འཇིག་རྟེན་གྱི་བྱ་བ་སྒོ་ཀུན་ནས་བསྒྲུབས་ཤིང་འགྲུབ་པར་འགྱུར་བའི་རྒྱུ་ཡང་དེ་ཡིན་ཕྱིར།ལོ་ཟླའི་བཞུར་རྒྱུན་ལ་ཕངས་པ་མེད་དགོས་ན་རྒྱུན་འཁྱོངས་བྱེད་དགོས་ལ།མི་ཡུལ་གྱི་ཆེས་མཛེས་སྡུག་བཀྲ་བའི་འཇའ་ཚོན་དེ་ཕུབ་དགོས་ནའང་རྒྱུན་འཁྱོངས་བྱེད་དགོས་པ་དང་།མི་ཡུལ་གྱི་གྲུ་ཁ་དེར་འཇོག་ཕོད་པའི་ལག་རྗེས་ཤིག་འཇོག་དགོས་ནའང་རྒྱུན་འཁྱོངས་བྱེད་དགོས་སོ།།...

ཨེ་མ།ཉི་ཟླ་རེས་བགྲོད་ཀྱིས་གངས་རྩེ་སྐོར་ས།སྙན་ཚིག་ཆུ་ཀླུང་གིས་རླབས་སྒྲ་སྒྲོག་ས།གནམ་འོག་ན་མགོ་འཕང་ཆེས་མཐོ་བའི་ཕོ་རྒོད་ཀྱི་འདུ་ར།ས་སྟེང་ན་མཚར་སྡུག་ཆེས་ཆེ་བའི་དྭངས་སྨན་གྱི་འཁྲུངས་གཞིས།གནམ་གྱི་འོག་ན་སུས་ཀྱང་མ་ནོན་པའི་གེ་སར་གྱི་སྙན་པ་དེས།མཐོ་ལྗོངས་ཀྱི་གནམ་སའི་ལྟེབས་ཁ་དེ་གཞན་ལས་རྒྱ་ཡངས་པར་ཕྱེས།ས་ཡི་ཁྱོན་ན་འགྲན་ཟླས་མ་བཟུང་པའི་གེ་སར་གྱི་གཏམ་རྒྱུད་དེས།གངས་འདབས་ཀྱི་གཙང་པོའི་བཞུར་རྒྱུན་དེ་ཀུན་ལས་རྒྱང་རིང་བར་བརྐྱངས།...

ཆུང་དུས་སུ།ཕ་ཡུལ་ནི་བཤད་མི་ཚར་བའི་ལྷ་སྒྲུང་ཞིག་ཡིན།ཕ་ཡུལ་ནི་རྨིས་མི་ཚར་བའི་རྨི་ལམ་ཞིག་ཡིན།ཕ་ཡུལ་ནི་བླངས་མི་ཚར་བའི་གླུ་གཞས་ཤིག་ཡིན།རྣང་ཞིང་དུ་རེ་བས་བཏབ་པའི།སྨིན་ཟིན་པའམ་མ་སྨིན་པའི་རྨི་ལམ་གྱི་ལོ་ཏོག་དང་།ཐོང་གཤོལ་གྱི་བར་ན་འཕུར་བའི་རྡུལ་འཚུབ་ཀྱི་དྲན་པ།དུས་ཚིགས་ཀྱི་གོམ་འགྲོས་ཀློང་ན་མག་མོག་ཏུ་འཕྱོ་ཞིང་།ཕྱིར་མི་ལྡོག་པའི་རྒྱང་རིང་གི་ལམ་དུ་བཞུར།...

