ཞིབ་འཇུག་པ་ཆེན་མོ་བློ་བཟང་ལྷུན་གྲུབ་རྡོ་རྗེ་ལགས་ཀྱི་མཚམས་སྦྱོར་མདོར་བསྡུས།

ཞིབ་འཇུག་པ་ཆེན་མོ་བློ་བཟང་ལྷུན་གྲུབ་རྡོ་རྗེ་ལགས།

　　བློ་བཟང་ལྷུན་གྲུབ་རྡོ་རྗེ་ལགས་ནི1948ལོའི་ཟླ12པར་མཚོ་སྔོན་འབའ་རྫོང་དུ་སྐྱེས་ཤིང་། ཕྱིས་སུ་ཅི་ལིན་སློབ་ཆེན་འགྲིམ་ནས་དཔལ་འབྱོར་རིག་པའི་འབུམ་རམས་པའི་ཞིབ་འཇུག་སློབ་མའི་གོ་མིང་ཐོབ། 1978ལོ་ནས་བཟུང་སྔ་རྗེས་སུ་མཚོ་སྔོན་ཞིང་ཆེན་མཚོ་ལྷོའི་བྲག་དཀར་རྫོང་ཨུའི་ཧྲུའུ་ཅི་དང་མཚོ་ལྷོ་ཁུལ་ཨུའི་ཧྲུའུ་ཅི། མཚོ་ལྷོ་ཁུལ་དཔོན་བཅས་ཀྱི་འགན་བཞེས། 1985ལོ་ནས་བཟུང་ཐོན་ཀྲུང་དབྱང་དང་ཧྲུའུ་ཅི་ཁྲུའུ་ཡི་ཧྲུའུ་ཅི་དང་། རྒྱལ་ཡོངས་ཀྱི་ན་གཞོན་མཉམ་འབྲེལ་ལྷན་ཚོགས་ཀྱི་རྒྱུན་ལས་ཀྲུའུ་ཞི་གཞོན་པ། ཀྲུང་གོའི་བོད་རིག་པའི་ཞིབ་འཇུག་ལྟེ་གནས་ཀྱི་ཏང་རྩ་འཛུགས་ཀྱི་ཧྲུའུ་ཅི་གཞོན་པ། སྤྱི་ཁྱབ་ལས་འཛིན་པ་གཞོན་པ་བཅས་ཀྱི་འགན་བཞེས། 1995ལོའི་ཟླ9པ་ནས་བཟུང་སྔ་རྗེས་སུ་ཀན་སུའུ་ཞིང་ཆེན་གྱི་ཧྲིན་ཀྲང་གཞོན་པ་དང་ཀན་སུའུ་ཞིང་ཆེན་ཏང་ཨུའི་རྒྱུན་ཨུ། ཞིང་ཆེན་ཏང་ཨུའི་སྲིད་ཁྲིམས་ཨུའི་ཧྲུའུ་ཅི། ཞིང་ཆེན་སྲིད་གྲོས་ཀྱི་ཀྲུའུ་ཞི་གཞོན་པ། ཞིང་ཆེན་དམངས་ཆེན་རྒྱུན་ཨུ་ལྷན་ཁང་གི་ཀྲུང་རིན་གཞོན་པ་སོགས་ཀྱི་འགན་བཞེས། སྐབས་བདུན་པ་དང་བརྒྱད་པའི་རྒྱལ་ཡོངས་སྲིད་གྲོས་ཀྱི་ཨུ་ཡོན་དང་། སྐབས་བཅུ་གཅིག་པའི་རྒྱལ་ཡོངས་དམངས་ཆེན་གྱི་མི་རིགས་ཆོས་ལུགས་ལས་དོན་ཨུའི་ཨུ་ཡོན་བཅས་ཀྱི་འགན་བཞེས། ད་ལྟ་ཀྲུང་གོའི་མདོ་དབུས་མཐོ་སྒང་ཞིབ་འཇུག་ཚོགས་པ་དང་། རྒྱལ་ཡོངས་ཁོར་ཡུག་སྲུང་སྐྱོབ་མཉམ་འབྲེལ་ལྷན་ཚོགས་ཀྱི་རྒྱུན་ལས་ལས་འཛིན་པའི་འགན་བཞེས་ཡོད་པར་མ་ཟད། ལན་ཀྲུའུ་སློབ་ཆེན་དང་ནུབ་བྱང་མི་རིགས་སློབ་ཆེན། ཡུན་ནན་མི་རིགས་སློབ་ཆེན། མཚོ་སྔོན་མི་རིགས་སློབ་ཆེན་བཅས་ཀྱི་གདན་ཞུའི་དགེ་རྒན་ཆེན་མོ་ཡིན་པ་རེད།
　　བགྲང་བྱ་བཅུ་ཕྲག་རིང་ལ་ཁོང་ཉིད་ཀྱིས་མདོ་དབུས་མཐོ་སྒང་གི་སྐྱེ་ཁམས་ཁོར་ཡུག་སྲུང་སྐྱོབ་ལ་ཞིབ་འཇུག་དཔྱིས་ཕྱིན་པ་བྱས་ནས་དཔྱད་འབྲས་ཕུན་སུམ་ཚོགས་པ་ཐོན་ཡོད་པ་སྟེ། ཁོང་ཉིད་ཀྱིས་གཙོ་སྒྲིག་དང་ཆེད་མཁས་པ་མང་པོའི་རྩོམ་སྒྲིག་གནང་བའི《མདོ་དབུས་མཐོ་སྒང་གི་ཁོར་ཡུག་དང་འཕེལ་རྒྱས》ཞེས་པའི་དཔེ་ཚོགས་དེ་ཀྲུང་གོའི་བོད་རིག་པའི་ཞིབ་འཇུག་ལྟེ་གནས་དང་ཀྲུང་གོ་སྤྱི་ཚོགས་ཚན་རིག་སློབ་གླིང་གི་ཚན་རིག་ཞིབ་འཇུག་གི་དཔྱད་གཞི་གཙོ་ཤས་སུ་བཞག  