མི་བསྲུན་པ་ལ་ཆད་པ་ཡིས།།ཇི་ལྟར་གཅོད་པར་བྱ་ཞེ་ན།།ཡང་དག་དུས་བབ་དོན་ལྡན་དང་།།འཇལ་ཞིང་བྱམས་པ་ལྔ་ལྡན་པའི།།མི་ཡི་བདག་པོས་ཆད་པ་གཅོད།།...

བག་ཡོད་ཅེས་པ་གང་ཞེ་ན།།མི་དབང་དེས་ནི་འདི་སྙམ་དུ།།ལོངས་སྤྱོད་མི་རྟག་སྤྲིན་ལྟར་གཡོ།།བདག་ཀྱང་འཆི་བར་འགྱུར་སྙམ་དུ།།དྲན་པ་ཉེ་བར་བཞག་ནས་སུ།།འདོད་པའི་ཉེས་དམིགས་ཤེས་བྱེད་ཅིང་།།ངེས་འབྱུང་བཙལ་བའི་ཚུལ་གྱིས་ནི།།ལོངས་སྤྱོད་དག་ལ་སྤྱོད་བྱེད་ཅིང་།།དབང་ཕྱུག་དམ་པས་དབང་བགྱིད་དོ།།...

སྐྱེ་རྒུ་སྐྱོང་བར་བྱེད་པ་ཡི།།བསྟན་བཅོས་དེ་ཡང་གང་ཞེ་ན།།མི་རིགས་པ་ཡི་ཆགས་པ་དང་།།སྡང་དང་རྨོངས་པའི་གཉེན་པོ་རུ།།མ་ཆགས་མ་སྡང་རྨོངས་མེད་དེ།།གཉེན་པོ་གསུམ་གྱི་རང་བཞིན་དང་།།རབ་དབྱེ་ཕན་ཡོན་གསུམ་དུ་སྟོན།...

མི་རིགས་གསུམ་ཞེས་གང་ཞེ་ན།།མི་དགེ་བཅུ་ལ་མངོན་དགའ་བ།།ཆོས་མིན་གྱི་ནི་ཆགས་པ་ཡིན།།རང་གི་འབྱོར་པས་ཆོག་མི་ཤེས།།མི་རིགས་པ་ཡི་འདོད་ཆེན་ཉིད།།ལོག་པའི་བསྟན་བཅོས་ལ་བསྟེན་པ།།...

རྒྱལ་པོ་རྣམས་ནི་ཅི་ཞིག་ལ།།གནས་ནས་སྐྱེ་རྒུ་སྐྱོང་ཞེ་ན།།འཁོར་ལོས་སྒྱུར་བ་མ་གཏོགས་གཞན།།བསྟན་བཅོས་ལ་ནི་གནས་ནས་སུ།།སྐྱེ་རྒུ་སྐྱོང་བར་བྱེད་པ་སྟེ།།ཅི་ཡི་ཕྱིར་ན་འཇིག་རྟེན་དུ།།འཁོར་ལོས་སྒྱུར་བ་བྱུང་བའི་ཚེ།།མི་རིགས་པ་གསུམ་མེད་ཕྱིར་རོ།།...

དེ་ལས་གཞན་པའི་རྒྱལ་པོ་རྣམས།།རང་གི་རིགས་ལ་དབང་བའམ།།བསོད་ནམས་སྟོབས་ཀྱིས་གང་ཐོབ་པའི།།མངའ་ཡུལ་དེ་ལ་དབང་སྒྱུར་རོ།།...

འཁོར་སྒྱུར་དེ་ཡིས་དེ་ཀུན་ལ།།རང་རང་མངའ་རིས་གཏོགས་པ་རྣམས།།ཆོས་དང་མཐུན་སྐྱོང་མི་མཐུན་མིན།།ཆོས་མིན་སྤྱོད་ལ་མ་དགའ་བར།།འཁོར་ཀུན་སྙོམས་པར་སྐྱོང་གྱིས་དང་།།ཁྱོད་ཀྱང་བདག་གི་ཞབས་འབྲིང་དུ།།འགྱུར་ཞེས་གནང་བ་སྦྱིན་པར་བྱེད།།...

གང་ཞིག་གླིང་བཞིར་གནས་པ་ཡི།།རྒྱལ་པོ་རྒྱལ་ཕྲན་ཇི་སྙེད་པས།།འཁོར་ལོས་སྒྱུར་བའི་རྒྱལ་པོ་དེར།།བདག་གནས་འབྱོར་པ་དང་ལྡན་པ།།...

ས་རྣམས་མཐའ་དག་ཀུན་ནས་སུ།།རང་གི་རིས་སུ་ཕབ་འགྱུར་ཏེ།།ཇི་ལྟར་ཞེ་ན་ཕྱིར་རྒོལ་བས།།གནོད་མེད་སྡོ་བ་མེད་པར་ནི།།ནན་གྱིས་བགྱི་བས་འཚེ་བ་མེད།།མཚོན་གྱིས་འཚེ་དང་ཆད་པ་ཡིས།།མནར་བ་དག་ནི་མེད་བཞིན་དུ།།མི་རིགས་གསུམ་སྤང་ཆོས་མཐུན་གྱིས།ཕྱོགས་སུ་མ་ལྷུང་སྙོམས་པས་སོ།།...

ཕྱོགས་ལས་རྒྱལ་བྱེད་འཁོར་ལོ་དང་།།བཞོན་མཆོག་ངོ་མཚར་གླང་པོ་ཆེ།།རྩེ་དགའི་མཆོག་གྱུར་བཙུན་མོ་དང་།།སྣང་བྱེད་ཡོ་བྱད་མཆོག་ནོར་བུ།།ལོངས་སྤྱོད་མཆོག་ལྡན་ཁྱིམ་བདག་དང་།།དཔའ་མཛངས་བདེ་བྱེད་བློན་པོ་མཆོག།ཤུལ་ལམ་བདེར་བགྲོད་རྟ་མཆོག་སྟེ།།རིན་ཆེན་སྣ་བདུན་དག་དང་ལྡན།།...

མི་ལྕོགས་པ་ཡི་བྱ་བ་ལ།།གཞན་གྱིས་རྦད་ཀྱང་བསྒྲུབ་མི་བྱ།།དགེའོ་དགེའོ་ཞེས་སྨྲས་པས།།མེ་ཡི་ནང་དུ་སུ་ཞིག་མཆོང་།།...

གཉིས་པ་དེ་རྣམས་མ་གཏོགས་གཞན།།སྐྱོང་ལ་སྐྱེ་རྒུའི་བདག་ཅེས་བྱ།།འདི་ལ་འཁོར་ལོས་སྒྱུར་བ་དང་།།རྒྱལ་པོ་ཆེ་དང་ཁམས་ཀྱི་རྒྱལ།།རྒྱལ་ཕྲན་བཞི་ལས་འཁོར་སྒྱུར་ནི།།...

ལོངས་སྤྱོད་དག་གིས་མི་ཕོངས་ལ།།ཕན་ཚུན་འཚེ་དང་རྩོད་པ་མེད།།གཞན་ཡང་བསྐལ་བཟང་དུས་ཀྱི་མི།།ཕ་མ་བཀུར་ཞིང་དགེ་ཆོས་སྤྱོད།།རྒྱལ་པོར་གདགས་པ་མེད་ན་ཡང་།།རང་རང་ལས་ཀྱིས་བདེ་བར་སྐྱོང་།།...

སྐྱོང་ཚུལ་རང་རང་ལས་དང་ནི།།སྐྱེ་རྒུའི་བདག་པོས་སྐྱོང་བ་གཉིས།།དང་པོ་སྒྲ་མི་སྙན་པ་དང་།།བསྐལ་པ་དང་པོའི་མི་རྣམས་བཞིན།།...

སྐྱེ་རྒུ་ཞེས་ནི་བྱ་བ་ཡང་།།ཕུང་པོ་ལྔ་སྟེ་འདི་ལ་གཉིས།།སྐྱེ་བ་བཞིས་བསྡུས་སེམས་ཅན་དང་།།འབྱུང་ལྔས་བསྡུས་པ་སྣོད་ཀྱི་ཁམས།།...