འཇིགས་སྐྲག་དང་དངངས་འཚུབ་ཀྱི་ཁྲོད་དུ་རྣམ་འདྲེན་ལ་མགོ་ཡོམ་ལྟ་བུ་ཞིག་འཁོར་ཏེ་རླུང་ནང་དུ་འགྱེལ་སོང་།ཁོས་ས་རྡུལ་གྱིས་བསྒྲིབས་ནས་ཡོད་པའི་མིག་ཤེལ་ལས་སྔར་བཞིན་རླུང་གིས་འཁུར་བཞིན་པའི་སྲོག་ཆགས་དང་དངོས་པོ་མཐའ་དག་གསལ་པོར་མཐོང་བྱུང་།ཁོས་རང་ཁྱིམ་དུ་ཉར་ཚགས་བྱས་ཡོད་པའི་དཔེ་ཆ་དག་ཀྱང་རླུང་གིས་ཁུར་ཏེ་ཤོག་ལེབ་རེ་རེ་བཞིན་ས་རུ་འཐོར་ནས་ཤོག་ལེབ་རེ་རེ་ས་ངོས་ནས་བར་སྣང་དུ་འཁུར་དུས།རྣམ་འདྲེན་གྱིས་དཔེ་དེབ་དེ་དག་གི་ཁྲོད་ཀྱི་ཤེས་བྱ་དང་ཡིད་དུ་འོང་བའི་གཏམ་རྒྱུད་དག་ལ་སླར་ཡང་ཐེངས་གཅིག་མཇལ་ན་བསམ་པས་ཚོར་སྣང་ཞིག་གིས་ཁོས་ལག་པས་དཔེ་དེབ་དེ་དག་འཛིན་པར་འབད་པ་བྱས་མོད།ཁོས་ལག་པའི་ཟིན་རྒྱུ་ཕར་ཞོགདཔེ་དེབ་དེ་དག་གི་ཤོག་བུ་རེ་རེ་ཕྱོགས་བཞི་མཚམས་བརྒྱད་དུ་འཐོར་གྱིན་རང་དང་བར་ཐག་ཇེ་རིང་ནས་ཇེ་རིང་དུ་གྱུར།རླུང་ཤུགས་ཀྱིས་ཁོ་རང་ཉིད་ཀྱང་བར་སྣང་དུ་བཀྱགས་ནས་བར་སྐབས་ཤིག་ལ་ཁོ་རང་མིག་འཕྲུལ་ཡིན་མིན་ཅི་ཆ།ཁོའི་མཐོང་སྣང་ཞིག་ཏུ་རླུང་གིས་འཁུར་བཞིན་པའི་དཔེ་དེབ་ཀྱི་ཤོག་ངོས་དེ་དག་ལས་དབྱངས་བཞི་དང་གསལ་བྱེད་སུམ་ཅུའང་མགོ་རྟིང་རྫོགས་ནས་མགོ་དང་རྐང་པ་རང་རང་སར་འཐོར་གྱིན་ཕྱོགས་བཞིར་ཁུར་ནས་ཁོ་དང་བར་ཐག་ཇེ་རིང་ནས་ཇེ་རིང་དུ་གྱུར་ཏེ་རེ་རེ་བཞིན་ས་རྡུལ་གྱི་ཀློང་དུ་འཐིམ་པར་གྱུར་པ་མཐོང་བྱུང་།བར་སྐབས་དེར་སྔར་ལས་ཆེ་བའི་རླུང་འཚུབ་དྲག་པོ་ཞིག་གིས་ཁོའི་མཐོང་ལམ་ཡོད་ཚད་བསྒྲིབས་པར་གྱུར།...

ལོ་རྒྱུས་ཀྱི་ཆུ་ཀློང་ན་རྩེན་པའི་གནས་རི་འདི་ལ་དུས་ད་ལྟའི་བར་དུ་ལོ་རྒྱུས་ཉམས་ཞིབ་པ་སུས་ཀྱང་བརྟོལ་མ་ནུས་པའི་ལོ་རྒྱུས་ཀྱི་གསང་བ་ཞིག་སྦས་འདུག་སྙམ་པའི་དོག་པ་ཞིག་གི་སྐུད་སྣེ་མདུན་གྱི་ལམ་བུར་སྦྲེལ་བཞིན་ལུང་སྟོད་ན་ཁ་བ་དང་ལྷིང་འཇགས་མནབས་ནས་ཞི་གནས་ཏིང་འཛིན་གྱི་རྒྱུན་ཐག་ཆད་མ་མྱོང་བའི་དབེན་གནས་དེ་ལ་དམིགས་ནས་སོང་།ཀྱག་ཀྱོག་གི་ལམ་བུ་མང་དུ་བརྒྱུད་མཐར་ང་ཚོ་གཞི་ནས་དགོན་འདབས་སུ་སླེབས་ཤིང་ཚང་མའི་གོམ་ཁ་ཡང་མ་བགྲོས་གཅིག་མཐུན་གྱིས་གཡང་གཟར་གྱི་བྲག་ངོས་ན་ཆགས་པའི་བྲག་ཕུག་དག་གི་ཕྱོགས་སུ་བསྐྱོད་འགོ་བརྩམས།...

ངས་རང་ཉིད་ཀྱི་ཁྲག་རྒྱུན་དང་འབྲེལ་བ་ཡོད་པའི་སྐྱེས་པ་དེ་འདི་ལྟ་བུའི་གཞན་གྱི་བདེ་སྡུག་ལ་བསམ་བློ་གཏོང་ཤེས་མཁན་ཞིག་ཡིན་ན་ཅི་མ་རུང་སྙམ། གལ་ཏེ་སྤྱི་ཚོགས་ནི་སློབ་ཁང་གྲུ་བཞི་མ་འདིའི་ནང་ལོག་གི་མི་རྣམས་ཡིན་ན་ང་ནི་ངའི་གཡོན་ཕྱོགས་སུ་ཡོད་པའི་སློབ་ཁང་དང་ཐག་མི་རིང་བའི་སྡོང་བོ་ཁེར་སྐྱེས་དེ་ཡིན་སྲིད་སྙམ། ངས་རང་ཉིད་སྡོང་བོ་གཞན་རྣམས་ལྟར་བསྟར་ཕྲེང་མི་སྒྲིག་པར་འདི་ལྟའི་རླུང་བུ་དང་ཙག་ཁ་རྒོད་ས་འདིར་གཅིག་པུར་ལྷག་དོན་ཅི་ཡིན་འདོད་པས། ངའི་ནང་སེམས་ཀྱི་སྤྲོ་སྐྱིད་ཡོད་ཚད་སྡོང་བོ་འདིའི་ལོ་འདབ་བཞིན་སྟོན་མཇུག་གི་རླུང་གིས་གང་སར་གཏོར་འགྲོ་ཞིང་། མདུན་ཕྱོགས་ཀྱི་སྒོ་སམ་ངོས་ཀྱི་ཡི་གེ་དེ་དག་ཀྱང་རབ་རིབ་དང་མག་མོག་ཏུ་གྱུར་འདུག...

