༄༅། །ཁྲི་ཀ་རྫོང་གི་ཆུང་འབྲིང་སློབ་གྲྭའི་བོད་ཡིག་དགེ་རྒན་གྱི་འཇོན་ནུས་འགྲན་བསྡུར་སྤེལ།

       ༢༠༢༣ལོའི་ཟླ༡༡ཚེས༡༣ཉིན། ཁྲི་ཀའི་རྫོང་ཡོངས་ཀྱི་ཆུང་འབྲིང་སློབ་གྲྭའི་བོད་ཡིག་དགེ་རྒན་གྱི་ཆེད་ལས་བྱང་ཚད་ཀྱི་ནང་དོན་ལ་ཤུགས་སྣོན་དང་ཆེད་ལས་འཇོན་ནུས་ཆེ་རུ་གཏོང་ཆེད། ཁྲི་ཀ་རྫོང་གི་ཆུང་འབྲིང་སློབ་གྲྭའི་བོད་ཡིག་དགེ་རྒན་གྱི་འཇོན་ནུས་འགྲན་བསྡུར་གྱི་བྱེད་སྒོ་སྤེལ།

       ཁྲི་ཀ་རྫོང་སློབ་དཔྱོད་ཁང་གིས་དགེ་རྒན་གྱི་ཆེད་ལས་རྩལ་ནུས་འཕེལ་རྒྱས་ལ་སྐུལ་འདེད་གཏོང་བའི་འདུ་ཤེས་མཐའ་འཁྱོངས་ཀྱིས་དགེ་རྒན་གྱི་ཕྱོགས་བསྡུས་བྱང་ཚད་དང་འཇོན་ནུས་མཐོ་རུ་གཏོང་རྒྱུ་དམིགས་ཡུལ་དུ་བྱས་ཏེ་བྱེད་སྒོ་ཕུན་སུམ་ཚོགས་པ་སྤེལ། ཐེངས་འདིའི་འགྲན་བསྡུར་ནང་དམའ་རིམ་སློབ་འབྲིང་དང་སློབ་ཆུང་གཉིས་ཚུད་ཡོད་པ་དང་ཁྱོན་བདམས་ཐོན་དགེ་རྒན༣༡འགྲན་བསྡུར་ནང་ཞུགས་པ་རེད། དུས་ཡུན་ཉིན་གཉིས་ཀྱི་འགྲན་བསྡུར་ནང་ཞུགས་པའི་བདམས་ཐོན་དགེ་རྒན་རྣམས་ལ་བཤད་ཁྲིད་དང་། ལེགས་རྩོམ་གྱེར་འདོན། ཡིག་གཟུགས་འགྲེམས་སྟོན། སྒྱུ་རྩལ་འཁྲབ་སྟོན་སོགས་འཇོན་རྩལ་ཁག་བཞིར་དམིགས་ནས་ཛ་དྲག་གི་འགྲན་བསྡུར་སྤེལ་བ་རེད།

       བཤད་ཁྲིད་འགྲན་བསྡུར་ལ་ཞུགས་པའི་དགེ་རྒན་ཚོས་སྔོན་ཐོན་གྱི་སློབ་ཁྲིད་འདུ་ཤེས་དང་། སློབ་ཁྲིད་ཀྱི་རྨང་གཞི་བརྟན་པའི་གཞི་རྩའི་འཇོན་ནུས་ཀྱི་ལེགས་ཆ་འདོན་སྤེལ་གང་ཐུབ་བྱས་ཏེ། རྣམ་གྲངས་མང་ཞིང་ནང་དོན་ཕུན་སུམ་ཚོགས་པ། སློབ་ཁྲིད་ཀྱི་ཡིད་དབང་འཕྲོག་ཤུགས་མངོན་པ་བཅས་ཀྱི་ཁྱད་ཆོས་ལྡན་ཞིང་། རང་རང་སོ་སོའི་སློབ་ཁང་སློབ་ཁྲིད་ཁྲོད་ཀྱི་སྔོན་ཐོན་སློབ་གསོའི་འདུ་ཤེས་དང་། བྱང་ཆུབ་པའི་སློབ་ཚན་བསྡུ་སྒྲིལ་ནུས་པ། རྩ་བ་བརྟན་པའི་སློབ་ཁྲིད་ཀྱི་རྨང་གཞི། རང་གཤིས་ཅན་གྱི་སློབ་ཁྲིད་ཉམས་འགྱུར་བཅས་ལ་ཡར་ངོའི་ཟླ་བཞིན་འཕེལ་བའི་རྣམ་པ་གང་ལེགས་མངོན་ཡོད་པ་རེད། དེས་ཤེས་ཡོན་བརྒྱུད་སྤེལ་དང་ཤེས་རབ་གསོ་སྐྱོང་། འཇོན་ནུས་སྔོག་འདོན། ལུས་སེམས་བདེ་ཐང་སོགས་སློབ་མའི་འཕེལ་རྒྱས་ལ་ནུས་པ་བླ་ལྷག་ཐོན་ཡོད།

