སུམ་ཅུ་ཏིག

 སུམ་ཅུ་ཏིག་གིས་མཆིན་མཁྲིས་ཚ་བ་སེལ།། ཞེས་པར། ལྕགས་ཕྲེང་ལས། སུམ་ཅུ་ཏིག་ནི་བསིལ་ལ་རྣོ།།ཞེས་དང༌། དཔག་བསམ་ལྗོན་ཤིང་ལས། སུམ་ཅུ་ཏིག་གིས་བད་མཁྲིས་སེལ།། རྨ་ཚད་གསོད་ལ་ཚད་ནད་འཇོམས།། ཞེས་པ་ལ། རིགས་ཆེ་ཆུང་གཉིས་འབྱུང༌། ཆེ་བ་མེ་ཏོག་སེར་ཤས་ཆེ་བ་རོ་ཤིན་ཏུ་ཁ་བ་དང༌།ཆུང་བ་མེ་ཏོག་དམར་ཤས་ཆེ་ལ་རོ་མི་ཁ་བའོ།། རྗེ་རང་བྱུང་པས། སུམ་ཏིག་ཆེ་བས་རྣག་རྣམས་སྐེམ།། ཆུང་བས་རྒྱུ་ལོང་ཁྲད་ནད་སྐེམ།།ཞེས་གསུངས། འཁྲུངས་དཔེར། སུམ་ཅུ་ཏིག་ཅེས་བྱ་བ་ནི།། གཡའ་སྤང་ནགས་དང་བྲག་ལས་སྐྱེ།། ལོ་མ་ལེབ་ཆུང་ཀོ་མཆུ།། པདྨ་སྤུངས་བཞིན་གདན་དུ་སྐྱེ།། ངར་པ་དམར་པོ་བ་སྤུ་ཅན།།ཚི་ཅན་མེ་ཏོག་དམར་ལ་སེར།། རོ་ཁ་ནུས་པ་ཤིན་ཏུ་བསིལ།། ཞེས་གསུངས། རྟོག་པ་བརྗོད་པ་ལས། གངས་ཅན་བྲག་ལྗོངས་འཛིན་པའི་སུམ་ཅུ་ཏིག།པད་གདན་ཟངས་གོས་གསེར་གྱི་ཕྲེང་བས་བརྒྱན།། རིགས་ལྔའི་ནུ་མོར་བཅས་པའི་བདུད་རྩི་དང༌།། མཁྲིས་ཚད་རྩད་ནས་གཅོད་པའི་གཙོ་མོ་ལགས།།ཞེས་གསུངས་པས་གཙོ་མོ་དེ་ལ་རིགས་ལྔའི་ནུ་མོ་ཡང་ཡོད་པར་ཨོ་རྒྱན་རིན་པོ་ཆེ་དང་དྭགས་པོ་ཟླ་འོད་གཞོན་ནུ་དྷརྨ་སྭ་མཱི་རྣམས་ཀྱིས་བཤད་པའི་ནུ་མོ་ལྔ་ནི།གསེར་ཏིག དངུལ་ཏིག ཟངས་ཏིག ལྕགས་ཏིག གུར་ཏིག་དང་ལྔའོ།། གསེར་ཏིག་ནི། རང་བྱུང་པས། གསེར་ཏིག་བད་མཁྲིས་རིམས་ཚད་སེལ།།ལྕགས་ཏིག་ཟངས་ཏིག་དངུལ་ཏིག་གསུམ།། རུས་ཚད་སེལ་ཞིང་མགོ་ལ་ཕན།། ཞེས་སོ།། འཁྲུངས་དཔེར། གསེར་ཏིག་ཡུངས་ཀར་སྡོང་བུ་འདྲ།།ལོ་མ་སྡོང་བུ་གདེངས་པ་ལ།། མེ་ཏོག་དམར་སེར་ཤིན་ཏུ་གསལ།། རོ་ནི་ཁ་བའི་མཆོག་ཡིན་ནོ།། རང་གི་ནུས་པས་བད་ཀན་སེལ།།གཅིག་ཐང་ནུས་པས་རིམས་གསར་འཇོམས།།ཞེས་པ་ཤས་གྲམ་ཁྲོད་ཞིང་མུ་སོགས་ལས་ཡུངས་ཀར་ལྟར་སྐྱེ་བ་འབྲས་བུ་སེར་ཞིབ་མེ་ཏོག་ཤིན་ཏུ་སེར་ལ་དམར་མདངས་ཆགས་པས་གསལ་བ་དེའོ།།དངུལ་ཏིག་ནི། འཁྲུངས་དཔེར། དངུལ་ཏིག་མེ་ཏོག་དཀར་པོ་སྟེ།། ལོ་མ་སྡོང་བུ་རབ་ཏུ་རིང༌།། རོ་ནི་ཁ་ལ་ནུས་པ་རྩུབ།།སྨན་ནད་ཐམས་ཅད་སེལ་བར་བྱེད།། ཅེས་པས་གསལ་ལོ།། ཟངས་ཏིག་ནི། འཁྲུངས་དཔེར། ཟངས་ཏིག་རྫ་ཤག་སྤང་ཤར་སྐྱེ།།སྡོང་པོ་དམར་མང་ངར་པ་མེད།། ལོ་མ་མང་སྤུངས་སྤུ་ཆུང་ཅན།། མེ་ཏོག་དམར་སེར་མགོ་མང་འཁྲིགས།། རོ་ནི་མངར་ཁ་ཅུང་ཟད་འཇམ།།རྒྱལ་པོ་གསེར་རྐེད་ཅན་ཡང་ཟེར།། རླུང་ཚད་ལྡན་པའི་མཁྲིས་ནད་སེལ།། ཞེས་པས་གསལ་ལོ།། ལྕགས་ཏིག་ནི། འཁྲུངས་དཔེར། ལྕགས་ཏིག་ཆུ་འགྲམ་སྤང་ལས་སྐྱེ།། སྡོང་པོ་ལྕགས་ཀྱི་ཐུར་མ་ལ།། ལོ་མ་སྔོ་ལྗང་རྟིང་པས་དྲིལ།།ངར་པ་ནག་ཅིང་ཕྲ་བ་ལ།། མེ་ཏོག་སྔོ་སྐྱ་རྡོ་རྗེའི་ར།། མང་བས་གར་སྐྱེ་ས་མདོག་སྔོ།། གང་བུ་ཟར་མའི་གང་བུ་འདྲ།། འབྲས་བུ་ལྕགས་ཀྱི་རིང་བསྲེལ་ཞིབ།།རོ་ཁ་རྨ་ཚད་རིམས་ཚད་སེལ།། ཞེས་པས་རྟོགས་སོ།།