ཞྭ་ནག་པའི་སྙན་ངག་ཚན་པ་གསུམ།

བུད་མེད་དག་གིས།
རང་ཉིད་འཇིག་རྟེན་མཐར་ཐུག་གི་མཛེས་པར་རློམ་ནས།
མི་རྣམས་ཀྱི་མདུན་དུ་རང་ཉིད་ཁོ་ན་ངོམ་སོ་བྱེད།

གཞུང་ཆུའི་བཞུར་སྒྲ་ལ་ཉན་ན།
ད་ལྟ་ང་ཚོ་ཚང་མ་དུས་ཚོད་ཀྱི་མདུན་དུ་ངུ་ཤུམ་བྱེད་པ་ཚོར་ནའང།
མཚན་མོ་རེ་རེར།
མི་རྣམས་རྨི་ལམ་གྱི་ཁུག་ཏུ་ཉལ་ཡོད།

ཟམ་པ་དེའི་ཕར་སྣེ་དང་ཚུར་སྣེ།
གྱེས་བྲལ་ལྟ་བུའི། དྲན་གདུང་ལྟ་བུའི་དཔེ་ལེན་ས་ཞིག་དང་ཀུན་ནས་མཚུངས།
ཟམ་ཁར་དཔྱང་བའི་གློག་སྒྲོན་དེ་དག་ཀྱང།
ང་ཚོ་ནང་བཞིན་དྲན་གདུང་དང་ཁེར་རྐྱང་གྱོན་པར་དགའ་བོ་ཡོད།
ཉིན་དེར་ཁྱོད་ཀྱིས་ང་ལ་ཕུལ་བའི་སྙན་ངག་དེ།
ཡིད་ནས་བརྗེད་ཐབས་མེད་པ་ཞིག་བཀླགས་རྗེས།
འུ་གཉིས་ཀ་མཚོན་ཐུབ་པའི་སྙན་ངག་ཅིག་འབྲི་བར།
ངས་དུས་ཚོད་མང་པོར་བསམ་གཞིག་བྱས་པ་ཡིན།

འཚོ་བ་དང་སྦྱར་ནས། བརྩེ་དུང་དང་སྦྱར་ནས།
མིག་ཆུ་དང་སྦྱར་ནས། དགོད་སྒྲ་དང་སྦྱར་ནས།
གང་ལྟར་ངས་སྙན་ངག་ཅིག་འབྲི་དགོས་ཡོད།

ང་ཡི་ཡི་གེའི་ནང་གི་གར་མ།
ཚེ་རབས་དུ་མའི་ཁྲོད་ཀྱི་ད་ལྟ་བར།
འུ་གཉིས་སྙན་ངག་གཅིག་གི་ནང་དུ།
ལས་དབང་གིས། རྟེན་འབྲེལ་གྱིས་འཕྲད་བྱུང།

གཙང་བོའི་རླབས་རྒྱུན་ལྟ་བུའི་ཚེ་རབས་འདིར།
དྲན་པའི་ནམ་མཁའ་རུ་ཉི་ཟླ་བཞིན་འཆར་བའི་ཁྱོད་ཉིད།
ང་ཁོ་ནའི་སྙན་ངག་གི་སྲོག་ཡིག་ཡིན་ན་ཆོག་གམ།
འཇིག་རྟེན་གྱི་རྡུལ་ཕྲན་མ་ལུས་སིལ་བར་འཐོར་ན་འཐོར།
ཚེ་སྲོག་གི་སྐུད་པ་མ་ལུས་དུམ་བར་ཆད་ན་ཆད།
སྒྱུ་རྩལ་གྱི་མེ་ལོང་ཆག་ཧྲལ་དུ་གྱུར་ན་ཤིན་ཏུ་འགྱོད།

ཁྱོད་ཀྱིས་སྐད་ཆ་ཞིག་བཤད་ཟིན་ནའང།
ཁྱོད་ཀྱིས་སྐད་ཆ་ཞིག་ད་རུང་མ་ཤོད་པར་ལུས་ཡོད་ངེས།

འཆི་བའང་དོན་དམ་སྒྱུ་རྩལ་ཞིག་རེད།
འཆི་བ་ནི་མི་ཚེ་གཅིག་གི་བྱ་བཞག་མཐའ་དག་ལ་རྫོགས་ཚིག་འབྲི་ཚུལ་ཞིག་རེད།
དོན་དམ། ང་ཚོ་ཚང་མ་འཆི་བ་དང་ཁ་གཏད་དུ་འགྲེང་ནས་བསྡད་ཡོད།