ངོས་དང་པོ > ཆེད་དོན། > རིག་གནས་བགྲོ་གླེང་། > མཚོ་ལྷོ་ཁུལ་སྐབས་དང་པོའི་རིག་གནས་རིག་དངོས་གསར་གཏོད་ཐོན་རྫས་འགྲེམ་སྟོན་དང་ངོ་མཚར་རྡོ་རིགས་གནའ་རྫས་སྤེལ་རེས་འགྲེམ་སྟོན་གྱི་འགོ་ཚུགས་མཛད་སྒོ་བསྡུས།

མཚོ་ལྷོ་ཁུལ་སྐབས་དང་པོའི་རིག་གནས་རིག་དངོས་གསར་གཏོད་ཐོན་རྫས་འགྲེམ་སྟོན་དང་ངོ་མཚར་རྡོ་རིགས་གནའ་རྫས་སྤེལ་རེས་འགྲེམ་སྟོན་གྱི་འགོ་ཚུགས་མཛད་སྒོ་བསྡུས།

རྩོམ་པ་པོ།：ལྷ་ཚེ། ཡོང་ཁུངས།：མཚོ་སྔོན་པོ་དྲ་བ། དུས་ཚོད།：2019-12-30 10:25:56 ཀློག་གྲངས།：

གནའ་རྫས་འགྲེམ་སྟོན།

སྤྱི་ཟླ12པའི་ཚེས27ཉིན་གྱི་སྔ་དྲོར། མཚོ་ལྷོ་ཁུལ་མི་རིགས་བཤམས་སྟོན་ཁང་གིས་མཚོ་ལྷོ་ཁུལ་སྐབས་དང་པོའི་རིག་གནས་རིག་དངོས་གསར་གཏོད་ཐོན་རྫས་འགྲེམ་སྟོན་དང་ངོ་མཚར་རྡོ་རིགས་གནའ་རྫས་སྤེལ་རེས་འགྲེམ་སྟོན་གྱི་འགོ་ཚུགས་མཛད་སྒོ་བསྡུས།

གནའ་རྫས་འགྲེམ་སྟོན།

ཐེངས་འདིའི་འགྲེམ་སྟོན་ལ་མཚོ་ལྷོ་ས་ཁུལ་ནས་ཐོན་པའི་གསར་ཐོན་དུས་རབས་ཀྱི་འོ་གསོས་སྲོག་ཆགས་ཀྱི་འགྱུར་རྡོ་དང་། ཉར་ཚགས་བྱས་པའི་གནའ་རྫས་རྩ་ཆེན་སོགས་བདམས་ལེན་བྱས་ཏེ། དེའི་སྐབས་ཀྱི་མེས་པོའི་བློ་གྲོས་དང་ལག་རྩལ་མཚོན་གང་ཐུབ་དང་། དེ་ལས་མཚོ་ལྷོ་ས་ཁུལ་གྱི་མཚར་སྡུག་འོད་སྟོང་འབར་བའི་ལོ་རྒྱུས་དང་རིག་གནས། རྣམ་པར་བཀྲ་བའི་དམངས་སྲོལ་རིག་གནས་སོགས་འགྲེམས་སྟོན་བྱས་པ་ཡིན། རྗེས་ཕྱོགས་སུ། ང་ཚོས་མུ་མཐུད་དུ་དངོས་མང་བཤམས་སྟོན་ཁང་གི་དྲིལ་བསྒྲགས་དང་སློབ་གསོའི་འགན་ནུས་འདོན་སྤེལ་བྱས་ཏེ། དངོས་མང་བཤམས་སྟོན་ཁང་གིས་ལོ་རྒྱུས་རིག་གནས་དང་སྤྱི་ཚོགས་རིག་གནས་རྒྱུན་འཛིན་བྱེད་དགོས་པའི་སྤྱི་ཚོགས་སློབ་གསོ་ལས་ཁུངས་ཤིག་གི་ལྟ་བའི་དགོངས་དོན་གཞིར་བཟུང་བ་དང་སྦྲགས། དངོས་མང་བཤམས་སྟོན་ཁང་ནས་ཕྱིར་བུད་དེ་རང་གི་ལས་སྒོའི་ཁ་ཕྱོགས་རྒྱུན་དུ་གཞི་རིམ་ལ་གཏད་ནས། རིམ་གྱིས་གཞི་རིམ་ལས་ཁུངས་དང་དངོས་མང་བཤམས་སྟོན་ཁང་གཉིས་ངེས་གཏན་གྱི་བྱང་ཚད་སློབ་གསོའི་རྟེན་གཞི་ཞིག་ཆགས་དགོས་པ་དང་། དངོས་མང་བཤམས་སྟོན་ཁང་གི་ནུས་པ་སྣ་ཚོགས་བེད་སྤྱད་དེ་མང་ཚོགས་ལ་ཞབས་ཞུ་ལེགས་པོ་སྒྲུབ་པར་མ་ཟད། མཚོ་ལྷོ་ཁུལ་གྱི་སྤྱི་ཚོགས་རིགགནས་འཕེལ་རྒྱས་དང་བསམ་པའི་དཔལ་ཡོན་འཛུགས་སྐྲུན་ལ་ཤེད་ཤུགས་གང་ཡོད་འདོན་དགོས།

