༄༅།།བོད་སྐད་ཀྱི་མུ་འབྲེལ་བརྙན་ཐུང《སྨན་བླའི་མཐོང་སྣེ》ཞེས་པ་ཕབ་སྐྲུན་བྱེད་མགོ་བརྩམས།

སྤྱི་ཚོགས་གོང་ནས་གོང་དུ་འཕེལ་བཞིན་པའི་དེང་གི་དུས་འདིར། མི་རྣམས་ཀྱི་འཚོ་བའི་ལོངས་སྤྱོད་ཕུན་སུམ་ཚོགས་པོ་རེད། ཡིན་ནའང་མི་ལ་ཤས་ཤིག་གི་སྤྱི་ཚོགས་ཀྱི་རིན་ཐང་འདུ་ཤེས་དང་ཀུན་སྤྱོད་ཐད་མི་ལེགས་པའི་སྣང་ཚུལ་དེ་དག་ལ་དམིགས་ནས་མཚོ་ལྷོ་རྒྱང་སྒྲོག་བརྙན་འཕྲིན་ཁང་གིས་ཆེད་དུ་རྒན་གཅེས་གཞོན་བཀུར་དང་། ཁོར་ཡུག་སྲུང་སྐྱོང་། སྤྱི་ཚོགས་ཡིད་རྟོན། ཁྲིམས་ལུགས་བརྩི་སྲུང་། དྲ་རྒྱའི་བདེ་འཇགས་སོགས་ནང་དོན་འདུས་པའི་བོད་སྐད་ཀྱི་མུ་འབྲེལ་བརྙན་ཐུང་《སྨན་བླའི་མཐོང་སྣེ》ཞེས་པ་ཇུས་འགོད་ཕབ་སྐྲུན་བྱེད་བཞིན་ཡོད། བརྙན་ཐུང་འདི་ཟླ7པའི་ཚེས23ཉིན། མཚོ་སྔོན་པོའི་འགྲམ་དུ་ཕབ་སྐྲུན་བྱེད་མགོ་བརྩམས་ཤིང་། རྒྱལ་ཁབ་ཀྱི་རིམ་པ་གཉིས་པའི་འཁྲབ་གཞུང་རྩོམ་པ་པོ་སྨན་བླ་སྐྱབས་དང་། རྒྱལ་ཁབ་ཀྱི་རིམ་པ་གཉིས་པའི་འཁྲབ་སྟོན་པ་གནམ་ལྷ་འབུམ་གཉིས་ཆེད་དུ་གདན་འདྲེན་བྱས་ནས་སྤྱི་ཕན་བརྙན་ཐུང་འདི་ཕབ་སྐྲུན་བྱེད་བཞིན་ཡོད། མུ་འབྲེལ་བརྙན་ཐུང་འདིར་བསྡོམས་པའི་ལེའུ་བཅུ་ཡོད་པ་དང་། ཟླ9བའི་ཟླ་དཀྱིལ་དུ་མཚོ་ལྷོ་ཁུལ་རྒྱང་སྒྲོག་བརྙན་འཕྲིན་ཁང་དང་། མཚོ་ལྷོ་ཁུལ་དྲ་ལམ་རྒྱང་སྒྲོག་བརྙན་འཕྲིན་ཁང་ནས་དུས་མཉམ་དུ་གཏོང་རྒྱུ་ཡིན།