པར་གློག་ཀླད་དུ་འཚོལ་བཤེར་བྱེད་དུ་བཅུག་ཀྱང་དེབ་དེ་དག་དཔར་སྐྲུན་ཅུང་སྔ་བས། འདིར་ཉེ་ལམ་དཔར་སྐྲུན་བགྱིས་པའི་དེབ་གསར་མ་གཏོགས་མེད་ཟེར། སྐུ་ཞབས་ཝང་ཞོ་པོ་ལགས་ཀྱི་བརྩམས་དེབ་གསུམ་ཉོས་པ་ཡིན། ཕྱི་དྲོའི་དུས་སུ་ཅིན་ཧྭ་གཙང་འགྲམ་ནས་ཉི་ནུབ་བར་དུ་བསྡད་པ་དང་། ཁྱི་རིགས་ཆེ་ཆུང་སྣ་ཚོགས་གྲོགས་སུ་སྡེབ་པའི་ཕོ་མོ་རྒན་དར་གཞོན་གསུམ་གྱི་འགྲོ་འོང་རྒྱུན་ཆད་པ་མི་འདུག སྲོད་ཀྱི་དུས་སུ་མཚམས་སྤྲིན་ཡིད་དུ་འོང་བ་འགའ་པར་དུ་བརྡབ་རྗེས་མགྲོན་ཁང་དུ་ལོག གཞུང་ལམ་འགྲམ་གྱི་རང་མོས་དཔེ་ཀློག་གི་སྒྲོམ་ཞིག་མཐོང་བའི་མོད། དཔེ་སྒྲོམ་གྱི་པར་དང་ཞབས་མཆན་དུ་ཕྱིའི་རྒྱལ་ཁབ་ཀྱི་གྲོང་ཁྱེར་ག་གེ་མོ་རུ་ལེ་དབར་རེའི་མཚམས་སུ་དཔེ་ཁང་རེ་འདུག་སྐད་གོ་ཐོས་བྱུང་མོད། ངས་ནི་འབྲི་ཆུའི་ལྷོ་རྒྱུད་ཀྱི་ཅིན་ཧྭ་གྲོང་ཁྱེར་ནས་ད་གཟོད་མཐོང་སྐལ་ཤར་ཅེས་གྲོགས་པོའི་སྐད་འཕྲིན་དུ་བཏང་བ་ཡིན།        ཆེས༨ཀྱི་སྔ་དྲོའི་ཆུ་ཚོད་བརྒྱད་དང་ཕྱེད་ཀྱི་དུས་ལ། ཀྲེ་ཅང་དགེ་ཐོན་སློབ་ཆེན་ཧྥེ་གླིང་ཞིབ་འཇུག་གླིང་གི་ཉེ་ལོགས་ཀྱི་ནུས་མང་སློབ་ཁང་ནས་སློབ་སྦྱོང་མགོ་ཚུགས་པའི་མཛད་སྒོ་བསྡུས། ཚོགས་འདུའི་གཏམ་བཤད་དག་ལ་ཉན་ཞོར་དུ། ཉིན་དྲུག་རིང་གི་སློབ་སྦྱོང་གི་རྩ་དོན་དང་དམིགས་ཡུལ། ཁ་ཕྱོགས་དང་འཆར་བཀོད་བཅས་ལག་དེབ་ཀྱི་རྣམ་པར་བཟོས་པ་གང་དེར་ཞིབ་ཏུ་བལྟས། གཞུང་ལུགས་སློབ་ཁྲིད་དང་ཡུལ་དངོས་རྟོག་དཔྱོད་ཟུང་འབྲེལ་ཡིན་པ་དང་། དེ་ནི་བཤད་ཀྱི་ཁ་ལ་ཉན་ཆོག་པ་དང་ལས་ཀྱི་ལག་ལ་ལྟོས་ཆོག་པ་ཞིག་རེད་འདུག་པས། མེ་འཁོར་ལས་གཉིད་མ་སད་དང་ཀོག་མ་ལངས་ཀྱིས་ལེ་དབར་སྟོང་གི་ལམ་ཐག་བརྒྱུད་པ་དོན་དང་ལྡན་ཚོད་དུ་འདུག་བསམ་ནས་སེམས་ལ་སྤྲོ་བ་འཕེར།
