མཚོ་ལྷོ་ཁུལ་གྱི་རྫོང་ཁག་ལྔའི་བོད་འགྱིག་འགྲན་བསྡུར་ཀོས་ནན་རྫོང་དུ་སྤེལ།

       དམངས་ཡོངས་ཀྱིས་ཀྲུང་ཧྭ་མི་རིགས་གཅིག་མཐུན་འདུས་གྲུབ་ཀྱི་འདུ་ཤེས་བརྟན་པོ་བཙུགས་ནས་མི་དམངས་མང་ཚོགས་ཀྱི་ལུས་སྦྱོང་གི་དགོས་མཁོ་དང་བསམ་པའི་རིག་གནས་འཚོ་བ་སྔར་ལས་ཇེ་ལེགས་སུ་གཏོང་ཆེད། ཉེ་ཆར། མཚོ་ལྷོ་ཁུལ་རིག་གནས་ཁང་གིས་ཀོས་ནན་རྫོང་རིག་གནས་ལུས་རྩལ་ཡུལ་སྐོར་རྒྱང་སྒྲོག་བརྙན་འཕྲིན་ཅུའུ་དང་མཉམ་དུ་སྒྲིག་འཛུགས་བྱས་ནས་གཉེར་བའི་མཚོ་ལྷོ་ཁུལ་གྱི་བོད་འགྱིག་གསོ་སྦྱོང་འཛིན་གྲྭ་སྐབས་བཞི་པ་དང་། ཁུལ་ཡོངས་ཀྱི་བོད་འགྱིག་འགྲན་བསྡུར་དེ་ཀོས་ནན་རྫོང་དུ་མགོ་ཚུགས་པ་དང་ཁུལ་ཡོངས་ཀྱི་རྫོང་ལྔའི་བོད་འགྱིག་འགྲན་བསྡུར་ནང་ཞུགས་མཁན་མི60ལྷག་ཡོད།

       ཐེངས་འདིའི་གསོ་སྦྱོང་འཛིན་གྲྭའི་ཐོག་བོད་འགྱིག་གི་ཞིང་ཆེན་རིམ་པའི་གཟུགས་འདས་ཤུལ་བཞག་རིག་གནས་ཀྱི་རྒྱུན་འཛིན་པ་དགེ་རྒན་ཟླ་བ་ཐར་སོགས་གདན་དྲངས་ནས་སློབ་ཁྲིད་བྱས་པ་དང་བོད་འགྱིག་གི་ལོ་རྒྱུས་དང་བྱུང་ཁུངས། འཕེལ་རྒྱས་རྒྱབ་ལྗོངས། བོད་འགྱིག་དང་རོང་འབྲོག་པའི་འཚོ་བའི་དབར་གྱི་འབྲེལ་བ་དང་གནས་བབ་གལ་ཆེན་སོགས་ཀྱི་ཐད་ཁྱོན་ཡོངས་ནས་གསོན་ཉམས་དོད་པའི་སློབ་ཁྲིད་བྱས་པས་གསོ་སྦྱོང་ནང་ཞུགས་མཁན་གྱི་སློབ་མར་ཕན་པ་མི་དམན་པ་ཐོབ།    

       འགྲན་བསྡུར་ཁྲོད་འགྲན་ཞུགས་བདམས་ཐོན་པ་ཚོས་བློ་གྲོས་དང་དཔའ་ངར་འགྲན་ཞིང་ངོ་མཚར་ཆེ་བའི་ཡུལ་དངོས་ལྟད་མོ་བར་བོད་འགྱིག་གི་ཐུན་མོང་མ་ཡིན་པའི་ཡིད་དབང་འཕྲོག་ཤུགས་ཉམས་སུ་མྱོང་དུ་བཅུག ཉིན་བཞིའི་འགྲན་རྩོད་དྲག་པོ་བརྒྱུད་འབའ་རྫོང་གི་རྟ་མགྲིན་ཚེ་བརྟན་ལ་ཨང་དང་པོ་དང་། ཀོས་ནན་རྫོང་གི་ལྕགས་བྱམས་ཐར་ལ་བྱ་དགའ་ཨང་གཉིས་པ། ཐུན་ཏེ་རྫོང་གི་པད་མ་རིག་འཛིན་ལ་ཨང་གསུམ་པ། ཀོས་ནན་རྫོང་གི་འཇམ་དཔལ་ལ་ཨང་བཞི་བ། ཀོས་ནན་རྫོང་གི་མགོན་པོ་རྒྱལ་ལ་ཨང་ལྔ་པ་བཅས་ཐོབ།

       ཐེངས་འདིའི་བྱེད་སྒོས་བོད་འགྱིག་ལ་དགའ་མཁན་ཚོར་བོད་འགྱིག་རྒྱུན་འཛིན་གྱི་གལ་ཆེའི་རང་བཞིན་དང་རྩལ་ནུས་མངོན་པར་བྱེད་པའི་ལས་སྟེགས་བཏོད་དེ་རིག་སྟོབས་གསར་སྤེལ་དང་། བསམ་པར་ཤུགས་རྐྱེན་བཟང་པོ་ཐེབས་པར་མ་ཟད། ཚང་མས་དགའ་བསུ་ཐོབ་ཡོད།