ངོས་དང་པོ > ཆེད་དོན། > རིག་གནས་བགྲོ་གླེང་། > ༄༅༎ གསར་དུ་རྙེད་པའི་མཚོ་སྔོན་ཞིང་ཆེན་ཁྲི་ཀ་རྫོང་ཁོངས་ཀྱི“རྫོང་མགོའི་བྲག་བརྐོས་རི་མོའི”ཡུལ་དངོས་རྟོགས་དཔྱོད།
༄༅༎ གསར་དུ་རྙེད་པའི་མཚོ་སྔོན་ཞིང་ཆེན་ཁྲི་ཀ་རྫོང་ཁོངས་ཀྱི“རྫོང་མགོའི་བྲག་བརྐོས་རི་མོའི”ཡུལ་དངོས་རྟོགས་དཔྱོད།
རྩོམ་པ་པོ།:སྒོ་མེ་མགོན་པོ་ཚེ་རིང་།
ཡོང་ཁུངས།:མཚོ་སྔོན་པོའི་དྲ་བ།
དུས་ཚོད།:2020-04-28 11:13:34
ཀློག་གྲངས།:







རྫོང་མགོའི་བྲག་བརྐོས་རི་མོ་ནི་མདོ་དབུས་མཐོ་སྒང་གི་གནའ་བོའི་བྲག་བརྐོས་རི་མོའི་བྱེ་བྲག་ཅིག་ཡིན་པས། བརྐོས་རིས་གཟུགས་བརྙན་གྱི་ཆ་ནས་བོད་ཡུལ་གྱི་བྲག་བརྐོས་རི་མོ་གཞན་དག་དང་ཕལ་ཆེར་འདྲ་བར་སྣང་སྟེ། མིག་སྔར་གསར་རྙེད་བྱུང་བའི་བརྐོས་རིས་ཚང་མ་ཕྱོགས་བསྡོམས་རགས་རིམ་ཙམ་བྱས་ན་ཕལ་ཆེར་རིགས་གསུམ་ཙམ་ལ་འདུ་བར་འདོད་དེ། དང་པོ་ནི་སྲོག་ཆགས་ཀྱི་རིགས་ཡིན། གཉིས་པ་ནི་འགྲོ་བ་མིའི་རིགས་ཀྱི་གཟུགས་དབྱིབས་སྣ་ཚོགས། གསུམ་པ་རྩི་ཤིང་གི་རིགས། བཞི་བ་ནི་གནའ་བོའི་ཆོས་ལུགས་སོགས་ཀྱི་དོན་སྙིང་ལྡན་པའི་མཚོན་བྱེད་རི་མོ་སྣ་ཚོགས་པ།













རིག་དངོས་རྟོགས་དཔྱོད་ཀྱི་རིན་ཐང་།
རྫོང་མགོའི་བྲག་བརྐོས་རི་མོ་གསར་དུ་རྙེད་པ་དེས་མདོ་དབུས་མཐོ་སྒང་གི་གནའ་བོའི་བྲག་བརྐོས་རི་མོའི་ཁྱབ་ཁོངས་རྒྱ་བསྐྱེད་པ་དང་། གནའ་བོའི་བོད་པའི་རིག་གནས་ཀྱི་འཚོལ་ཞིབ་དང་ཤུལ་རྫས་གསོག་འཇོག་ཐད་ལ་རིན་ཐང་ཆེན་པོ་ལྡན་པར་མ་ཟད། གདོད་མའི་དད་མོས་དང་ཐོན་སྐྱེད་འཚོ་བའི་གནས་སྟངས་སོགས་ཀྱི་ཞིབ་འཇུག་ལ་རིན་ཐང་བྲལ་བའི་རྒྱུ་ཆ་མཁོ་སྤྲོད་བྱས་པ་རེད། དེ་བས་རྫོང་མགོའི་བྲག་བརྐོས་རི་མོར་ཁྱད་ཆོས་འདི་དག་ལྡན་པར་འདོད་དེ།གཅིག་ནས་རྙེད་སའི་ས་ཁུལ་ལ་ཁྱད་ཆོས་ལྡན་པ་སྟེ། རྫོང་མགོའི་བྲག་བརྐོས་རི་མོ་ཐོན་ཡུལ་ནི་དེ་སྔོན་གནའ་བོའི་བྲག་བརྐོས་རི་མོ་ཐོན་མ་མྱོང་པའི་ས་ཁུལ་གྱི་གྲས་སུ་གཏོགས་པ་སྟེ། དེ་སྔོན་མཚོ་སྔོན་གྱི་ཡུལ་གྲུ་བཅུ་གསུམ་ཙམ་ནས་གནའ་བོའི་བྲག་བརྐོས་རི་མོ་རྙེད་པ་ཐམས་ཅད་མཚོ་སྔོན་པའི་མཐའ་འཁོར་གྱི་འབྲོག་ཁུལ་དུ་གཏོགས་པ་རེད། དཔེར་ན་མཚོ་སྔོན་པོའི་བྱང་རྒྱུད་ཀྱི་རྐང་ཚ་རྫོང་དང་། ཐེམ་ཆེན་རྫོང་། ནུབ་རྒྱུད་ཀྱི་དབུས་ལམ་རྫོང་དང་། དུར་ལམ་རྫོང་། ན་གོར་མོ་གྲོང་ཁྱེར། དེ་མིན་ལྷོ་རྒྱུད་ཀྱི་གུང་ཧོ་རྫོང་བཅས་འབྲོག་ཁུལ་དུ་གཏོགས་པའི་ས་བབ་མཐོ་བའི་རྩྭ་ཐང་ཆེན་པོ་དག་ལས་ཐོན་པ་མ་གཏོགས། རྨ་ཆུ་དང་འབྲི་ཆུའི་འགྲམ་རྒྱུད་ཀྱི་ས་བབ་ཅུང་དམའ་བའི་གཞུང་ཁུག་དང་ལུང་རྒྱུད་དག་ནས་རྙེད་མ་མྱོང་པས། ཐོན་ཡུལ་གྱི་ཆ་ནས་གཞན་ལས་ཁྱད་དུ་འཕགས་པ་རེད།