       སློབ་སྦྱོང་གི་འཚོ་བ་བླ་ནས་སྦྱར་བས་བཟའ་བཏུང་གི་དུས་རན་ཚེ། བྱང་བུ་སྙིང་རྗེ་བོ་དེ་བཟུང་ནས་འགྲོ་རྐྱང་བྱས་ཆོག ཟས་རིགས་རང་འདེམས་དང་ཚལ་རིགས་སྣ་མང་། ཁོར་ཡུག་གཙང་ལ་སྒྲིག་གཞི་ཚགས་དམ། རིན་གོང་མཐོ་དམའ་ཅི་རིགས་སུ་དགེ་སློབ་དང་ལས་བཟོ་བས་རང་ཚོད་ལྟར་ལོངས་སུ་སྤྱད་ཆོག རྒྱུས་མེད་པར་ཚོད་མ་ཟིན་ཚེ་གྲོན་ཆེ་བ་འདུག        ཕྱི་ཉིན་ཞོགས་པའི་དུས་ཚོད་བརྒྱད་དང་ཕྱེད་ཀའི་སྟེང་སྤྱི་སྤྱོད་རླངས་འཁོར་ཞིག་ཏུ་བསྡད་ནས་ལམ་ལ་བུད། གྲོང་ཁྱེར་གྱི་མཐའ་ལ་ཐོན་ཙམ་ནས་མྱུར་ལམ་དུ་ཞུགས་ནས་ཧང་ཀྲིག་ཕྱོགས་སུ་བསྐྱོད། ལམ་འགྲམ་གྱི་གྲོང་དང་གྲོང་གསེབ། ལྗོན་པ་དང་ནགས་ཚལ། མཐོ་དམའ་ཅི་རིགས་ཀྱི་རི་བོ་སོགས་རེ་རེ་བཞིན་རྒྱབ་ཕྱོགས་སུ་རྒྱུགས་ཀིན་མཆིས།  སེམས་ལ་མི་ཟེར་བ་འདི་འཕེལ་རྒྱས་སམ་འཚོ་གནས་ལབ་བཞིན། སྨིན་ཐག་མ་ཆོད་པའི་ཀུ་ཤུ་སྐྱ་རྡོ་ཞིག་དང་འདྲ་བའི་གྲོང་ཁྱེར་དུ་འཚང་ཁ་རྒྱག་དོན་ག་རེ་ཡིན་ནམ་བསམ། དུས་ཚོད་བཅུ་བ་ཙམ་ལ་ཧེ་ཁྲོང་སློབ་ཆུང་དུ་འབྱོར་བ་དང་། སློབ་གཙོས་སྣེ་ལེན་བརྒྱུད། སློབ་གྲྭའི་སྙན་ཞུ་ཚོམས་ཆེན་ནས་ཐོག་མའི་སློབ་སྒྲུབ་ཀྱི་ལྟ་བ་ནས་བར་གྱི་ལག་ལེན། མཇུག་གི་གྲུབ་འབྲས་སོགས་པར་དང་བརྙན་དང་ཡི་གེར་སྡེབ་ནས་སློབ་གསོའི་ལངས་ཕྱོགས་མངོན་པར་གསལ་བའི་ངོ་སྤྲོད་རྒྱས་པ་ཞིག་གནང་བྱུང་། ཁོའི་ལྟ་སྤྱོད་ལས་རིག་གནས་རང་རྟོན་གྱི་ཆ་བཅོས་མིན་དུ་ཚོར་ཐུབ་པ་འདུག ཉིན་གུང་གི་འཚོ་བ་དགེ་རྒན་གྱི་ཟ་ཁང་དུ་བཀོད་སྒྲིག་བྱས་ཡོད་པ་དང་། སློབ་མའི་ཟ་ཁང་དང་བར་དུ་ཆོད་སྟབས་བདེ་ཞིག་ལས་མི་འདུག སློབ་མ་ཚོས་ཁ་ལག་བཟའ་བཞིན་པའི་སྐབས་དང་འཁེལ་འདུག་པས། ཁོ་ཚོས་ཟ་འཐུང་གི་རྣམ་པ་ཅི་འདྲ་ཞིག་ཡིན་སྙམ་གྱི་དོགས་པ་འཆང་བཞིན་སློབ་མ་ཚོའི་ཁྲོད་དུ་ཕྱིན་པ་ཡིན། སློབ་གཙོའི་ངོ་སྤྲོད་ལས་གསུང་བ་ལྟར་ན། དེང་གི་བྱིས་པ་མང་པོ་ངལ་རྩོལ་གྱི་ནུས་པ་ཧ་ཅང་ཞན་པ་དང་། ངལ་རྩོལ་དུ་འཇུག་མི་ནུས་མཁན་གྱིས་སྤྱིར་བཏང་ངལ་རྩོལ་གྱི་འབྲས་བུ་ལ་བརྩི་འཇོག་དང་གཅེས་སྤྲས་བྱེད་ཤེས་རྒྱུ་ཧ་ཅང་ཁག་པོ་འདུག