སྲས་མོའི་ལོག་ཕེབས།༼༡༽ ཡབ་གཞིས་པཎ་རིག་འཛིན་དབང་མོ་མཚོ་སྔོན་པོ་དྲ་བར་གདན་ཕེབས་གནང་ཞིང་ཤིས་ཚིག་བསྩལ།

   གནམ་ལོ་གསར་ཚེས་ཀྱི་དཔྱིད་ཟླ་དང་པོའི་ཚེས་ལྔ་ནི་གཟའ་སྐར་འཕྲོད་སྦྱོར་གྱི་ཉི་བཟང་སྐར་བཟང་སྟེ་མགྲོན་བསུ་གསོལ་སྟོན་གྱི་ལས་ལ་འཇུག་ལེགས་པའི་ཉིན་མོ་ཞིག་ཡིན། ཏག་ཏག་སྐབས་འདི་ལ་མཚོ་སྔོན་པོའི་ལྷོ་འགྲམ་དུ་ལྷུན་གྱིས་ཆགས་པའི་མཐོ་སྒང་གི་གྲོང་རྡལ་ཆུང་བ་ཆབ་ཆ་རུ་དགའ་ཞིང་གུས་པའི་སྐུ་མགྲོན་ཏེ་པཎ་ཆེན་སྐུ་ཕྲེང་བཅུ་བ་མཆོག་གི་སྲས་མོ་ཡབ་གཞིས་པཎ་རིག་འཛིན་དབང་མོ་བསུས་བྱུང་།

   ལོ་སར་གྱི་སྐབས་སུ། ཞོང་ཧྭ་རྫོང་བིས་མདོ་དགོན་དང་མཚོ་ལྷོ་ཁུལ་པཎ་ཆེན་བདེ་སྐྱིད་དགོན་གྱི་གདན་ཞུས་ལྟར། སྲས་མོ་ཡབ་གཞིས་པཎ་རིག་འཛིན་དབང་མོ་རང་གི་ཕ་ཡུལ་དུ་ལོག་ནས་པཎ་ཆེན་སྐུ་ཕྲེང་བཅུ་བ་སྐུ་འཁྲུངས་ནས་བགྲང་བྱ་བདུན་ཅུ་ལོན་པའི་རྗེས་དྲན་བྱ་འགུལ་ལ་ཞུགས་པ་དང་།  ལོ་ངོ་ཉི་ཤུའི་རིང་ལ་མཇལ་འཕྲད་མ་ཐུབ་པའི་ཡུལ་མི་སྤུན་ཟླ་རྣམས་དང་ལྷན་དུ་འཛོམས། མཚོ་ལྷོ་བོད་རིགས་རང་སྐྱོང་ཁུལ་དུ་ཕེབས་པའི་བར་གསེང་དུ་སྲས་མོ་ཡབ་གཞིས་པཎ་རིག་འཛིན་དབང་མོ་མཚོ་སྔོན་པོ་དྲ་ཚིགས་སུ་གདན་ཕེབས་གནང་ཞིང་། མཚོ་སྔོན་པོ་དྲ་བའི་ལས་བྱེད་མི་སྣ་ཡོངས་ལ་ལོ་སར་གྱི་བཀྲ་ཤིས་སྨོན་འདུན་ཞུས། སྲས་མོས་མཚོ་སྔོན་པོའི་དྲ་ངོས་ལ་ཞིབ་གཟིགས་གནང་རྗེས་བཤད་རྒྱུར། “མཚོ་སྔོན་པོའི་དྲ་ངོས་བསྒྲུབས་པ་ཤིན་ཏུ་ཡག་པོ་འདུག  ཐུན་མོང་མ་ཡིན་པའི་ཁྱད་ཆོས་འཛོམས་ཡོད། ང་པེ་ཅིང་དུ་ཡོད་དུས་སྔ་མོ་ནས་མཚོ་སྔོན་པོ་དྲ་བ་བཟོས་ཡོད་པ་གོ་ཐོས་བྱུང་ཡོད། དེ་རིང་ང་དངོས་སུ་འདིར་ཡོང་བར་དགའ་སྤྲོ་ཞེ་དྲག་སྐྱེས་ཀི་ཡོད།”

