ཁྲི་གོང་ཨོ་རྒྱན་ཚེ་རིང་གི་སྙན་ངག

དགུན་ཁ་སླེབས་སོང་།
དགུན་ཁ་ཉ་མོའི་གཤོག་འོག་ནས་རིམ་གྱིས་བསྲིངས་པར།
ས་གཞི་གཅེར་བུར་ཐོན་པའི་ཤོམ་མ་ཇི་བཞིན།
འབྱུང་བཞིའི་ཡལ་ག་རྣམས་སྐྱ་ཧྲལ་ཧྲུལ།
འཁྱགས་སོབ་སོབ་གང་སར་མཐོང་ལ།
འཁྱགས་རོམ་གྱི་སྟེང་ན་ཁ་བས་རང་ཚུགས་དམར་མོ་དེ་སྐྱོང་ཡང་།
སྲང་ལམ་གྱི་ཧྲག་སྒྲ་དེས།
ཐབ་མདོའི་མེ་ལྕེ་དཀྲུགས་པས།
ཝ་ཞྭ་ཀེམ་ཀེམ་དུ་གྱོན་པའི་ན་ཆུང་བུ་མོས།
ཅི་མི་སྙམ་པར་ཁ་བར་ལན་བུ་བསླེས།

དགུན་ཁ་སླེབས་སོང་།
དགུན་ཁ་སོས་ཀའི་དྲི་བཞོན་དང་མི་འདྲ་བར།
རི་རབ་ཀྱི་རྩེ་ནས་ཁ་བཏགས་དཀར་པོ་ཞིག་དང་མཚུངས་པར་མུ་མཐའ་མེད་པར་བརྐྱངས་ཤིང་།
དམག་ཆེན་གཉིས་པའི་འཇབ་རྒོལ་བཞིན་རི་ལུང་ཐོལ་གྱིས་བཟུང་སྟེ། གཡོགས་ལ།
ལུས་སེམས་གྲང་ཤུར་ཤུར་བཟོ་ཞིང་།
འཇིགས་པ་མེད་ཀྱང་རི་སྤྱང་སྔོན་མོའི་རུས་གསེང་ལ་མེ་མདའ་ཐེབས་པ་ལྟ་བུའི་ཟུག་གཟེར་བརྒྱ་ཕྲག་གིས་འགད་ལ་རྩོམ་སྟེ།
སྟོན་ཟླ་སེར་པོའི་ལོ་ལེགས་དེ་ལ་བསམས་ན།
ལོ་གཅིག་གི་འཇབ་རྒོལ་དེ་ཡང་སྔ་ཕྱི་རྒོལ་གྱི་རིགས་པའི་བཙན་དབང་ཞིག་མ་ཡིན་པར།
དབྱར་ཁ་སླེབས་ཚེ་མེ་ཏོག་བཞད་པ་ནང་བཞིན།
རང་བྱུང་གི་ཆོས་ཉིད་དེ་ལའང་ལང་ཚོའི་འཇོ་སྒེག་ལྟེམས་ཤིང་གཡོ།

དགུན་ཁ་སླེབས་སོང་།
དགུན་ཁར་ཆར་ལྡན་དུས་སྐབས་ཀྱི་སྐྱེ་སྟོབས་དང་ཚོན་མདངས་མེད་མོད།
ཁྲ་ལམ་མེར་བཞད་པའི་མེ་ཏོག་སྣ་ཚོགས་ཀྱི་དྲན་ཤིང་ཐོར་ཞིང་།
དམར་ལམ་ལམ་འབར་བའི་གོ་ཁའི་ལབ་གླེང་དང་།
དྲོད་སོབ་སོབ་འཁྱིལ་བའི་ཨ་འཇམ་ཚ་རུ།
ད་དུང་ཞབས་རྗེས་ཁངས་ལ་བཞག་པའི་བྲེད་ཤ
རྒྱུ་ཞབས་ཟ་འཕྲུག་ལངས་པའི་དྲན་གདུང་།
དེ་ཡང་ཉི་གདུགས་འོག་གི་ཆར་བའི་ཁེར་བཤད་མིན་ལ།
ཟེའུ་འབྲུ་ས་ལ་བཏིངས་པའི་སྟོན་མཇུག་གི་དགའ་སྣང་དང་།
དགུན་ཟླ་རིང་མོ་རི་ལུང་དུ་སྦ་བའི་སྔ་ལྟོས་ཡིན་ལ།
རྒྱ་མཚོ་སྔོན་མོ་མཁའ་དབྱིངས་ནས་འབབ་པའི་བྱ་སྒྲོའི་མཆོད་བསྟོད་དེ།
སྐར་ཚོགས་ས་ལ་ཟགས་པའི་སྟ་གོན་ཡིན།