       ལེགས་རྩོམ་གྱེར་འདོན་བྱ་ཡུལ་གྱི་འགྲན་བསྡུར་ནང་ཞུགས་པའི་དགེ་རྒན་ལ་ལས་བྱིས་བློའི་སྒྱུ་རྩལ་གྱི་ཁྱད་ཆོས་ངོམས་པ་དང་། ལ་ལས་ཇི་མ་ཇི་བཞིན་དུ་ངག་གི་དབྱངས་རྟར་བརྒྱུས་ནས་གྱེར་པ། ལ་ལས་གདུང་སེམས་མཉམ་བསྐྱེད་ཀྱིས་བརྩེ་བ་ཟབ་མོ་བཅངས་ནའང་ཕྱོགས་གང་ཅིས་ཐད་དུ་སྙན་འཇེབས་ཀྱི་དབྱངས་འགྲོས་དང་ཡོངས་སུ་ཕྱུག་པའི་བརྩེ་དུང༌གིས་ཕྱུག་ཡོད། ཁོང་ཚོའི་འཁྲབ་སྟོན་འོག་བྱིས་སྒྲུང་དང་། ལྷུག་རྩོམ། གཏམ་རྒྱུད། སྙན་ངག་སོགས་ཀྱིས་གློ་བུར་དུ་ཡིད་ཀྱི་མཚོ་མོ་སྐྱོམ་པར་བྱས་ནས་རྩོམ་རིག་གི་དག་ཞིང་ལ་མྱོང་རོལ་བྱེད་དུ་བཅུག་པ་དང་མཚུངས། རྣམ་པ་འདིའི་སློབ་རའི་རྣམ་ཤེས་གསར་བཞེངས་དང་རིག་གནས་རྒྱུད་འཛིན། རྡོག་རྩ་གཅིག་སྒྲིལ་བཅས་ལ་ནུས་པ་བླ་ལྷག་ཐོན་དུ་བཅུག་ཡོད།

       དེའི་རྗེས་སུ་ཡིག་གཟུགས་འགྲེམས་སྟོན་ནང་ཞུགས་པའི་དགེ་རྒན་ཚོས་གཟབ་ནན་ངང་ལེགས་བྲིས་བྱུང་བ་གང་དགར་བྲིས་ཏེ་སླ་བཅོས་སྤུ་ཙམ་ཡང་བྱས་མེད་ལ། བོད་ཀྱི་ཡིག་གཟུགས་ཀྱི་ཁུངས་དང་འབྲེལ་བའི་བྲིས་རྒྱུན་ལ་དོ་སྣང་སྒོས་དབུ་ཅན་དང་དབུ་མེད་ཀྱི་བྲིས་རྒྱུན་མི་འདྲ་བ་རེ་འགྲེམས་སྟོན་བྱས། ཡིག་འབྲུ་རེ་རེའི་འབྲི་རིམ་ཐད་ནས་ཀྱང་དགེ་རྒན་ཚོས་གཟབ་ནན་ངང་ཡར་རྒྱས་བརྩོན་ལེན་གྱི་སེམས་འདུན་མཚོན་པར་བྱས་ཡོད། དེའི་ཕྱིར་དགེ་རྒན་གྱི་ཡིག་གཟུགས་ནི་སློབ་ཁྲིད་ནང་དོན་གྱི་གྲུབ་ཆ་གཙོ་བོ་ཞིག་སྟེ། ཡིག་གཟུགས་ཀྱིས་སློབ་མའི་མི་གཤིས་དང་སེམས་ཁམས། ལག་རྩལ་འཇོན་ཐང་སོགས་ལ་དྲང་ལྡོག་གང་རུང་གི་ཤན་ཤུགས་ཐེབས་ཀྱི་ཡོད་པ་བསྙོན་དུ་མེད་པ་མཚོན་ཡོད།