དེ་བས། རང་གི་ཡུལ་བབ་ཀྱི་ཁྱད་ཆོས་གཙིགས་སུ་བཟུང་ནས། སློབ་མ་འབྲས་འདེབས་འཛུགས་ནས་སྟོན་སྡུད་བཅས་ཀྱི་ངལ་རྩོལ་གྱི་གོ་རིམ་མཐའ་དག་ཁྲོད་ཞུགས་བཞིན་ཡོད་པས། འབྲས་དང་བཅས་པའི་ཟ་མ་གྲོན་ཆུང་གི་འདུ་ཤེས་ལེགས་པོ་ཆགས་བཞིན་འདུག་ཚུལ་བཤད། དོགས་པ་ནི་དོགས་པ་ཙམ་སྟེ། མིག་མཐོང་ལག་ཟིན་ལས་ཡོད་ཚད་ར་སྤྲད་བྱུང་། ངལ་རྩོལ་སློབ་གསོས་སློབ་མའི་བརྗེ་རེས་དང་ལག་ལེན། མྱོང་བའི་ནུས་པ་སྐྱེད་སྲིང་དང་རིན་ཐང་ལྟ་བ་ལེགས་པོ་ཞིག་ཆགས་པར་རྨང་འདིང་བཞིན་འདུག གྲོན་ཆུང་གི་འདུ་ཤེས་ནི་དྲིལ་སྒྲོག་ཙམ་གྱིས་མི་འཇོན་པར་སྒྲུབ་པའི་སྦྱོར་བ་ལ་གཞོལ་དགོས་ཀྱི་བསམ་ཚུལ་དེར་ལན་གསལ་བོ་ཞིག་རྙེད་བྱུང་།
       ཁ་ལག་མཆོད་རྗེས་ཟ་ཁང་གི་ཕྱི་རུ་བུད་པ་ན། ལག་ཏུ་བྱང་བུ་ཐོགས་པའི་སློབ་གྲོགས་འགས་དགེ་རྒན་གང་རུང་གི་མིང་ནས་བཟུང་ཏེ་སུ་ཡིན་པ་འདྲི་བཞིན་འདུག ངས་རང་གི་མིང་ནས་འབོད་བཞིན་པའི་སློབ་གྲོགས་དེ་ལ་ལག་བརྡ་ཞིག་བསྟན་པ་ན། ལམ་སེང་གམ་དུ་སླེབས་བྱུང་ལ་འཛུམ་ཤིག་ཕྱུངས་བཞིན་གུས་འདུད་དང་བཅས། དགེ་རྒན་བདེ་མོ། ང་ནི་གསུམ་བརྒྱད་འཛིན་གྲྭའི་སློབ་མ་ཀྲང་ཞོ་ཡན་ཡིན། ངའི་འགན་ཁུར་ནི་དེ་རིང་ཉིན་གུང་གི་དུས་ཚོད་ནང་ཁྱེད་འཁྲིད་ནས་སློབ་གྲྭའི་ར་བར་ཡུལ་སྐོར་དང་སྣེ་ཤན་བྱེད་རྒྱུ་དེ་ཡིན། ང་ཚོའི་སློབ་ར་རུ་སྲོག་ཆགས་སྣ་ཚོགས་གསོ་སྤེལ་གྱི་ར་བ། སིལ་ཏོག་ར་བ། སྔོ་ཚོད་ར་བ། ཉ་གསོ་ར་བ། ཤོག་བུ་བཟོ་སྐྲུན་ཁང་། ལྗོན་པའི་སྟེང་གི་དཔེ་ཁང་སོགས་མང་པོ་འདུག རང་འདོད་བཞིན་སྐོར་བ་བྱས་ཆོག་ལ་དྲི་བ་ཅི་ཡོད་ཐད་ཀར་ང་ལ་དྲིས་ཆོག་ཟེར། སློབ་གཙོའི་རང་རློམ་གྱི་རྣམ་པ་དེ་སློབ་མ་ཚོའི་སྟེང་ནས་ཀྱང་མཐོང་ཐུབ་པ་འདྲ། སློབ་གྲྭའི་ར་སྐོར་ཆ་ཚང་དུ་མྱུལ་ཚར་དུས། ཡིད་ཀྱི་ག་ཤེད་ཅིག་ཏུ་སྐུང་ནས་ཡུན་རིང་ལུས་པའི་རང་བྱུང་ཁམས་ནི་ད་གཟོད་མིའི་རིགས་ཀྱི་ཆེས་བཟང་བོའི་དགེ་རྒན་ཡིན་ཟེར་བའི་ལེགས་བཤད་དེ་མངོན་སུམ་མིག་ལ་སྣང་བར་བྱས་སོང་།        