བདག་ལ་མཚོན་ན།ཀ་བཤད་ལྷུག་རྩོམ་ནི་རྣམ་པའམ་ལུས་ཀྱི་ཐོག་ནས་ལྷུག་རྩོམ་ཡིན་པ་གང་ཞིགདེ་ཉིད་ཀ་མད་ཀྱི་རིམ་པ་བཞིན་བསྟར་བའི་ཐོག་ནས་དེ་ལྟར་མིང་དུ་བཏགས་པ་ཡིན་པས།སྔོན་ཆད་བཞིན་ཚིགས་སུ་བཅད་པ་ཁོ་ནའི་ཐོག་ནས་ཀ་བཤད་འབྲི་བའི་རྣམ་པ་དང་ཅུང་ཁྱད་པར་གཏོད་པ་ཙམ་ལས།ཕྲ་ཞིབ་བྱེ་བྲག་གི་ཐོག་ནས་ཁྱད་ཆོས་འདི་དང་དེའོ་ཞེས་མ་ལག་དང་ལྡན་པ།ཚགས་སུ་ཚུད་པ་ཞིག་ད་དུང་གསལ་བོ་ཞུ་རྒྱུ་མེད།འོན་ཏེ།ལྷུག་རྩོམ་ཞིག་ཡིན་ཚེ།བརྗོད་བྱའི་ནང་དོན་རྒྱ་ཆེ་ཞིང་རང་དབང་ཡིན་ཆོག་ལ།རྣམ་པའི་ཐོག་ནས་ཀྱང་སྲོལ་རྒྱུན་སྙན་ངག་ཇི་བཞིན་རྐང་གྲངས་སོགས་ཀྱི་ཚད་བཀག་མེད་མོད་ཀྱང་།དེ་ཉིད་སྒྱུ་རྩལ་གྱི་བརྩམས་ཆོས་ཤིག་ཡིན་པའི་ཆ་ནས།ངེས་པར་སྒྱུ་རྩལ་གྱི་ཐབས་འཕྲུལ་དུ་མ་སྤྱད་ཆོག་ལ།སྒྱུ་རྩལ་གྱི་ཐབས་འཕྲུལ་སྤྱད་པའི་ཐོག་ནས།ལྷུག་རྩོམ་དེ་ཉིད་ལ་མཛེས་ཉམས་ཐུན་མོང་མ་ཡིན་པ་ཞིག་བསྐྲུན་ཡང་ཆོགལྷག་པར་དུ་ཀློག་པ་པོས་གཟིགས་ཀློག་གནང་སྐབས་སྒྱུ་རྩལ་བརྩམས་ཆོས་ཤིག་ལ་མྱོང་རོལ་བྱས་པའི་སྣང་བ་ངོ་མ་ཞིག་སྦྱིན་ཐུབ་ངེས།དེ་མ་གཏོགས།དེ་ལྟ་བུའི་རྩོམ་རིག་གི་སྐད་ཆ་དང་རྣམ་པའི་ཐོག་ནས་སྒྱུ་འཕྲུལ་གྱི་ཐབས་འཕྲུལ་རེ་འདོན་མ་ཐུབ་ཚེ།ལྷུག་མ་བྲིས་པ་ཙམ་གྱིས་ལྷུག་རྩོམ་ཡིན་པའི་ངེས་པ་ག་ལ་ཡོད།ཡང་སྒྱུ་འཕྲུལ་གྱི་ཐབས་འཕྲུལ་གང་ཞིག་སྤྱོད་དགོས་མིན་ཐད།རང་གི་རྣམ་རྟོག་གམ་བློས་བསླངས་ལ་བརྟེན་དགོས་པ་བདེན་མོད།བདག་གི་བསམ་ཚུལ་ལ།ཐོག་མར་རང་གི་སྲོལ་རྒྱུན་རིག་རྩོམ་ནང་དུ་ཡོད་པའི་རྒྱུ་ཆ་དེ་དག་ལེགས་པར་གཞིབ་རྒྱུ་དེ་ནི་གལ་འགངས་ཆེ་བ་ཡིན་པར་སེམས་ཤིང་།《སྙན་གཞུང་མེ་ལོང་མ》ཡི་ནང་དུ་བསྟན་པའི་ཚིག་རྒྱན་དེ་དགདེང་གི་ཆོས་དང་མཐུན་པའི་དེང་གི་རྩོམ་རིག་བརྩམས་ཆོས་ནང་དུ་གདན་འདྲེན་ཐུབ་ནའང་།བསམ་པའི་ཡུལ་ལས་འདས་པའི་ཁྱད་ཆོས་དུ་མ་ཐོན་ཐུབ་སྙམ།...

