༄༅།།མཚོ་ལྷོ་ཁུལ་མི་རིགས་མཐོ་འབྲིང་གཉིས་པས“ཆོས་འཛིན་རྟགས་མའི”བློར་འཛིན་འགྲན་སྡུར་གྱི་བྱ་འགུལ་སྤེལ།

       ༢༠༢༡ལོའི་ཟླ༣པའི་ཚེས༢༩ཉིན།  མཚོ་ལྷོ་ཁུལ་མི་རིགས་མཐོ་རིམ་སློབ་འབྲིང་གཉིས་པས་“ཆོས་འཛིན་རྟགས་མའི”བརྡ་སྤྲོད་རྩ་བ་བློར་འཛིན་གྱི་བྱ་འགུལ་སྐབས་བཅུ་གཅིག་པ་ལེགས་པར་སྤེལ།       སྤྱིར་བློར་འཛིན་ནི་སྔོན་བྱོན་མཁས་པ་རྣམས་ཀྱིས་མི་ལོ་བརྒྱ་ཕྲག་དུ་མའི་སློབ་གསོའི་ཉམས་མྱོང་ཁྲོད་སྤྱི་བསྡོམས་བྱས་པའི་བོད་ཡིག་སློབ་སྦྱོང་བྱེད་ཐབས་གལ་ཆེན་ཞིག་ཡིན་ཞིང་།  རང་ཉིད་ལ་ཉེ་བར་མཁོ་བའི་སུམ་རྟགས་དག་གསུམ་དང་སྙན་ངག་གི་རྩ་བ་སོགས་བློར་ཟིན་རྒྱུ་ནི་རིག་པའི་གནས་ལ་འཇུག་པའི་ཐེམ་སྐས་དང་པོ་ལྟ་བུ་ཡིན། ་སློབ་སྐབས་འདིའི་བྱ་བའི་འཆར་གཞི་ལྟར་གཟའ་ཟླ་བའི་ཉིན་གྱི་ཕྱི་དྲོའི་དུས་ཚོད་བེད་སྤྱད་ནས་བོད་ཡིག་ཁྲིད་དཔྱོད་ཁག་གིས་མཐོ་གཅིག་དང་མཐོ་གཉིས་རིམ་པའི་བརྡ་སྤྲོད་ཀྱི་རྩ་བ་བློར་འཛིན་ལས《རྟགས་འཇུག》་དང་《རྟགས་འཇུག་དཀའ་གནད་སེལ་བའི་མེ་ལོང་》གཉིས་ཀྱི་བློར་འཛིན་འགྲན་སྡུར་གྱི་བྱ་འགུལ་སློབ་གྲྭའི་རྩལ་སྦྱོང་ར་བ་དང་སྣ་འཛོམས་ཐོག་ཁང་མདུན་གྱི་ཐང་ཆེན་གཉིས་སུ་སྤེལ།   འཛིན་གྲྭ་ཐུན་མོང་གིས་བློ་རྒྱུགས་སྤྲོད་པའི་ཐབས་ལམ་སྤྱད་ཅིང་། དཔྱད་འདེམས་པའི་དགེ་རྒན་རྣམས་ཀྱིས་སྨྲ་ལྕེ་དང་སྤོབས་པ། བྱང་ཆ། གྱོན་གོས། ཉམས་འགྱུར་སོགས་ཕྱོགས་མང་པོ་ནས་སྐར་མ་བརྒྱབ།  ལྟ་ཞིབ་པའི་དགེ་རྒན་གྱིས་གཟབ་ནན་གྱིས་ལྟ་ཞིབ་བྱས་ཏེ་བློར་ཡག་པོ་ཟིན་མེད་པའི་སློབ་མ་རྣམས་ཟུར་དུ་བཀར་ནས་མིང་ཐོར་བཀོད་ཅིང་།  དུས་བཅད་ལྟར་རང་རང་གི་བོད་ཡིག་དགེ་རྒན་མདུན་དུ་བློ་རྒྱུགས་སྤྲོད་དགོས་པའི་རེ་བ་ནན་མོ་བཏོན་ཞིང་།  བློར་ལེགས་པར་ཟིན་པའི་འཛིན་གྲྭ་རྣམས་ལ་དཔེ་དེབ་དང་གཟེངས་བསྟོད་ཀྱི་ཡི་གེའི་བྱ་དགའ་བསྩལ།       མཐར་དགེ་རྒན་ལྕགས་རྒྱལ་འབུམ་གྱིས་སྤྱིར་བློར་འཛིན་ནི་ཤིན་ཏུ་གལ་ཆེ་ཞིང་ལྷག་པར་དུ་ལོ་བཅོ་ལྔ་ཚར་རྟིང་འདྲ་དང་ལོ་ཉི་ཤུ་ཝ་དམར་འདྲ་འདྲའི་གཞོན་ནུའི་དུས་ནི། སར་བརྒྱབ་ན་ས་འགད་ཅིང་རྡོར་བརྒྱབ་ན་རྡོ་འགད་པའི་དུས་ཡིན་པས་དུས་ཚོད་ཆུད་ཟོས་སུ་གཏོང་མི་རུང་བ་དང་།   ཡང་མདོ་ལས།  མི་འཇིགས་པ་རྣམས་ཀྱི་མཆོག་ནི་འདི་ལྟ་སྟེ།  ཆོས་རྣམ་པར་འབྱེད་པའོ།། ཉམ་ཆུང་བ་རྣམས་ཀྱི་ཐ་མ་ནི་འདི་ལྟ་སྟེ།  ཐོས་པ་ཉུང་བའོ།། ཞེས་པའི་ལུང་དྲངས་ནས་མི་ཞིག་ལ་མཚོན་ན་ལེགས་ཉེས་བླང་དོར་འབྱེད་པའི་ཤེས་རབ་ཀྱི་ཡན་ན་གལ་ཆེ་བ་མེད་ཅིང་དེ་ཡང་ཐོས་པ་ལ་བརྟེན་ནས་འབྱུང་དགོས་པས་སློབ་སྦྱོང་ལ་འབད་བརྩོན་ལྷོད་མེད་བྱ་དགོས་པ་དང་།   ཡང་བདག་ཉིད་བདག་གི་མགོན་གྱི། །གཞན་ལྟ་སུ་ཞིག་མགོན་དུ་འགྱུར། །ལེགས་དང་ཉེས་པར་བྱེད་པ་ལ། །བདག་ཉིད་བདག་གི་དཔང་པོའང་ཡིན། །ཞེས་པའི་ལུང་དྲངས་ཏེ།   རང་བློ་རང་ལ་ལྐོག་ཏུ་མ་གྱུར་པས་རང་ཉིད་ཀྱིས་སློབ་སྦྱོང་བྱས་མ་བྱས་དང་བློར་ཟིན་མ་ཟིན་རང་ཉིད་ལ་ཤིན་ཏུ་གསལ་བ་དང་།   མ་འོངས་པར་རང་ཉིད་མི་གང་འདྲ་ཞིག་ཏུ་འགྱུར་མིན་ཡང་།  ཀོ་གྲུ་གར་གཏོང་མཉན་པའི་ལག་ཡིན་པས་རང་གིས་རང་ལ་འགན་ཁུར་ནས་རང་རྟོགས་ཀྱིས་སློབ་སྦྱོང་བྱེད་དགོས་པའི་རྣག་ཐོག་གཙག་འཁེལ་གྱི་ཁ་ཏ་དང་བཅས་བྱ་འགུལ་གྱི་མཇུག་བསྡུས་སོ།།