མི་ཡི་བདག་པོས་འཁོར་རྣམས་ལེགས་བསྐྱང་ཤིང་།།འཁོར་གྱི་སྐྱེ་རྒུས་རྗེ་ལ་མངོན་མཆོད་པ།།དེ་དང་ལྷན་ཅིག་བདེ་དང་སྐྱིད་པ་ཡིས།།རྒྱལ་ཁམས་ཕྱུར་བུར་གང་བ་བཞིན་དུ་འགྱུར།།...

རྒྱལ་པོ་གཅིག་པུས་ས་རྣམས་མཐའ་དག་གི།སྐྱེ་རྒུའི་ལེགས་ཉེས་གཏན་ལ་དབབ་པར་དཀའ།།འཁོར་ཚོགས་བཟང་པོ་འཁོར་དུ་བསྡུས་བྱས་ནས།།འཁོར་གྱི་དཀྱིལ་འཁོར་ཀུན་ཏུ་དགེ་བར་འགྱུར།།...

འཁོར་བཟང་དག་དང་ངེས་པར་ལྡན་གྱུར་ན།།དམན་པའི་མི་ཡང་རྒྱལ་རིགས་ཆེ་དང་མཉམ།།རྒྱལ་པོ་བཟང་ཞིང་འཁོར་ཡང་བཟང་གྱུར་ན།།ཡངས་པའི་ས་ཆེན་དཔུང་བས་འཛིན་པར་ནུས།།...

དེ་ལྟར་རྒྱལ་རིགས་བསོད་ནམས་ལྡན་པ་ཡིས།།བློ་གྲོས་སྟོབས་ཀྱིས་སྐྱེ་བོ་ལེགས་བརྟགས་ནས།།ཡོན་ཏན་ལྡན་པའི་འཁོར་གྱིས་ལེགས་མཛེས་པ།།སཱ་ལའི་ཤིང་ཆེན་བཞིན་དུ་མངོན་པར་མཐོ།།...

འཁོར་དང་བཅས་ཏེ་རྒྱུད་དག་པ།།བཟང་པོའི་གསེར་དང་མཚུངས་རྣམས་ཀྱིས།།སྐྱེ་རྒུ་སྐྱོང་བའི་ཐབས་བསྟན་པའི།།ལུགས་ཀྱི་བསྟན་བཅོས་བརྟག་པར་བྱ།།...

རང་དོན་སྣ་ཚོགས་ཞུ་སྦྱོར་གྱིས།།རྒྱལ་པོ་གནས་མིན་སྦྱོར་བྱེད་པ།།དེ་འདྲ་ཁྲེལ་མེད་ཡིན་པའི་ཕྱིར།།རྒྱལ་པོས་ཤེས་ན་དོར་བར་བྱ།།...

གང་ལ་རྒྱལ་པོ་ཐུགས་བརྩེ་ན།།དེ་ཡིས་རྒྱལ་པོ་དེ་ཉིད་ལ།།གང་ཕན་འབའ་ཞིག་བསྒྲུབ་བྱ་སྟེ།།​​​​​​​བདག་ལ་ཐུགས་ནི་བརྩེའོ་ཞེས།།...

བླ་མ་ཤིན་ཏུ་གཉན་པའི་ཕྱིར།།བཀའ་ལས་བཟློག་པར་མི་རིགས་པས།།ཞུ་བ་མང་ན་རྒྱལ་པོས་ཀྱང་།།བགྱི་བར་དཀའ་བ་དག་ཏུ་འགྱུར།།...

སྲོག་ལ་བབ་པའི་ཆད་ལས་སོགས།།ལུགས་དང་མི་འགལ་འགའ་ཞིག་ལས།།འཇིག་རྟེན་ཁྲིམས་ཀྱི་བྱ་བ་ལ།།ངོ་ཆེན་བླ་མས་གསུང་མི་བྱ།།...

རྒྱལ་པོས་བླ་མར་བཟུང་རྣམས་ཀྱིས།།རྒྱལ་པོ་དེ་ཉིད་ཚེ་འདི་དང་།།ཁྱད་པར་འཇིག་རྟེན་གཞན་དག་ཏུ།།བདེ་བའི་ཐབས་ལ་ཡང་དག་བསམ།།...