    ཡབ་གཞིས་པཎ་རིག་འཛིན་དབང་མོས་དགའ་མགུའི་ངང་ཆེད་དུ་མཚོ་སྔོན་པོ་དྲ་བར“མཚོ་སྔོན་པོའི་རླབས་ཕྲེང་གི་གཟེགས་མ་རེ་རེ་ཕྱོགས་ཀྱི་སྐྱེ་རྒུ་མིག་གི་དཔལ་དུ་འཕྱོ་བར་སྨོན”ཞེས་ཤིས་ཚིག་གནང་ཞིང་། “ངས་ཡི་གེ་འདི་འདྲ་ཞིག་བྲིས་ནས་མཚོ་སྔོན་པོ་དྲ་བར་གནང་བ་ནི། མཚོ་སྔོན་པོ་དྲ་བས་འུ་ཅག་བོད་ཁུལ་གྱི་འབངས་མི་རྣམས་ལ་ཆ་འཕྲིན་བརྗེ་རེས་ཀྱི་སྟེགས་བུ་ཞིག་བསྐྲུན་ཐུབ་པའི་རེ་བ་ཡིན། དེ་དང་ཆབས་ཅིག་ནང་ལོག་གི་མི་རྣམས་དང་། འཛམ་གླིང་ཡོངས་ཀྱི་མི་རྣམས་ལ་བོད་ཀྱི་རིག་གནས་རྒྱུས་ལོན་བྱེད་དུ་འཇུག་དགོས”ཞེས་བརྗོད།

    མཚོ་སྔོན་པོ་དྲ་བ་གསར་འཛུགས་མཁན་ཚེ་ལོ་ལགས་ཀྱིས་སྲས་མོ་འཁོར་དང་བཅས་པ་མཚོ་སྔོན་པོ་དྲ་བར་གདན་ཕེབས་གནང་བར་རྟེན་འབྲེལ་ཞུས་པ་དང་།  མཚོ་སྔོན་པོ་དྲ་བའི་གནས་ཚུལ་ངོ་སྤྲོད་རགས་བསྡུས་བྱས། ཁོས་བཤད་རྒྱུར། “གནམ་ལོ་གསར་ཚེས་ཀྱི་དུས་འདིར། སྲས་མོ་འཁོར་དང་བཅས་པ་རྒྱལ་ས་པེ་ཅིང་ནས་ཕ་ཡུལ་དུ་ལོག་ཅིང་། མདོ་སྨད་ཆབ་ཆ་གྲོང་རྡལ་དུ་ཕེབས་ཏེ་མཚོ་སྔོན་པོ་དྲ་ཚིགས་སུ་གདན་བཞུགས་གནང་བར་དགའ་མགུ་ཡི་རང་བྱེད་པ་ཡིན། ལྷག་པར་དུ་སྲས་མོ་ལགས་ཀྱིས་བྲེལ་ཟིང་གི་ཁྲོད་ནས་མཚོ་སྔོན་པོ་དྲ་བར་ཤིས་ཚིག་གནང་བར་ངས་ལས་བྱེད་མི་སྣ་ཡོངས་ཀྱི་ཚབ་བྱས་ཏེ་སྙིང་ཁུང་རུས་པའི་གཏིང་ནས་ཐུགས་རྗེ་ཆེ་ཞུ་བ་ཡིན། དེ་དང་ཆབས་ཅིག་སྲས་མོ་འཁོར་དང་བཅས་པའི་ས་བྱི་ལོའི་ལོ་སར་ལ་བཀྲ་ཤིས་བདེ་ལེགས་ཞུ།”