༄༅༎དགེ་བའི་བཤེས་གཉེན་ཆེན་མོ་རྒན་དཔའ་རིས་སངས་རྒྱས་མཆོག

དགེ་བའི་བཤེས་གཉེན་ཆེན་མོ་རྒན་དཔའ་རིས་སངས་རྒྱས་མཆོག་ནི། སྤྱི་ལོ1931པར་དཔའ་རིས་བོད་རང་སྐྱོང་རྫོང་གི་ཞྭ་དམར་ཚོ་བར་སྐུ་འཁྲུངས་ཤིང་། སྤྱི་ལོ1954བར་ནུབ་བྱང་མི་རིགས་སློབ་གྲྭ་ཆེན་མོའི་སྐད་ཡིག་སྡེ་ཚན་ནས་སློབ་མཐར་ཕྱིན། སྔ་ཕྱིར་སློབ་གྲྭ་དེ་གའི་བོད་ཡིག་སྡེ་ཁག་གི་དགེ་རྒན་དང་། ཞིབ་འཇུག་སློབ་མའི་སྟོན་པ་དང་། སྡེ་ཁག་དེའི་དབུ་འདྲེན་བཅས་མཛད། ལས་ཁུར་ཟུར་བའི་སྐབས་སུ་སློབ་གྲྭའི་གེ་སར་ཞིབ་འཇུག་ཁང་གི་ཆེད་འདྲོངས་ཞིབ་འཇུག་མཁན་དང་། དགེ་བཤེས་རྒན་པའི་འདུན་མའི་གཙོ་འཛིན་གཞོན་པའི་ཁུར་བཞེས། དེ་དང་ཆབས་གཅིག་ཀྲུང་གོ་རིག་གནས་ཞིབ་འཇུག་ལས་ཁུངས་ཀྱི་ཞིབ་འཇུག་ཆེན་མོ་དང་། ཀྲུང་གོ་དེང་རབས་རིག་རྩལ་ལས་ཁུངས་ཀྱི་ཚེ་གང་བོའི་མཚན་འཛིན་གཙོ་བོ། ཀྲུང་གོ་མངོན་མཐོང་རིག་གཞུང་དུས་དེབ་ཀྱི་ཞུས་ཆེན་པ། འཛམ་གླིང་གི་སློབ་གསོ་ཚན་རིག་རིག་གནས་འཕྲོད་བསྟེན་ལྷན་རྒྱས་རྩ་འཛུག་གི་རིག་འཛིན་ཁ་འཕྲོ་བཅས་ཀྱི་འགན་བཞེས་གནང་ངོ་།།
ཁོང་གིས་བརྩམས་ཆོས་གཙོ་བོ་ནི། བརྡ་སྤྲོད་སྦྱོར་བ་རྣམ་བཞི་རབ་གསལ་དང་། དག་ཡིག་རིག་པ་གབ་པ་མངོན་ཕྱུང་། མངོན་བརྗོད་ཁུངས་་བཙུན་རྒྱ་མཚོ། བོད་ཡིག་བྲི་ཚུལ་མཐོང་བ་ཀུན་སྨོན། དཔེ་ཆོས་ཚིག་མཛོད། སྡེབ་སྦྱོར་རིག་པ་ གསར་བའི་སྲོལ་འབྱེད། ཚན་རིག་ཉེར་མཁོའི་ཤེས་བྱ་བོད་འགྱུར། བོད་ཡིག་ཚེག་སྡེབ་སློབ་པའི་ཐབས་མཆོག་སོགས་དེབ་བཅུ་ལྷག་ཡོད། དཔྱད་རྩོམ་སྐོར་ལ། སྐད་ཆ་དང་ཡི་གེ་ནི་རིག་པའི་གཏེར་མཛོད་ཆེ་ཤོས་ཡིན་པ་དང་། གེ་སར་སྒྲུང་ནི་ངག་གི་སྒྱུ་རྩལ་གྱི་དབྱིག་མཛོད་ཡིན་པ། རྒྱ་བོད་ཡིག་རིགས་བསྡུར་ནས་དཔྱད་པ་བློ་ལྡན་དགའ་བསྐྱེད། ལོ་ཙཱའི་བྱ་བ་ཅིས་ཀྱང་སྐད་རིགས་རང་རང་གི་མིང་དང་ཚིག་གི་སྦྱོར་སྲོལ་དང་བསྟུན་དགོས་པ་སོགས་དཔྱད་རྩོམ་བརྒྱ་ཕྲག་ལྷག་ཡོད། 
གསུང་རྩོམ་ལ་བྱ་དགའ་ཐོབ་པའི་སྐོར་ལ། སྐད་ཆ་དང་ཡི་གེ་ནི་རིག་པའི་གཏེར་མཛོད་ཆེ་ཤོས་ཡིན་ཞེས་པའི་དཔྱད་རྩོམ་ལ། འཛམ་གླིང་གི་གཞུང་ལུགས་སྲོལ་འབྱེད་འགངས་ཆེན་གྱི་བྱ་དགའ་ཁྱད་འཕགས་ཅན་ཐོབ་པ་དང་། བརྡ་སྦྲོད་སྦྱོར་བ་རྣམ་བཞི་རབ་གསལ་ཞེས་བྱ་བ། ཀྲུང་གོའི་བོད་རིག་པ་ཞིབ་འཇུག་གི་ཇོ་མོ་གླང་མའི་བྱ་དགའ་ཨང་གཉིས་པ་ཐོབ་པ་དང་། གེ་སར་སྒྲུང་དཔེ་གུང་སྒྲུག་པར་ཀྲུང་གོ་རིག་གནས་ཁང་དང་། རྒྱལ་ཁབ་མི་རིགས་དོན་གཉེར་ལས་ཁུངས་དང་། ཀྲུང་གོ་སྤྱི་ཚོགས་ཚན་རིག་ཁང་དང། རྒྱལ་ཡོངས་རིག་རྩལ་མཉམ་འབྲེལ་ཚོགས་པ་བཅས་ཀྱི་གེ་སར་སྒྲུང་མྱུར་སྐྱོབ་དང་ཞིབ་འཇུག་ཏུ་བྱས་རྗེས་ཁྱད་འཕགས་བཞག་པའི་བྱ་དགའ་ཐོབ་པ་དང་། གཞན་ད་རུང་བྱ་དགའ་མང་བོ་ཐོབ་མྱོང་ངོ་། །