༄༅།།《མ་རྒྱུད་གནས་རི་ཆེན་མོ་བྱང་བྱ་དུར་གནས་ཡིག་དྲི་མེད་ཤེལ་དཀར》མཚམས་སྦྱོར།

དེ་ཡང་བྱང་བྱ་དུར་རི་བོ་རྩེ་དགུ་ནི། སི་ཁྲོན་རྔ་བ་ཁུལ་ཟུང་ཆུ་རྫོང་གི་བྱང་ཤར་ནས་སྤྱི་ལེ་སུམ་ཅུ་ཡས་མས་ཀྱི་མཚམས་སུ་རི་ཡི་རྩེ་མོ་དགུ་བསྟར་བསྒྲིགས་ཏེ་ཡོད་ལ། རི་རྣམས་ཀྱི་རྩེ་མོ་རྫ་རི་དང་། སྐེད་ན་ནགས་ཚལ། རྩ་བར་སྤང་གིས་སྐོར་ཞིང་། བྱ་དང་བྱེའུ། བདག་མེད་ཀྱི་རི་དྭགས་སྣ་ཚོགས་བག་མེད་དུ་རྒྱུ་ཞིང་། རྩ་ཆེ་བའི་རྩི་སྨན་གྱི་རིགས་མོད་པ། ཁྱད་པར་དུ་གནས་རི་འདི་ནི་སྟོན་པ་གཤེན་རབ་ཀྱིས་བྱིན་གྱིས་བརླབས་ཤིང་། གསང་སྔགས་མ་རྒྱུད་ཀྱི་སྒྲུབ་གནས་ཉེར་བཞིའི་ནང་གསེས།“ཟིང་ཆུ་ནགས་རིང་མཁའ་འགྲོ་འུག་གདོང་།”ཞེས་མ་རྒྱུད་ལུང་གིས་བསྔགས་ཤིང་། སྒྲུབ་ཕུག་ཉམས་དགའ་བ། དུར་ཁྲོད་བག་དྲོ་བ། བཀའ་རྟགས་ངོ་མཚར་ཆེ་བ། ཞབས་རྗེས་གསལ་ལ་དོད་པ་སོགས་ངོ་མཚར་ཆེ་བའི་ལྟས་བགྲང་གིས་མི་ལོངས་བ་ཡོད།
ཐེངས་འདིར་དགའ་མལ་དགོན་ཆེན་གྱི་སྒྲུབ་གྲྭའི་དགེ་བཤེས་ཤེས་རབ་ལྷུན་གྲུབ་ཀྱིས་གཙོ་སྒྲིག་བྱས་ཤིང་། སི་ཁྲོན་མི་རིགས་དཔེ་སྐྲུན་ཁང་གིས་དཔར་དུ་བསྐྲུན་པའི《མ་རྒྱུད་གནས་རི་ཆེན་མོ་བྱང་བྱ་དུར་གནས་ཡིག་དྲི་མེད་ཤེལ་དཀར》ཞེས་བྱ་བའི་དེབ་འདིའི་ཁྱད་ཆོས་སམ་དགེ་མཚན་འགའ་བརྗོད་ན།
གཅིག་ན་གནས་རི་འདི་ཡི་གནས་སྒོ་འབྱེད་མཁན་སྐྱང་འཕགས་ཆེན་པོས་བརྩམས་པའི་བྱ་དུར་དཀར་ཆག་དང་། མཁར་ཡག་མཁས་གྲུབ་ཀྱིས་བསྒྲིགས་པའི་གནས་རིའི་ཞིང་བཀོད། སྐྱང་སྤྲུལ་ནམ་མཁའ་རྒྱལ་མཚན་གྱི་ཞལ་གསུང་ལྟར་སྒྲ་བཙུན་རྟོགས་ལྡན་གྱིས་བསྒྲིགས་པའི་དཀར་ཆག་དྭངས་འདྲེན། གཏེར་སྟོན་འོད་ཟེར་གླིང་པའི་དབྱིངས་ཉིད་མཁའ་འགྲོའི་ཞལ་ལུང་དཀར་ཆག ཧོར་པོ་དྲུང་རམས་པ་བསྟན་འཛིན་བློ་གྲོས་ཀྱིས་བྲིས་པའི་དཀར་ཆག་སྤོས་ཀྱི་གླང་པོ། དཔོན་སློབ་རྣམ་དག་འོད་ཟེར་དང་ངེས་མེད་རྣལ་འབྱོར་སོགས་སྐྱེས་ཆེན་རྣམས་ཀྱི་གནས་བསྟོད་སོགས་ཚད་ལྡན་གྱི་ཡིག་ཆ་དག་ལ་གཞི་བཅོལ་བས་ཁུངས་བཙུན། གཉིས་ན་སྲོལ་རྒྱུན་གྱི་དཀར་ཆག་ཇི་བཞིན་དབུ་ནས་ཞབས་སུ་གནས་ཀྱི་གཙོ་ཕལ་ལྟར་མཐར་ཆགས་སུ་བྲིས་པ་མིན་པར།  ཕྱི་ཡི་བསྐོར་ལམ་གྱི་འགྲོས་ལྟར་མཆོད་མཇལ་བྱེད་ས་རེ་རེ་ནས་ཚན་པ་ཕྱེས་ཏེ་མཚམས་སྦྱོར་བྱས་པས་སྟབས་བདེ། གསུམ་ན་མཆོད་མཇལ་བྱེད་ཡུལ་རེ་རེ་ལ་ཡི་གེས་ངོ་སྤྲོད་བྱས་པ་མ་ཟད་ཁྲ་ཆུང་མིག་གི་བདུད་རྩིར་སོན་པའི་ཚོན་ཁྲ་ཅན་གྱི་པར་རིས་རེ་བཀོད་པས་ཞལ་གསལ། བཞི་ན་གནས་བཤད་ཚན་པ་རེ་རེ་བཞིན་གངས་ཅན་བརྡ་སྐད་རྒྱ་ཡིག་ཏུ་གོ་སླར་བསྒྱུར་ནས་ཤན་སྦྱར་ཚུལ་དུ་བཀོད་པས་གང་ལ་གང་འཚམས་དེ་ལ་དེ་བསྟུན་གྱི་ཐབས་མཁས་པ་སོགས་སོ།།