       སྒྱུ་རྩལ་འཁྲབ་སྟོན་གྱི་འགྲན་བསྡུར་འགོ་ཚུགས་པའི་སྐབས་སུ། འགྲན་ཞུགས་དགེ་རྒན་རྣམས་ནི་གངས་རིའི་སྐར་རྒྱན་བཞིན་ལྷང་ལ་བུད་པ་དང། ཁོང་ཚོས་སྨྱུ་གུ་དང་སྣག་ཚས་འཁྱུག་འགྲོས་རྩལ་གྱི་སྟངས་སྟབས་ཅི་དགར་བསྒྱུར་བ་དང་། ཡང་ན་དཀྲོལ་གཏོང་གཞས་ལེན་བྱས་ནས་གསོན་ཤུགས་དང་དར་སྲོལ་ལྡན་པའི་སྒྱུ་རྩལ་གྱི་ཡིད་དབང་འཕྲོག་ཤུགས་ཅི་དགར་མངོན་དུ་བཅུག དེ་དང་མཉམ་དུ། ལེགས་རྩོམ་གྱེར་འདོན་གྱིས་ཀྱང་བརྗོད་འདས་ཞིང་དུ་རྣམ་ཤེས་འཕོ་བ་དང་འདྲ་བ་བྱུང་ཡོད། དེ་བས་དགེ་རྒན་ནི་ཤེས་རིག་གི་ས་བོན་འདེབས་མཁན་དང་དཔལ་ཡོན་གྱི་མྱུ་གུ་གསོ་མཁན། མིའི་བླ་སྲོག་གི་ཇུས་འགོད་པ་ཡིན་པར་བརྗོད་པའང་དོན་དུ་གནས་སོ། །

       ༢༠༢༣ལོའི་ཆུང་འབྲིང་སློབ་གྲྭའི་སྐད་ཡིག་དགེ་རྒན་གྱི་འཇོན་ནུས་འགྲན་བསྡུར་ཆེན་མོ་རྒྱལ་ཁའི་ངང་མཇུག་འགྲིལ་ཞིང་། འགྲན་བསྡུར་ལ་བརྟེན་ནས་སྦྱོང་བརྡར་གྱི་ཚབ་བྱས་པ་དང་འགྲན་བསྡུར་ལ་བརྟེན་ནས་ཞིབ་འཇུག་ལ་སྐུལ་འདེད་བཏང་སྟེ་དགེ་རྒན་གྱི་ཆེད་ལས་བྱང་ཚད་དང་ཆེད་ལས་འཇོན་ནུས་ཟམ་མི་ཆད་པར་མཐོ་རུ་བཏང་། ཉིན་གཉིས་ཀྱི་ཛ་དྲག་གི་འགྲན་བསྡུར་ཁྲོད་འགྲན་ཞུགས་དགེ་རྒན་ཚང་མར་གྲུབ་འབྲས་མངོན་གསལ་ཐོབ། ཐེངས་འདིའི་འགྲན་བསྡུར་ནི་འཇོན་ནུས་ཀྱི་འགྲན་བསྡུར་རྐྱང་རྐྱང་ཙམ་མ་ཡིན་པར་བདམས་ཐོན་པ་ཚོའི་བློ་གྲོས་དང་ཉམས་འགྱུར་ཕྱོགས་ཡོངས་ནས་མངོན་པ་ཞིག་རེད། མཐར་འགྲན་བསྡུར་འདིས་དགེ་རྒན་གྱི་དཔུང་སྡེ་ལ་སྐུལ་འདེད་དང་རང་གི་འཇོན་ནུས་ཆེ་རུ་གཏོང་བར་དམིགས་འབེན་ཡག་པོ་བཙུགས་པར་མ་ཟད། དེ་བས་མུ་མཐུད་དུ་སློབ་གསོའི་བྱ་བར་མཐོང་ཆེན་བྱས་ནས་སློབ་མ་གང་མང་གསོ་སྐྱོང་ཐད་ལ་ཕན་འབྲས་མི་དམན་པ་ཐོན་དུ་བཅུག་ཡོད།