རྒྱལ་ཡོངས་ཀྱི་བོད་ཀྱི་གསོ་བ་རིག་པའི་མཐོ་རིམ་ཞིབ་སྦྱོང་འཛིན་གྲྭ་པེ་ཅིང་དུ་བསྡུས།

       ཟླ10པའི་ཚེས10ཉིན། སྐབས་བཅུ་བཞི་པའི་རྒྱལ་ཡོངས་བོད་ལུགས་གསོ་རིག་མཐོ་རིམ་ཟབ་སྦྱོང་འཛིན་གྲྭའི་འགོ་ཚུགས་མཛད་སྒོ་པེ་ཅིང་བོད་ལུགས་སྨན་ཁང་དུ་འཚོགས། སྐབས་འདིའི་ཟབ་སྦྱོང་འཛིན་གྲྭས“བོད་ཀྱི་གསོ་བ་རིག་པའི་གསུང་རབ་དང་ནད་ཐོག་སྨན་བཅོས་ཀྱི་ཉམས་མྱོང”བརྗོད་དོན་གཙོ་བོར་བྱས་ཤིང་། ཀྲུང་གོའི་བོད་རིག་པ་ཞིབ་འཇུག་ལྟེ་གནས་ཀྱིས་གཙོ་གཉེར་བྱས་པ་དང་། ཀྲུང་གོའི་བོད་རིག་པ་ཞིབ་འཇུག་ལྟེ་གནས་ཀྱི་ཚན་ཞིབ་ལས་སྒོའི་གཞུང་ལས་ཁང་དང་། བོད་ལུགས་གསོ་རིག་ཞིབ་འཇུག་ཁང་། པེ་ཅིང་བོད་ལུགས་སྨན་ཁང་བཅས་ཀྱིས་མཉམ་འབྲེལ་ཐོག་སྒྲུབ་འགན་འཁུར་བ་ཞིག་ཡིན་ཞིང་། དེའི་དམིགས་ཡུལ་ནི་བོད་ལུགས་གསོ་རིག་ཤེས་ལྡན་པའི་ཆེད་ལས་ནུས་པ་སྔར་བས་ཆེ་རུ་བཏང་ནས་བོད་ཀྱི་གསོ་བ་རིག་པའི་རིག་གཞུང་རྒྱུན་འཛིན་དང་གསར་གཏོད་འཕེལ་རྒྱས་ལ་སྐུལ་འདེད་གཏོང་རྒྱུ་དེ་རེད། སླད་ཕྱིན་ཉིན་བདུན་ནང་བོད་ལྗོངས་དང་། སི་ཁྲོན། མཚོ་སྔོན། ཀན་སུའུ། ཡུན་ནན། པེ་ཅིང་སོགས་ནས་ཡོང་བའི་སློབ་མ100ལྷག་ཙམ་དེ་གར་ཟབ་སྦྱོང་ནང་ཞུགས་རྒྱུ་རེད།

       འགོ་ཚུགས་མཛད་སྒོ་ནི་པེ་ཅིང་བོད་ལུགས་སྨན་ཁང་གི་ཡོན་ཀྲང་གཞོན་པ་མཆོད་རྒྱལ་གྱིས་གཙོ་སྐྱོང་གནང་ཞིང་། ཀྲུང་གོའི་བོད་རིག་པ་ཞིབ་འཇུག་ལྟེ་གནས་ཀྱི་སྤྱི་ཁྱབ་གཙོ་འགན་འཁུར་མཁན་གཞོན་པ་ལིའུ་ཝེ་དང་། ཀྲུང་གོའི་བོད་རིག་པ་ཞིབ་འཇུག་ལྟེ་གནས་ཚན་ཞིབ་གཞུང་ལས་ཁང་གི་ཀྲུའུ་རེན་ཧུའུ་ཧྲའོ་ཅི། པེ་ཅིང་བོད་ལུགས་སྨན་ཁང་གི་ཡོན་ཀྲང་ཀའོ་ཝེ། སྨན་རྩིས་ཞིབ་འཇུག་ཁང་གི་སུའུ་ཀྲང་གཞོན་པ་ཧྥེང་ཤིན་སོགས་ཚོགས་འདུར་ཞུགས་ཡོད། རྒྱལ་ཡོངས་ཀྱི་ཀྲུང་ལུགས་གསོ་རིག་མཁས་པ་གྲགས་ཅན་དང་། བོད་ཀྱི་གསོ་བ་རིག་པའི་ཀྲུའུ་རེན་སྨན་རམས་པ། རྒྱལ་ཡོངས་ཀྱི་ཀྲུང་ལུགས་གསོ་རིག་རིག་གཞུང་གི་ཉམས་མྱོང་རྒྱུན་འཛིན་གྱི་མཛུབ་ཁྲིད་དགེ་རྒན་གྲགས་ཅན་རྣམ་རྒྱལ་ལགས་གདན་ཞུས་ལྟར་སློབ་ཁྲིད་གནང་བར་ཕེབས་ཡོད།

       པེ་ཅིང་བོད་ལུགས་སྨན་ཁང་གི་ཡོན་ཀྲང་ཀའོ་ཝེས་ཤིས་ཚིག་སྒྲོན་སྐབས། རྒྱལ་ཡོངས་བོད་ལུགས་གསོ་རིག་མཐོ་རིམ་ཟབ་སྦྱོང་འཛིན་གྲྭ་བསྟུད་མར་གཉེར་བ་དེས་བོད་ཀྱི་གསོ་བ་རིག་པའི་ལས་དོན་པར་ཆུ་ཚད་མཐོ་བའི་སློབ་སྦྱོང་སྤེལ་རེས་ཀྱི་ལས་སྟེགས་ཤིག་བསྐྲུན་པ་དང་། ཤེས་བྱ་མཉམ་སྤྱོད་དང་ཉམས་མྱོང་ཁྱབ་སྤེལ་བྱ་རྒྱུར་སྐུལ་འདེད་བཏང་བ་མ་ཟད། བོད་ཀྱི་གསོ་བ་རིག་པའི་ཆེད་ལས་ཤེས་ལྡན་པའི་དཔུང་ཁག་འཛུགས་སྐྱོང་དང་རིག་ཚན་ཕྱོགས་ཡོངས་ནས་འཕེལ་རྒྱས་འགྲོ་བར་སྐུལ་འདེད་དེ་བས་ནུས་ལྡན་བཏང་ཡོད་ཅེས་བརྗོད་པ་དང་། ཁོང་གིས། སློབ་མ་ཚང་མས་སློབ་སྦྱོང་གི་གོ་སྐབས་ལ་གཅེས་སྤྲས་དང་ཞིབ་འཇུག་གཏིང་ཟབ་བྱས་ནས། རིགས་པའི་གཞུང་ལུགས་དང་ནད་ཐོག་ལག་ལེན་ཟུང་འབྲེལ་དམ་ཟབ་ཀྱིས་སྨན་བཅོས་ཆུ་ཚད་རྒྱུན་ཆད་མེད་པར་མཐོ་རུ་བཏང་སྟེ་བོད་ཀྱི་གསོ་བ་རིག་པ་དུས་བསྟུན་འཕེལ་རྒྱས་འགྲོ་བར་རམ་འདེགས་ཐུབ་རྒྱུའི་རེ་བ་ཡོད་ཅེས་བརྗོད།