སྲས་མོའི་ལོག་ཕེབས།༼༤༽རི་བོ་ཉི་ཟླ་མཆོད་སྤྲིན་སྟུག་པོས་གཡོགས། མཚོ་ཆུང་ནོར་བུ་བཅིབས་བསུ་ཚོགས་ཀྱིས་ཁེབས།

   ཧོར་ཟླ་དང་བོའི་ཚེས་བཞིའི་ཉིན་གུང་། སྲས་མོ་ཡབ་གཞིས་པཎ་རིག་འཛིན་དབང་མོ་འཁོར་དང་བཅས་པ་སྐུ་འབུམ་བྱམས་པ་གླིང་ནས་རྡོག་ཐོན་ཏེ། པཎ་ཆེན་སྐུ་ཕྲེང་བཅུ་བ་སྐུ་བཞུགས་དུས་ཤིན་ཏུ་ཐུགས་མཉེས་མཛད་པའི་མཚོ་ལྷོ་བོད་རིགས་རང་སྐྱོང་ཁུལ་དུ་སྐྱོད་པའི་ལམ་ལ་བཞུད། ཕྱི་དྲོའི་དུས་ཚོད་བཞི་ཡས་མས་སུ། འགྲུལ་བཞུད་རླངས་འཁོར་གྱི་བསྟར་ཕྲེང་རི་བོ་ཉི་ཟླར་འབྱོར། མཚོ་ལྷོ་ཆབ་ཆ་ནས་འོངས་པའི་སྔུན་བསུ་པ་རྣམས་ཀྱང་སྔ་མོ་ནས་ལེ་བར་ལྔ་བཅུ་ལྷག་གི་རྒྱང་ཐག་ཆོད་པའི་གནས་འདིར་སླེབས་ཡོད།

བསང་མཆོད་བྱེད་བཞིན་པ།

   རི་བོ་ཉི་ཟླ་ནི་མཚོ་ལྷོ་བོད་རིགས་རང་སྐྱོང་ཁུལ་གྱི་སྒོ་གླེགས་ཡིན་པ་དང་།མདོ་དབུས་མཐོ་སྒང་གི་ཤར་སྒོ་ཡིན་པ་མ་ཟད། སའི་བཀོད་པ་ཕུན་སུམ་ཚོགས་ཤིང་མདོ་དབུས་མཐོ་སྒང་དང་ས་སེར་མཐོ་སྒང་བར་གྱི་ས་ཆུ་རི་ཀླུང་གི་དབྱེ་མཚམས་ཀྱང་ཡིན།གནའ་སྔ་མོའི་དུས་ནས།རི་བོ་ཉི་ཟླ་ནི་མེས་རྒྱལ་ནང་ཁུལ་གྱི་ལྷོ་ནུབ་མཐའ་མཚམས་ཤར་བགྲོད་ཀྱི་འགྲིམ་འགྲུལ་ལྟེ་བ་ཡིན་ཞིང་བོད་རྒྱ་ཕན་ཚུན་མཛའ་བརྩེའི་འགྲོ་འོང་དང་ཚོང་ལམ་གཙོ་བོ་ཡིན།ཧན་རྒྱལ་རབས་ཀྱི་དུས་སུ་རི་བོ་ཉི་ཟླ་ནི་རང་རྒྱལ་གྱི་དར་གོས་འགྲིམ་ལམ་གྱི་མལ་ཚིགས་ཆེན་པོ་ཞིག་ཡིན། ཐང་རྒྱལ་རབས་ཀྱི་སྐབས་སུ་རི་བོ་ཉི་ཟླ་ནི་ཐང་བོད་གནའ་ལམ་གྱི་བཞུད་ལམ་ཉག་གཅིག་ཏུ་གྱུར་ཡོད། སྤྱི་ལོ༦༤༡ལོར་ཐང་རྗེ་སྲས་མོ་ཝིན་ཁྲིན་ཀོང་ཇོ་བོད་ཀྱི་བཙུན་མོར་གདན་འདྲེན་པའི་ལམ་བར་དུ་གནས་འདི་རུ་ངལ་གསོས་ཤིང་།ངོ་མཚར་བའི་ལོ་རྒྱུས་ཀྱི་གཏམ་རྒྱུད་ཀྱིས་རི་བོ་ཉི་ཟླ་ལ་བཀྲག་མདངས་གསར་བ་བསྣན།སྤྱི་ལོ༧༣༣ལོར་ྔ་བོད་གཉིས་ཀྱིས་རི་བོ་ཉི་ཟླ་ནས་ས་མཚམས་བཅད་ཅིང་མི་རིགས་མཛའ་འབྲེལ་གྱི་རྡོ་རིང་བཙུགས།