གཉིས་ནས་རི་མོའི་གཟུགས་བརྙན་ཕུན་སུམ་ཚོགས་པ་སྟེ། རི་དྭགས་དང་གཅན་གཟན་གྱི་རིགས་ཡོད་པར་མ་ཟད། ཆུ་ལ་གནས་པའི་ས་འབྲུག་སོགས་ཀྱི་གཟུགས་བརྙན་ཡང་མཐོང་ཐུབ་ལ། དེ་མིན་མིའི་གཟུགས་དབྱིབས་ལ་མཚོན་ན་ཡང་སྐྱ་མི་དང་རྔོན་པ། ཆོ་ག་པ་སོགས་ཀྱི་སྣང་བརྙན་སྣ་ཚོགས་ཡོད། གཞན་ཡང་ཉི་ཟླ་དང་གཡུང་དྲུང་། སྡོང་བོའི་ཡལ་ག འཁོར་ལོ། འཕང་ཤིང་སོགས་གནའ་བོའི་ཤེས་རིག་གི་མཚོན་བྱེད་དུ་གྱུར་པའི་རི་མོའང་སྣ་ཚོགས་ཡོད་པས། བྲག་བརྐོས་རི་མོའི་རྣམ་གྲངས་ཧ་ཅང་ཕུན་སུམ་ཚོགས་པ་རེད།
གསུམ་ནས་ཁྱབ་ཚུལ་ཁྱད་པར་བ་ཡིན་པ་སྟེ། ལུང་གཞུང་གཅིག་གི་ནང་ཁུལ་གྱི་ལེའུ་བཅུ་ཙམ་གྱི་ནང་རོལ་དུ་བྲག་བརྐོས་རི་མོ་རྣམས་གནས་དྲུག་ཙམ་གྱི་ཐང་ཁུག་ལ་བྱུར་བུར་སྤུངས་ནས་ཡོད་པ་རེད།
བཞི་ནས་བརྐོས་གཟུགས་རེ་རེ་བཞིན་རྡོ་ཕ་བོང་ཁེར་རྐྱང་གི་ངོས་སུ་བཀྲ་བ་དང་། དེ་ཡང་རྐོ་ཡུལ་གྱི་རྡོ་བ་ལ་ཆེ་ཆུང་གི་ཁྱད་པར་མེད་ཅིང་། ཆེ་བ་ཕ་བོང་གི་ངོས་དང་ཆུང་བ་སྲིད་ཞེང་ལ་ཁྲི་གང་ལས་ལྷག་པ་ཙམ་གྱི་རྡོ་ངོས་སུའང་རི་མོ་བརྐོས་ཡོད་པས། སྐབས་དེའི་མི་རྣས་ཀྱིས་རང་གིས་མཐོང་ཚད་ཀྱི་རྡོ་ངོས་སུ་རི་མོ་བརྐོ་བའི་སྲོལ་རྒྱུན་ཡོད་པ་ལྟ་བུའི་སྣང་བ་བཅོས་མིན་དུ་ཤར་འོངས།
མདོར་ན། རྫོང་མགོའི་གནའ་བོའི་བྲག་བརྐོས་རི་མོ་ནི་མདོ་དབུས་མཐོང་སྒང་གི་ཤར་མཐའི་རྨ་ཆུ་འབབ་ཡུལ་གྱི་ལུང་ཁུལ་ནས་གསར་དུ་རྙེད་པའི་བྲག་བརྐོས་རི་མོའི་སྐོར་ཚོམ་ཆེན་པོ་ཞིག་ཡིན་ལ། གནས་འདིའི་མཐོ་ཚད་ལ་མཚོ་ངོས་ལས་རྨི༢༦༠༠ཙམ་ལས་མེད་པས་ད་སྔ་རྙེད་པའི་མདོ་དབུས་མཐོ་སྒང་གི་གནའ་བོའི་བྲག་བརྐོས་རི་མོའི་ཁྲོད་ནས་ཐོན་ཡུལ་ཆེས་དམའ་བའི་གྲས་སུ་གཏོགས་ཤིང་། རི་མོའི་ཁྱབ་ཡུལ་གྱི་ཆ་ནས་གཟུགས་དབྱིབས་སྣ་ཚོགས་རྡོ་ང་ཁེར་རྐྱང་གི་ངོས་སུ་སྤྱི་འདུས་ཀྱིས་སྤུངས་ནས་ཡོད་པ་སོགས་ཀྱི་ཁྱད་ཆོས་མངོན་པར་གསལ་བ་ཞིག་ཡིན་ནོ།།
མཚོ་ལྷོ་ཁུལ་རིག་གནས་ཁང་གིས་མཁོ་འདོན་བྱས།
འབྲེལ་ཡོད་འོས་སྦྱོར།
-
暂无相关信息roking
འབྲེལ་གཏུག་ཁ་པར།:0974-8512858
འཕྲིན་སྐུར་ཡིག་ཟམ།:amdotibet@163.com
ཚ་ཤོས།
བརྗེ་སྒྱུར།
བརྙན་རིས།
འོས་སྦྱོར།
བརྗེ་སྒྱུར།
པར་རིས་ལོངས་སྤྱོད།