ཆུ་མོ་ཡོས་ལོའི་མཚོ་ལྷོ་ཁུལ་གྱི་ལོ་གསར་རིག་རྩལ་དགོང་ཚོགས།

       བགྲེས་པར་གྱུར་པའི་ལོ་རྒན་ཞིག་ཕར་ལ་བསྐྱལ་ཏེ་རེ་སྨོན་གྱིས་ཁེངས་པའི་ཆུ་མོ་ཡོས་ཀྱི་གནམ་ལོ་གསར་བ་འཁྲིས་སུ་གསོལ་བའི་དུས་འདིར། དྭངས་གཙང་གི་སྨོན་པ་ལ་བཀྲ་ཤིས་པའི་ཁ་གཡང་གིས་བརྒྱན་ཅིང་། ལྷད་མེད་ཀྱི་འཛུམ་ཆུང་ལ་ཉམས་འགྱུར་གྱི་སྟངས་སྟབས་ཀྱིས་སྡེབ་སྟེ། གསེར་ཞུན་གྱི་ཡུལ་ལྗོངས་ཀུན་ཏུ་མིག་དབང་གསོ་བའི་ལྟད་མོ་གྱ་ནོམ་པ་ཞིག་ང་ཚོའི་བསམ་པའི་འཚོ་བའི་རྒྱགས་ཕྱེ་རུ་གནང་གྲབས་ཡོད་པ་ལགས་ན། འདིར་ཀྲུང་གུང་མཚོ་ལྷོ་ཁུལ་ཨུའི་དྲིལ་སྒྲོག་པུའུ་དང་མཚོ་ལྷོ་བོད་རིགས་རང་སྐྱོང་ཁུལ་རིག་གནས་ལུས་རྩལ་ཡུལ་སྐོར་རྒྱང་སྒྲོག་བརྙན་འཕྲིན་ཅུའུ་ཡིས་གཙོ་སྒྲུབ་བྱས་པ་དང་། མཚོ་སྔོན་ཞིང་ཆེན་གེ་སར་ཟློས་གར་ཚོགས་པ་དང་མཚོ་ལྷོ་བོད་རིགས་རང་སྐྱོང་ཁུལ་མི་རིགས་ཟློ་གར་ཚོགས་པས་འགན་སྒྲུབ་གནང་ཞིང་། མཚོ་ལྷོ་བོད་རིགས་རང་སྐྱོང་ཁུལ་བརྙན་འཕྲིན་ཁང་གིས་རོགས་སྒྲུབ་བྱས་པའི་ཆུ་མོ་ཡོས་ལོའི་ལོ་གསར་རིག་རྩལ་དགོང་ཚོགས«འབྱོར་ཕྱུག་གི་ཨ་མདོ»ཞེས་པ་དེ་སྤྱི་ཟླ1པོའི་ཚེས13ཉིན་གྱི་དགོང་མོའི་དུས་ཚོད19：30སྟེང་ཁུལ་རིག་གནས་སྨྱན་སྦྱོར་ལྟེ་གནས་ཀྱི་འཁྲབ་སྟོན་ཚོམས་ཆེན་དུ་ཀུན་གྱི་སྤྱན་ལམ་དུ་འབུལ་རྒྱུ་རེད།