   ལོ་རྒྱུས་ཀྱི་འགྲོས་དང་བསྟུན་ནས། རི་བོ་ཉི་ཟླ་ལས་ང་ཚོས་ཀུན་དང་མི་མཚུངས་པའི་ལོ་རྒྱུས་ཀྱི་བརྗེད་ཐོ་དུ་མ་བཀླག་ཐུབ།སྤྱི་ལོ༡༩༨༠ལོ་དང༡༩༨༧ལོར་པཎ་ཆེན་རིན་པོ་ཆེ་སྐུ་ཕྲེང་བཅུ་བ་མཆོག་སྔ་རྗེས་སུ་ཐེངས་གཉིས་ལ་རི་བོ་ཉི་ཟླར་ཞབས་ཀྱིས་བཅགས་ཤིང་བྱིན་གྱིས་རླབས་པས། རི་བོ་ཉི་ཟླ་ནི་བཀྲ་ཤིས་ཤིང་མི་གཤིས་ཅན་གྱི་རིག་གནས་ཀྱི་རྒྱབ་ལྗོངས་ཤིག་ཏུ་གྱུར།ལོ་ངོ་ཉི་ཤུ་འདས་པའི་དུས་དེ་རིང་སྟེ།རིན་པོ་ཆེ་མཆོག་སྐུ་འཁྲུངས་ནས་ལོ་འཁོར་བདུན་ཅུ་འདས་པའི་སྐབས་འདིར། རིན་པོ་ཆེའི་སྲས་མོ་ཡབ་གཞིས་པཎ་རིག་འཛིན་དབང་མོས་ཀྱང་ཡབ་ཆེན་གྱི་ཞབས་རྗེས་བསྙེགས་ནས་རི་བོ་ཉི་ཟླར་ཕེབས་པ་འདིའང་ལོ་རྒྱུས་རང་བཞིན་ལྡན་པའི་མ་བཅོས་ལྷུན་གྱིས་འགྲིག་པའི་རྟེན་འབྲེལ་ཅིག་ཅི་ལ་མ་ཡིན།

     རིན་པོ་ཆེ་ནང་བཞིན་སྲས་མོ་རིག་འཛིན་དབང་མོས་ཉི་ཟླའི་ཁས་ཁ་རུ་བསང་གི་མཆོད་སྤྲིན་རྒྱ་ཆེན་པོ་བྱས་ཤིང་།བཀྲ་ཤིས་བདེ་སྐྱིད་ཡོང་བའི་སྨོན་ལམ་བཏབས།སྲས་མོའི་རྩ་བའི་བླ་མ་སྐུ་ཕྱོགས་འཇམ་པོ་རིན་པོ་ཆེས“ལྷ་རྒྱལ་ལོ”ཞེས་བསྒྲགས་པ་དང་མཉམ་དུ་དེར་འདུས་མི་རྣམས་ཀྱིས་མཁའ་ལ་རླུང་རྟ་སྤུར་ཞིང་།“ལྷ་རྒྱལ་ལོ”ཡི་འབོད་སྒྲས་བར་སྣང་ཡོངས་སུ་ཁེངས་པར་བྱས།འདི་ནི་པཎ་ཆེན་རིན་པོ་ཆེས་གནས་འདི་རུ“ལྷ་རྒྱལ་ལོ”ཞེས་རི་བོ་ཉི་ཟླའི་རྫ་གསེབ་ཏུ་ཁྱབ་པའི་གངས་སེང་དཀར་མོའི་གད་རྒྱངས་ཡང་བསྐྱར་ཐེངས་ཤིག་བསྒྲགས་པ་དང་གཉིས་སུ་མ་མཆིས།

ཁ་བཏགས་འབུལ་བཞིན་པ།

     དེའི་རྗེས་སུ།སྲས་མོ་འཁོར་དང་བཅས་པ་སྣེ་ཤན་རླངས་འཁོར་དང་བསྡོངས་ནས་ལྷོ་ཡི་ཕྱོགས་སུ་སྐྱོད།མཐོ་སྒང་གི་གྲོང་རྡལ་དང་བོ་རིག་སྨོན་གཡེར་མོ་ཐང་བརྒྱུད་དེ་སྨུག་སྤྲིན་གྱིས་བཀླུབས་པའི་གླང་མ་ལུང་བ་བརྒལ་མཐར།ཉི་འོད་ཀྱི་གཟི་བྱིན་རྣམ་པར་བཀྲ་བའི་མཚོ་ཆུང་ནོར་བུ་ཐང་དུ་བསླེབས།ལེ་བར་འགའ