ཨ་མདོ་ཆབ་འགག་ཡུལ་གྱི་མདའ་རྩེད།

　　2. མདའ་རྩེད་ཀྱི་འགོ་རྩོམ་པའི་སྐོར།
　　འཇལ་འབེན་ལ་ཨ་མ་ཟེར་བའི་སྲོལ་ཡོད་ལ། མདའ་འཕེན་སའི་ཡུལ་ལ་སྐུ་ར་དང་། མདའ་འཕེན་གྲོགས་ལ་སྐུ་ཡ་ཡང་ཟེར། གང་ལྟར་ཀྱང་ཕྱོགས་གཉིས་ཀྱིས་བཟོས་པའི་འཇལ་འབེན་གྱི་དབྱིབས་ནི་ཟུར་གསུམ་ཡིན་ལ། ཟུར་གཉིས་སར་འབབ་པ་དང་ཟུར་གཅིག་གནམ་ལ་འཁོར་བ། ཟུར་རྩེ་རུ་ཐོ་ལུ་ཟེར་བའི་ས་ཐོ་ཆུང་ཆུང་ཞིག་འཇོག་པ། འབེན་གྱི་སྟོད་ཀྱི་སྙིང་ཁར་འཇལ་ལྟེ་ཞེས་པ་ཞིག་དང་མཐའ་སྐོར་དུ་དཀར་ཆག་གྲུ་བཞི་ཅན་ནམ་རུས་ཆག་དཀར་པོ་ལྔ་དྲུག་ཙམ་འཇོག་པའི་ལུགས་སྲོལ་ཡོད། དེའི་རྒྱུ་མཚན་ནི་མདའ་འཕེན་སྐབས་འབེན་གྱི་དཀྱིལ་སྙིང་གསལ་བོར་མཐོང་བའི་ཆེད་དུ་ཡིན། འཇལ་འབེན་གྱི་མཐའ་མཚམས་སུ་རྩི་ཏོ་རིང་བས་ཕྱི་ནང་གི་མཚམས་བཅད་འདུག  འདིར་གསལ་བོར་ཤེས་དགོས་པ་ཞིག་ནི་འཇལ་ལྟེ་དང་མཐའ་མཚམས་ཀྱི་རྩི་ཏོ་གཉིས་ཤིན་ཏུ་གལ་ཆེ་ལ། དེ་ཡང་མཐའ་མཚམས་ཀྱི་རྩི་ཏོའི་ནང་ཕྱོགས་སུ་ཕོག་པའི་མདའ་ཡིན་ན་གྲངས་ཀའི་ནང་དུ་བརྩིས་ཆོག་ལ། མཐའ་མཚམས་ཀྱི་རྩི་ཏོའི་ཕྱི་རུ་ཡོད་ན་བརྩི་མི་ཆོག   དེ་བཞིན་མདའ་མང་པོ་འཇལ་འབེན་ཏུ་བབས་པའི་དབང་དུ་བཏང་ནའང་མདའ་གང་འཇལ་ལྟེ་ལ་ཐག་ཉེ་ན་དེ་ཁོ་ན་བརྩི་བ་ལས་གཞན་མདའ་ཡོད་ཚད་མི་བརྩི་བ་ཡིན། དེ་ནི་མདའ་མོ་གཅིག་གིས་མདའ་གཞན་ཚང་མ་བླངས་ཟིན་པ་ཡིན་པས། མདའ་བ་རྣམས་ཀྱིས་འདིའི་ཕྱོགས་སུ་དོ་སྣང་བྱེད་བཞིན་མཆིས།
　　དེ་ཡང་ཕྱོགས་གཉིས་ཀས་འཇལ་འབེན་བཟོས་གྲུབ་རྗེས། མདའ་བ་རེའི་ལག་ཏུ་མདའ་ཆ་རེ་བཟུང་ནས་རང་གི་འཇལ་འབེན་དམ་པོར་བསྐོར་ནས་ཐེངས་གསུམ་འཁོར་བ་དང་ཀི་སྒྲ་འབྲུག་སྟོང་ལྡིར་བ་བཞིན་སྒྲོག་ཅིང་། སྐད་སྒྲ་ཇི་འདྲར་ཆེ་ན་དེ་འདྲར་བརྗིད་ཉམས་ལྡན་ཞིང་། ད་དུང་ཕ་རོལ་པོ་ཟིལ་གྱིས་གནོན་པའི་ནང་དོན་ཡང་མཆིས་སོ། །
