ཨ་མདོའི་ཟློས་གར་ཆེན་མོ«གྱིམ་ཤིང་ཀོང་ཇོ»ཟི་ལིང་དུ་ཐོག་མའི་འཁྲབ་སྟོན་བྱས་པ།

       རྒྱལ་ཁབ་སྒྱུ་རྩལ་ཐེབས་རྩའི2022ལོའི་གར་སྟེགས་སྒྱུ་རྩལ་གསར་རྩོམ་གྱི་རོགས་སྐྱོར་རྣམ་གྲངས་ཏེ་ཨ་མདོའི་ཟློས་གར་ཆེན་མོ«གྱིམ་ཤིང་ཀོང་ཇོ»ཟླ5པའི་ཚེས24ཉིན་ཟི་ལིང་དུ་ཐོག་མའི་འཁྲབ་སྟོན་བྱས། ཟློས་གར་འདིའི་ནང་གྱིམ་ཤིང་ཀོང་ཇོ་བོད་ལ་བག་མར་ཕེབས་ཚུལ་ལོ་རྒྱུས་རྒྱབ་ལྗོངས་སུ་བྱས་ཏེ། གྱིམ་ཤིང་ཀོང་ཇོ་བོད་ལ་མ་ཕེབས་གོང་སྤྱི་ཡོངས་བསམས་ཤིང་དཀའ་བ་ཁྱད་དུ་བསད། འགལ་བ་སྣ་ཚོགས་ཡོངས་སུ་བསལ་ཏེ་བོད་ཐང་མཛའ་བརྩེ་ཇེ་ཟབ་དང་མི་རིགས་མཐུན་སྒྲིལ་ལ་སྐུལ་འདེད་བཏང་བས། མི་དམངས་མང་ཚོགས་ཀྱི་དགའ་གུས་ཐོབ་པའི་གཏམ་རྒྱུད་བརྗོད་ཡོད་པ་རེད།

       ཟློས་གར་འདི་ནི་མཚོ་སྔོན་ཞིང་ཆེན་བོད་ཀྱི་ཟློས་གར་ཚོགས་པས་དུས་ཡུན་ལོ3གྱི་དུས་ཚོད་སྤྱད་དེ་གསར་རྩོམ་དང་འཁྲབ་སྦྱོང་བྱས་ཤིང་། མཚོ་སྔོན་ཞིང་ཆེན་བོད་ཀྱི་ཟློས་གར་ཚོགས་པའི་ཚོགས་གཙོའམ་རྒྱལ་ཁབ་རིམ་པའི་གཟུགས་མེད་རིག་གནས་ཤུལ་བཞག་རྣམ་གྲངས་ལས་ཨ་མདོའི་ཟློས་གར(རྨ་ལྷོའི་ཟློས་གར)གྱི་ཚབ་མཚོན་རྒྱུན་འཛིན་པ་ཨ་ལོ་རིན་ཆེན་རྒྱལ་པོས་འཁྲབ་གཞུང་གསར་རྩོམ་དང་སྤྱི་ཁྱབ་འཁྲབ་ཁྲིད་པའི་འགན་བཞེས་པ་རེད། ཨ་ལོ་རིན་ཆེན་རྒྱལ་པོས་བཤད་རྒྱུར“ཟློས་གར་ནང་གི་དབྱངས་རྟ་དང་། རོལ་དབྱངས། གྱོན་ཆས། གར་མཛེས་ཇུས་འགོད་སོགས་ལ་དུས་རབས་ཀྱི་ཁྱད་ཆོས་དང་མི་རིགས་ཀྱི་ཁྱད་ཆོས་མངོན་པར་ལྡན། ང་ཚོས་ལོ་རྒྱུས་དོན་ཆེན་ཇི་ལྟ་བ་མཚོན་པར་གང་ནུས་ཀྱིས་འབད་དེ། རིག་གནས་དང་། སྒྱུ་རྩལ། ལོ་རྒྱུས་བཅས་གཞི་གཅིག་ཏུ་འདུས་པའི་ཟློས་གར་ཆེན་མོ་ཞིག་ལྟད་མོ་བ་རྣམས་ལ་གཟིགས་མོར་ཕུལ་ཡོད”ཟེར།

       ཟློས་གར་འདིས་གྱིམ་ཤིང་ཀོང་ཇོའི་དུས་ཟིང་སྐབས་ཀྱི་བྱིས་དུས་དང་བོད་ལ་བསྐྱོད་ཚུལ། གཉེན་འབྲེལ་བཙུགས་པ། མཐུན་འབྲེལ་ལ་བསྐུལ་བ། ཤེས་རིག་བརྒྱུད་སྒྲོག བུ་ཤོར་རིམས་ཕོག་སོགས་མི་ཚེའི་མྱོང་བརྒྱུད་གལ་ཆེན་གཙོ་སྣེར་བཟུང་སྟེ། གྱིམ་ཤིང་ཀོང་ཇོའི་སྣང་བརྙན་ཁྱད་གཤིས་ལྡན་པ་བཞེངས་ཤིང་། ཁོ་མོའི་ཐུན་མོང་མ་ཡིན་པའི་མི་ཚེ་དང་ལས་དབང་མངོན་པ་བརྒྱུད་སྣ་མང་བརྗེ་རེས་ཀྱི་བོད་ཐང་འབྲེལ་བའི་གཏམ་རྒྱུད་སྙན་མོ་ཞིག་བརྗོད་ཡོད།

       མཚོ་སྔོན་ཞིང་ཆེན་བོད་ཀྱི་ཟློས་གར་ཚོགས་པའི་ཚོགས་གཙོ་གཞོན་པ་བཙུན་ཐར་སྐྱིད་ཀྱིས། “«གྱིམ་ཤིང་ཀོང་ཇོའི»འཁྲབ་སྟོན་གྱིས་ལྟད་མོ་བ་རྣམས་ལ་དུས་རབས་མི་འདྲ་བ་དང་ཁྱད་ཆོས་མི་འདྲ་བའི་ཨ་མདོའི་ཟློས་གར་གྱི་ཉམས་འགྱུར་དང་སྒྱུ་རྩལ་གྱི་འགུག་ཤུགས་ཉམས་སུ་མྱོང་བ་དང་ཆབས་ཅིག ཨ་མདོའི་ཟློས་གར་གྱི་སྲུང་སྐྱོང་དང་རྒྱུན་འཛིན་སྐོར་ལ་སྐུལ་འདེད་བྱེད་འདོད་ཀྱི་སེམས་ཤུགས་སྩོལ་ཐུབ་པའི་རེ་བ་ཡོད”ཅེས་ཟེར།