རི་བྲག་ནགས་གསུམ་གྱི་འགག་ཕྲེང་མང་པོ་ཐོལ་གྱིས་བརྒལ་འོངས་པའི་གཙང་བོ་ཞིགགྲོང་ཁྱེར་གྱི་བས་མཐའ་རུ་འབབ་པའི་ཚེ་ན་སྟོབས་ཤུགས་ཀྱི་རླབས་སྒྲ་ཙམ་ཡང་མེད་ན་ག་ལ་འགྲིག་ཨང་།ང་རང་གཙང་འགྲམ་གྱི་རྡོ་ཐེམ་ཞིག་ཏུ་ཙོག་སྟེ་ཕྱོགས་ཕྱོགས་སུ་མིག་ཉུལ་ཐེངས་ཤིག་བྱེད་དུས།གཙང་བོའི་ཕར་ཚུར་གྱི་མིས་བཟོས་རྡོ་གཟུགས་དེ་དག་མིག་ལམ་དུ་མངོན་བྱུང་།ཨར་འདམ་གྱིས་འཇིམ་བཟོ་བྱས་པའི་རྡོ་བྲག་གི་གཟུགས་ཅན་ཞིག་རལ་དེ་ག་མཐོང་བའི་མོད་ལ།ངས་སྲ་ཞིང་མཁྲེགས་པའི་རང་བྱུང་གི་རྡོ་བ་དག་ཡིད་ལ་ཤར་ཞིང་།གཙང་བོར་ཆལ་ཆིལ་གྱི་རླབས་སྒྲ་མེད་པ་ནི་གཙང་བོ་རྫ་བྲག་གི་གཡང་གཟར་དང་ཕ་བོང་གི་གྲམ་འཛིང་ལ་མ་ཕྲད་པས་ཡིན་ལ།དེ་ནི་དཀའ་སྡུག་གི་ལས་མ་བྱས་ཚེ་བདེ་སྡུག་གི་སྐད་སྒྲ་མེད་པ་དང་ཀུན་ནས་མཚུངས།...

བརྟན་གཡོའི་ཆོས་ཀུན་ཚིམས་པར་མཛད་པ་སྣ་བརྒྱའི་མེ་ཏོག་སྙིང་དུ་སྡུག།སྡུག་གུར་བཞད་པའི་ལོ་འདབ་ཁུད་ན་ཚེ་སྲོག་འབུམ་ཕྲག་འདོད་པས་མྱོས།།མྱོས་རྣམས་ཅ་ཅོས་ཤང་ཤང་འབབ་ཆུ་སྐྱེངས་པའི་ཟོལ་གྱིས་སའི་འོག་ཡིབ།།ཡིབ་ཞུའི་ཆས་གོས་གསེར་གྱིས་ཤན་ཀྱང་གང་གི་དཔལ་ལ་མི་ཆགས་སུ།།...

ཁ་བའི་རྡུལ་བརྩེགས་སྤོ་མཐོར་བརྩེགས་པའི་རིར།།སྡེར་ཆགས་གདོང་ལྔས་སྲིད་པ་ལྡིར་བའི་སྒྲར།།ནགས་ཀྱི་འབའ་ལེས་ཀི་ཅོ་འབྱིན་པའི་དབྱངས།།འཇིག་རྟེན་བཞད་གད་འཆོར་བའི་རྒྱུ་མིན་ནམ།།ནམ་མཁའི་ཀ་བའི་ཟོལ་དུ་བརྫུས་པའི་རྫར།།ཞོལ་ཆེན་ཧུར་སྒྲའི་ལྕེ་དམར་བརྡབ་པའི་དབྱངས།།ཅེ་སྤྱང་བྱ་རྨྱང་བྱེད་པའི་ལྟེང་ཀ་ལ།།རྨིག་བཞིས་གོར་མ་རྫུ་བཞིན་མི་འགྲོ་འམ།།བྱིན་ཆགས་རྫ་གཡམ་འཐབ་པའི་ཀོ་རོན་ན།།ཐང་དཀར་གཤོག་རྩལ་སྟོབས་ཀྱིས་དྲེགས་པའི་ཚེ།།བྲག་རྩར་ཐི་བ་འཁུན་པའི་བཟོ་ལྟ་ལ།།རྗེས་ཆགས་ཕྱི་མིག་ལྟ་བཞིན་མི་འགྲོ་རི།།...