　　དེ་ནས་མདའ་འཕེན་གྱི་འགོ་བརྩམས་པས་ན་ཐོག་མར་གཞིས་པ་ཚང་གིས་འཇལ་འབེན་སྟེང་ལ་འཕེན་པའི་སྲོལ་ཡོད་ལ། མདའ་མོ་དང་པོ་དེ་མ་ཁྲིད་མཁན་གྱིས་འཕེན་དགོས་པ་ལགས། དེ་ལྟར་གཞིས་པ་ཚང་གི་མ་ཁྲིད་མཁན་གྱིས་མདའ་དང་པོ་འཕངས་པ་ན། མདའ་མགོ་ན་ཡོད་པའི་ཕོ་གསར་སྐྱེ་གཟུགས་ཡག་ཅིང་གྱོན་པ་ཕལ་ཆེར་དོ་མཉམ་པ་ལྔ་ནས་དྲུག་གིས་མྱུར་དུ་མདའ་དང་པོ་དེ་འཇལ་འབེན་གྱི་ཐོ་ལུའི་ལྟག་ཏུ་བཙུགས་རྗེས་རིམ་གྱིས་སྐད་ཆེན་པོས་ཀི་ཤུར་བརྒྱབ་ནས་རྐང་པས་ས་རྡུང་བའི་སྐབས་སུ། མདའ་བ་མང་པོ་གྲལ་བསྒྲིགས་ནས་ཀི་འདེབས་པ་དང་རྐང་པ་དག་རིམ་པ་ཡོད་པའི་སྒོ་ནས་སར་བརྡུངས་ཏེ་འཇལ་འབེན་གྱི་ཕྱོགས་སུ་འགྲོ་བ་དང་། དེ་ནས་མདའ་མགོའི་ཕོ་གསར་དག་དང་འདྲེས་ནས་འབེན་ལ་སྐོར་བ་ཐེངས་གསུམ་གྲུབ་རྗེས། ཐམས་ཅད་ཀྱིས་ཀི་བསྭོ་བསྭོ་ལྷ་རྒྱལ་ལོ་ཞེས་ལན་མང་པོ་སྒྲོག་ཅིང་ཕྱིར་མདའ་འཕེན་སར་ལོག་པ་ལགས་སོ། །དེ་ནས་མགྲོན་པོ་ཚང་གི་མ་ཁྲིད་མཁན་གྱིས་མདའ་དང་པོ་འཕངས་པ་ན་ཡང་གོང་བཞིན་རིམ་པ་དེ་དག་བརྒྱུད་དགོས་པ་ལགས། དེ་ཡང་ཀི་བཏབ་པར་བརྗིད་ཆེ་བ་དང་གྲལ་བསྒྲིགས་ནས་འགྲོ་བར་ཉམས་ཇི་འདྲར་ཆེ་ན་དེ་འདྲར་གཟེངས་བསྟོད་ཐོབ་པ་ཡིན་ལ་དེར་སྡེ་བར་ལ་རྒྱ་བརྩོན་པའི་དོན་ཡང་འདུས། ཕྱོགས་གཉིས་ཀའི་མ་ཁྲིད་པའི་གོ་རིམ་མཇུག་བསྒྲིལ་རྗེས་བུ་ཁྲིད་མཁན་གཉིས་ཀྱིས་འཕེན་དགོས་པ་དང་། དེ་ནས་མདའ་བ་ཐམས་ཅད་ཀྱིས་རིམ་པ་བཞིན་འཕེན་པའི་འགོ་རྩོམ་པ་ཡིན། གཞིས་པ་དང་མགྲོན་པོ་ཕྱོགས་གཉིས་ཀའི་མདའ་བ་ཚོས་རང་རང་གི་ཆ་བསྒྲིགས་ནས། མདའ་འཕེན་པའི་སྐབས་སུ་ལྷ་འབོད་ཀླུ་འབོད་བགྱིས་ནས་མདའ་འགོག་པའི་སྲོལ་ཡང་ཆགས་ཡོད། རང་རང་གི་སྐུ་ཡའམ་མདའ་འཕེན་གྲོགས་ཀྱི་མདའ་དེ་འབེན་ལ་ཕོག་པ་ན། ལ་རྒྱ་ཤོར་བ་དང་ངོ་ཚ་ཆེ་བའི་བཤད་ཚུལ་ཡོད་པས། མདའ་བ་ཕན་ཚུན་སུ་ཡིན་ཡང་མདའ་ཕོག་པར་དོགས་ནས་ཡིད་བདེ་མོ་ཞིག་གཏན་ནས་ཡོང་ཐབས་མེད། 
　　3. མདའ་རྩེད་རྩེད་སྲོལ།
　　མདའ་རྩེད་ཀྱི་རྩེད་སྲོལ་གྱི་ཐད་ལ་ཡང་ས་ཆ་སོ་སོར་ལུགས་སྲོལ་མི་འདྲ་བ་རེ་ཡོད་ཀྱང་མ་བུ་དང་བ་མོའི་རྩེད་སྲོལ་ནི་ཕལ་ཆེར་མཐུན་པར་སྣང་ལ། མདའ་ལྔ་ལོང་དགོས་པ་དེ་ཡང་གཞི་མགྲོན་གཉིས་སུ་ཡིན་ཡང་སྔོན་མར་མདའ་སུ་ལོངས་ན་དེའི་ཕྱོགས་ཀྱི་མ་ལོངས་པ་ཡིན། མ་ལོངས་པའི་སྟེང་དུ་མདའ་ལྷག་མ་དྲུག་བདུན་བརྒྱད་ལྟ་བུ་ཕོག་སྟེ་བརྩི་རྒྱུ་ཡོད་པས་ན། ལྷག་མའི་མདའ་ལ་ཅོང་རྡོག(ཨ་མདོའི་ཁ་སྐད་དེ་གོ་རེའི་རིགས་ཤིག་ཡིན)ཟེར། དམངས་སྲོལ་ལྟར་ན་མ་ལོངས་ནས་ཅོང་རྡོག་གཅིག་ཅོང་རྡོག་གཉིས་ཞེས་པའི་བརྩི་སྲོལ་ཡོད། མ་ལོངས་རྗེས་བུ་ཁྲིད་པའི་འགོ་བརྩམས་པ་ལགས། བུ་ཁྲིད་པའི་འགྲོ་ལུགས་ཀྱང་གོང་དུ་བརྗོད་ཟིན་པའི་མ་ཁྲིད་པའི་འགྲོ་ལུགས་དང་གཅིག་མཚུངས་ཡིན། བུ་ལའང་མདའ་ལྔ་ལོང་དགོས་པ་ཡིན། གལ་སྲིད་མ་བུ་གཉིས་ཀ་སྡེ་གཅིག་ལ་ལོངས་པའི་དབང་དུ་བཏང་ན་བ་མོ(བ་མོ་ཞེས་པ་ནི་སྲོག་ཆགས་བ་མོའི་མིང་དང་གཅིག་མཚུངས་ཡིན་ལ། འདིར་མདའ་བཅུ་ལོངས་པས་ན་བ་མོ་གཅིག་ལ་བརྩི་སྲོལ་ཡོད)བཞག་པ་ཡིན། བ་མོ་བཞག་པ་ཡིན་ན་བ་མོ་འཇོག་མཁན་དེ་མདའ་རྩེད་ལས་རྣམ་པར་རྒྱལ་བ་དང་བ་མོ་འཁུར་མཁན་དེ་མདའ་རྩེད་ལས་ཕམ་པ་ཡིན། གལ་སྲིད་གཞི་མགྲོན་གཉིས་ཀས་ཕན་ཚུན་ལ་བ་མོ་རེ་བཞག་པའི་དབང་དུ་བཏང་ན། འདྲ་མཉམ་དུ་གྱུར་པའི་རྐྱེན་གྱིས་ཡང་བསྐྱར་མ་ཁྲིད་པའི་འགོ་རྩོམ་པ་དང་། མ་ལོངས་རྗེས་བུ་ཁྲིད་པའི་འགོ་རྩོམ་དགོས་པ་རེད། དེར་ཡང་མ་གཞིས་པར་ལོངས་པ་དང་བུ་མགྲོན་པོར་ལོངས་པའི་ཚེ། མ་བུ་གང་གང་ཟེར་ཏེ་འདྲ་འདྲ་ཡིན་པར་བརྩི། སྡེ་བ་གང་ཡིན་རུང་མ་བུ་ལོངས་ཀྱང་བ་མོ་མ་བཞག་ཚེ། ལ་རྒྱ་དང་ངོ་ཚ་ཆེན་པོ་ཤོར་མེད་ནའང་། བཤད་སྲོལ་ལ་ཕན་ཚུན་གྱིས་བ་མོ་མ་བཞག་ཀྱང་རྒྱལ་ཁ་སྡེ་བ་སུ་ལ་ཡོད་ཅེས་གླེང་བར་བྱ་ངེས་རེད། དེ་ཡང་སྡེ་བ་གཅིག་གིས་སྡེ་བ་གཞན་གཅིག་ལ་བ་མོ་བཞག་པའི་དབང་དུ་བཏང་ན། རྩེད་ཐེངས་འདིར་སྐྱིན་པ་སྤྲོད་མ་ཐུབ་ཀྱང་སྐབས་ནམ་ཞིག་གླགས་དང་བསྟུན་ནས་སྐྱིན་པ་སྤྲོད་རྒྱུའི་བསམ་པ་མདའ་བ་ཚང་མར་ཡོད། གཞན་ཡང་ཕན་ཚུན་ལ་གྲོས་སྡུར་ཅི་ཡང་མེད་པར་མདའ་རྒྱུག་ཏུ་འགྲོ་བའི་སྲོལ་ཡང་ཡོད། མདའ་རྒྱུག་ཟེར་བ་དེ་གློ་བུར་དུ་མདའ་བ་ཐམས་ཅད་བསྡུས་ནས་རང་ལ་བ་མོ་འཇོག་མཁན་གྱི་སྡེ་བར་མདའ་འཕེན་པར་རྒྱུག་པའི་དོན་ཡིན། མདའ་རྒྱུག་ཏུ་སོང་ནས་བ་མོ་ཕྱིར་སྤྲོད་ཐུབ་པ་བྱུང་ཚེ་འདོད་ཐོག་ཏུ་འོངས་པ་ཡིན་ལ། བ་མོ་སྤྲོད་མ་ཐུབ་པར་བ་མོའི་སྟེང་དུ་བ་མོ་འཁུར་ན་དེ་བས་ཡིད་སྡུག་པར་གྱུར་ཏེ་སྙིང་ནད་ཀྱང་ཇེ་ཆེར་འགྱུར་བའི་ཁར་ལ་རྒྱ་ཡང་ཤོར་ཟིན་པ་ནི་སྨོས་མ་དགོས་སོ། །
　　གཉིས་པ། མདའ་རྩེད་དང་འབྲེལ་བའི་གླུ་གར་གྱི་སྐོར།
　　སྡེ་བ་གང་ཡིན་ཡང་ཕན་ཚུན་ལ་མདའ་འཕེན་དུ་སོང་ནས་ཉིན་གཅིག་དང་ཕྱེད་ཀ་འདུག་པ་ནི་ཕལ་ཆེར་གོམས་སྲོལ་དུ་གྱུར་ཡོད། མདའ་འཕེན་དུ་སོང་བའི་ཉིན་དང་པོའི་དགོང་ཇ་འཐུངས་རྗེས། མདའ་བ་དང་གཞིས་པའི་མ་སྲུ་རྣམས་ལྷན་དུ་འཛོམས་ནས་གླུ་ལེན་གར་རྩེད་བྱེད་སྲོལ་མཆིས། གླུ་ལེན་གར་རྩེད་ཀྱི་བརྒྱུད་རིམ་ཡང་ཐོག་མར་གཞིས་པའི་གླུ་བ་གསུམ་གྱིས་གླུ་སྙན་ཞིང་འཇེབས་པ་གསུམ་བླངས་ནས་གླུ་སྒོ་ཕྱེས་པས་ན། མགྲོན་པོ་ཚང་གི་སྐད་ངག་འཛོམས་པའི་གླུ་བ་གསུམ་གྱིས་ཀྱང་གླུ་གསུམ་བླངས་ཏེ། གཞིས་པའི་མ་སྲུ་ཚོའི་ལག་ཏུ་ཆང་ཕོར་སྤྲོད། དུས་དེར་མ་སྲུ་ཚང་གི་གླུ་མས་ཀྱང་གླུ་ལེན་པའི་འགོ་རྩོམ་ཞིང་བླངས་པའི་གླུ་ཆང་མགྲོན་པོའི་ལག་ཏུ་གུས་པའི་ངང་འཇོག་པ་དང་། ཕོ་མོ་ཕན་ཚུན་གྱིས་གླུ་ཁ་མཚར་བཅུ་ལྷག་ཅིག་བླངས་རྗེས། སྟོན་བཤད་དང་ཆང་བཤད་སོགས་བཤད་པའི་ལུགས་སྲོལ་དང་། མི་གཉིས་སམ་བཞིས་རྩེ་རིག་འཁྲབ་ལེན་བྱེད་པའང་ཡོད། དེའི་རྗེས་སུ་མགྲོན་པོ་ཚང་གིས་གླུ་ཆེན(ལ་གཞས)ལེན་པའི་རེ་བ་ཞུ་གླུ་བླངས་ཏེ། རང་གི་གྲལ་འགོའི་རྒན་པོའི་ལག་ཏུ་ཆང་ཕོར་བཞག་པས་ན། རྒན་པོས་སྐད་གསེང་མཐོན་པས་གནང་བ་བྱིན་པ་ཡིན། སྟ་རེ་བཟུང་ནས་ནགས་སུ་འགྲོ་ན། ལྕགས་ཐོམ་ཁྱེར་ནས་ཆུ་ལ་འགྲོ་ན། མགོ་ན་མཐུར་མེད། རྐང་ན་སྒྲོག་མེད་ཅེས་ཟེར་ནས་གནང་བ་བྱིན་ཚེ། སྐད་ངག་ཡིད་དུ་འོང་བ་ཞིག་གིས་ལ་གཞས་ཀྱི་རྩེད་འགོ་བླངས་ནས་མ་སྲུ་ཚོའི་ལག་ཏུ་ཆང་ཕོར་བཞག་མ་ཐག  གླུ་མ་ལ་ཡང་ཐེ་ཚོམ་ཅི་ཡང་མེད་པར་ཕྱིར་གཞས་ལན་སློག་པ་ཡིན་ལ། དེ་ལྟར་ཕལ་ཆེར་དགོང་མོའི་ཆུ་ཚོད་དགུ་ནས་ཕྱི་ཉིན་གྱི་སྔ་དྲོའི་ཆུ་ཚོད་གཉིས་ཡས་མས་སུ་ལ་གཞས་གཏུག་རེས་བྱེད་པ་དང་། དེར་ཡང་སྐད་ངག་གི་བཟང་ངན་དང་ལ་གཞས་ཀྱི་མང་ཉུང་ལྟར་རྒྱལ་ཕམ་ལ་ལྟ་བའི་སྲོལ་ཡོད། གླུ་གར་གྱི་ཚོགས་པ་གྲོལ་བའི་སྐབས་སུ་སྐུ་མགྲོན་ཚོས་བཀྲ་ཤིས་པའི་གླུ་གསུམ་ལེན་པ་དང་། བཀྲ་ཤིས་ཀྱི་གླུ་གཞུག་མ་བླངས་པ་དང་ཆབས་ཅིག་སྐུ་མགྲོན་རྣམས་ཡར་ལངས་ནས་རིམ་གྱིས་སྒོར་འགྲོ་བར་རྩོམ། དུས་དེར་གཞིས་པའི་མ་སྲུ་ཚོ་སྔོན་དུ་ཕྱིར་བུད་ནས་ཕྱི་སྒོར་གཏན་པོ་བརྒྱབ་ནས་མགྲོན་པོ་སྒོར་འགྲོ་རུ་མི་འཇུག  