མཚོ་སྔོན་མི་རིགས་སློབ་ཆེན་གྱིས་ཚོགས་ཆེན་བཅུ་དགུ་པ་རྒྱལ་ཁའི་ངང་ཚོགས་པར་རྟེན་འབྲེལ་ཞུས།

     ཏང་གི་ཚོགས་ཆེན་བཅུ་དགུ་པ་རྒྱལ་ཁའི་ངང་ཚོགས་པར་རྟེན་འབྲེལ་ཞུ་བ་དང་ཚོགས་ཆེན་བཅུ་དགུ་པའི་དགོངས་དོན་ལ་སློབ་སྦྱོང་གཏིང་ཟབ་བྱེད་པ། མི་རིགས་མཐུན་སྒྲིལ་གྱིས་སློབ་རའི་འཛུགས་སྐྲུན་བྱ་བ་ལ་སྐུལ་འདེད་གཏོང་བ། སློབ་ཆེན་སློབ་མའི་ཆབ་སྲིད་བསམ་བློའི་སློབ་གསོའི་བྱ་བ་ལ་ཤུགས་སྣོན་བྱེད་པ་བཅས་ཀྱི་ཆེད་དུ། སྤྱི་ཟླ་བཅུ་པའི་ཚེས་ཉི་ཤུ་ཉིན་གྱི་ཕྱི་དྲོར། མཚོ་སྔོན་མི་རིགས་སློབ་ཆེན་གྱིས་སྐབས་བརྒྱད་པའི་མི་རིགས་ཤེས་བྱའི་འགྲན་སྡུར་གྱི་མཇུག་མཐའི་འགྲན་སྡུར་སྤེལ།
     ཟླ་བ་གཅིག་ལྷག་རིང་གི་ཐོག་མའི་འགྲན་སྡུར་དང་བསྐྱར་འགྲན་སོགས་ཀྱི་འགྲན་སྡུར་གོ་རིམ་བརྒྱུད་དེ། རྩེ་གྲས་སུ་ཚུད་པའི་གྲ་སྒྲིག་སློབ་གསོའི་སློབ་གླིང་དང་སྒྱུ་རྩལ་སྡེ་ཁག དངོས་ལུགས་དང་གློག་རྡུལ་ཆ་འཕྲིན་སློབ་གླིང་། འཛུགས་སྐྲུན་ལས་གཞིའི་སློབ་གླིང་། སྐྱེ་ཁམས་སློབ་གླིང་། ཆབ་སྲིད་སློབ་གླིང་། ཡུལ་སྐོར་སློབ་གླིང་། དཔལ་འབྱོར་སློབ་གླིང་། བཟོ་ཚོང་སློབ་གླིང་བཅས་བསྡོམས་པས་འཐུས་ཚབ་རུ་ཁག་དགུ་མཇུག་མཐའི་འགྲན་སྡུར་དུ་ཚུད། འགྲན་སྡུར་གྱི་ནང་དོན་ལ་མི་རིགས་ཤེས་བྱ་ཡོད་པར་མ་ཟད། ད་དུང་ཚོགས་ཆེན་བཅུ་དགུ་པའི་སྙན་ཞུའི་ནང་དོན་བསྲེས་པས་ཚོགས་ཆེན་བཅུ་དགུ་པའི་དགོངས་དོན་དྲིལ་སྒྲོག་གི་ནུས་པ་བླ་ལྷག་ཐོན། འགྲན་སྡུར་གྱི་རྣམ་པ་ལ། མྱུར་ལན་འདེབས་པ་དང་འདེམ་གསེས། བསྡུས་ལན་འདེབས་པ་བཅས་རྣམ་པ་གསུམ་འདུ་ལ། རི་མོ་དང་གླུ་དབྱངས། བརྙན་ཐུང་སོགས་ཀྱི་རྣམ་པའི་འདྲི་གཞི་ཡང་མང་པོ་བཀོད་དེ། འགྲན་སྡུར་ལ་སྔར་ནས་མེད་པའི་སྤྲོ་སྐྱིད་ཀྱི་མཁའ་དབུགས་གསར་བ་ཞིག་བསྣན་འདུག
     ཛ་དྲག་གི་འགྲན་སྡུར་གོ་རིམ་བརྒྱུད་དེ། མཐར་དཔལ་འབྱོར་སློབ་གླིང་ལ་ཨང་དང་པོ་དང་དངོས་ལུགས་དང་གློག་རྡུལ་ཆ་འཕྲིན་སློབ་གླིང་ལ་ཨང་གཉིས་པ། སྒྱུ་རྩལ་སྡེ་ཁག་ལ་ཨང་གསུམ་པ་བཅས་ཀྱི་བྱ་དགའ་ཐོབ་ལ། འཐུབ་ཚབ་རུ་ཁག་གཞན་པ་དྲུག་ལའང་ཕུལ་བྱུང་བྱ་དགའ་གནང་། སློབ་གྲྭའི་འགོ་ཁྲིད་ཀྱིས་བྱ་དགའ་ཐོབ་པའི་རུ་ཁག་ལ་གཟི་བརྗིད་དཔང་ཡིག་དང་བྱ་དགའ་སྤྲད།
     མི་རིགས་ཤེས་བྱའི་འགྲན་སྡུར་ནི་མཚོ་སྔོན་མི་རིགས་སློབ་ཆེན་གྱི་མི་རིགས་མཐུན་སྒྲིལ་འཕེལ་རྒྱས་དྲིལ་སྒྲོག་གི་ཕྲེང་སྟར་བྱ་འགུལ་གྲས་ཀྱི་གཅིག་ཡིན་ལ། དེ་ནི་མཚོ་སྔོན་མི་རིགས་སློབ་ཆེན་གྱི་སློབ་མ་རྣམས་ཀྱི་ཆབ་སྲིད་བསམ་བློའི་སློབ་གསོའི་ཡོངས་ཁུངས་གཙོ་བོ་རུ་གྱུར་ཡོད། ཐེངས་འདིའི་མི་རིགས་ཤེས་བྱའི་འགྲན་སྡུར་སྤེལ་བ་ནི། ཚོགས་ཆེན་བཅུ་དགུ་པ་རྒྱལ་ཁའི་ངང་ཚོགས་པར་རྟེན་འབྲེལ་ཞུ་བའི་བྱ་འགུལ་ཡིན་པ་མ་ཟད། ཚོགས་ཆེན་བཅུ་དགུ་པའི་དགོངས་དོན་སློབ་སྦྱོང་གི་སློབ་གསོ་བྱ་འགུལ་ཡང་ཡིན་པས་དོན་སྙིང་གལ་ཆེན་ལྡན།