འགྱོད་པ།

       བྱིས་དུས་ཀྱི་འཚོ་བ་ནི་མངར་ཞིང་སྐྱུར་བ་ཞིག་ཡིན་ལ་མི་སུ་དང་སུར་མཚོན་ན་ཡང་དགའ་སྐྱོ་ཆགས་སྡང་གི་སེམས་འགྱུ་གང་མང་ཞིག་ཡོད་པ་སྨྲས་མ་དགོས།
       ནངས་ཚོགས་ལ་སྐད་ཡིག་དགེ་རྒན་གྱིས་ང་ཚོ་བློ་འཛིན་དུ་བཅུགདགེ་རྒན་གྱིས་བཤད་རྒྱུར།
       དེ་རིང་བློ་འཛིན་བྱེད་པའི་ནང་དོན་ཚང་མ་ཉིན་འགའ་ཡི་སྔོན་ལ་བཀོད་སྒྲིག་བྱས་ཟིན་པ་དག་དག་ཡིན། བློ་བཟུང་ནས་མ་ཚར་ན་གནང་བ་སྟེར་སྐབས་དུས་ལྟར་འགྲོ་རུ་མི་འཇུག་པར་བཤད། 
       ནངས་ཚོགས་ཀྱི་དུས་ཚོད་བེད་སྤྱད་ནས་འབད་པ་བྱས་མོད། འོན་ཀྱང་། སེམས་ལ་ཅི་ཡང་མི་འགྲོ་བས་གནམ་གང་ལ་རྟ་གསོས་ནས། །ཚེས་གཅིག་ལ་རྟ་རྒྱུག་པའི་དཔེ་རུ་གྱུར་ཏོ། །
       ད་ཐེངས་ནད་ཡམས་ཀྱི་དབང་གིས་སློབ་གྲྭ་ནས་འདུག་ཡུན་རིང་སོང་བའམ་ཅི་ཡིན་མི་ཤེས་མོད། ཨ་ཕ་དྲན་ནས་ཡིད་སེམས་ལྡིབ་ལ་ལྷུང་འགྲོ་བའི་ཉིན་མོ་ཞིག་རེད། 
       ནངས་ཇ་འཐུང་བའི་གོ་སྐབས་དང་བསྟུན་ནས་རང་ཉིད་ཀྱི་དཔེ་དེབ་སྟེང་ལ་ལྕགས་སྙུག་དམར་པོའི་རྟགས་བརྒྱབ་ནས་བློ་བཟུང་ཚུལ་བཅོས། ཐུན་དང་པོ་མ་གྲོལ་བའི་སྔོན་ལ་སློབ་མ་འགས་དགེ་རྒན་ལ་ཞུ་གཏུགས་བྱས་འདུག དགེ་རྒན་གྱིས་བཤད་རྒྱུར་སློབ་གྲོགས་འགའ་རེས་ང་ཡི་ཡིག་གཟུགས་དང་འདྲ་བའི་རྟགས་བརྒྱབ་འདུག མ་གསང་དྲང་མོར་བཤད་ན་རང་ཉིད་ཡ་རབས་སྤྱོད་བཟང་གི་བསྒྲུབ་སྲོལ་ཡིན་ཞེས་བཤད་ནས་བུད་སོང་།
       སྐབས་དེར་ངའི་ཅི་ཞིག་བཤད་དགོས་པ་དང་ཅི་ཞིག་བསྒྲུབ་དགོས་པའང་དྲན་རྒྱུ་མི་འདུག དེ་ནས་མྱུར་དུ་ཤོག་བུ་དང་ལྕགས་སྙུག་བླངས་ནས་སྐད་འཇོག་ཡི་གེ་ཞིག་བྲིས་ནས་རྒན་ལགས་ཀྱི་མདུན་ཅོག་སྟེང་བཞག 
       ཕྱི་དྲོ་ཐུན་དང་པོ་འཚོགས་སྐབས་དགེ་རྒན་གྱིས་ཡི་གེ་དེ་ཁྱེར་ཡོང་ནས་ངའི་ལག་ལ་བཞག ཁ་ཕྱེས་ནས་བལྟས་པ་ན་འབྲི་སྙུག་དམར་པོ་ཡིས་འདི་ལྟར་བྲིས་ཡོད། སློབ་བུ་ལགས། ཁྱོད་རང་ཉིན་འདི་དག་ལ་བློ་རིག་གནད་དུ་བསྒྲིམ་ཐུབ་མེད་པ་རྒན་ལགས་ཀྱིས་སྔ་མོ་ནས་ཤེས་ཡོད། ཡིད་མ་ཆད། བློ་མ་ཕམ། བརྩོན་པ་ཆུ་བོའི་རྒྱུན་བཞིན་བསྟེན་དང་གཡུར་ཟའི་འབྲས་བུ་སྨིན་ནི་རེད་ཅེས་བྲིས་འདུག གྲལ་དག་ལ་ཆེ་ཆུང་སྙོམས་པའི་ཡིག་འབྲུ་དེ་དག་བཀླགས་རྗེས་རང་ཉིད་རང་གི་མགོན་ཡིན་པའི་ཡིད་ཆེས་ཀྱིས་རབ་ཏུ་བརླན་པ་དང་དགེ་རྒན་སྔ་མོ་ནས་རང་ལ་ཡིད་ཆེས་བརྟན་པོ་ཡོད་པའང་རྟོགས་སོང་།
       དེ་བས་ན། མངར་ལ་སྐྱུར་བའི་འཚོ་བ་འདི་ཡི་ཁ་དོག་འབྱེད་མཁན་ནི་དགེ་རྒན་དམ་པ་ལས་མ་འདས་སོ། །

རྩོམ་པ་པོ་ཆུང་ཆུང་བསམ་འགྲུབ་མཚོ་ནི་ཧོལ་ཁ་མི་རིགས་བཅའ་སྡོད་སློབ་ཆུང་གི་དྲུག་གཉིས་འཛིན་གྲྭའི་སློབ་མ་ཡིན།