གལ་ཏེ་སྒོ་ཕྱེ་དགོས་ན་མགྲོན་པོ་རྣམས་དང་མ་སྲུ་ཚོས་ཨ་མ་རོགས་གཞས་ཟེར་བ་དེ་བཤད་དེ་མ་སྲུ་ཚོ་ཕམ་པས་ན་ད་བཟོད་སྒོ་ཕྱེ་ངེས་ཡིན་ལ། གལ་ཏེ་ཕམ་པར་གཏོང་མ་ཐུབ་ན་སྒོ་མི་འབྱེད། ཡིན་ནའང་དུས་ཚོད་འགྱངས་ན་མགྲོན་པོ་ཚོའི་སྐུ་ངལ་བར་དོགས་ནས་གཞིས་པའི་འགོ་དཔོན་ཞིག་གིས་མ་སྲུ་ཚོ་ལ་ཁ་ངོ་བསླངས་པས་ན། ད་གཟོད་མ་སྲུ་ཚོས་སྒོ་ཕྱེས་ནས་སྐུ་མགྲོན་རྣམས་ལ་ངལ་གསོ་བར་འཇུག་པ་ལགས། དེར་ཡང་ཁ་བདེ་ལྕེ་བདེ་ཅན་གྱིས་བཤད་པའི་ཨ་མ་རོགས་གཞས་ཟེར་བ་ནི་ཡང་སྙིང་ཅི་ཡིན་ཞེ་ན། དེ་ནི་ན་གཞོན་ཕོ་མོ་བར་ཕན་ཚུན་མཐུན་པའི་བརྩེ་སེམས་མཚོན་པའི་ཁ་མཚར་ཞིག་ཡིན། ཕལ་ཆེར་ཚིག་རྐང་བཞི་དང་དྲུག་བརྒྱད་བཅུ་ཅན་མང་པོ་འདུག་པ་སྟེ། དཔེར་ན། ཕ་གིའི་སྒང་ནས་འཁོར་ལོ་འཁོར་གི །ཚུར་གའི་སྒང་ནས་འཁོར་ལོ་འཁོར་གི །ཨ་ཕ་ཨ་མ་ཡུལ་ནས་འཁོར་གི །རོགས་ཁྱོད་དང་འུ་གཉིས་འདི་ན་འཁོར་གི །ཞེས་པ་ལྟ་བུའི་བཞི་རྐང་ཅན་དང་། ཕ་གི་བྲག་རེད། །ཚུར་ག་ནགས་རེད། །ལུང་བ་ཆུ་རེད། །གྲམ་པ་རྡོ་རེད། །བྱ་མོ་འཕུར་གི །གཤོག་རྩལ་འདར་གི །བྱ་ཕྲུག་འཕུར་གི །སྙིང་རྩ་འདར་གི །རོགས་ངེད་གཉིས་འགྲོགས་ན། །རྐང་རྩ་འདར་གི །ཞེས་པ་ནི་ཚིག་རྐང་བཅུ་ཅན་ལྟ་བུའོ། །ཁ་མཚར་འདི་རིགས་ལ་སྲོལ་རྒྱུན་གྱི་བཤད་སྲོལ་གཞིར་བཞག་གི་སྟེང་གསར་བ་བསྒྲིགས་པ་ཡང་ཡོད། གང་ལྟར་ཀྱང་ཨ་མ་རོགས་གཞས་ཞེས་པ་འདི་རོང་སྡེ་ཕལ་ཆེར་གྱིས་མདའ་རྩེད་སྐབས་སུ་བཀོལ་བ་ཡིན་ལ་འབྲོག་སྡེ་མང་པོ་དང་ཁམས་ཕྱོགས་སུ་དར་ཁྱབ་ཏུ་སོང་མེད་གསལ་བོ་མི་ཤེས།