དེར་མ་ཟད《མདོ་དབུས་མཐོ་སྒང་གི་ཁོར་ཡུག་དང་འཕེལ་རྒྱས་བསྡུས་བཤད》དང་། 《མདོ་དབུས་མཐོ་སྒང་གི་ཁོར་ཡུག་དང་མི་གྲངས》། 《མདོ་དབུས་མཐོ་སྒང་གི་ཁོར་ཡུག་དང་མཚོ་མཚེའུ》། 《མདོ་དབུས་མཐོ་སྒང་གི་རྩྭ་སའི་འཕེལ་རྒྱས་དང་སྐྱེ་ཁམས་ཁོར་ཡུག》 《མདོ་དབུས་མཐོ་སྒང་གི་ཆུའི་ཐོན་ཁུངས》། 《མདོ་དབུས་མཐོ་སྒང་གི་འཁྱགས་རོམ་དང་སྐྱེ་ཁམས་ཁོར་ཡུག》  《མདོ་དབུས་མཐོ་སྒང་གི་བྱེ་འགྱུར་གནད་དོན་དང་རྒྱུན་མཐུད་འཕེལ་རྒྱས》། 《མདོ་དབུས་མཐོ་སྒང་གི་འགྲིམ་འགྲུལ་དང་འཕེལ་རྒྱས》། 《མདོ་དབུས་མཐོ་སྒང་གི་ཐོན་ལས་སྒྲིག་གཞི》། 《མདོ་དབུས་མཐོ་སྒང་གི་སྐྱེ་ཁམས་གནས་སྐོར་གྱི་རྒྱུན་མཐུད་འཕེལ་རྒྱས་ཀྱི་དཔེ་དབྱིབས་ཞིབ་འཇུག》 《མདོ་དབུས་མཐོ་སྒང་གི་ཚན་རྩལ་ཡིག་ཆའི་དཀར་ཆག་ཕྱོགས་ཆེན་མོ》། 《བོད་ཀྱི་སྲོལ་རྒྱུན་རིག་གནས་དང་མདོ་དབུས་མཐོ་སྒང་གི་ཁོར་ཡུག་སྲུང་འཕེལ》སོགས་ཆེད་རྩོམ་མང་པོ་བརྩམས་ཡོད་ཅིང་། དེ་ལས་གཞན《རྒྱལ་སྤྱིའི་ཚོང་རར་བསྐྱོད་པ》དང《ཀན་ལྷོའི་སྐྱེ་ཁམས་དཔལ་འབྱོར་དཔེ་སྟོན་ས་ཁུལ་གྱི་ཞིབ་འཇུག》སོགས་གཙོ་སྒྲིག་གནང་། ཁོང་ཉིད་ཀྱིས་ཀྲུང་ཧྭའི་ཆུ་ཡི་གཏེར་མཛོད་དང་ཁུངས་ལྔ་སོགས་ཀྱི་རིག་གཞུང་ལྟ་བ་གསར་བ་བཏོན་མྱོང་ལ།  《མདོ་དབུས་མཐོ་སྒང་གི་ཆུའི་ཐོན་ཁུངས་ཀྱི་སྲུང་སྐྱོབ་དང་བེད་སྤྱོད》དང《ནུབ་རྒྱུད་ས་ཁུལ་གྱི་སྐྱེ་ཁམས་སྤོར་དམངས་འཆམ་མཐུན་གྱིས་འཕེལ་རྒྱས་འབྱུང་བའི་གནད་འགག》སོགས་མདོ་དབུས་མཐོ་སྒང་གི་ཁོར་ཡུག་སྲུང་སྐྱོབ་ཐད་ཀྱི་རིག་གཞུང་དཔྱད་རྩོམ་མང་པོ་སྤེལ་བ་རེད།
　　2011ལོའི་ཟླ3པར་ཀྲུང་གོའི་བོད་རིག་པའི་ཞིབ་འཇུག་ལྟེ་གནས་ཀྱི་སྤྱི་ཁྱབ་ལས་འཛིན་པ་གཞོན་པའི་འགན་བཞེས་རྗེས་མུ་མཐུད་དུ་མདོ་དབུས་མཐོ་སྒང་གི་སྐྱེ་ཁམས་ཁོར་ཡུག་དང་བོད་ཀྱི་རི་ཆུའི་རིག་གནས་ལ་ཞིབ་འཇུག་བྱེད་འགོ་བརྩམས་ཤིང་། ད་ལྟ《མདོ་དབུས་མཐོ་སྒང་གི་ཁོར་ཡུག་དང་རི་ཆུའི་རིག་གནས》ཞེས་པའི་དཔྱད་གཞི་གལ་ཆེན་དེར་འགོ་འཛིན་བྱས་ནས་མི་བརྒྱ་ལྷག་གི་གྲུབ་པའི་ཚོགས་པ་དང་མཉམ་དུ་ཞིབ་འཇུག་བྱེད་བཞིན་ཡོད་པ་རེད།