བོད་ལུགས་གསོ་རིག་གི་ཟས་སྤྱོད་གཙོ་བོར་བྱེད་པའི་ལུས་ཁམས་བདེ་སྲུང་ཤེས་བྱ།

　　ནད་ལ་གསོ་བར་བྱེད་པའི་གཉེན་པོ་ཡི། །བྱ་བ་སྤྱོད་ལམ་གནས་ལ་བསླབ་བྱ་ན།  །རྒྱུན་སྤྱོད་དུས་སྤྱོད་གནས་སྐབས་སྤྱོད་ལམ་གསུམ། །དེ་ལ་ཉིན་རེ་རྒྱུན་དུ་སྤྱོད་པའི་ལས།  །ཚེ་རྐྱང་འཇིག་རྟེན་པ་དང་དམ་པའི་འོ། །
　　དང་པོ་ཚེ་རྐྱང་པ་ཡི་སྤྱོད་ལམ་ནི།  །རྟག་ཏུ་བདེ་གནས་འདོད་ཅིང་ཚེ་བསྲིང་ཕྱིར། །སྨན་མཆོག་རིན་ཆེན་གྲུབ་པའི་གསང་ངག་བཅང་།  །ནད་སློང་རྐྱེན་གཉིས་དྲན་པའི་རྟག་ཏུ་སྤང་།  །ལུས་ངག་ཡིད་ལས་ཉེས་སྤང་ཡང་དག་བསྟེན།  །ལྕེ་སོགས་དབང་པོ་མནར་དང་ཉམས་བདེར་མིན།  །ཐེ་ཚོམ་གྲུ་འམ་མི་སུན་བཞོན་པ་དང་།  །གསོད་ས་ཆུ་ཆེན་མི་ཡི་ཕུང་པོ་དང་། །གད་སྟེང་ཤིང་རྩེར་དབྱར་དགུན་འཛེག་འགྲོ་སྤང་། །སྡོད་ན་ས་བརྟག་འགྲོ་ན་ལམ་བརྟག་ཅིང་། །མཚན་མོ་དོན་ཆེན་དབྱུག་ཐོགས་གྲོགས་ལྡན་བྱ། །མཚན་གཉིད་མ་ལོག་རྩུབ་པས་ཅི་བདེར་ལོག  །མ་ལོག་ནང་པར་སྨྱུང་བྱ་ཕྱེད་གཉིད་ལོག  །ར་རོ་སྟོབས་ཟད་མྱ་ངན་རྩོལ་བས་དུབ། །སྨྲ་མང་རྒས་དང་འཇིགས་པའི་མི་རྣམས་ལ།  །སོ་ག་རྩུབ་ཅིང་མཚན་མོ་ཐུང་བས་ན། །ལུས་ཀྱི་སྟོབས་འཕྲོག་རླུང་འཕེལ་འགྱུར་བའི་ཕྱིར། །ཉིན་པར་གཉིད་ལོག་སྣུམ་ལྕིར་འགྱུར་བས་ཕན།  །གཞན་དུ་ཉིན་གཉིད་བད་ཀན་སྐྱེད་ཅིང་སྐྲངས། །རྨོངས་བག་མགོ་ན་སྒྱིད་སྐྱུར་རིམས་འདེབས་འགྱུར།།གཉིད་འཕེལ་སྐྱུགས་དང་སྨྱུང་བྱ་བུད་མེད་བསྟེན། །གཉིད་ཡེར་འོ་མ་ཞོ་ཆང་ཤ་ཁུ་བཏུང་། །མགོ་བོ་བསྐུ་ཞིང་རྣ་བ་སྣུམ་གྱི་དགང་། །ཉལ་པོ་སྐྱེ་གནས་མི་མཐུན་འདག་པོ་ཅན། མི་སྡུག་སྦྲུལ་མ་ཤུགས་ཞན་ཉེན་པ་དང་། །ཟླ་མཚན་ལྡན་དུས་བཀན་བྱེད་འཁྲིག་པ་སྤང་། །དགུན་དུས་རོ་ཙས་དྲེགས་ཚེ་བཀག་པ་མེད། །སྟོན་དཔྱིད་ཞག་གཉིས་དབྱར་སོས་ཟླ་ཕྱེད་སྤྱད། །གཞན་དུ་བུད་མེད་ལ་ཞུགས་དབང་པོ་ཉམས།  །མགོ་འཁོར་དུས་མིན་འཆི་བར་བྱེད་པ་ཡིན།  །རྟགས་ཏུ་བསྐུ་བྱུག་སྤྱོད་བྱེད་རྒས་ངལ་རླུང་། །འཇོམས་བྱེད་མགོ་རྐང་རྣ་བ་ལ་བསྟེན་བྱ།  །ལུས་ཡང་ཚིལ་འབྲི་སྐབས་ཕྱེད་མེ་དྲོད་སྐྱེད།   །མཁྲེགས་དང་ལས་ནུས་ཡང་དག་རྩོལ་སྤྱད་འབྱུང་།   །ཐལ་དྲགས་ལོག་པས་དེ་ལས་མ་རུངས་འགྱུར།  །རྒས་བྱིས་རླུང་མཁྲིས་ནད་ཅན་དེ་སྤང་བྱ།   །སྟོབས་ལྡན་སྣུམ་ཟ་དགུན་དང་དཔྱིད་དུས་དང་།  །བད་ཀན་ཅན་གྱིས་རྩོལ་བཅག་བསྟེན་པར་བྱ།  །དྲིལ་ཕྱིས་བད་ཀན་སེལ་ཞིང་ཚིལ་འཇུ་བྱེད།   །ལྤགས་གསལ་ཡན་ལག་བརྟན་པར་བྱེད་པའི་མཆོག  །ཁྲུས་ནི་རོ་ཙ་དྲོད་སྟོབས་ཚེ་མདངས་སྐྱེད། །གཡའ་རྡུང་དྲི་ང་སྙོམ་སྐོམ་ལུས་ཚ་སེལ།  །ཆུ་དྲོན་མགོ་བཀྲུས་སྐྲ་མིག་སྟོབས་འཕྲོག་ཡིན།  །ཚད་འཁྲུ་ལྟོ་སྦོས་ཆམ་པ་མ་ཞུ་དང་།   །སྣ་མིག་ནད་ཅན་ཟོས་མ་ཐོག་ལ་སྤང་།  །མིག་ནི་མེ་ཡི་རང་བཞིན་བད་ཀན་འཇིག  །མཆི་མ་འཛག་ཕྱིར་མིག་སྨན་སྐྱེར་ཁཎཌ།  །རྟག་ཏུ་ཞག་བདུན་ལོན་ཚེ་ཉིན་རེ་བླུག   །གློ་བུར་ནད་ལྔའི་དགྲ་ལ་སྐྱེལ་མ་བསྟེན།  །རྟག་ཏུ་གཅིག་ལ་མ་ཡིན་ཀུན་སྙོམས་སྤྱད།  །དེ་ལྟར་བདག་ནི་ཉིན་མཚན་གནས་འགྲོ་ཞེས།  །རྟག་ཏུ་དྲན་པ་ཉེར་འཇོག་སྡུག་བསྔལ་བསྲིང་།  །འཇིག་རྟེན་མི་ཆོས་སྤྱོད་པ་ཡོན་ཏན་ཀུན་གྱི་གཞི།  །ཆད་དོན་བཙན་པར་བྱ་ཞིང་ཚིག་རྗེས་དོན་གྱིས་བསབ། །ངན་ལས་ཆད་ཀྱང་བཟློག་ཅིང་བཟང་ལས་བཤོལ་ཡང་བརྩམ།  །གཞིག་པ་སྔོན་ལ་བཏང་ཞིང་ཕྱིས་ཀྱི་ལེགས་འཕེན་བཅའ།  །ཟེར་དགུ་བདེན་པར་མི་བཟུང་ལེགས་པར་དཔྱད་ནས་བཟུང་།  །སྨྲ་དགུ་བསམ་ལ་སྨྲ་ཞིང་རང་གི་མདོ་དོན་བསྡམ།  །བུད་མེད་ངག་ལ་མི་ཉན་སྦད་ཁ་ལྕི་བར་བྱ།   །བྱམས་ལྟོས་མི་ལ་ཚིག་དྲོན་མི་གཞུག་ལྷུག་པར་སྨྲ།  །ཅམ་ལ་བརླིང་ཞིང་འཕྲལ་ལ་འགྲོགས་པ་བདེ་བར་བྱ།  །དགྲ་བོ་ཡོན་པར་མི་བཏང་འདམ་རིང་ཐབས་ཀྱིས་འདུལ།  །ཉེ་འཁོར་ཤ་ཚས་བསྐྱང་ཞིང་སྔར་དྲིན་མིག་རིང་བལྟ།  །སློབ་དཔོན་ཕ་ཁུ་ལ་སོགས་རྒན་རིགས་ཕུད་དུ་ཁུར།  །ཡུལ་མི་མཛའ་བཤེས་འགྲོགས་དགོས་རྣམས་དང་བློ་སེམས་བསྟུན།  །སོ་ནམ་ཞིབ་མོར་བྱ་ཞིང་དགོས་དུས་རྩིང་པོར་སྤྱད།  །མི་བདེན་འཕམ་ངོས་བླང་ཞིང་རྒྱལ་ན་ཚོད་ཟིན་བྱ།  །མཁས་ན་དྲེགས་པ་སྐྱུང་ཞིང་ཕྱུག་ན་ཆོག་ཤེས་བྱ།  །མི་བྲན་ཁྱད་དུ་མི་བསད་མཐོ་ལ་ཕྲག་དོག་སྤང་།  །མི་ངན་བསྟེན་རྫི་མི་བྱ་བན་བོན་དགྲར་མི་བསླང་།  །གཞན་གྱི་ནོར་ལ་མི་འབགས་ལ་ཡོགས་གནའ་ལ་འཛེམ།  །མི་འགྱོད་རྡོག་གཏད་བྱ་ཞིང་ངན་ལ་དབང་མི་བསྐུར།  །སེམས་ཀྱི་སེམས་དྲང་ངང་རིང་ཡངས་ཤིང་གཞི་བསྐྱེད་ལ།  །ལས་རྣམས་ཕལ་ཆེར་ཟླ་ཚོད་དུས་སུ་བླང་བ་གཅེས།  །དེ་འདྲ་གཅིག་པུར་སྐྱེས་ཀྱང་གཞན་ལ་དབང་མི་འཚོར།  །བྲན་གྱི་ལུས་ཀྱང་སྐྱེ་བོ་མང་པོའི་དཔོན་དུ་འགྱུར།  །དེ་ནས་དམ་པ་ལྷ་ཆོས་སྤྱད་པ་ནི།  །སེམས་ཅན་ཐམས་ཅད་བདེ་བ་འདོད་པའི་ཕྱིར།  །རྩོམ་པ་ཀུན་ལ་འཇུས་ཀྱང་ཆོས་མེད་ན།  །བདེ་ཉིད་སྡུག་བསྔལ་རྒྱུ་ཕྱིར་ཆོས་ལ་འབད།  །མོས་པས་བཤེས་བསྟེན་ཅིག་ཤོས་རིང་དུ་སྤང་།  །སྲོག་གཅོད་རྐུ་དང་ལོག་པར་གཡེམ་པ་དང་།   རྫུན་དང་ངག་འཁྱལ་ཚིག་རྩུབ་དང་དབྱེན་སྦྱོར་དང་།  །བརྣབས་སེམས་གནོད་སེམས་ལྟ་བ་ཕྱིན་ཅི་ལོག   །སྡིག་པའི་ལས་བཅུ་ལུས་ངག་ཡིད་ཀྱིས་སྤང་།  །མྱ་ངན་ནད་འཕོངས་སྡུག་ལ་ནུས་ཕན་གདགས།  །འབུ་སྲིན་སྲོག་ཀུན་རྟག་ཏུ་རང་འདྲར་བལྟ།  །བསླུ་མེད་དེས་པས་འཛུམ་ཞིང་དྲང་པོ་སྨྲ།  །གནོད་བརྩོན་དགྲ་ལའང་ཕན་གདགས་གཙོར་བྱས་ཏེ།  །བྱམས་པས་བྱང་ཆུབ་མཆོག་གི་སེམས་གཉིས་བསྐྱེད། །ལུས་ངག་ཡིད་དུལ་ཕོངས་སེམས་གཏོང་མེད་ལྡན།  །གཞན་གྱི་དོན་ལའང་རང་གི་འདྲར་སེམས་པ།   །དེ་དག་དམ་པའི་སྤྱོད་པ་མཐར་ཐུག་གོ  །ཞེས་གསུངས་སོ།  །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ཉིན་རེ་བཞིན་རྒྱུན་དུ་སྤྱོད་པའི་ལེའུ། 
　　 གཉིས་པ།   དུས་སུ་སྤྱོད་པའི་སྤྱོད་ལམ་ནི།   །དགུན་སྟོད་དགུན་སྨད་དཔྱིད་དང་སོ་ག་དང་།  །དབྱར་སྟོན་དགུན་ཟླ་ར་སོགས་གཉིས་རིམ་བཞིན།  །སྐད་ཅིག་ལ་སོགས་གང་ཅིག་ཡང་ཙམ་ལ།  །ཉིན་ཞག་ཟླ་བ་དུས་དང་ལོར་འགྱུར་ཏེ།  །ཉི་མ་བརྒྱད་གསུམ་དབྱར་དགུན་དབུས་སུའང་ལྡོག  །གསུམ་ནི་ལྟོ་དང་བྱང་དུ་འགྲོ་ཞེས་བྱ།  །ནམ་དང་ཉི་མ་ཕྱེད་ན་མཉམ་པ་ཡིན།  །བརྒྱད་དང་བཅུ་་ན་སྒྲ་སྒྲོགས་ཆད་པར་འགྱུར།  །དེ་ལ་དགུན་ཟླ་ཐ་ཆུང་ལ་སོགས་པ།  །ཉི་མ་བྱང་དུ་འགྲོ་བའི་དུས་ཀྱི་ཚེ།  ཤིན་དུ་རྣོ་ཚ་རྩུབ་པའི་ངོ་བོར་འགྱུར།  །རླུང་དང་ཉི་མ་དག་གི་ནུས་སྟོབས་ཀྱིས།  །ཟླ་བ་ས་ཡི་ཡོན་ཏན་ཟད་པར་བྱེད།  །འདིར་ནི་ཚ་བསྐ་ཁ་བའི་རི་སྟོབས་ཆེ།  །མི་རྣམས་ཀྱི་ནི་མཐུ་སྟོབས་ཉིན་རེ་འཕྲོག   །ཆར་དུས་ལྷོ་ཕྱོགས་འགྲོ་ཚེ་སླར་སྟོབས་བསྐྱེད།  །བསིལ་བ་ཟླ་བའི་སྟོབས་ལྡན་ཉི་མ་འབྲི།  །ཆར་བབས་རླུང་གིས་ས་སྟེང་ཚ་བ་ཞི།   །སྐྱུར་དང་ལན་ཚ་མངར་བའི་རོ་སྟོབས་སྐྱེད།  །དགུན་ཆེ་སོས་དང་དབྱར་ཆུང་སྟོན་དཔྱིད་འབྲིང་།  །དེ་ལྟར་བགྲོད་དུས་རྣམ་པ་གཉིས་བསྟན་ནས།  །ད་ནི་ནམ་ཟླ་དུས་དྲུག་སྤྱོད་ལམ་ནི།   །དགུན་སྟོད་གྲང་བས་བ་སྤུའི་སྒོ་བཀག་སྟེ།  །མེ་ཡི་སྟོབས་ལྡན་རླུང་གིས་སྦར་བས་ཡིས།  །ཟས་ཉིང་གྱུར་ན་ལུས་ཟུངས་འབྲི་བར་འགྱུར།  །དེ་ཕྱིར་དང་པོའི་རོ་གསུམ་བསྟན་པར་བྱ།  །དེ་ཚེ་མཚན་མོ་རིང་བས་བཀྲེས་གྱུར་ཏེ།  །དེ་ཡིས་ལུས་ཟུངས་འབྲི་བར་འགྱུར་བའི་ཕྱིར།  །ཏིལ་མར་གྱིས་བྱུག་ཤ་ཁ་སྣུམ་པ་བཟའ།  །ལྤགས་པའི་གོས་དང་ལྷམ་ནི་རྟག་ཏུ་བགོ  །དུགས་དང་མེ་ཉེའི་འོད་ལ་ངན་པར་བསྲོ། །ས་ཡི་ཁང་པ་ཉེས་རིམ་ནང་དུ་བསྡད།  །དགུན་སྨད་དུས་ན་ལྷག་པར་གྲང་བས་ན།  །དེར་ཡང་སྤྱོད་ལམ་འདི་ཉིད་སྤྱད་པ་བསྔགས།  །དགུན་དུས་བད་ཀན་ཁོག་ཏུ་གསོག་པ་སྟེ།  །དཔྱིད་དུས་ཉི་འོད་དྲོད་པས་མེ་དྲོད་ཉམས།  །བད་ཀན་ལྡང་ཞིང་ཐ་མའི་རོ་གསུམ་བསྟེན།  །ནས་རྙིང་སྐམ་སའི་ཤ་དང་སྦྲང་རྩི་དང་།  །ཆུ་སྐོལ་སྒ་ཐང་བཏང་ཞིང་རྩུབ་པ་བསྟེན།  །རྩོལ་བས་བཅག་དང་ཧྲིལ་ཕྱིས་བད་ཀན་བསལ།  །དྲི་ཞིམ་སྐྱེད་མོས་ཚལ་གྱི་ཉི་གྲིབ་འདུག  །སོ་ག་ཉི་མའི་འོད་ཟེར་རབ་ཚ་བས།  །སྟོབས་འཕྲོག་ཕྱིར་ན་མངར་ཡང་སྣུམ་བསིལ་བཟའ།  །ལན་ཚ་ཚ་སྐྱུར་རྩོལ་བ་ཉི་འོད་སྤང་།  །བསིལ་ཆུས་ལུས་བཀྲུ་ཆང་ཆུ་བསྲེས་པ་བཏུང་།  །རང་ཕྲའི་གོས་བགོ་བསིལ་ཁང་དྲི་བཟང་བསྟེན།  །ཤིང་གྲིབ་རྫི་ཆར་བསེར་བུ་ངད་ལྡན་བྱ།  །དབྱར་དུས་མཁའ་ལ་སྤྲིན་འདུས་ཆུ་ཡིས་བརླན།  །རླུང་དང་གྲང་བ་ས་རླང་ཆུ་རྙོག་ཅན།  །མེ་དྲོད་གནོད་པས་མེ་དྲོད་སྐྱེད་པ་བསྟེན།  །དང་པོའི་རོ་གསུམ་ཡང་དྲོ་སྣུམ་བཅས་བཟའ།  །སྐམ་སའི་ཆང་བཏུང་ཁང་སྟེང་བསིལ་སྤངས་གནས།  །དབྱར་བསིལ་འཕྲལ་དུ་ལུས་ལ་ཉི་ཟེར་གདུངས། །ཆར་དུས་བསགས་པའི་མཁྲིས་པར་སྟོན་ལྡང་།  །དེ་བསལ་ཕྱིར་ན་མངར་ཁ་བསྐ་བ་བསྟེན།  །ག་བུར་ཙན་དན་ཨུ་ཤིར་དྲི་ལྡན་པའི།   །གོས་བགོ་ཁང་པ་ཆག་ཆག་བཏབ་བར་འདུག  །མདོར་ན་ཟས་སྐོམ་དབྱར་དགུན་དྲོ་བ་བསྟེན།  །དཔྱིད་རྩུབ་སོས་དང་སྟོན་ག་བསིལ་བར་བྱ།  །དབྱར་དང་དགུན་ནི་དང་པོའི་རོ་གསུམ་བསྟེན།  །དཔྱིད་ཀ་ཐ་མའི་རོ་གསུམ་སོ་ག་མངར།  །སྟོན་ཀ་མངར་ཁ་བསྐ་བ་བསྟེན་པར་བྱ།   །སྟོན་དཔྱིད་བཤལ་སྐྱུགས་དབྱར་ག་འཇམ་རྩི་བསྔགས།  །དམན་ལྷག་ལོག་ན་དེ་དང་འཚམ་པར་དཔྱད།  །ཅེས་གསུངས་སོ།  །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་དུས་སུ་སྤྱོད་པའི་ལེའུ།
　　གསུམ་པ་གནས་སྐབས་སྤྱོད་ལམ་བསྟན་པ་ནི།  །བཀྲེས་སྐོམ་སྐྱུག་པ་གཡལ་དང་སྦྲིད་པ་དང་།   །དབུགས་གཉིད་ལུད་པ་མཆིལ་མ་བཤང་བ་འཕྱེན།  །གཅིན་དང་ཁུ་བའི་ཤུགས་ནི་འགག་མི་བྱ།  །བཀྲེས་བཀག་ལུས་ཞིག་ཉམ་ཆུང་ཡི་ག་འཆུས།  །མགོ་འཁོར་དེ་ཟས་ཡང་སྣུམ་དྲོ་ཆུང་སྦྱར།  །སྐོམ་བཀག་ཁ་སྐམ་མགོ་འཁོར་སྙིང་ནད་འབྱུང་།  །མྱོས་འགྱུར་དེ་བསིལ་ཆོག་ཐམས་ཅད་ཕན།  །སྐྱུགས་བཀག་དང་ག་འགག་དང་དབུགས་མི་བདེ།  །སྐྱ་རྦབ་དབལ་གཡན་པ་འབྲས་དང་མཛེ།  །མིག་ནད་ལུས་པ་རིམས་ནད་འབྱུང་བར་འགྱུར།  །སྨྱུང་གནས་དུད་རྣོན་ཁ་བཀང་དབོ་བར་བྱ།  །སྦྲིད་བཀག་དབང་པོ་མི་གསལ་མགོ་བོ་ན།  །གཉའ་བ་རེངས་དང་ཁ་ཡོ་འགྲམ་ཆག་འགྱུར།  །དུད་རྣོན་སྣ་སྨན་ཉི་མ་བལྟ་བས་བསལ།  །གཡལ་བཀག་དེ་འདྲ་ཆོ་ག་རླུང་འཇོམས་ཕན།  །ངལ་དུབ་དབུགས་བཀག་སྐྲན་དང་སྙིང་ནད་འབྱུང་།  །མྱོས་འགྱུར་དེར་ནི་ངལ་གསོ་རླུང་སེལ་ཕན། །གཉིད་བཀག་གཡལ་མང་ལུས་སྙོམས་མགོ་བོ་ལྕི།  །མིག་འགྲིབ་ཁ་ཟས་མི་འཇུ་ཤ་ཁུ་དང་།  །ཆང་བཏུང་བསྐུ་མཉེ་བྱ་ཞིང་གཉིད་ལོག་ཕན།  །ལུད་པ་བཀག་པས་ལུད་འཕེལ་དབུགས་མི་བདེ།  །ཤ་སྙེམ་སྐྱིགས་བུ་སྙིང་ནད་ཡིག་ག་འཆུ། །དེར་ནི་ལུད་པ་བསལ་བའི་ཆོ་ག་བྱ།  །མཆིལ་མ་བཀག་པས་སྙིང་དང་མགོ་བོ་ན།  །སྣ་ཆུ་འཛག་ཅིང་མགོ་འཁོར་ཡི་ག་འཆུས།  །དེ་ལ་ཆང་བཏུང་གཉིད་ལོག་གཏམ་སྙན་ཕན།  །འཕྱེན་བཀག་རྟུག་སྐམས་འཕྱེན་དང་བཤང་བ་འགག  །སྐྲན་གཟེར་མིག་རྟུལ་དྲོད་ཆུང་སྙིང་ནད་འགྱུར།  །བཤང་བ་བཀག་པས་ཁ་རུ་མི་གཙང་འབྱུང་།  །ཀླད་པ་ན་ཞིང་ཉ་འགྱུར་ཆམ་པས་འདེབས།  །སྔར་བཤད་ནད་འགྱུར་གཅིན་བཀག་རྡེའུ་ནད་དང་།  །ཆུ་སོ་ཕོ་མཚན་དཀུ་ནད་སྔར་ནད་འབྱུང་།  །དེ་སྨན་རེང་བུ་མས་བཏང་ལུས་བཅིང་དང་།  །བསྐུ་བྱུགས་དུག་དང་སྨན་མར་བསྟེན་པར་བྱ།  །ཁུ་བ་འཀག་པས་དེ་འཛག་ཕོ་མཚན་ན།  །ཆུ་འགག་རྡེའུ་འཕེལ་དང་མ་ནིང་འགྱུར།  །མས་བཏང་ལུས་བཅིང་བུད་མེད་སྤྱད་པར་བྱ།  །ཏིལ་མར་འོ་མ་ཁྱིམ་བྱ་ཤ་ཆང་བཏང་།  །དེ་ལྟར་ཤུགས་ནི་བཀག་དང་བཙིར་བ་ཡིས།  །ནད་ཀུན་འབྱུང་འགྱུར་འཕྲལ་དུ་རླུང་འཁྲུག་པས།  །དེ་ཕྱིར་དེ་ཡི་ཟས་དང་སྨན་སྐོམ་སྦྱར།  །ནད་གང་སྨྱུང་དགུན་བསགས་གྲང་ནད་དཔྱིད་དུས་སྦྱང་།  །སོས་བསགས་དབྱར་སྦྱང་དབྱར་བསགས་སྟོན་དུས་སྦྱང་།  །ལེགས་པར་སྦྱངས་པས་རོ་ཐོན་ནད་མེད་འགྱུར།  །རྟག་ཏུ་ཕན་པའི་ཟས་དང་སྤྱོད་ལམ་རྣམས།  །ཉམས་ལྡན་བསྟེན་པར་བྱེད་ན་ནད་མི་འབྱུང་།  །ནད་ཀུན་མི་སྐྱེ་སྐྱེས་པའང་ཞི་བའི་ཕྱིར།  །གནས་སྐབས་སྤྱོད་པའི་ཆོ་ག་འདི་ཉིད་བསྔགས།  །ཞེས་གསུངས་སོ།  །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་གནས་སྐབས་ཀྱི་སྤྱོད་ལམ་བསྟན་པའི་ལེའུ།
　　ནད་ལ་གསོ་བར་བྱེད་པའི་གཉེན་པོ་ཡི།   །འཚོ་བ་ཟས་ཀྱི་གནས་ལ་བསླབ་པ་ནི།  །ཟས་སྐོམ་ལེགས་སྤྱད་ལུས་དང་སྲོག་འཚོ་ཞིང་།  །དམན་ལྷག་ལོག་གྱུར་ནད་བསྐྱེད་འཕྲལ་སྲོག་འཇོམས།  །དེ་ཕྱིར་ཟས་སྐོམ་སྦྱོར་བ་མཁས་པ་གཅེས།  །འདི་ལ་སྤྱི་སྡོམས་ཟས་ཚུལ་ཤེས་པ་དང་།  །ཟས་བསྡམ་ཟས་ཚོད་རན་པར་བཟའ་བ་གསུམ།  །ཟས་ཀྱི་ཚུལ་ཤེས་པ་ལ་ཟས་སྐོམ་གཉིས།  །ཟས་ལ་འབྲུ་ཤ་སྣུམ་ངད་གཡོས་སྦྱར་ལྔ།   །འབྲུ་ལ་གཉིས་ཏེ་གྲ་མ་གང་བུ་ཅན།  །དེ་ལ་གྲ་མ་ཅན་གྱི་འབྲུ་ཡི་སྡེ། འབྲས་ཁྲི་ཁྲ་མ་གྲོ་ནས་སོ་བ་དང་།   །སྲེ་ད་ལ་སོགས་རོ་དང་ཞུ་རྗེས་མངར།   །རོ་ཙ་རླུང་འཇོམས་ལུས་སྟོབས་བད་ཀན་སྐྱེད།   །དེ་ལ་འབྲས་ནི་སྣུམ་འཇམ་བསིལ་ལ་ཡང་།   །ཉེས་པ་གསུམ་སེལ་རོ་ཙ་འཁྲུ་སྐྱུག་གཅོད།  །ཁྲེ་ནི་ལྕེ་བསིལ་བརྟས་བྱེད་ཆགས་གྲུགས་སྦྱོར།  །ཁྲ་མ་བསིལ་ཡང་རྩུབ་ཅིང་ཡི་གར་འཕྲོད།  །གྲོ་ནི་ལྕི་བསིལ་འཚོ་བྱེད་རླུང་མཁྲིས་སེལ།  །གང་བུ་ཅན་འབྲུ་སྲན་མ་སོན་སྲན་གཉིས།  །བསྐ་མངར་བསིལ་ཡང་སྐྱ་ལ་རྩ་སྒོ་འགག   །བད་ཀན་ཚ་བ་སེལ་ཞིང་འཁྲུ་བ་གཅོད།    །སྣུམ་སེལ་ཁྲག་མཁྲིས་ཚིལ་ལ་བྱུགས་ན་ཕན།  །རྒྱ་སྲན་བད་རླུང་ལུད་པ་དབྱུགས་མི་བདེ།  །གཞང་འབྲུམ་ཁུ་བའི་རྡེ་འཇོམ་ཁྲག་མཁྲིས་སྐྱེད།  །མ་ཤ་རླུང་འཛོམས་བད་མཁྲིས་ཁུ་སྟོབས་འཕེལ།  །
　　སྲན་ཆུང་བསྐ་མངར་ཉེས་པ་གསུམ་ག་སྐྱེད། །སྐྱོ་མས་མེ་དབལ་དྲེག་ནད་ཁྲག་ནད་སེལ།  །ཏིལ་འབྲུ་ལྕི་དྲོ་རོ་ཙ་རླུང་ནད་འཛོམས།  །ཟར་མ་མངར་ཁ་སྣུམ་འཇམ་རླུང་ལ་ཕན།  །བྲོ་བོ་བསིལ་ཡང་རྨ་འཇིག་ཉེས་གསུམ་སྐྱེད།  །འབྲུ་ཀུན་གསར་ཐོག་རློན་པ་ལྕི་བ་སྟེ།  །སྨིན་གྱུར་སྐམས་དང་རྙིང་པ་ཡང་བ་ཡིན།  །རྗེན་པ་བཅོས་དང་གཡོས་སུ་བྱས་པ་ཀུན།  །རིམ་བཞིན་ཡང་ཞིང་འཇུ་སླ་འཕྲོད་པར་འགྱུར།  །ཤ་ནི་སྡེ་བརྒྱད་སྐམ་གཤེར་ཐུན་མོང་གནས།  །རྨ་བྱ་གོང་སྲེག་སྐྱུང་ག་བྱ་ནག་དང་། །རི་བྱ་རྣམས་ནི་ཁྲོན་གྱིས་རྐོ་བའི་སྡེ།  །ནི་ཙོ་ཁུ་བྱུག་ཐི་བ་སྐྱེ་ག་དང་།  །འཇོལ་མོ་བྱིའུ་མཆུ་ཡི་རྐོ་བའི་སྡེ།  །ཤ་བ་གླ་དགོ་གཉན་དང་རི་བོང་དང་།  །གཅོད་ཀྱི་ཤ་རྣམས་རི་དྭགས་སྡེ་ཚན་ཡིན། །རྒྱ་དང་ཁ་ཤ་ར་རྒོད་ཕག་རྒོད་དང་།  །མ་ཧེ་བསེ་སྨུག་རྐྱང་དང་གཡག་རྒོད་དང་།  །མཛོ་རྒོད་ལ་སོགས་རི་དྭགས་ཆེ་བའི་སྡེ།  །སྟག་གཟིག་དོམ་དྲེད་གསའ་དང་སྤྱང་ཀི་གཡི།  །ཝ་དང་འཕར་བ་སྦྲེ་སོགས་གཅན་གཟན་སྡེ།  །བྱ་རྒོད་ཁྭ་རླག་ནེ་ལེ་བྱ་རོག་དང་།  །འུག་པ་བྱིའུ་ཁྲ་རྩལ་མཐུས་ཟ་བའི་སྡེ།   །མཛོ་གཡག་རྔ་མོང་རྟ་བོང་བ་ལང་དང་།  །སྐོམ་པོར་ལུག་ཁྱི་དང་ཕག་པ་བྱ།  །བྱི་ལ་ལ་སོགས་མི་ཡིས་བདག་བྱེད་སྡེ།  །འཕྱི་བ་བྱི་ཐུར་སྦལ་སྦྲུལ་གྲུམ་པ་དང་།  །རྨིགས་པ་རྩངས་པ་སྡིག་པ་ཁུང་གནས་སྡེ།  །ཁྲུང་ཁྲུང་ངང་ངུར་སོ་བྱ་སྐྱར་མོ་དང་།  །སྲམ་དང་ཉ་སོགས་རླན་ལ་གནས་པའི་སྡེ། །སྡེ་བརྒྱད་ཤ་རྣམས་རོ་དང་ཞུ་རྗེས་མངར།  །ཐོག་མཐའ་མར་མ་སྐམ་གཤེར་ཐུན་མོང་གནས།  །སྐམ་སའི་ཤ་རྣམས་བསིལ་ཞིང་ཡང་ལ་རྩུབ།  །རླུང་དང་བད་ཀན་ལྡན་པའི་ཚ་བ་སེལ།  །རླན་གནས་ཤ་རྣམས་སྣུམ་ཞིང་ལྕི་ལ་དྲོ།  །ཕོ་བ་མཁལ་རྐེད་གྲང་རླུང་ནད་ལ་ཕན།  །ཐུན་མོང་གནས་པ་ནུས་པ་གཉིས་དང་ལྡན།  །བྱ་གཅན་རྩལ་མཐུས་ཤ་རློན་ཟ་བ་རྣམས། །རྩུབ་ཡང་རྣོ་བས་ཕོ་བས་མེ་དྲོད་སྐྱེད། །སྐྲན་བཤིག་ཤ་འཕེལ་གྲང་བའི་ནད་ཀུན་སེལ།  །ལུག་ཤ་སྣུམ་དྲོ་སྟོབས་འཕེལ་ལུས་ཟུངས་སྐྱེད།  །རླུང་དང་བད་ཀན་སེལ་ཞིང་དང་ག་འབྱེད།  །ར་ཤ་ལྕི་བསིལ་ཉེས་ཁ་གསུམ་སློང་ཞིང་།  །བསེ་དུག་འབྲུམ་ནག་མེས་འཚིག་རྨ་ལ་ཕན།  །བ་ལང་བསིལ་སྣུམ་རླུང་ལྡན་ཚ་བ་སེལ།  །རྟ་རྐྱང་བོང་བུ་ལ་སོགས་བཤུལ་ཤ་རྣམས།  །རྣག་གཅོད་མཁལ་རྐེད་གྲང་བ་ཆུ་སེར་སེལ།  །ཕག་ཤ་བསིལ་ཡང་རྨ་འཇིག་རྨུག་པོ་སེལ།  །མ་ཧེའི་ཤ་ཡིས་གཉིད་དང་ཤ་འཕེལ་བྱེད། །གཡག་ཤ་སྣུམ་དྲོ་གྲང་སེལ་ཁྲག་མཁྲིས་སྐྱེད།  །ཁྱིམ་བྱ་བྱིའུ་ཁུ་འཕེལ་རྨ་ལ་ཕན།  །རྨ་བྱ་མིག་ནད་སྐད་འགག་རྒས་སྲ་ཕན། །གཡག་རྒོད་ཕོ་མཆིན་གྲང་སེལ་མེ་དྲོད་སྐྱེད།  །རི་དྭགས་བསིལ་ཡང་ལྡན་ཚད་སེལ་བར་བྱེད།  །རི་བོང་ཤ་རྩུབ་དྲོད་སྐྱེད་འཁྲུ་བ་གཅོད།  །འཕྱི་བ་སྣུམ་ལྕི་དྲོ་ཞིང་འབྲས་ལ་ཕན། །གྲང་རླུང་ཕོ་བ་མཁལ་རྐེད་མགོ་ནད་སེལ། །སྲམ་ཤ་རོ་ཙ་མཁལ་རྐེད་གྲང་བ་སེལ།  །ཉ་ཤ་ཕོ་བའི་ནད་སེལ་དང་ག་འབྱེད།  །མིག་གསལ་རྨ་འབྲས་བད་ཀན་བཤིག་པར་བྱེད།  །ཤ་ཀུན་ཕོ་མོའི་སྟོད་སྨད་ཕྱེད་ལྕི་སྟེ།  །སྦྲུམ་མ་ཀུན་ལྕི་རྐང་བཞི་མོ་ཡི་ཡང་།  །བྱ་རྣམས་ཀུན་ནི་ཕོ་ཡི་ཡང་བ་ཡིན།  །མགོ་དང་རོ་སྟོད་བྲང་རྒྱབ་དཔྱི་རྐེད་ལྕི།  །ལུས་ཟུངས་བདུན་པོ་ཕྱི་མ་ཕྱི་ལྕི།  །ཤ་གསར་བསིལ་ཞིང་ཤ་རྙིང་དྲོ་ལ་བཅུད།  །ལོ་ཤ་ཁྱད་པར་རླུང་གནོན་མེ་དྲོད་སྐྱེད།  །རློན་པ་འཁྱགས་པོ་བསྲེགས་པ་འཇུ་དཀའ་ལྕི།  །སྐམ་དང་བཙོས་པ་ཡང་ཞིང་འཇུ་བ་སླ།  །སྣུམ་ནི་མར་དང་ཏིལ་མར་རྐང་མར་ཚིལ།  །རོ་མངར་ཕྱི་མ་ལྕི་བསིལ་ཁོང་འཁྲུ་སྣུམ།  །རྟུལ་དང་ཕྲ་ལ་གཉེན་ཞིང་རླན་པ་ཡིན། །རྒས་བྱིས་སྟོབས་ཆུང་སྦེབ་རྩུབ་ཁུ་ཁྲག་ཟད།  །སྦྱང་བྱས་སེམས་ལས་རླུང་གིས་ཉེན་ལ་བསྔགས།  །དེ་ལ་མར་གསར་བསིལ་ཞིང་རོ་ཙ་ལ།  །མདོག་སྟོབས་སྐྱེད་ཅིང་མཁྲིས་ཚད་སེལ་བར་བྱེད།  །མར་རྙིང་སྨྱོ་དང་བརྗེད་བྱེད་བརྒྱལ་རྨ་འཚོ།  །ཞུན་མར་བློ་རྣོར་དྲན་གསལ་དྲོད་སྟོབས་སྐྱེད།  །ཚེ་འཕེལ་སྣུམ་པའི་མཆོག་སྟེ་ལས་སྟོང་བྱེད།  །ཕྲུམ་གསེར་སྤྲི་དང་ཕྱུར་བ་ལ་སོགས་པ།  །དང་ག་ལེན་ཞིང་རྟུག་སྐམས་བད་ཀན་སེལ།  །ཟོ་མར་བད་རླུང་སེལ་ཞིང་མེ་དྲོད་སྐྱེད།  །འབྲི་དང་ལུག་མར་དེ་བཞིན་གྲང་རླུང་སེལ།  །མཛོ་སྙོམས་བ་ར་བསིལ་བས་རླུང་ཚད་སེལ།  །ཏིལ་མར་ཚ་རྣོ་སྐེམ་ཤ་སྐྱེད་ཅིང་།  །སྦོམ་པོ་འབྲི་ལ་མཁྲེགས་ཏེ་བད་རླུང་སེལ།  །ཡུངས་མར་རླུང་གནོན་བད་མཁྲིས་སྐྱེད་པ་ཡིན།  །རྐང་མར་རླུང་འཛོམས་ཁུ་སྟོབས་བད་ཀན་སྐྱེད།  །ཚིལ་གྱི་རུལ་ཚིགས་ན་དང་མེས་འཚིག་དང་།  །རླུང་དང་རྣ་ཀླད་མངལ་ནད་སེལ་བར་བྱེད།  །སྐྱེས་བུ་རྣུམ་ལ་བརྟེན་པར་བྱེད་པར་རྣམས།  །ནང་གི་དྲོད་འབར་ཁོང་པ་དག་པ་དང་།  །ལུས་ཟུངས་འཕྲལ་བརྟས་སྟོབས་དང་མདོག་བཟང་ལྡན།   །དབང་བརྟན་རྒོས་སྲ་ལོ་བརྒྱ་ཐུབ་པར་བཤད། །སྔོ་ངད་སྒོག་བཙོང་ལ་སོགས་ཚ་བ་དང་།  །ཁུར་མངས་རྒྱ་ཁུར་ལ་སོགས་ཁ་བ་དང་།  །སྐམ་དང་གཤེར་བའི་གནས་སུ་སྐྱེས་པ་དང་།  །སྐམ་དང་རློན་པ་གཡོན་བྱས་རྗེས་པ་རྣམས།  །དྲོ་ཡང་བསིལ་ལྕི་གྲང་བ་ཚད་ནད་སེལ།  །བཙོང་སྒོག་གཉིད་འཕེལ་ཟས་ལེན་བད་རླུང་སེལ།  །སྒོག་སྐྱ་ལྕི་བསིལ་སྲིན་ནད་ཚད་རླུང་སེལ།  །སྒོག་སྐྱ་ལྕི་བསིལ་སྲིན་ནད་ཚད་རླུང་སེལ།  །ལ་ཕུག་གཞོན་ནུ་ཡང་དྲོ་མེ་དྲོད་སྐྱེད།  །ནར་སོན་ལྕི་བསིལ་བད་ཀན་སྐྱེད་པར་བྱེད།  །ཉུང་མ་དེ་བཞིན་དུག་ནད་མ་ལུས་བསྲུང་།  །རི་སྒོག་ཐམས་ཅད་འཇུ་དཀའ་ཟས་ལེན་ལྕི།  །ལྕུམ་དང་ཆུ་ལོས་བད་ཀན་དང་ག་འབྱེད།  །སྔོ་ཀུན་རྩ་སྒོག་འགག་ཅིང་སྨན་ནུས་འཇོམས།  །འཇུ་ཞིང་ཟུངས་སྙོམས་དྲོད་སྐྱེད་རྩ་སྦུབས་མཉེན།  །སྐ་བ་དྲོད་སྐྱེད་བཀྲེས་སྐོམ་ཉམ་ཆུང་རྨྱ།  །ནད་འཇུ་བྱེད་ཅིང་དྲི་མ་འགགས་པ་སེལ།  །ཐུག་གར་འཁྲུ་གཅོད་ཡིད་འོང་སྐོམ་པ་སེལ།  །དེ་ཕྱིར་རིམ་པས་ཉམ་ཆུང་ཁྲུས་རྗེས་བསྔགས། །འབྲས་ཆན་ལེགས་བཅོས་ཚ་བའི་སྨན་དང་བསྐོལ།  །ཡང་ཞིང་འཇུ་སླ་ཤ་ཁུ་འོ་བསྐོལ་ལྕི།   །འབྲས་ཡོས་འཁྲུ་བ་གཅོད་དང་རུས་ཆག་སྦྱོར།   །སྲུས་ཐུག་ནས་ཐུག་རྒྱུན་འགག་མེ་དྲོད་འཇོམས།  །ཡོས་དྲལ་ཡང་ཞིང་འཇམ་དྲོ་ཕོ་བར་འཕྲོད།  །རྩམ་པ་གྲང་མོ་སྟོབས་སྐྱེད་ལྕི་བ་ཡིན།  །བཙོས་ཟིན་ཡང་ལ་འཇམ་པས་འཇུ་བ་སླ།  །ཁེངས་པོ་ཐམས་ཅད་ཕོ་བའི་མེ་དྲོད་འཇོམས། །ཨ་སྦྱར་འཇུ་སླ་སྟོབས་འཕྲོད་ཉེས་ཀུན་སེལ།  །ཟན་ཆང་རླུང་སེལ་ཁོང་པའི་དྲོད་ལ་ཕན།  །ཟན་སྐམ་ཚོད་མ་རླུང་ལ་མཆོག་ཏུ་བསྔགས།  །ཟྭ་ཚོད་རླུང་འཇོམས་དྲོད་སྐྱེད་བད་མཁྲིས་སློང་།  །ལྕམ་པ་བེ་ཁུར་དྲོད་སྐྱེད་འཁྲུ་བ་གཅོད།  །དྭ་ཚོད་རླུང་འཇོམས་རྨ་སྐེམ་བད་མཁྲིས་སྐྱེད།  །སྣེ་ཚོད་མིག་ལ་གནོད་ཅིང་རྟུག་སྐམ་སེལ།  །མོན་སྣེ་དམར་པོས་ཉེས་པ་གསུམ་ག་སེལ།  །སྐྱབས་དང་ཁུར་ཚོད་བསིལ་ཏེ་ཚ་བ་སེལ།  །སྔོ་སྒའི་ཚ་བ་མཁྲིས་ཚད་མགོ་ནད་སེལ།  །སྲན་ཚོད་ཁ་ཟས་ལེན་ཞིང་བད་རླུང་སྐྱེད།   །ལུས་ཀྱི་སྣུམ་འདོན་འབྲུ་མར་མ་ཞུ་སེལ།  །ལོ་གསར་སྙོམས་ཤིང་བཤུར་བས་བད་རླུང་སྐྱེད།  །ཡུངས་དཀར་ལོ་མ་བད་མཁྲིས་འཁྲུག་པར་བྱེད།  །ལྕ་བ་མཉེའི་ཚོད་བད་རླུང་སེལ།  །ལ་ཕུག་ཚ་བ་དྲོད་སྐྱེད་འཁྲུ་བ་གཅོད།  །སྒོག་སྐྱ་སྒོག་སྔོན་ཚ་བ་རླུང་ལ་ཕན།  །ལན་ཚ་ཁ་ཟས་ཀུན་གྱི་བྲོ་བ་སྐྱེད།  །དྲོད་སྐྱེད་འཇུ་བ་སླ་ཞིང་བཤང་བ་འབྱིན།  །གཡེར་མས་རྩ་སྒོ་འབྱེད་ཅིང་བད་རླུང་སྐྱེད།  །སྒ་ཡིས་དྲོད་སྐྱེད་ཤིང་ཀུན་རླུང་ནད་འཇོམས།  །སྤོད་ཀུན་ཟས་ཀྱི་བྲོ་སྐྱེད་ཡི་གར་འོང་།  །བཏུང་བ་འོ་མ་ཆུ་དང་ཆང་ལ་སོགས།  །རིམ་བཞིན་ནད་སེལ་ལྡོག་པས་དེ་རབ་སྐྱེད།  །འོ་མ་ཕལ་ཆེར་རོ་དང་འུ་རྗེས་མངར།  །སྣུམ་ལྕི་ཟུངས་འཕེལ་མདངས་སྐྱེད་རླུང་མཁྲིས་སེལ།  །རོ་རྩ་བད་ཀན་སྐྱེད་བསིལ་ལྕི་བ་ཡིན།  །བ་ཡི་འོ་མ་གློག་རྡོལ་གཅོང་ལ་ཕན།  །རིམས་རྙིང་གཅིན་སྙི་ཡིད་གཞུངས་འཚོ་བྱེད་ཡིན།  །ར་ཡི་འོ་མས་དབུགས་མི་བདེ་བ་སེལ།  །ལུག་གི་འོ་མས་རླུང་འཇོམས་སྙིང་ལ་གནོད།  །འབྲི་ཡི་འོ་མ་བད་མཁྲིས་ནད་ལ་གནོད།  །རྟ་བོང་འོ་མ་གློ་གསོ་རྨོངས་པར་བྱེད།  །འོ་རློན་ལྕི་བསིལ་སྲིན་དང་བད་ཀན་སྐྱེད།   །བསྐོལ་ན་ཡང་དྲོ་བསྡུས་ན་འཇུ་དཀའ་ལྕི།  །བཞོས་ཐོག་འོ་མ་དྲོན་མོ་བདུད་རྩིར་མཚུངས།   །འོ་མ་སྙིང་པོ་བཏོན་པའི་ཞོ་སྐྱ་ཡིས།  །མ་སྙོམས་རིམས་ཆམ་འགྲམས་འཁྲུགས་འཁྲུ་བ་སེལ།  །ཞོ་ཀུན་རོ་དང་ཞུ་རྗེས་སྐྱུར་བསིལ་སྣུམ།   །རྟུག་སྐེམ་རླུང་ཚད་སེལ་ཞིང་ཡི་ག་འབྱེད།  །དར་གསར་བསྐ་སྐྱུར་ཡང་ཞིང་མེ་དྲོད་སྐྱེད།  །སྐྲན་མཆེར་གཞང་འབྲུམ་མར་མ་ཞུ་བ་སེལ།  །ཞོ་ཁ་ཆུ་འཁྲུ་བཤང་སླ་རྩ་སྦུབས་སྦྱོང་།   །ཕྱུར་ཁུས་རླུང་མཁྲིས་མི་སྐྱེད་བད་ཀན་སེལ།  །ཞོ་བཙོས་རྟུག་སྐེམ་ཚད་པས་འཁྲུ་བ་སེལ།   །དཀར་རྣམས་ལུག་དང་འབྲི་ཡི་དྲོ་ལ་བཅུད།  །བ་ར་བསིལ་ཡང་མཛོ་ཡི་སྙོམས་པ་ཡིན།  །ཆུ་ནི་ཆར་ཆུ་གངས་ཆུ་ཆུ་ཀླུང་ཆུ།  །ཆུ་མིག་ཁྲོན་པ་བ་ཚ་ཤིང་གི་ཆུ།  །རིམ་པས་དང་པོ་མཆོག་ཡིན་ཕྱི་མ་དམན།   །མཁའ་ལས་འབབ་པ་རོ་མི་གསལ་ལ་ཞིམ།   །འཚོ་ངོམས་བསིལ་ལ་ཡང་བས་བདུད་རྩིར་མཚུངས།  །གངས་ཅན་ལས་བྱུང་ཤུགས་དྲག་བརྡབས་པའི་ཆུ།  །ཤིན་ཏུ་བཟང་བསིལ་མེ་ཡིས་ཐུབ་པར་དཀའ།  །བརྟན་གཡུང་སྲིན་བུ་རྐང་བམ་སྙིང་ནད་སྐྱེད།  །ས་གཙང་ཉི་འོད་རླུང་གིས་ཕོག་པ་བཟང་།  །འདམ་རྫབ་ཉ་ལྕིབས་རྩ་ལོ་ཤིང་གྲིབ་ཕོག   །བ་ཚ་སྲོག་ཆགས་ཁུ་བས་ཉེས་ཀུན་སྐྱེད།  །ཆུ་བསིལ་བརྒྱལ་ངལ་ཆང་ནད་མགོ་འཁོར་སྐྱུག  །སྐོམ་དད་ལུས་ཚ་ཁྲག་མཁྲིས་དུག་ནད་སེལ།  །ཆུ་སྐོལ་དྲོད་སྐྱེད་ཟས་འཇུ་སྐྱིགས་བུ་སེལ།   །བད་ཀན་ལྟོ་སྦོས་དབུགས་མི་བདེ་བ་དང་།   །ཆམ་པ་རིམས་གསར་འཕྲལ་དུ་ཟློག་པར་བྱེད།  །བསྐོལ་གྲངས་བད་ཀན་མི་སྐྱེད་མཁྲིས་པ་སེལ།   །ཞག་གཅིག་ལོན་ནས་དུག་འདྲ་ཞེས་ཀུན་སྐྱེད།  །ཆང་ནི་མངར་སྐྱུར་ཁ་ལ་ཞུ་རྗེས་སྐྱུར།  །རྣོ་དྲོ་རྩུབ་ཕྲ་ཅུང་ཟད་ཐུར་དུ་འཁྲུ།  །དྲོད་འབར་སྤོབས་སྐྱེད་གཉིད་འཕེལ་བད་རླུང་སེལ།  །ཐལ་དྲགས་སེམས་བསྒྱུར་བག་མེད་ངོ་ཚ་འཇིག   །ར་རོ་དང་པོ་བག་མེད་གནས་ལ་གནས།  །རྣམ་རྟོག་ངན་བཅོམ་བདེ་བ་ཡིན་སྙམ་སེམས།   །ར་རོ་གཉིས་པ་གླང་ཆེན་སྨྱོན་པ་ལྟར།  །ཁ་ན་མ་ཐོ་ཚུལ་ཁྲིམས་འཆལ་བའི་གནས།  །ར་རོ་ཐ་མ་སེམས་མེད་རོ་ལྟར་ཉལ།  །གང་ཡང་མི་ཤེས་མུན་པའི་གནས་སུ་འགྱུར།  །གསར་པ་ལྕི་ཞིང་རྙིང་པ་ཡང་པ་ཡིན།   །གསར་འཇམ་ཕོ་བའི་དྲོད་སྐྱེད་འཇུ་བ་སླ།  །གྲོ་ཆང་འབྲས་ཆང་ནས་ཆང་གོང་མ་ལྕི།  །སོ་བ་སྲེ་ད་ཡོས་ཆང་ཡང་བ་ཡིན།  །ཚ་ནི་ཁྲག་མཁྲིས་བད་ཀན་སེལ་བར་བྱེད། །ཅེས་གསུངས་སོ།  །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ཟས་ཀྱི་ཚུལ་ཤེས་པར་བྱ་བའི་ལེའུ།
　　ཟས་སྐོམ་བསྡམ་བྱ་དུག་ལྡན་མི་འཕྲོད་ཟས།  །འཕྲལ་དུ་སྲོག་འདོར་ཉེས་པ་འཁྲུག་ཕྱིར་བསྲུང་།  །རྒྱལ་པོའི་ཕོ་བྲང་སྲོག་འཚོའི་སློབ་དཔོན་བཞག  །དེས་ནི་ཟས་སྐོམ་དུག་ལས་ཐར་བར་འགྱུར།   །དུག་ལྡན་ཟས་དེ་ཁ་དོག་དྲི་རོ་ལྡོག   །མེར་བསྲེགས་དུ་བ་རྨ་བྱའི་མགྲིན་འདྲ་འབྱུང་།  །མེ་ལྕེ་གཅིག་ཏུ་འཁྱིལ་ཞིང་མེ་སྟག་རྒལ།  །མཐོང་ན་བྱ་རོག་སྐད་འདོན་རྨ་བྱ་དགའ།  །ཁྱི་ལ་བྱིན་ན་ལྟོ་བ་དྲོས་ནས་སྐྱུག   །ཤ་ལ་དུག་ཡོད་དམར་ལ་ལྕགས་མི་ལེན།  །སྦོས་ཤིང་ཆང་སྦྱར་མིག་བདུགས་ཚ་ཞིང་འཁྲུག  །དུག་སྟེར་ཆག་ཚང་མི་དེ་ཁ་སྐམ་ཞིང་།   །རྡུལ་ཞིང་འདར་ལ་སྐྲག་ཅིང་འདུག་མི་ཚུགས།   །གནོང་བག་གིས་ནི་ཕྱོགས་སུ་ལྟ་བར་བྱེད།   །ཤེས་ནས་ཀུན་ལ་གནོད་པར་འགྱུར་ཕྱིར་དོར།  །ཁ་ཟས་མི་འཕྲོད་ཟོས་པས་སྦྱར་དུག་མཚུངས།   །ཞོ་མ་ལངས་དང་ཆང་གསར་མི་འཕྲོད་དེ།  །ཉ་ཡི་ཤ་དང་འོ་མ་འཕྲོད་པ་མིན།  །དེ་བཞིན་འོ་མ་ཤི་ཐོག་གཉིས་མི་འཕྲོད།   །བྱ་ཡི་སྒོ་ང་ཉ་ཡི་ཤ་མི་འཕྲོད།  །སྲན་མི་ཚོད་མ་བུ་རམ་ཞོ་མི་འཕྲོད།  །ཤ་མོ་ཡུངས་ཀར་མར་ལ་བརྔོས་པ་དང་།  །ཁྱིམ་བྱའི་ཤ་དང་ཞོ་བསྲེས་ཟ་བ་དང་།  །སྦྲང་རྩི་མར་ནག་ཆ་མཉམ་འཕྲོད་མི་འགྱུར།  །མར་གསར་འཁར་བའི་སྣོད་དུ་ཞག་བཅུ་ལས།  །སྐྱེར་པའི་མེ་ལ་ཧ་རི་ཧྲ་ཤ་བསྲེགས།   །ཅོང་ཞི་ཟོས་རྗེས་ཤ་མོ་ཁུར་བ་ཟ།  །ཞུན་མོར་ཟོས་རྗེས་ཆུ་གྲང་འཐུང་བ་དང་།  །ཤ་ལ་དཀར་སྐྱུར་རྩམ་དྲིས་ཕོག་པ་དང་།  །སྔ་མ་མ་ཞུ་ཕྱི་མ་ཟོས་པ་ཡིས།  །ཁ་ཟས་མི་འཕྲོད་ཟོས་པས་འཐབ་པ་དང་།  །མ་གོམས་དུས་མིན་ཟོས་པས་དུག་ཏུ་འགྱུར།  །རྩོལ་བཅས་སྣུམ་བསྟེན་དྲོད་ཆེ་དར་ལ་བབ།   །སྟོབས་ལྡན་གོམས་པར་ཟོས་ལ་གནོད་མི་འགྱུར།  །མི་འཕྲོད་འཕྲོད་པ་བསྟེན་ནམ་སྤང་བྱེད་ན།  །འདྲིས་གོམས་སྒོ་ནས་ཆ་ཡིས་བསླབ་པར་བྱ།  །འཕྲལ་དུ་སྤང་བསྟན་ཉེས་པ་མྱུར་དུ་འཁྲུག  །གནོད་པ་གནོད་བྱའི་བདག་ཉིད་ཉེར་གྱུར་པས།   །ཕན་མེད་གནོན་པར་བྱེད་པ་མཁས་པས་སྤང་།  །ཞེས་གསུངས་སོ།   །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ཁ་ཟས་བསྡམ་པའ་ལེའུ།
　　དུས་ཀུན་ཏུ་ནི་ཟས་ཚོད་རན་པར་བཟའ།   །ཟས་རྣམས་ལྕི་ཡང་ཚད་ལས་དཔགས་བྱ་སྟེ།  །ཡང་ལ་འགྲངས་ཤིང་ལྕི་ལ་ཕྱེད་འགྲངས་ཙམ།  །བདེ་བླག་འཇུ་སླ་ཚོད་ཟིན་ཞེས་སུ་བཤད།  །དེ་ནི་ལུས་འཚོ་མེ་དྲོད་སྐྱེད་བྱེད་ཡིན།  །གལ་ཏེ་ཟས་ཚོད་མ་ཟིན་ཆུངས་གྱུར་ན།  །སྟོབས་མདངས་མི་འཕེལ་རླུང་ནད་མ་ལུས་འབྱུང་།  །ཚད་ལས་ཐལ་ན་མ་ཞུ་བེ་སྣབས་སྐྱེད།  །དེ་ཡིས་མེ་མཉམ་རླུང་རྒྱུའི་རྩ་སྦུབས་བཀག  །ཕོ་བའི་དྲོད་ཉམས་ཉེས་པ་མ་ལུས་སྐྱེད།   །དེ་ཕྱིར་ཟས་དང་ཕོ་བའི་མེད་དྲོད་སྦྱར།  །ལྟོ་བའི་ཆ་གཉིས་ཟས་ལ་ཆ་གཅིག་སྐོམ། །ཆ་བཞི་པ་ནི་རླུང་གི་གནས་སུ་བཞག  །ཟས་ཟོས་རྗེས་སུ་སྐོམ་འཐུངས་ངོམས་དང་ཁྱབ།   །ཟས་འདྲུལ་འཇུ་ཞིང་ལུས་བརྟས་སྟོབས་འཕེལ་བྱེད།  །སྐད་འགགས་གློ་རྡོལ་ལུད་པ་ཆམ་པ་སོགས།  །ནམ་ཚོད་ཡན་ཆད་ནད་ལ་གནོད་པ་ཡིན།   །མེ་དྲོད་ཆུང་ལ་ཤ་ཟོས་ཆང་འཐུང་བྱ།  །མི་འཇུ་སྦོས་ན་ཟོས་རྗེས་ཆུ་སྐོལ་བཏུང་།  །སྐེམ་པོ་རྒྱས་པར་བྱེད་ན་ཆང་བཏུང་བྱ།   །སྦོམ་པོ་དབྲི་ལ་སྦྲང་རྩིའི་ཆུ་བཏུང་ངོ་།  །ཞོ་ཆང་དུག་སྦགས་སྦྲང་རྩི་ཟོས་པ་ལ།   །རྗེས་སུ་ཆུ་བསིལ་འཐུང་ན་ཕན་པ་ཡིན།  །ཟས་ཟོས་བར་མཐའ་ཐོག་མར་སྐོམ་འཐུངས་ན།  །ཉལ་འཆག་རན་ཞིང་སྦོམ་དང་སྐེམ་པོར་འགྱུར།  །ཉེས་པ་ལས་མི་འགྲོ་མེ་དྲོད་འབར།   །ལུས་ཡང་དང་ག་བདེ་ལ་དབང་པོ་གསལ།  །སྟོབས་ཆེ་ཤང་གཅི་འོག་རླུང་བདེ་བར་རྒྱུ།   །ཟས་ཚོད་ལེགས་པར་ཟིན་ལས་འབྱུར་བར་འགྱུར།  །ཞེས་གསུངས་སོ།  །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ཁ་ཟས་བསྲུང་བ་དང་ཟས་ཚོད་རན་པར་བཟའ་བའི་ལེའུ།
　　རྣམ་པར་མ་གྱུར་ཐ་མལ་ལུས་པོ་ལ།  །མི་ན་གནས་དང་རིང་དུ་འཚོ་བར་བྱ།  །དང་པོར་མི་ན་གནས་པར་བྱ་བ་ནི།  །ནད་ཀུན་རྒྱུ་ལས་རྐྱེན་གྱིས་བསླང་ལས་འབྱུང་།  །རྐྱེན་མེད་རྒྱུ་ལས་འབྲས་བུ་འབྱུང་མི་སྲིད།  །དེ་ཕྱིར་ནད་རྣམས་ཀུན་གྱི་རྐྱེན་སྤང་བྱ།  །དུས་དང་དབང་པོ་སྤྱོད་ལམ་རོ་ནུས་རྣམས།  །སྨན་དང་ལོག་པ་ལྷག་པས་ནད་སྐྱེད་ལ།   །ཡང་དག་སྦྱོར་བ་ནད་མེད་གནས་པའི་རྒྱུ།   །དེ་ཕྱིར་སྤྱོད་ལམ་ཟས་སྨན་རྣམ་གསུམ་པོ།  །ཡང་དག་བསྟན་པས་ནད་མེད་བདེར་གནས་འགྱུར།  །ལོ་ཟླ་འདས་ཏེ་ལུས་ཟུངས་སྟོབས་འགྲིབ་པ།  །ཚེ་ཟད་རྒས་པའི་ནད་ལས་བསྲིང་བ་ནི།  །བཅུད་ལེན་ཕན་ཡོན་གནས་རྟེན་བྱ་ཐབས་བཞི།  །ཕན་ཡོན་ཚེ་རིང་ན་ཚོད་དར་ལ་འཇོག   །ལུས་མདངས་སྟོབས་སྐྱེད་དབང་པོ་གསལ་བར་བྱེད།  །གནས་གཙང་དབེན་དགའ་བར་ཆད་མེད་པ་དེར།  །རྟེན་ནི་ཧ་ཅང་རྒས་པ་མ་ཡིན་པས།  །ཆགས་སྤང་བརྩོན་པས་གཟའ་སྐར་བཟང་དུས་འཇུག  །བྱ་ཐབས་གཙོར་བླང་ཞར་སྤྱད་རྣམ་པ་གཉིས།  །གཙོ་བོར་སྤྱད་པ་སྔོན་འགྲོ་སྔོན་གཞི་གཉིས།  །སྔོན་འགྲོ་སྣུམ་འཆོས་རྗེས་ལ་ཁྲུས་བྱས་ལ།  །འབྲས་བུ་གསུམ་དང་རྒྱམ་ཚ་པི་པི་ལིང་།  །བཅའ་སྒ་ཤུ་དག་ཡུང་བ་བྱི་ཏང་ག  །བུ་རམ་བ་ཆུ་སྦྱར་བས་ཁོང་ལ་སྦྱང་།   །མ་སྦྱངས་དྲི་བཅས་ཆོས་ལྟར་དོན་མེད་འགྱུར།  །དངོས་གཞི་སྒོག་སྐྱ་ཞུན་མར་སྦྱར་བྱས་ལ།   །ནས་སྣོད་བདུན་གསུམ་བཞག་ལ་ཞག་གྲངས་བསྟེན།  །རླུང་གི་ནད་སེལ་ཚེ་འཕེལ་བྱེད་པ་ཡིན།  །བྲག་ཞུན་ལེགས་བཏུས་གསེར་དངུལ་ཟངས་ལྕགས་རྣམས།  །ལྕགས་སྣོད་འཕྲོད་སྨན་སྦྱར་བ་རིམས་སྐྱེད་བཟའ།  །ནད་འཇོམས་ཚེ་འཕེལ་མོན་སྣེ་རྒྱ་སྲན་སྤང་།  །ཙི་ཏྲ་ཀ་དང་མར་སྦྲང་སྦྱར་བ་བསྟེན།   །ཚེ་རིང་ལུས་རྒྱས་མེ་དྲོད་འབར་བར་བྱེད།  །བ་གཅིན་སྦྱར་བསྟེན་ཤ་བཀྲ་མཛེ་ནད་སེལ།   །ཨ་རུ་བར་སྐྱུར་འབྲས་བུའི་སྨན་མར་གྱིས།  །དབང་པོ་གསལ་ཞིང་སྟོབས་སྐྱེད་རྒས་ཀ་སྲ།  །ཀུན་ལ་ནད་དང་གང་འཕྲོད་ཟས་སྤྱོད་བསྟེན།  །རུལ་སྐྱུར་སྔོ་ངད་མི་འཕྲོད་སྤང་བར་བྱ།  །ཟླ་བ་གསུམ་དྲུག་ལོ་གཅིག་འབྲས་བུ་འགྲུབ།   །དེ་མ་ལྕོགས་ན་ཞར་ལ་སྤྱད་བྱས་པས།  །གནས་སྐབས་འབྲས་བུ་འབྱུང་བར་ནུས་པ་ཡིན།   །ཞེས་གསུངས་སོ།  །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་མི་ན་བ་གནས་པར་བྱ་བའི་ལེའུ།  །