༄༅།།《འགྲེལ་བ་དོན་གསལ》དང《ལམ་རིམ་ཟིན་བྲིས》གཉིས་པར་དུ་བསྐྲུན།

      ཉེ་ལམ་སེར་གཙུག་ནང་བསྟན་དཔེ་རྙིང་འཚོལ་བསྡུ་ཕྱོགས་སྒྲིག་ཁང་ནས་བསྒྲིགས་ཤིང་། སི་ཁྲོན་མི་རིགས་དཔེ་སྐྲུན་ཁང་གིས་དཔར་དུ་བསྐྲུན་པའི《ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོན་པར་རྟོགས་པའི་རྒྱན་ཅེས་བྱ་བའི་འགྲེལ་བ》དང《ལམ་རིམ་ཟིན་བྲིས་མཁས་པའི་ཡིད་འཕྲོག》ཅེས་བྱ་བའི་དཔེ་དེབ་གཉིས་ད་ལྟ་དངོས་སུ་སྤྱི་ཚོགས་སོ་སོར་འགྲེམ་སྤེལ་བྱས་ཡོད།
      དེ་ཡང་། ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོན་པར་རྟོགས་པའི་རྒྱན་ནི་རྗེ་བཙུན་བྱམས་མགོན་གྱིས་མཛད་པའི་ཤེར་ཕྱིན་གྱི་མདོའི་སྦས་དོན་མངོན་རྟོགས་ཀྱི་རིམ་པ་གཙོ་བོར་སྟོན་པའི་སྐབས་བརྒྱད་ཀྱི་བདག་ཉིད་ཅན་གྱི་བསྟན་བཅོས་ཤིག་ཡིན། དེའི《འགྲེལ་བ་དོན་གསལ》ནི་རྒྱ་གར་གྱི་ཤེར་ཕྱིན་སྨྲ་བའི་སློབ་དཔོན་སེང་གེ་བཟང་པོས་མཛད་པ་ཡིན་ཞིང་། མཁན་པོ་བིདྱ་ཀ་ར་པྲ་བྷ་དང་ཞུ་ཆེན་ལོ་ཙཱ་བ་བན་དེ་དཔལ་བརྩེགས་གཉིས་ཀྱིས་བསྒྱུར་ཅིང་གཏན་ལ་ཕབ་པའོ།།       《ལམ་རིམ་ཟིན་བྲིས་མཁས་པའི་ཡིད་འཕྲོག》ནི་དགེ་བའི་བཤེས་གཉེན་ཆེན་མོ་རྗེ་ལམ་རིམ་པ་ངག་དབང་ཕུན་ཚོགས་ཀྱིས༡༩༦༧ལོར་མཛད་པ་ཡིན་ཞིང་། གཙོ་བོར་སྐྱེས་བུ་ཆུང་ངུའི་ཆོས་སྐོར་དང་ལྷག་པར་བཤེས་གཉེན་བསྟེན་ཚུལ་ཤིན་ཏུ་གལ་ཆེན་ཏུ་མཐོང་ནས་ཁ་གསལ་གོ་བདེའི་ངང་གསུངས་ཡོད་དོ།།