ཁ་སང་ལ་ཉན་པ།

　　　　　　　　　　　　ལུག་སྤགས་གོས་སུ་གྱོན་པའི་སྟོན་ཁ་དེར།།
　　　　　　　　　　　　སྤལ་ཤུན་ཟས་རུ་གོམས་པའི་འཇིག་རྟེན་ཞིག'
　　　　　　　　　　　　ཟླ་བའི་གོ་ལ་ཞིག་གི་ཕར་ངོགས་ནས།།
　　　　　　　　　　　　མཛེས་ལྡན་བུ་མོ་ཞིག་ལ་གད་མོ་སླང་།།
　　　　　　　　　　　　

　　　　　　　　　　　　འབར་ཞུན་རླུང་གིས་ཟད་པའི་ཐོ་རེངས་ལ།།
　　　　　　　　　　　　གངས་ཅན་སྐྱེས་མའི་བཞོ་ལུང་གཡས་སུ་བཏེགས།།
　　　　　　　　　　　　མར་མེ་རླུང་གིས་སྐྱོམས་པའི་ནུབ་མོ་དེར།།
　　　　　　　　　　　　དབུ་དཀར་རྒན་པོའི་གཏམ་ལ་རིན་ཐང་ཆེ།།

　　　　　　　　　　　　ཐང་སྨུག་གཡུ་ལོ་བཞད་པའི་དུས་ཞིག་ལ།།
　　　　　　　　　　　　འབྲུག་མོས་ཇོ་རུ་དྲན་ཚུལ་གླེང་ན་ཡང་།།
　　　　　　　　　　　　རེ་དོག་སྐྱ་བོ་ཅན་གྱི་དམུ་རྒོད་ཚོས།།
　　　　　　　　　　　　སེམས་ལྡན་གཡག་རྒོད་ཅིག་ལ་སྣ་གཅུ་བཞག།

　　　　　　　　　　　　ལུང་བ་གེ་མོ་ཞིག་གི་འཚེར་ས་ནས།།
　　　　　　　　　　　　ཉི་ཐིག་དྲོད་མོ་ཞིག་ལ་རེ་སྒུག་བྱས།།
　　　　　　　　　　　　ཤ་འདྲིས་སྙིང་ཐུབ་གཞོན་ནུའི་བརྩེ་དུང་ལ།།
　　　　　　　　　　　　ན་ཟུག་ཁྲི་མ་འབུམ་གྱི་བར་ཐག་ཕྱེ།།

　　　　　　　　　　　　ངུར་སྨིག་ཞིང་ས་འགྲིམ་པའི་རྣམ་དཔྱོད་ཅན།།
　　　　　　　　　　　　ཁ་བའི་རིག་གཞུང་མིག་གི་དཔྱིད་ཏུ་གཏམས།།
　　　　　　　　　　　　བརྡ་འཕྲིན་དུས་ཀྱི་ལང་ཚོའི་སོ་ཁ་ན།།
　　　　　　　　　　　　བདག་གི་ཁ་སང་ངོ་མཚར་ཨེ་མ་རྨད།།