བྱ་རྒོད།

བྱ་རྒོད། 高山兀鹫 Himalayan Griffon

གཟུགས་གཞིའི་ཁྱད་ཆོས།
     བྱ་རྒོད་ཀྱི་གཟུགས་གཞིའི་རིང་ཚད་ལ་ལི་སྨིས122ཡོད་ཅིང་། ལུས་སྟོད་དཀར་སྐྱའམ་སྨུག་སྐྱ་ཡིན་པ་དང་མགོ་ན་བྱ་སྤུ་སེར་སྐྱ་ཙམ་ཐར་ཐོར་དུ་སྐྱེས་ཡོད། སྐེ་ཕྲ་ཞིང་དཀར་རྗེན་ཡིན་ལ། སྐེ་རྩ་ན་སྲིད་རིང་ཞིང་ཞེང་ཆེ་བའི་སྒྲོ་སྤུ་དཀར་སྐྱ་སྐྱེས་ཡོད་པ་དང་། དེའི་སྟེང་ན་མདུང་མགོའི་དབྱིབས་དང་མཚུངས་པའི་ཐིག་རིས་ཡོད། གཤོག་ཞེང་ཆེ་ལ་གཤོག་སྣེ་དང་རྔ་སྒྲོ་ནག་པོ་ཡིན། བྱ་རྒོད་ཀྱི་མཆུ་ལྗང་སྐྱ་དང་ལུས་སྨད་དཀར་སྐྱ། སུག་སྡེར་ལྗང་སྐྱ་བཅས་ཡིན། ཕོ་མོ་གང་ཡིན་རུང་ལུས་ཀྱི་ཆེ་ཆུང་དང་སྤུ་མདངས་སོགས་གཅིག་མཚུངས་ཡིན།
ཁྱབ་ཡུལ།
     བྱ་རྒོད་ནི་མདོ་དབུས་མཐོ་སྒང་ལ་གཏོགས་པའི་བོད་རང་སྐྱོང་ལྗོངས་དང་ཞིན་ཅང་ཡུ་གུར་རིགས་རང་སྐྱོང་ལྗོངས། ཉིན་ཞ་ཧོས་རིགས་རང་སྐྱོང་ལྗོངས། མཚོ་སྔོན་ཞིང་ཆེན། ཀན་སུའུ་ཞིང་ཆེན། སི་ཁྲོན་ཞིང་ཆེན། ཡུན་ནན་ཞིང་ཆེན་བཅས་ན་གནས་པའི་གཏན་སྡོད་རང་བཞིན་གྱི་འདབ་ཆགས་ཆེ་གྲས་ཀྱི་རིགས་ཤིག་ཡིན།
འཚོ་བའི་གོམས་གཤིས་དང་འཚོ་གནས་ཁོར་ཡུག
     བྱ་རྒོད་ནི་ས་བབ་མཐོ་ལ་མཁའ་དབུགས་སྐམ་ཞིང་གྲང་ངར་ཆེ་བའི་གནས་ཏེ། རི་དྭགས་ཆེ་གྲས་རྒྱུ་སའི་བར་སྣང་དུ་འཕུར་བཞིན་ཡོད་པ་མཐོང་ཐུབ། གནས་བཅའ་ས་ཕལ་ཆེར་མཚོ་ངོས་ལས་སྨིས2500ནས་སྨིས5000བར་གྱི་མཐོ་སྒང་ཡིན་ལ། ནམ་རྒྱུན་མཚོ་ངོས་ལས་སྨིས6000ཡོད་པའི་བར་སྣང་ན་ལྡིང་སྐོར་རྒྱག་པ་དང་ནམ་འཕང་སྟོད་བཞིན་འདུག  སྤྱིར་བྱ་རྒོད་གཅིག་གམ་བྱ་རྒོད་གཉིས་ནས་བྱ་རྒོད་གསུམ་ཙམ་བར་སྣང་དུ་འདུས་ནས་ཁ་ཟས་འཚོལ་བ་དང་། སྲོག་ཆགས་ཀྱི་བེམ་རོ་ཡོད་ས་རུ་བྱ་རྒོད་མང་བོ་འདུ་སྲིད། མཚམས་ལན་རེར་བྱ་རྒོད་མང་བོ་རི་དྭགས་རྒྱུ་ལམ་གྱི་བར་སྣང་དུ་འདུས་ཏེ། རི་དྭགས་ཤི་རོ་བཙལ་ཏེ་ཁ་ཟས་བྱེད་པ་ཡིན། ལོ་རེའི་ཟླདང་པོ་ནས་ཟླ་བཞི་བའི་བར་ནི་བྱ་རྒོད་ཀྱི་སྐྱེ་འཕེལ་བྱེད་པའི་དུས་ཡུན་ཡིན་ལ། རྒོད་ཚང་ཕལ་ཆེར་བྲག་སྲུབས་ན་བཅས་ཡོད། བྲག་ངོས་གཅིག་ན་རྒོད་ཚང་བཞི་ནས་དྲུག་ཡོད་པའི་གནས་ཚུལ་ཡང་མཐོང་རྒྱུ་ཡོད། བྱ་རྒོད་ཕལ་ཆེར་གྱིས་རྒོད་ཚང་རྙིང་བ་ཞིག་གསོ་བྱས་ནས་རྒོད་ཚང་གསར་བ་བཟོ་བ་ཡིན། བྱ་རྒོད་ཀྱིས་ལོ་རེར་སྒོ་ང་གཅིག་གཏོང་བ་དང་། སྒོ་ང་ནི་ཁྲ་ཐིག་མེད་པའི་སྒོ་ང་དཀར་བོ་ཡིན།
སྲུང་སྐྱོབ་བྱེད་པའི་དོན་སྙིང་།
     བྱ་རྒོད་ནི་འདབ་ཆགས་ཁྲོད་ཀྱི་གཟུགས་གཞི་ཆེས་ཆེ་བའི་འདབ་ཆགས་ཀྱི་རིགས་ཤིག་ཡིན་ལ། དགུང་ནམ་འཕང་སྟོད་སྲོལ་མིག་ལ་མཛེས་པར་མ་ཟད། སྲོག་ཆགས་ཀྱི་བེམ་རོ་སོགས་མི་གཙང་བ་དག་ཁ་ཟས་སུ་སྤྱད་དེ་ཁོར་ཡུག་གཙང་སྦྲ་བྱེད་པར་བྱེད་ནུས་གལ་ཆེན་འདོན་བཞིན་ཡོད།
ད་ཡོད་གནས་བབ།
     བོད་པ་རྣམས་ཀྱིས་གནའ་ནས་བཟུང་བྱ་རྒོད་ལ་སྲུང་སྐྱོབ་བྱེད་པ་ནི་གོམས་སྲིལ་ཞིག་ཏུ་གྱུར་ཡོད། དམངས་ཁྲོད་རྩོམ་རིག་ཏུའང་བྱ་རྒོད་་ལ་བསྟོད་པའི་གཏམ་རྒྱུད་དང་གླུ་ཚིག  གཏམ་དཔེ་སོགས་ཤིན་ཏུ་མང་། ཡིན་ནའང་མི་རྣམས་ཀྱིས་ཐོན་སྐྱེད་སྤེལ་བ་དང་བྱི་གསོད་དུག་གཟན་འཕངས་པ་སོགས་ཀྱི་དབང་གིས་བྱ་རྒོད་ནི་ཇེ་ཉུང་ནས་ཇེ་ཉུང་དུ་གྱུར་ཡོད། ད་ལྟ་ཁོར་ཡུག་སྲུང་སྐྱོབ་བྱ་དགོས་པའི་འདུ་ཤེས་ཉིན་རེ་བཞིན་ཇེ་ཆེར་གྱུར་བ་དང་མཉམ་དུ་བྱ་རྒོད་ཀྱི་གྲངས་ཀའང་སྔར་ལས་ཇེ་མང་དུ་འགྲོ་བཞིན་མཆིས། བྱ་རྒོད་ནི་རང་རྒྱལ་གྱི་གལ་གནད་དུ་བཟུང་སྟེ་སྲུང་སྐྱོབ་བྱ་དགོས་པའི་རི་སྐྱེས་སྲོག་ཆགས་ཨང་རིམ་གཉིས་པ་ཡིན།