དགེ་འདུན་ཆོས་འཕེལ་དང་ཨ་མདོ་བྱམས་པའི་ཐང་ག་སྒྱུ་རྩལ་འགྲེམས་སྟོན།

དུས་རབས་ཤིག་གི་སྐྱེས་ཆེན། སོར་རྩེ་ལས་འཁྲུངས་པའི་ལྷ་ཚོགས་ཀྱི་སྣང་བརྙན།
 

       ཟླ5པའི་ཚེས23ཉིན། “དུས་རབས་ཤིག་གི་སྐྱེས་ཆེན། སོར་རྩེ་ལས་འཁྲུངས་པའི་ལྷ་ཚོགས་ཀྱི་སྣང་བརྙན”ཞེས་པ་གཙོ་དོན་ཡིན་པའི་དགེ་འདུན་ཆོས་འཕེལ་དང་ཨ་མདོ་བྱམས་པའི་ཐང་ག་སྒྱུ་རྩལ་འགྲེམས་སྟོན་དེ་རྨ་ལྷོ་ཁུལ་རེབ་གོང་རིག་གནས་སྒྱུ་རྩལ་བཤམས་སྟོན་ཁང་དུ་དངོས་སུ་མགོ་བརྩམས། ཀྲུང་གོའི་རིག་རྫས་སྤེལ་རེས་ལྟེ་གནས་ཀྱི་ཀྲུའུ་རེན་གཞོན་པ་སུང་ཞའོ་པིན་དང་འབྲེལ་ཡོད་མགོ་ཁྲིད། དགེ་འདུན་ཆོས་འཕེལ་དང་ཨ་མདོ་བྱམས་པའི་བརྩམས་ཆོས་འགྲེམ་ཞུགས་ལས་ཁུངས། ལད་འབྲི། རྒྱུན་འཛིན་འགྲེམ་ཞུགས་རྩོམ་པ་པོ། ཁུལ་ལས་རིགས་ལག་རྩལ་སློབ་གྲྭའི་ཐང་ཀ་ཆེད་ལས་འཛིན་གྲྭའི་དགེ་སློབ་ཡོངས། ཁུལ་རེབ་གོང་རིག་གནས་མཐུན་ཚོགས་དང་སྨྱན་སྦྱོར་གསར་ལམ་ཁག་གི་མི་སྣ་བཅས་མི300ལྷག་འགྲེམས་སྟོན་མཛད་སྒོར་ཞུགས་ཡོད།

       རྒྱུས་ལོན་པ་ལྟར་ན། རེབ་འདིའི་འགྲེམས་སྟོན་ཚན་པ་གསུམ་དུ་བཀར་ཡོད་ཅིང་། ཁྱོན་བསྡོམས་བརྩམས་ཆོས100འགྲེམས་སྟོན་བྱས་ཡོད་པ་དང་འགྲེམས་སྟོན་དུས་ཡུན་ཟླ་བ་གཅིག་རེད། ཚན་པ་དང་པོ«མི་ཚུལ་རིང་ལུགས་ཀྱི་དེད་དཔོན་ཆེན་མོ་སྟེ་དགེ་འདུན་ཆོས་འཕེལ་དང་ཁོང་གི་སྒྱུ་རྩལ་བརྩམས་ཆོས»སུ་དགེ་འདུན་ཆོས་འཕེལ་གྱི་སྒྱུ་རྩལ་བརྩམས་ཆོས33འགྲེམས་སྟོན་བྱས་ཡོད་པ་དང་། ཚན་པ་གཉིས་པ«དུས་རབས་ཤིག་གི་སྐྱེས་ཆེན་ཏེ་ཨ་མདོ་བྱམས་པ་དང་ཁོང་གི་སྒྱུ་རྩལ་བརྩམས་ཆོས»སུ་ཨ་མདོ་བྱམས་པའི་ཐང་ག་སྒྱུ་རྩལ་བརྩམས་ཆོས40འགྲེམས་སྟོན་བྱས་ཡོད། ཚན་པ་གསུམ་པ«མི་རབས་བར་གྱི་རྒྱུན་འཛིན་ཏེ་ཐང་ག་སྒྱུ་རྩལ་གྱི་རྒྱུན་འཛིན་དང་གསར་གཏོད»དུ་དགེ་འདུན་ཆོས་འཕེལ་དང་ཨ་མདོ་བྱམས་པའི་ཐང་ག་སྒྱུ་རྩལ་གྱི་ལད་འབྲི་དང་རྒྱུན་འཛིན་གྱི་སྒྱུ་རྩལ་བརྩམས་ཆོས27འགྲེམས་སྟོན་བྱས་ཡོད།

       རེབ་འདིའི་འགྲེམས་སྟོན་ནི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རིག་རྫས་སྲུང་སྐྱོབ་བྱ་བའི་འབྲེལ་ཡོད་དཔྱད་བརྗོད་གལ་ཆེན་གྱི་དགོངས་དོན་ལག་བསྟར་དོན་འཁྱོལ་བྱས་པ་ཡིན་ལ། རྨ་ལྷོ་ཁུལ་གྱི་ལོ་རྒྱུས་རིག་གནས་ཀྱི་མི་སྣ་གྲགས་ཅན་དགེ་འདུན་ཆོས་འཕེལ་དང་ཨ་མདོ་བྱམས་པའི་ཐང་ག་སྒྱུ་རྩལ་གྱི་ཉམས་འགྱུར་མངོན་པ་དང་། “ཀྲུང་གོའི་ཐང་ག་སྒྱུ་རྩལ་གྱི་ཕ་ས”ཡི་ཟོང་རྟགས་ཀྱི་ཤུགས་རྐྱེན་མཐོར་འདེགས་དང་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་དར་སྤེལ་དང་། ཀྲུང་ཧྭའི་རིག་གནས་རྒྱུན་འཛིན་དང་ཀྲུང་ཧྭ་མི་རིགས་ཐུན་མོང་ཚོགས་པའི་འདུ་ཤེས་བརྟན་པོར་བསྐྱེད་པར་རྨ་ལྷོའི་རིག་དངོས་ཀྱི་སྟོབས་ཤུགས་སྐྱེས་སུ་ཕུལ་ཡོད།