༄༅།།ནག་ཆུ་གྲོང་ཁྱེར་མི་ཤུགས་ཅུའུ་ཡིས་འབྲོག་དམངས་མཉམ་ལས་ཁང་གི་འགན་ཁུར་བ་རྩ་འཛུགས་བྱས་ནས་ཆེད་དུ་མཚོ་སྔོན་ཏུ་སློབ་སྦྱོང་ལ་ཡོང་།

       ཉེ་ཆར་ནག་ཆུ་གྲོང་ཁྱེར་མི་ཤུགས་ཐོན་ཁུངས་དང་སྤྱི་ཚོགས་འགན་སྲུང་ཅུའུ་ཡིས་གཙོ་སྒྲུབ་བྱས་ཤིང་མཚོ་སྔོན་ཕུགས་སྟོན་ཁེ་ལས་དོ་དམ་བློ་འདྲི་ཚད་ཡོད་སྤྱི་གཉེར་ཁང་གིས་འགན་སྒྲུབ་བྱས་པའི༢༠༢༠ལོའི་ནག་ཆུ་གྲོང་ཁྱེར་ཞིང་འབྲོག་དམངས་དཔལ་འབྱོར་མཉམ་འབྲེལ་རྩ་འཛུགས་འགན་ཁུར་བའི་ཆེད་དོན་གསོ་སྦྱོང་འཛིན་གྲྭ་དེ་མཚོ་སྔོན་ཞིང་ཆེན་ཟི་ལིང་གྲོང་ཁྱེར་ནས་ཚོགས་མགོ་བརྩམས་ཤིང་། ཉིན་བདུན་རིང་ཟི་ལིང་གྲོང་ཁྱེར་དང་རྨ་ལྷོ་ཁུལ། མཚོ་ལྷོ་ཁུལ་སོགས་ཀྱི་མཉམ་ལས་ཁང་དང་ཁེ་ལས། བཟོ་གྲྭ་རྩེ་གྲ་དག་ལ་སློབ་སྦྱོང་བྱེད་དུ་སོང་ནས་ཐེངས་འདིའི་གསོ་སྦྱོང་བདེ་ལེགས་ངང་མཇུག་རྫོགས་འདུག        རྒྱུས་ལོན་བྱུང་བ་ལྟར་ན། ཐེངས་འདིར་ཉིན་བདུན་གྱི་རིང་མཚོ་སྔོན་ཕུགས་སྟོན་ཁེ་ལས་དོ་དམ་བློ་འདྲི་ཚད་ཡོད་སྤྱི་གཉེར་ཁང་གིས་བོད་འབྲེལ་ས་ཁུལ་དཔལ་འབྱོར་ལ་རྒྱུས་ལོན་ཟབ་ཅིང་། མཐོ་སྒང་ཁྱད་ལྡན་ཐོན་ལས་ལ་ཞིབ་འཇུག་ཡོད་པ། གཞུང་ལུགས་ལ་བྱང་ཆ་ལྡན་ཞིང་བོད་རྒྱ་སྐད་གཉིས་ཁོང་དུ་ཆུད་པའི་དགེ་རྒན་མང་པོའི་སློབ་ཁྲིད་གྲ་སྒྲིག་བྱས་ཡོད་ལ། དེ་དག་ལས་མཚོ་སྔོན་ཞིང་ཆེན་ཏང་གི་སློབ་གྲྭའི་དགེ་རྒན་ཆེན་མོ་བསོད་ནམས་དབང་རྒྱལ་དང་མཚོ་སྔོན་དགེ་ཐོན་སློབ་ཆེན་དཔལ་འབྱོར་སློབ་གླིང་གི་གླིང་གཙོ་དགེ་རྒན་ཆེན་མོ་བང་ཧྲི་ཡུང་། རྒྱལ་སྤྱིའི་ཐོ་འགོད་དོ་དམ་བློ་འདྲི་བ་ཚེ་རིང་རྡོ་རྗེ་དང་རང་རྒྱལ་གྱི་སྐྱེ་ཁམས་ཁོར་ཡུག་སྲུང་སྐྱོབ་པ་གྲགས་ཅན་དབྲ་ཁྱུང་དཔལ་བཟང་། ཚོང་རྟགས་གྲགས་ཅན་རེ་བ་ཡི་གསར་གཏོད་པ་འཇམ་དབྱངས་དཔལ་བཟང་སོགས་གཞུང་ལུགས་དང་ཉམས་མྱོང་གཉིས་ཀ་འཛོམས་པའི་དགེ་རྒན་ཚོའི་སློབ་ཁྲིད་ཀྱིས་གསོ་སྦྱོང་ལ་ཞུགས་པའི་ཕྱུག་འགྱུར་སྣེ་ཁྲིད་པར་ངེས་པ་དོན་གྱི་ཕན་པ་མི་ཉུང་བ་ཞིག་ཐོབ་ཡོད་པ་རེད།
       དེ་མ་ཟད་ཞིང་ཆེན་བརྒལ་བའི་གསོ་སྦྱོང་གི་ནང་དོན་གཙོ་བོར་གཞུང་ལུགས་སློབ་སྦྱོང་དང་ཡུལ་དངོས་སློབ་སྦྱོང་གི་བྱེད་ཐབས་སྤྱད་ནས་སྤུས་ཚད་མཐོ་ཞིང་བྱང་ཚད་བཟང་བའི་ཕྱུག་འགྱུར་སྣེ་ཁྲིད་མི་སྣ་སྐྱེད་སྲིང་བྱེད་རྒྱུ་བརྗོད་གཞི་གཙོ་བོར་གཏན་འཁེལ་བྱས་པ་དང་། “ཐོག་མའི་བསམ་འདུན་མ་བརྗེད་པར་འགན་འཁྲི་བློ་ལ་བརྟན་པོར་འཆང་བའི”དད་མོས་ཀྱི་རྨང་རྡོ་བརྟན་པོར་བཙུགས་པ་མ་ཟད། འཕེལ་རྒྱས་ཀྱི་འདུ་ཤེས་གསར་བ་སྤྱད་དེ་ནག་ཆུ་གྲོང་ཁྱེར་གྱི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་ནུས་པ་དང་ཆུ་ཚད་ཁྱོན་ཡོངས་ནས་མཐོ་རུ་བཏང་།
       རྒྱུས་ལོན་བྱུང་བ་ལྟར་ན། གསོ་སྦྱོང་འདིའི་མགོ་རྔ་བར་གསུམ་ཀུན་ལ་སྐྱེ་ཁམས་ཁོར་ཡུག་སྲུང་སྐྱོབ་བྱེད་པ་དང་མང་ཚོགས་ཡོང་འབབ་ཇེ་མཐོར་གཏོང་བ། ཐོན་སྐྱེད་ནུས་པ་ཇེ་བཟང་འགྲོ་བའི་ཆེད་དུ་ནག་ཆུ་གྲོང་ཁྱེར་གྱི་ཕྱུག་འགྱུར་སྣེ་ཁྲིད་མི་སྣ་ཚོ་མཚོ་སྔོན་གྱི་ས་ཁུལ་སོ་སོར་སོང་ནས་ནག་ཆུ་ས་ཁུལ་གྱི་འཕེལ་རྒྱས་གནས་བབ་ལ་འཚམ་པའི་མཉམ་ལས་ཁང་ལ་དང་བཟོ་གྲྭ། ཁེ་ལས་སོགས་ལ་སློབ་སྦྱོང་བྱེད་རྒྱུ་བཀོད་སྒྲིག་བྱས་ཡོད་ལ། ཁོ་ཚོས་ཀྱང་ཕྱིར་ནག་ཆུ་ས་ཁུལ་སོ་སོར་སོང་ནས་རང་གི་སྡེ་བའི་མཉམ་ལས་ཁང་གི་འཕེལ་རྒྱས་ལ་སྔར་ལས་ལྷག་པའི་ནུས་པ་འདོན་རྒྱུ་ཡིན་ཟེར།