བདག་གི་དགེ་རྒན།

        འཇིག་རྟེན་གྱི་སློབ་མ་ཚང་མར་རང་ཉིད་ཀྱི་སེམས་ཁོངས་སུ་ཆེས་བཟང་བའི་དགེ་རྒན་རེ་ཡོད་སྲིད་དེ། བདག་ལ་ཡང་ཆེས་ཁྱད་དུ་འཕགས་པའི་དགེ་རྒན་བཟང་བོ་ཞིག་ཡོད།
        ཁོང་ནི་བདག་གི་སློབ་ཆུང་ལོ་ངོ་དྲུག་རིང་གི་སྐད་ཡིག་དགེ་རྒན་ཡིན་པར་མ་ཟད་འཛིན་བདག་ཀྱང་ཡིན། ད་ལྟ་ཕལ་ཆེར་དགུང་ལོ་བཞི་བཅུར་སོན་ལ་ཉེ། གདུག་རྩུབ་ཆེ་བའི་ལོ་ཟླས་ཁོང་གི་གདོང་ལ་རྒས་གཉེར་གྱི་རི་མོ་ཕབ་ཅིང་ནག་ལ་འོད་འཁྱུག་པའི་སྐྲ་ལོ་ཡི་ཁ་དོག་བསྒྱུར། གསལ་ཞིང་རྣོ་བའི་རྣ་ཟུང་ཅོར་སེ་ཡོད་པས་ཚོགས་ཐུན་ནས་སློབ་གྲོགས་སུ་ཡིས་ཤབ་ཤུབ་ཀྱི་སྐད་ཆ་བཤད་ན་འཆོར་དུ་མི་འཇུག
        བྱ་གླག་གི་གཤོག་པ་བརྐྱངས་འདྲའི་སྨིན་མའི་འོག་གི་ཁྲ་ཆུང་མིག་ཟུང་དེར་ནམ་ཡང་བྱམས་བརྩེའི་མདངས་ཀྱིས་ཁེངས་ཡོད། བདག་གི་མིག་ལམ་དུ་དགེ་རྒན་གྱི་ཞལ་རས་ནི་བཅོ་ལྔའི་དུང་ཟླ་ལས་མཛེས་ཤིང་གུས་པར་འོས་པ་ཞིག་རེད།
        བདག་གི་དགེ་རྒན་གྱི་གཤིས་རྒྱུད་བལ་ལས་འཇམ་ལ། ཆེ་བཀུར་བྱམས་ལྡན་པ་དང་། བྱ་བ་ཅི་ཞིག་བསྒྲུབ་ཅིང་བློ་བརྟན་འགྱུར་མེད་དང་ཁ་བཤད་དོན་ལ་གནས་ཐུབ་པས་དགེ་སློབ་བར་གྱི་བརྩེ་མདངས་ཀྱི་བསམ་པ་འོ་ཆུ་གཅིག་ལ་འདྲེས་བ་བཞིན་ཡིན། ཁོང་ནི་ང་ཚོའི་དགེ་རྒན་ཡིན་པར་མ་ཟད་བྱམས་བརྩེ་ལྡན་པའི་ཨ་མ་ཞིག་དང་འདྲ་བར་དུས་ནམ་ཡང་ང་ཚོ་མི་རེ་རེའི་མདུན་ལམ་ལ་སེམས་ཁུར་བྱེད། ཁོང་གིས་དུས་ཚོད་སྐར་མ་གཅིག་ཀྱང་ཆུད་ཟོས་སུ་མི་གཏོང་བར་གྲོན་ཆུང་བྱེད། དགེ་རྒན་གྱིས་རང་ལ་ཆམ་པ་ལྕི་མོ་ཕོགས་ཀྱང་ང་ཚོའི་དོན་དུ་སློབ་ཐུན་བར་ནས་སྨན་ཞིག་བླངས་རྗེས་སྐར་མ་གཅིག་གིས་ཀྱང་རྗེས་སུ་མི་ལུས་བར་ཡོང་ནས་སློབ་ཁྲིད་བྱེད།
        དགེ་རྒན་གྱིས་རྟག་ཏུ་ཁོར་ཡུག་སྲུང་སྐྱོབ་སྐོར་གྱི་སློབ་གསོ་གཏོང་ཞིང་། སྣོད་བཅུད་དོ་མཉམ་གྱི་གལ་ཆེན་རང་བཞིན་ཡང་དང་ཡང་དུ་གསུངས་པས་ང་ལའང་ཁོར་ཡུག་སྲུང་སྐྱོབ་བྱེད་དགོས་པའི་འདུ་ཤེས་ཆགས་ཤིང་། ཕ་ཡུལ་གྱི་རི་ཆུ་ནགས་གསུམ་ལ་ནམ་ཡང་མཛེས་སྡུག་ལྡན་ཕྱིར་རང་ནུས་ཅི་ལྕོགས་བྱེད་རྒྱུ་ཡིན།
        དེ་བས་ན། དགེ་རྒན་ཁོང་ལྟ་བུ་ཞིག་ལ་འཕྲད་པ་ནི་ང་ཡི་བསོད་ནམས་ཆེན་པོ་ཞིག་ཡིན་ནོ། །

རྩོམ་པ་པོ་ཆུང་ཆུང་ནམ་མཁའ་རྡོ་རྗེ་ནི་ཧོལ་ཁ་མི་རིགས་བཅའ་སྡོད་སློབ་ཆུང་གི་དྲུག་གཉིས་འཛིན་གྲྭའི་སློབ་མ་ཡིན།