༄༅། རླུང་ནད་གསོ་ཐབས།

    རླུང་ནད་ལུས་ལ་ཞེན་པ་རྣམས་འདོན་ཞིང་ལུས་ཟུངས་གསོ་བར་བྱེད་པའི་ཐབས་སྨན་མར་གྱི་སྦྱོར་བ་ནི་ཁ་རུ་ཚ་དང་པི་པི་ལིང་གཉིས་སྲང་རེ་རེ་དང་ཨ་རུ་ར་རྡོག་སུམ་ཅུ་དང་བཅས་པ་རྣམས་རྩི་བཞིན་བཏགས་པའི་ཕྱེ་མ་འབྲིའི་མར་ལ་སྦྱར་བ་བསྟེན་ན་རླུང་གི་ནད་དང་སྟོད་ཀྱི་ནད་ལ་ཕན་པ་ཡིན་ནོ།། སྦྱོར་ཚད་དེ་བཞིན་དུ་སེ་འབྲུ་དང་འུ་སུ་དང་སྒ་དང་རྩི་ཏྲ་ཀ་དང་པི་པི་ལིང་དང་བཅས་པ་ཕྱེ་མར་བྱས་ཏེ་འབྲི་མར་དང་སྦྱར་ནས་བཏང་ན་རླུང་ནད་རྣམས་མ་ལུས་པ་འཇོམས་ཤིང་ཁྱད་པར་དུ་ཕོ་བའི་མེ་དྲོད་སྐྱེད་པར་བྱེད་ཅིང་ལུས་ཀྱི་ཤ་སྐེམ་པོ་ཡོད་པ་རྣམས་རྒྱས་པར་བྱེད་པ་ཡིན་ནོ།། སྒོག་སྐྱ་སྲང་བརྒྱད་ཆུར་བསྣུར་བའི་ཁུ་བ་ལ་བུ་རམ་དང་འབྲི་མར་སྲང་དོ་དང་སྦྱར་བ་དེ་ནས་གསེབ་ཏུ་ཞག་བཅུ་གཉིས་མནན་པ་དེ་ཉིད་ཐོ་རངས་ཁམ་རེ་བསྟེན་ན་རླུང་ནད་མ་ལུས་པ་ཀུན་འཇོམས་པར་བྱེད་པའི་སྨན་མར་གྱི་མཆོག་ཏུ་བཤད་པ་ཡིན་ནོ།།སྡི་ཏི་རྡོག་པོ་བཅུ་ཁ་རུ་ཚ་སྲང་བཞི་དང་ཤིང་ཀུན་ཞོ་གང་དང་ཨ་རུ་ར་རྡོག་ཉི་ཤུ་རྩ་ལྔ་རྣམས་བུ་རམ་དང་བཅས་པ་འབྲི་མར་རྙིང་པ་དང་སྦྱར་བའི་སྨན་མར་བཏང་ན་རླུང་ནད་རྣམས་འཇོམས་ཞེས་གཡུ་ཐོག་པའི་ཕྱག་དྲེག་མ་དང༌། བྲང་ཏིའི་བཞེད་དགོངས་ལྟར་ཡིན།