　　དེ་ཡང་མདའ་བ་རྣམས་ཕྱི་ཉིན་གྱི་ཉི་རྩེ་རི་གསུམ་གྱི་ཟོམ་ལ་ཕོག་པའི་དུས་སུ། སླར་ཡང་སྐུ་རའི(མདའ་འཕེན་ས)ནང་དུ་འདུས་ཤིང་། སྔར་ཉིན་བཞིན་ཕྱོགས་གཉིས་ཀྱིས་འཇལ་འབེན་བཟོས་ནས་གྲུབ་རྗེས་མདའ་འཕེན་པའི་འགོ་རྩོམ་པ་ཡིན། མདའ་རྩེད་ཀྱི་འབྲས་བུ་སྟེ་བཟང་ངན་ཅི་འདྲ་བྱུང་ཡང་ཕྱི་དྲོ་མདའ་རྩེད་མཚམས་བཞག་ནས་གླུ་ལེན་གར་རྩེ་བྱེད་དགོས་པ་ལགས། དེ་ནི་སྐུ་མགྲོན་རྣམས་ཀྱི་དྲོས་ཇ་འཐུངས་རྗེས་ཕྱིར་སྐུ་རའི་ནང་དུ་འདུས་ཤིང་། གཞིས་པ་ཚང་གིས་བཏིང་བའི་གདན་དཀར་དམར་ཁྲ་གསུམ་གྱི་སྟེང་དུ་སྐུ་མགྲོན་རྣམས་ལ་ལོ་རིམ་གྲལ་ལྟར་དཀྱིལ་ཀྲུང་བཅས་ནས་འདུག་པ་དང་། གཞིས་པ་ཚང་གི་བཀོད་སྒྲིག་ལྟར་མདང་དགོང་ཚོགས་པའི་འགྲོ་རིམ་དང་མཚུངས་པར། གཞིས་པ་ཚང་གིས་གླུ་སྒོ་ཕྱེ་རྗེས་སྐུ་མགྲོན་རྣམས་དང་གཞིས་པའི་མ་སྲུ་ཚོས་ཕན་ཚུན་བར་གླུ་ལེན་གྱི་འགོ་རྩོམ་པ་ཡིན། གླུ་ལེན་གྱི་ནང་དོན་དང་འགྲོ་རིམ་ཐམས་ཅད་སྔར་དང་མཚུངས་ལ་སྐུ་མགྲོན་རྣམས་ལམ་ལ་ཆས་སྐབས་སྐྱེལ་མ་རྒྱ་ཆེན་པོ་བྱེད་དགོས། དེར་ཡང་གཞིས་པའི་ཕོ་གསར་རྣམས་ཀྱིས་ལག་ཏུ་ཆང་ཕོར་འབྲུག་རྒྱན་བཟུང་སྟེ། གྲལ་ཉིས་བསྒྲིགས་བྱས་ནས་སྐུ་མགྲོན་རྣམས་དེའི་དཀྱིལ་དུ་འགྲོ་བའི་སྐབས་སུ་ཆང་འདྲེན་ཅི་ཐུབ་བྱེད་པ་དང་། མ་སྲུ་ཚོས་གླུ་དང་རྩེ་རིག་གིས་སྐྱེལ་མ་བྱས་ཏེ། ཕལ་ཆེར་སྡེ་བའི་འདབས་བར་དུ་སྐྱེལ་བའི་སྲོལ་ཡོད། དེ་ལྟར་སྐུ་མགྲོན་རྣམས་ཕལ་ཆེར་རྒྱང་གྲགས་གཅིག་ཙམ་སླེབས་པས་ན། སྐུ་མགྲོན་རྣམས་ཀྱིས་མཉམ་དུ་ཀི་ལན་གསུམ་བཏབ་རྗེས་ལམ་ལ་ཞུགས་ཏེ་ཕ་ཡུལ་ཕྱོགས་སུ་ཆས་པ་ཡིན།
