མགོ་ལོག་པ་བུ་ཡུག་གི་སྙན་ངག

       
གཡོ་བ་བྲལ་བའི་ཕ་བོང་འདི་དག
ཁྱོད་ཀྱི་སྒེར་གཤིས་ཀྱི་ཕ་བོང་ཡིན།
སྣོལ་མཚམས་མེད་པའི་གཙང་བོ་དེ་དག་ཀྱང།
ཁྱོད་ཀྱི་བློ་འབྱེད་ཀྱི་གཙང་བོ་ཡིན།

ཁྱོད་རང་འཆི་བར་མི་འཇིགས།
ཁྱོད་ཀྱིས་ཚེ་སྲོག་རྟ་རྔ་བཞིན་ཕྲ་བ་སྔར་ནས་ཤེས།
ཁྱོད་རང་དམོད་ཚིག་ལ་ཡང་མི་འཇིགས།
ཁྱོད་ཀྱིས་རང་ཉིད་མཚོན་བྱེད་ཀྱི་རྣམ་འགྱུར་མང་པོ་བསྟན་ཅིང།
ཐོབ་ཐང་གི་ཆོ་ལོ་དེ་དག་གིས་བྱང་ལམ་བཅད།

སྒྱུ་རྩལ་གྱི་བྱང་ཐང་འདི་ནས།
ཁྱོད་རང་ཨེ་ལག་སན་ཊར་ཡིན།
གླིང་དཀར་གྱི་རུ་སྡེ་འདི་ནས།
ཁྱོད་རང་རྒྱལ་ཚ་ཞལ་དཀར་ཡིན།

བཙོན་ནས་བླངས་པའི་སུ་མཱ་ཆན་གྱི་སྡོམ་ཚིག་དེ།
ཁྱོད་ཀྱི་སྡོམ་ཚིག་ཡིན།
ལག་དམར་ཞིག་གི་བྲང་གར་ལྷུང་བའི་སེམས་ཀྱི་དམ་ཚིག་ཀྱང།
ཁྱོད་ཀྱི་དམ་ཚིག་ཡིན།

ལེགས་ཉེས་ཀྱི་ར་བར་ལུས་པའི་མིག་ཤེལ་མཐུག་པོའི་སྐུ།
འགལ་འདུ་ཡི་སུམ་མདོར་ལྷགས་པའི་ནུབ་ལྭ་སྔོ་ནག་གི་སྐུ།
རང་ཞལ་དམར་རྗེན་དུ་སྟོན་པའི་བརྙན་མིག་རྣོན་པོའི་སྐུ།
དེ་དག་ནས་དེ་དག་ཁྱོད་ཀྱི་མཚན་དང་དཔེ་བྱད་ཡིན།

ཁྱོད་རང་ཁྲུང་ཁྲུང་གི་སྒྲོ་སྤུ་ཡིན་ལ།
ཐེ་ཧྲན་གྱི་ལྕི་ཚད་ཀྱང་ཅི་ལ་མིན་་་་་་་