ནོར་འཁྲུལ།

        ནོར་འཁྲུལ་ནི་འཚར་ལོངས་ཀྱི་གོ་རིམ་ཞིག་ཡིན་མོད། འོན་ཏེ། ནོར་འཁྲུལ་དེ་དུས་ཐོག་ཏུ་ཡོ་བསྲང་བྱེད་རྒྱུ་ནི་བྱིས་པ་ཡ་རབས་ཤིག་གི་བསྒྲུབ་སྲོལ་ཞིག་མ་ཡིན་ནམ།
        ཉིན་འགའ་ཡི་སྔོན་དུ་བསྒྲུབ་པའི་དོན་དག་དེ་ནི་ངས་མི་ཚེ་འདིར་ལས་པའི་ནོར་འཁྲུལ་ཆེན་པོ་ཞིག་ཡིན་ལ་ང་རང་མི་ཚེ་འདིར་ཆེས་འགྱོད་པ་སྐྱེ་བྱེད་ཀྱི་དོན་དག་ཐོག་མ་དེའང་ཡིན། 
        སློབ་གྲོགས་ག་གེ་མོའི་ངེད་གཉིས་སིལ་ཏོག་བརྐུ་རུ་འགྲོ་ཟེར་ལ་ངས་མཛོད་ཁང་དུ་ཇི་ལྟར་འཛུལ་བར་དྲིས་ཚེ། སྒོ་ཡི་སྟེང་ལ་ཤུགས་ཆེན་པོས་འགའ་བརྒྱབ་ན་ཕྱེ་ཐུབ་པར་བཤད།
        དགོང་ཚོགས་གྲོལ་རྗེས་ངེད་གཉིས་མཉམ་དུ་མཛོད་ཁང་གི་སྒོ་ཁར་བཅར། ང་རང་མཛོད་ཁང་གི་སྒོ་ཕྱེ་རྒྱུའི་སྤོབས་པ་ཉམས་སྟེ་ཕྱི་ནུར་བྱས་བ་ན་ཁོས་ང་ལ་རོགས་རམ་བྱེད་དགོས་པའི་བརྡ་ལ་མགོ་བོ་འགའ་གཡུག་པ་ན་ང་རང་སྔར་ལས་ལྷག་པའི་སྐྲག་སྣང་ཤིག་སྐྱེས་སོང་། 
        ཁོས་ཤུགས་གང་ཡོད་ཀྱིས་སྒོའི་སྟེང་ལ་ལན་འགའ་བརྒྱབ་པ་ན། འཛིན་གྲྭ་གཞན་པའི་སློབ་གྲོགས་ག་གེ་མོའི་ཐོས་རྗེས་དེར་བརྒྱུགས་འོངས། སྐབས་དེར་ཁོ་གཉིས་ཀྱིས་ཕན་ཚུན་ལ་ཤབ་ཤུབ་ཀྱི་ཁ་བརྡ་འགའ་བཤད་རྗེས་མཉམ་དུ་རྐང་བས་སྒོའི་སྟེང་ལ་འགའ་རྡུང་བ་ན་སྒོ་ཆག་སོང་།
        ཁོ་གཉིས་ག་མཉམ་དུ་མཛོད་ཁང་ནང་དུ་བརྒྱུགས་པ་ན་ང་ཡང་རྗེས་སྙེག་ནས་སོང་བ་དང་།ཐེངས་དང་པོར་འདི་འདྲའི་ལས་འགུལ་ལ་ཞུགས་པ་ཡིན་པས། བྲེལ་མྱུར་གྱིས་ཡར་མར་ལ་འགའ་ལྟས་པ་ན་སིལ་ཏོག་མ་གཏོགས་ཅི་ཡང་རིག་རྒྱུ་མི་འདུག་པར་སིལ་ཏོག་གཉིས་ཁྱེར་ནས་མལ་ཁང་དུ་བྲོས།
        ཉིན་འགའ་འགོར་རྗེས་ཁོས་ཡང་བསྐྱར་བརྐུས་བྱེད་དུ་འགྲོ་ཟེར་བར་ཁས་མ་བླངས། དེའི་དགོང་མོར་ཁོ་ཕྱིར་ཐོན་དུས་ང་ལ་ཟླ་གོར་མ་རྙེད་པར་སིལ་ཏོག་གཉིས་ཁྱེར་ནས་བུད་ཡོང་ཟེར། དེ་ནས་ཅུང་ཙམ་འགོར་རྗེས།ཁོ་གཉིས་ཨ་ཁུ་བདེ་སྲུང་བ་ཡིས་ཁྲིད་སོང་། རིམ་བཞིན་དུ་དེ་དང་འབྲེལ་ཡོད་ཀྱི་སློབ་གྲོགས་ཚང་མ་བོས་ནས་འདྲི་གཅོད་ཡང་ཡང་བྱས་ལ། སློབ་གཙོས་སྔོན་ཆད་མི་ངན་པའི་བརྐུས་བྱས་ནས་མཇུག་འབྲས་ངན་པ་འབྱུང་ཚུལ་གྱི་དཔེར་འཇོག་དང་ཁ་བརྡ་མང་པོ་བྱས་ནས་བདག་གི་དྲན་པའི་སྒོ་མོ་ཡངས་བོར་བྱས་ལ་ལྷན་ཅིག་ནོངས་འགྱོད་ཅིག་ངང་ངམ་ཤུགས་ཀྱིས་སྐྱེས་སོ།
དེ་ལྟར་་མི་དགོས་པའི་དོན་དག་ཞིག་ལ་ཚུལ་ནས་ཉིན་ཅི་ཙམ་འགོར་བ་ཡང་མ་ཤེས་མོད། འོན་ཀྱང་། གནང་བ་སྟེར་བའི་དུས་ཚོད་ལ་འཁེལ་འདུག སློབ་གྲོགས་ཚོ་རེ་རེ་བཞིན་ཀྱིམ་བདག་གིས་ཁྲིད་ནས་བུད་སོང་། བར་གླགས་དེར་ཨ་ཕ་སློབ་ཁང་དུ་འཛུལ་འོངས།དགེ་རྒན་ཁོ་གམ་དུ་བོས་ནས་བྱིས་པར་ཁ་ཏ་སློབ་གསོ་གཏོང་དགོས་ཚུལ་གྱི་ཁ་བརྡ་བྱས་པ་ན་ཨ་ཕའི་མིག་ཟུང་ལས་མཆི་མ་རྡོག་གཅིག་སར་ལྷུང་བ་དང། སྐད་དམའ་མོས་དགེ་རྒན་ལ། ཡ་ཡ། ཡ་ཡ་ཞེས་བཤད། དེ་དུས་ང་རང་ཨ་ཕ་ལ་ངོ་ཚ་བ་དང་། ཡིད་སེམས་ཀྱི་གཏིང་ལ་གྲི་ཡིས་གཙགས་པ་དང་འདྲ་བར་ཙག་ཤུད་འགའ་བརྒྱབ་སོང་ལ་ནོངས་འགྱོད་ཆེན་པོས་མགོ་བོ་སྨད་དེ་བསྡད།
རྩོམ་པ་པོ་ཆུང་ཆུང་རྡོ་རྗེ་ཚེ་རིང་ནི་ཧོལ་ཁ་མི་རིགས་བཅའ་སྡོད་སློབ་ཆུང་གི་དྲུག་གཉིས་འཛིན་གྲྭའི་སློབ་མ་ཡིན།