དགུན་ཁ་སླེབས་སོང་།
དགུན་ཁ་ཉིན་སྲིབ་མེད་པར་ཀུན་ལ་སླེབས་སོང་།
ཉི་འོད་ཀྱང་མ་ཡིན། མུན་པའང་མ་ཡིན།
མཐོང་ཐོས་དྲོད་ཀྱིས་བརླན་པའི་གུར་ཁང་དང་།
སྙིང་ཆུང་འཁོར་སྒྱུར་རྒྱལ་པོའི་ཕོ་བྲང་།
ཞབས་རྡུལ་གནོད་སྦྱིན་དཀྲུགས་པའི་གཡུལ་ས།
ཐ་ན་ཁ་པར་གྱི་བརྙན་ཤེལ་རེ་རེའི་ནང་།
གྲག་འགུལ་མེད་པར་ལྷོད་ཤིག་ཤིག
འཇམ་ཐང་ཐང་སླེབས་སོང་།

དགུན་ཁ་སླེབས་སོང་།
དགུན་ཁ་ཉི་འོད་བཞིན་རི་ལུང་ནས་རྩྭ་ཐང་།
དགུན་ཁ་མཁའ་རླུང་བཞིན་སྦྲ་འདབས་ནས་རི་གྲོང་།
དགུན་ཁ་ཆ་འཕྲིན་བཞིན་གྲོང་ཁྱེར་ནས་གྲོང་ཁྱེར།
ལྷུག་གེར་སླེབས་སོང་།

དགུན་ཁ་ལྷོ་བཞུད་ཀྱི་བྱ་ཁྱུ་དང་།
ལོ་མ་སེར་པོའི་འཕུར་ལྡིང་ཁྲོད།
ཚོར་སྣང་ཞིག་གི་དཀྱིལ་འཁོར་བཞིན་མཚོ་དང་མཚེའུ།
གཙང་པོ།
སྡོང་བོའི་ཡལ་ག
རྣང་མའི་བར་དུ་དཀར་ཡོམ་ཡོམ་བབས་ཤིང་།
སྨུག་ལྷང་ངེར་སླེབས་སོང་།

དགུན་ཁ་ཆུ་ཤེལ་ལྟ་བུའི་མཁའ་དབུགས་དང་ཧྲག་སྒྲ་ཞིག་གི་གོམ་སྟབས་བར་ནས།
རྐུན་མའི་འཇབ་མྱུར་བཞིན་གྱང་བར་དང་སྒོ་སྲུབས།
ལྭ་འདབས།
ཕུ་ཐུང་ནང་འཁྱགས་སོབ་སོབ་འཛུལ་ཞིང་།
གྲང་ཤུར་ཤུར་སླེབས་སོང་།

དགུན་ཁ་ལྗང་ཏིག་གེར་འཚེར་བའི་འཁྱགས་རོམ་དང་སྤུ་གྲིའི་སོ་ཁ་ནས།
ཐོད་པ་དང་རྣ་རྩེ། རྐང་མཐིལ་ནས་ཟུག་གཟེར་ཞིག་གི་ཏལ་འབིགས་བཞིན་ཟུག་ཅིང་།
འདར་སུག་སུག་སླེབས་སོང་།

དགུན་ཁ།
ཐབ་མདོ་ནས་དམར་ལམ་ལམ་མེ་ལྕེ་གླེང་བ་དེ་ཡང་།
དཔྱིད་ཀ་དམར་སིང་སིང་ཐོན་པ་དང་།
རིགས་མཐུན་ས་བོན་ལས་བག་ཆགས་སྣ་ཚོགས་དང་།
སྔོ་ལྗང་ལྗང་གི་ལོ་མ།
སེར་ལམ་མེར་དུད་པའི་གཟི་བརྗིད་དེའི་ཆེད་དུ་ཡིན།

ཡང་ཅིག་བསམས་ན།
དགུན་ཁ། རྒྱང་རིང་ནས་སླེབས་པའི་མགྲོན་པོ་བཞིན།
སྒོ་འགྲམ་དུ་འགྲམ་པ་སྦྱོར་ཞིང་།
དཔྱིད་ཀ་རི་ལུང་ཀུན་ཏུ་འབུས་ཏེ།
མེ་ཏོག་ཅིག་གི་ཁ་རླངས་བཞིན་གང་སར་བཞད་ལ།
སྟོན་ཁ་ལོ་མའི་འཕུར་ལྡིང་དང་ཧྲག་སྒྲའི་བར་དུ་རྩེན་ཞིང་།
སོ་སོའི་སྒོ་རའི་ནང་དུ་ངང་གིས་བབས་ཡོང་།