གནའ་རྫས་འགྲེམ་སྟོན།

མཚོ་ལྷོ་བོད་རིགས་རང་སྐྱོང་ཁུལ་ནི་མཐོ་སྒང་གི་གཟི་འོད་རབ་ཏུ་འཚེར་བའི་མུ་ཏིག་ལྟ་བུར་བསྔགས་པའི་མཚོ་ཆེན་ཁྲི་ཤོར་རྒྱལ་མོའི་ལྷོ་ཕྱོགས་སུ་ཆགས་ཡོད་པ་དང་། ཀྲུང་ཧྭའི་ཤེས་རིག་གི་ཉིང་བཅུད་སྦྲུམ་པའི་མ་ཡུམ་གཙང་བོ་སྟེ། རྨ་ཀླུང་དལ་འབབ་རིང་མོ་རང་སྐྱོང་ཁུལ་གྱི་ས་ཁོངས་ཧྲིལ་བོ་བརྒྱུད་ནས་འབབ་ཀྱིན་ཡོད། གནས་འདི་རུ་བརྗིད་ཆགས་ཡིད་འོང་གི་ས་ཁམས་ཁོར་ཡུག་དང་། རྣམ་པར་མཛེས་པའི་རྩྭ་ཐང་གི་ཡུལ་ལྗོངས། ཕུན་སུམ་ཚོགས་པའི་གཏེར་རྫས་ཀྱི་ཐོན་ཁུངས། གཞུང་དྲང་བབ་ཆགས་ཀྱི་མི་རིགས་ཀྱི་ཡུལ་སྲོལ་གོམས་གཤིས་སོགས་ཡོད་པར་མ་ཟད། ཧ་ཅང་ཡུན་རིང་བའི་ལོ་རྒྱུས་ལྡན་པ་དང་། ནོར་འཛིན་བུ་མོའི་སྟེང་འོག་ཀུན་ཏུ་གྱ་ནོམ་པའི་རིག་གནས་གཏེར་མཛོད་ཀྱིས་ཡོངས་སུ་གཏམས་འདུག་པའི་ཁར། ས་གནས་དང་མི་རིགས་ཀྱི་ཁྱད་ཆོས་མངོན་པར་གསལ་བའི་རིག་དངོས་ནི་དེ་བས་ཀྱང་མཚོ་སྔོན་ཞིང་ཆེན་གྱི་ལོ་རྒྱུས་རིག་གནས་ཀྱི་གྲུབ་ཆ་གལ་ཆེན་ཞིག་ཏུ་གྱུར་ཡོད།

གནའ་རྫས་འགྲེམ་སྟོན།

མཚོ་ལྷོ་ས་ཁུལ་དུ་རྡོ་ཆས་རྙིང་མའི་དུས་རབས་ཀྱི་དུས་མཇུག་ནས་བཟུང་གནའ་མིས་འཚོ་གཞེས་གནང་མྱོང་བ་དང་། དེའི་རྗེས་སུ་རབ་འོག་མའི་རྡོ་ཆས་དུས་སྐབས་བར་མ་དང་། རྡོ་ཆས་དུས་སྐབས་གསར་བ། ལོ་ཆས་སྤྱོད་པའི་དུས་རབས་སོགས་དུས་རབས་མི་འདྲ་བའི་ལོ་རྒྱུས་དུས་སྐབས་སྔོན་མའི་རིག་གནས་འཕེལ་འགྱུར་གྱི་བཞུད་ལམ་རིང་མོའང་བརྒྱུད་མྱོང་། ལོ་རྒྱུས་སྟེང་དུ་རོང་ཆཱང་དང་། རྒྱ། འ་ཞ། ཐུ་བྷོད་ལ་སོགས་པའི་གནའ་བོའི་མི་རིགས་མང་པོ་སྔ་རྗེས་སུ་གནས་འདིར་ལྷགས་ཏེ། དཀའ་སྤྱད་འབད་བརྩོན་གྱིས་གསོན་ཉམས་ལྡན་པའི་ལོ་རྒྱུས་ཟློས་གར་གྱི་གླེགས་བམ་རྔམས་མཐུག་པོ་ཞིག་ཁམས་གསུམ་སྐྱེ་འགྲོ་མ་ལུས་པའི་མིག་དབང་གསོ་བའི་འགྱུར་མེད་དན་རྟགས་སུ་བཀོད་ཡོད་ཅིང་། ཡུལ་གྲུ་འདིར་འཚོ་ཞིང་གཞེས་པའི་རིགས་སོ་སོའི་མི་དམངས་ཀྱིས་ཡུན་རིང་བའི་འོ་ཆུ་འདྲེས་པ་ལྟ་བུའི་མཛའ་བརྩེའི་བྱིན་མཐུ་ལ་བརྟེན་ནས། སྣ་མང་ཕུན་སུམ་ཚོགས་པ་དང་ས་ཁོངས་ཀྱི་ཁྱད་ཆོས་མངོན་པར་གསལ་བའི་མི་རིགས་རིག་གནས་རྒྱ་མཚོ་ལས་གཏིང་ཟབ་ཅིང་རི་རབ་ལས་དཔངས་མཐོ་བ་ཞིག་ཀྱང་གསར་གཏོད་གནང་ཡོད།

གནའ་རྫས།