༄༅།།གུང་ཧོ་རྫོང་རིག་སྨོན་གྲོང་བརྡལ་མོངྒོལ་སྡེ་བས་སློབ་དངུལ་བྱ་དགའ་སྩོལ་བའི་མཛད་སྒོ་སྤེལ་བ།

      དེ་ཡང་སྔོན་བྱོན་ཡབ་མེས་ཀྱི་ཤུལ་བཞག་རིག་གནས་རྒྱུན་འཛིན་དང་། དམངས་ཡོངས་ཀྱི་ཕྱོགས་བསྡུས་སྤུས་ཚད་མཐོ་རུ་འདེགས་པར་སློབ་གསོས་ནུས་པ་གལ་ཆེན་འདོན་ཐུབ་ལ། ཆེ་བ་རྒྱལ་ཁབ་དང་ཆུང་བ་དུད་ཁྱིམ་རེ་རེ་འཕེལ་རྒྱས་སུ་འགྲོ་དགོས་ན་སློབ་གསོ་ནི་རྨང་རྡོ་ལྟ་བུ་ཡིན་ཞིང་། གྲོང་སྡེ་འཛུགས་སྐྲུན་གྱི་རྩ་བའང་སློབ་གསོ་ལ་བརྟེན་དགོས་པས་གུང་ཧོ་རྫོང་རིག་སྨོན་གྲོང་བརྡལ་མོངྒོལ་སྡེ་བས་སྤྱི་ཟླ༡ཚེས༢༩ཉིན་སྡེ་བའི་ཏང་ཡོན་བྱ་འགུལ་ཁང་དུ༢༠༢༠ལོའི“བཤད་སྒྲུབ”སློབ་དངུལ་བྱ་དགའ་གནང་བའི་མཛད་སྒོ་གཟབ་རྒྱས་ངང་བསྡུས་ཤིང་། སྡེ་བའི་འགོ་ཁྲིད་ཚན་ཆུང་དང་རོགས་སྐྱོར་ཚོགས་པའི་ཚོགས་མི། བྱ་དགའ་ཐོབ་པའི་སློབ་མ་དང་ཁྱིམ་བདག་སོགས་མི༡༠༠ལྷག་བྱ་འགུལ་ལ་ཞུགས། སྤྱི་ལོ༢༠༢༠ལོར་སློབ་ཆེན་དུ་རྒྱུགས་འཕྲོད་པའི་སློབ་མ་ཁྱོན་བསྡོམས༢༠ཡོད་ལ། དེ་ལས་ཞིབ་འཇུག་སློབ་མ༡དང་། དངོས་གཞིའི་སློབ་མ༦  དངོས་གཞིའི་གྲ་སྒྲིག་སློབ་མ༢  ཆེད་སྦྱོང་སློབ་མ༡༡ཡོད།        རིག་སྨོན་གྲོང་བརྡལ་མོངྒོལ་སྡེ་བའི“བཤད་སྒྲུབ”སློབ་དངུལ་རོགས་སྐྱོར་ཚོགས་པ་ནི་སྡེ་བའི་ལས་བྱེད་ཚན་ཆུང་གིས་གཙོ་སྒྲུབ་བྱས་ཏེ་སྤྱི་ལོ༢༠༡༣ལོར་གསར་དུ་བཙུགས་པའི་མང་ཚོགས་རང་བཞིན་གྱི་རྩ་འཛུགས་ཚོགས་པ་ཞིག་ཡིན་ལ། ཚོགས་པ་འདི་ཚུགས་པ་ནས་ད་ལྟའི་བར་ཚོགས་མི་ཡོངས་ཀྱིས་བདག་བས་གཞན་གཅེས་ཀྱི་བསམ་བློ་སྔོན་དུ་བཏང་ཞིང་གཏོང་ཕོད་ཀྱི་ཕྱག་ཟུང་རིང་དུ་བརྐྱངས་ཏེ་བྱ་དགའི་མ་དངུལ་ཕུལ་ཏེ་ལོ་རེ་བཞིན་རྒྱལ་ཡོངས་ཀྱི་སློབ་གྲྭ་ཆེན་མོར་སློབ་མ་བསྡུ་བའི་གཅིག་གྱུར་རྒྱུགས་གཞིའི་ཁྲོད་རྒྱུགས་འབྲས་གཡུར་ཏུ་ཟ་བ་བླངས་པའི་སློབ་མ་དག་ལ་བྱ་དགའ་བསྩལ་པ་སྟེ། ཞིབ་འཇུག་སློབ་མ་རེ་ལ་དམངས་སྒོར༣༠༠༠དང་། དངོས་གཞི་སློབ་མ་རེར་དམངས་སྒོར་༢༥༠༠དང་། དངོས་གཞིའི་གྲ་སྒྲིག་སློབ་མ་རེར་དམངས་སྒོར༢༠༠༠ ཆེད་སྦྱོང་སློབ་མ་རེར་དམངས་སྒོར༥༠༠རེའི་བྱ་དགའི་བདག་རྐྱེན་བསྩལ་ལ། ཚོགས་པ་འདིས་སྤྱི་ལོ༢༠༡༣ལོ་ནས་སྤྱི་ལོ༢༠༢༠ལོ་སྟེ་ལོ་ངོ་བརྒྱད་ཀྱི་རིང་ལ་སློབ་གྲྭ་ཆེན་མོར་རྒྱུགས་འཕྲོད་པའི་སློབ་མ༡༢༣ལ་བྱ་དགའ་བསྩལ་པ་དང་། དེ་ལས་ཕྱི་འགྲིམ་སློབ་མ༡དང་། ཞིབ་འཇུག་སློབ་མ༧  དངོས་གཞི་སློབ་མ༤༠  དངོས་གཞིའི་གྲ་སྒྲིག་སློབ་མ༢༠  ཆེད་སྦྱོང་སློབ་མ༥༥བཅས་ཡོད།        འདི་ནི་ཕྱུགས་ལས་གཙོ་བོར་གཉེར་བའི་སྡེ་བ་ཞིག་ལ་མཚོན་ན་སློབ་གསོའི་བྱ་བ་དེ་སྔ་ན་མེད་པའི་འཕེལ་རྒྱས་སུ་ཕྱིན་པའི་དན་རྟགས་ཤིག་དང་། ཏང་དང་རྒྱལ་ཁབ་ཀྱི་ཡང་དག་པའི་སྲིད་ཇུས་ལག་བསྟར་དངོས་འབེབས་བྱས་ཏེ་དམངས་ཡོངས་ཀྱི་བསམ་བློའི་ཆུ་ཚད་དང་ཕྱོགས་བསྡུས་སྤུས་ཚད་མཐོར་འདེགས་བྱུང་བའི་མཚོན་རྟགས་ཤིག་ཀྱང་ཡིན་ལ། སློབ་དངུལ་རོགས་སྐྱོར་ཚོགས་པས་སྡེ་བའི་ན་ཆུང་གཞོན་ནུ་རྣམས་ཀྱི་རང་གི་མི་ཚེའི་ཕུགས་འདུན་མངོན་འགྱུར་བྱ་བར་སྐུལ་འདེད་ཀྱི་ནུས་པ་ཐོན་ཡོད་པ་མ་ཟད། མ་འོངས་པར་ཕ་ཡུལ་གྱི་སློབ་གསོའི་བྱ་བ་དང་འཕེལ་རྒྱས་སྣ་ཚོགས་ལ་ཕན་ནུས་གང་ལེགས་འདོན་པའི་རྨང་གཞི་བརྟན་པོ་བཏིངས་ཡོད།