ཕྱི་ཉིན་སྔ་དྲོ་མུ་མཐུད་དུ་སློབ་གསོ་སྒྲིག་ཆས་བེད་སྤྱོད་དང་དོ་དམ་སྐོར་གྱི་སློབ་ཁྲིད་ལ་ཉན། ཉིན་འདི་དག་གི་སློབ་ཁྲིད་མདོར་དྲིལ་ཏེ་ལྕམ་སཱ་ཆེའི་སྐད་ཆ་ལྟར་བཤད་ན། བསམ་བློ་ལ་མཉམ་ཞོག་དེས་སྐད་ཆ་དང་བྱ་ལས་ཐག་གཅོད་ཐུབ། སྐད་ཆ་དང་བྱ་ལས་ལ་མཉམ་ཞོག་དེས་ཀུན་སྤྱོད་ལ་སྣེ་ཁྲིད་བྱེད་ཐུབ། ཀུན་སྤྱོད་ལ་མཉམ་ཞོག་དེ་ནི་གོམས་གཤིས་སུ་འགྱུར་ངེས། གོམས་གཤིས་ལ་མཉམ་ཞོག་དེས་རང་བཞིན་བསྐྲུན་ཐུབ། རང་བཞིན་ལ་མཉམ་ཞོག་དེས་ལས་དབང་ཐག་གཅོད་ཐུབ་ཅེས་པའོ། །ཕྱི་དྲོར་ཡིའུ་བུའུ་གྲོང་ཁྱེར་གྱི་ཧྥིན་ཧྲོས་ཐང་སྡེ་བར་བསྐྱོད། དེ་ནི«གུང་ཁྲན་ཏང་གི་བསྒྲགས་གཏམ»ཐོག་མར་རྒྱ་ཡིག་ཏུ་སྒྱུར་མཁན་གྱི་སྐུ་ཞབས་ཁྲིན་ཝང་ཏོ་ཡི་ཕ་ཡུལ་ཡིན་འདུག རི་ཆུ་གཉིས་འཛོམས་ཀྱི་གྲོང་ཚོ་ཉམས་དགའ་བ་ཞིག་ཡིན་པ་དང་། དེར་སླེབས་ནས་ཅང་མ་འགོར་བར་ཆར་བ་བབས་བྱུང་། སྣེ་ཤན་པས་སྐུ་ཞབས་ཁྲིན་ཝང་ཏོའི་འཁྲུངས་གཞིས་ཀྱི་ཁྱམས་འོག་ཏུ་བསྡད་ནས་ཁོང་གི་དཀའ་སྡུག་ཆེ་བའི་མི་ཚེའི་བྱུང་རིམ་དང་ལས་ཀྱི་མཛད་པ་དག་ཆུ་བཞུར་བ་ལྟར་བཤད་བཞིན་འདུག
       ངས་ཁང་རྙིང་དེའི་བྱ་འདབ་ཀྱི་ཆར་བའི་ཐིགས་པ་ས་ལ་ཟགས་གྱིན་པར་ལྟ་བཞིན། ཞི་བར་གཤེགས་ཟིན་གྱི་སྔོན་བྱོན་ཡབ་མེས་འགའི་མཛད་འཕྲིན་དག་དྲན་བྱུང་། ཆར་བ་མུ་མཐུད་དུ་འབབ་བཞིན་འདུག་པས། ལྟ་སྐོར་སྟབས་བདེའི་ངང་མཇུག་སྒྲིལ་བར་བྱས།
       དགོང་ཁར་མཉམ་འཛོམས་ཀྱི་ཟ་མ་བཟས་རྗེས། དགེ་རྒན་གྱིས་ད་ནི་སློབ་སྦྱོང་མཇུག་རྫོགས་པ་ཡིན་པས། སང་ཉིན་རང་སར་ལོག་ཆོག་གི་གཏམ་དང་བཅས་ཕན་ཚུན་ལ་གྱེས་མཚམས་ཞུས། བདེ་མོ། ཀྲེ་ཅང་དགེ་ཐོན་སློབ་ཆེན། བདེ་མོ། ཡུན་ཐུང་གི་སློབ་གྲོགས་ཚོ།