　　དེ་ལྟར་སྡེ་བ་གཉིས་ཀའི་བཤད་མཚམས་ལྟར་ཉིན་གཅིག་དང་གཉིས་ཀྱི་རྗེས་སུ། སྡེ་བ་འདིའི་མདའ་བ་རྣམས་སྡེ་བ་གཞན་དེར་མདའ་འཕེན་དུ་འགྲོ་དགོས་ལ། མདའ་རྩེད་ཀྱི་འགྲོ་རིམ་དང་གླུ་གར་གྱི་བརྒྱུད་རིམ་ཐམས་ཅད་གོང་དུ་བརྗོད་པ་དང་གཅིག་མཚུངས་ཡིན་པས་བསྐྱར་དུ་བརྗོད་པའི་དགོས་པ་མེད། ལར་ཆབ་འགག་ཡུལ་གྱི་རྒྱ་ར་གཙོ་བྱས་པའི་རྐ་གསར། ཨར་སྟི། དུམ་པ། མེ་ཏོག་ལུང་པ་གོང་ཞོལ། འགག་གོང་ཞོལ། སོར་རྒྱག་དང་ཁྲ་ཚང་བཅས་སུ་མདའ་རྩེད་ཀྱི་གྲངས་མང་ཡང་། གཙོ་བོ་རྒྱ་ལོའི་ཚེས་པ་གསུམ་ནས་བཅུ་བར་དུ་མདའ་རྩེད་བྱེད་པ་ནི་ཆད་མེད་ཡིན། འོན་ཀྱང་འདིར་ཤེས་དགོས་པ་ཞིག་ནི། སྡེ་བའི་རྒན་པོ་གཙོ་ཆེ་ཤོས་རེ་ཚེ་ལས་འདས་པ་ན་ལོ་དེར་མདའ་མི་འཕེན་པའི་སྲོལ་ཡང་ཡོད་དོ། །
　　མདའ་རྩེད་ཀྱི་རིགས་འདི་གང་ལྟར་ཀྱང་དམངས་ཁྲོད་རྩེད་མོའི་གྲུབ་ཆ་གཙོ་བོ་ཞིག་ཡིན་པས། འདིར་རང་གཞན་ཐམས་ཅད་ཀྱིས་ཉམས་པ་སོར་ཆུད་དང་མ་ཉམས་རྒྱུན་འཛིན་བྱེད་རྒྱུ་ནི་ཤིན་ཏུ་གལ་ཆེ། དམངས་ཁྲོད་ལ་མཚོན་ན་རིག་གནས་འཚོ་བ་ལོངས་སུ་སྤྱོད་རྒྱུ་མང་པོ་མེད་པར་བརྟེན། མདའ་རྩེད་དང་གླུ་རྩེད་སོགས་རྒྱ་ཇེ་ཆེ་དང་ནང་དོན་ཕུན་སུམ་ཇེ་ཚོགས་སུ་གཏོང་མ་ཐུབ་ན། མང་ཚོགས་ཀྱི་རིག་གནས་འཚོ་བའི་འདོད་བློ་དེ་སྐོང་ཐབས་མེད་པ་ལགས། དེའི་ཕྱིར། ངེད་ཅག་འབྲེལ་ཡོད་པ་རྣམས་ཀྱིས་རང་རེའི་ཆབ་འགག་ཡུལ་གྱི་སྔར་ཡོད་ཐུན་མོང་མ་ཡིན་པའི་མདའ་རྩེད་ཀྱི་ཁྱད་ཆོས་གཞིར་བཟུང་སྟེ། དེང་རབས་ཅན་གྱི་ཁྱད་ཆོས་ལྡན་པའི་མདའ་རྩེད་ཀྱི་རྣམ་པ་གསར་བ་ཞིག་གཏོད་པར་འབད་འབུངས་ལྷོད་མེད་བྱེད་དགོས་པ་ལགས།