རྒྱལ་སྲས་ཐོགས་མེད་བཟང་པོས་ནད་ལ་སོགས་པ་ལམ་དུ་འཁྱེར་ཚུལ།

རྒྱལ་སྲས་ཐོགས་མེད་བཟང་པོ།

          བདག་གཞན་སྒྱུ་ལུས་ཀྱི་ཕུང་པོ་འདི། ། ན་ན་ན་སྟེ་ན་བས་དགའ། ། སྔར་བསགས་ཀྱི་ལས་ངན་འཛད་པ་ཡིན། ། ཆོས་སྤྱོད་ཀྱི་བྱ་བ་སྣ་ཚོགས་ཀྱང་། ། སྒྲིབ་གཉིས་སྦྱོང་བའི་ཆེད་དུ་ཡིན། ། ན་བ་མེད་ན་མེད་དེ་དགའ། ། ལུས་སེམས་བདེ་ན་དགེ་སྦྱོར་འཕེལ། ། མི་ལུས་དོན་ཅན་བྱེད་པ་ཡང༌།། སྒོ་གསུམ་དགེ་ལ་སྦྱོར་བ་ཡིན། ། འབྱོར་བ་མེད་ན་མེད་དེ་དགའ། ། བསྲུང་བྲལ་གྱི་བྱ་བྲེལ་དེ་ལ་མེད། ། འཐབ་རྩོད་ཀྱི་ཁྲོ་འཁྲུགས་ཇི་སྙེད་པ། ། འཛིན་ཆགས་ཀྱི་ནོར་ལས་འབྱུང་བར་ངེས། ། འབྱོར་པ་ཡོད་ན་ཡོད་དེ་དགའ། ། བསོད་ནམས་ཀྱི་དགེ་ཚོགས་སྤེལ་བས་ཆོག ། འཕྲལ་ཕུགས་ཀྱི་ཕན་བདེ་ཇི་སྙེད་པ། ། བསོད་ནམས་ཀྱི་འབྲས་བུ་ཡིན་པར་ངེས། ། མྱུར་དུ་ཤི་ན་ཤི་བས་དགའ། ། རྐྱེན་ངན་གྱིས་བར་དུ་མ་ཆོད་ཅིང༌། ། མཚམས་སྦྱོར་གྱི་བག་ཆགས་བཟང་འགྲོགས་པས། ། མ་ནོར་གྱི་ལམ་དུ་ཚུད་པར་ངེས། ། ཡུན་དུ་གསོན་ན་གསོན་པས་དགའ། ། ཉམས་མྱོང་གི་ལོ་ཐོག་སྐྱེས་པ་ལ། ། གདམས་ངག་གི་རླན་དྲོད་མ་ཡལ་བར། ། ཡུན་དུ་བསྟེན་པས་སྨིན་པར་འགྱུར། ། གང་ཡིན་ཡང་དགའ་བ་སྒོམས་ཤིག་ཨང་། །

ཞེས་པ་ས་སྐྱ་དགེ་བཤེས་ཤིག་གིས་ནད་ལ་སོགས་པ་བྱུང་ན་ཇི་ལྟར་བྱེད་དྲིས་པའི་ལན་དུ་ནད་ལ་སོགས་པ་ལམ་དུ་འཁྱེར་བའི་ཚུལ་འདི། ཆོས་སྨྲ་བའི་བཙུན་པ་ཐོགས་མེད་ཀྱིས་བཀོད་པའོ།།